LOOMƐITIƐ 9 - DEƲE NIINƐI

Gala ge laa wuloa Yezɔitiɛ vaa zu

¹ Gà ƃɔɛzu ga tɔyã è ɣɛ velei gè la ga Kolai maa nu. Gɛ̀ lɛ zɛɛ ʋaa wosu. Nà ki‐gaa‐ziɛi ɣa mazeele woo ʋeezu Gala baa ŋinɛgi na gaa‐ƃai zaala zu ga

² maa‐wõi wala loovɛ mà zìi wala yíɛ zuuli kɛlɛ gɛ lɛ leveni.

³ Ƃɔvɛlaale gɔ̀ zoo gè wõi ɣɛ ƃalaa ga nà kagi koto vɛɛ bà pɔ̀ɔ laa wulo Kolai maʋai va bàitiɛ ʋaa ma, na ɣa ga niitiɛ gá tiɛni gé mazii ƃɔgɛi.

⁴ Natiɛ ta ga Yezɔitiɛ. Ta ɣa Gala ge te ɣɛɛ ga dea. Ta ɣa Gala na saala‐malai te ʋaa ma, ná deʋei ƃɔga ná tɔgi te ʋeeai te ʋaa ma. Gala‐feliai ƃɔga Gala na ki‐togi ta ɣa te ga te wo.

⁵ Ta ɣa te mama gwɔlɔni te ɣɛni ga numai niitiɛ Gala ge yee ƃadoni tiɛ ga ná numaa. Na ɣa ɣɛɛ na ta ɣa Kolai wuloa te mazii zu nu ƃuse ŋeteai mavele ma. Galagi nii é ŋɛni ɣaazɔ maazu daa‐maa‐lɛɛ ɣa wo da wɔ. É ɣɛ ŋɛ na.

⁶ Ɛ́ lɛ ga Gala goi ʋɛŋɛ ɣa é boga. Ƃɔvɛlaale su‐wulo‐zu lɛ ga taitiɛ ɣaazɔ te wuloa Yezɔi manu zuwui zu te pɛ ka te ga Yezɔitiɛ.

⁷ Su‐wulo‐zu lɛ wɔnɔ ga nui pɛ ka ga Eeƃɔlɔhɛ̃ɛ dea te ɣɛɛ ʋai ma ga Eeƃɔlɔhɛ̃ɛ manu zuwua. Kɛ̀ Gala ge ɣɛni Eeƃɔlɔhɛ̃ɛ ma, “Aize zaala zu ɣa daa‐zei ka zei la è manu zuwuitiɛ va.”

⁸ Nii zu‐wulo‐zu ɣa ga Eeƃɔlɔhɛ̃ɛ deai niitiɛ te ɣai nu ƃuse ŋeteai mavele ma ta lei tɔ ɣɛ ga Gala deaitiɛ. Kɛ̀ niitiɛ te ɣai Gala na ki‐togi zu ta ɣa te ga Eeƃɔlɔhɛ̃ɛ manu zuwuitiɛ.

⁹ Ƃɔvɛlaale nii ɣa é ga ki‐togi zu woi. Gala ge ɣɛni tea, “Siɛgi ɣa ziiti na vɛ laa yɔɔzu, gà va wulu. Na ɣa ɣɛɛ na Seelɔ ɣa sa a zunu luu maa zɔlɔ wo.”

¹⁰ Tii gɛ lɛ ŋɛni nɔ ga na. Luibɛka ko siɣini. Zunu gila pɔ nɔ ɣa é duitiɛ ɣaani ba. Zunui na ɣɛni ga de mama gwɔlɔ Aize.

^11-12 Velei ƃalaa tɛ lɛ ŋɛni dɛ te ɣaani la ɔ́ nɔ ɣɛ ga te faa ta nɛpɛ kɛ mayowũ ƃaa mavagɔ, Gala ge ɣɛni Luibɛka ma, “Liɛ ɣelei ɣa ɣɛ ga leɣe ɣelei wu nu.” Gala ge nii ɣɛɛni ga ná zii‐ma‐ziɣi leʋei yɛ laani laa‐zu. Zii‐ma‐ziɣi ʋai nii maʋaa ziɣiai fai nii la yá nɛɛ Gala bɛ, ɛ́ lɛ ga nu ƃuse na tii‐ɣɛɛ vele.

¹³ È ɣɛ velei ponɛi la Gala kɔlɔi zu Gala giɛ ɣɛ tea, “Gè Yeekɔ wõini, kɛ̀ Iisɔɔ vɛlɛ lɛ bɛ̀.”

¹⁴ Zɛƃɛ mu ka sa da bo su? ?Da bo ga Gala fuuluvɛ? Ɛ́ lɛ wɔlɔ‐wɔlɔ ŋɛ na!

¹⁵ Ƃɔvɛlaale é ɣɛni Mooze ma, “Nui nii a nɛɛ bɛ̀ towa ga gaazu‐maa‐wõi ɣa. Nui nii a nɛɛ bɛ̀ towa gà wõi.”

¹⁶ Na ma maʋai lɛ wulozu nu ƃuse na deʋe zu ɔ́ nɔ ɣɛ ga ná tii‐ɣɛɛ vele. Kɛ̀ towaa ziɣi Gala na gaazu‐maa‐wõi‐ɣai la.

¹⁷ Ƃɔvɛlaale Gala kɔlɔi ɣa bosu ga Gala ge ɣɛni Feeloo ma, “Gè è wu ziɣia nà gaa‐ƃai ɣaa‐wodo ʋaa ƃɔɔƃɔɔgi ma è maʋai maazu, kɛɛ ʋaa ma nà daa‐zeigi wo ga seeze woo zuu pɛ su.”

¹⁸ Nii mavele ma nui nɛpɛ a nɛɛ Gala bɛ towa a gaazu‐maa‐wõi ɣa, nii nɛpɛ wɔnɔ a nɛɛ bɛ́ é manui wui zu ƃɔlɔ.

Gala na zii‐ɣaa‐wãlai ta ná gaazu‐maa‐wõi‐ɣai

¹⁹ Yà sa yà gàa‐zaɣa kɛ yìɛ ɣɛ mà, “Zɛƃɛ mu ka é kɛɛ Gala giɛ dɛ nɔ nu zɔ siɣi faa zu? Ƃɛ ɣa a zoo é kpaa wulo zii‐ma ʋai zu?”

²⁰ Yài è ga nu ƃuse, è lo‐su ɣa ga minɛ è vaazu Gala daa woo zu loozu? ?Ŋɛnii nii kpɛtɛi towaa bo kpɛtɛ nui ma yíɛ ɣɛ ma, “Zɛƃɛi é kɛɛ è kpɛ̀tɛ vele ɣɛɛ ŋɛ ni?”

²¹ ?Gaa‐ƃaa lɛ diɣi‐lo nui ya ná penai maazu ga é pena zii ɣilagi nɔ maƃuu ta ƃɛtɛ ga ŋɛni yãka vapa, na ɣa ɣɛɛ na é zɔi ƃɛtɛ nɔ tii nii ʋaa ma maʋaa maa lɛ viini?

²² Kilaa ʋaa zu ani Gala gɔ ɣɛ na wõizu é ná zii‐ɣaa‐wãlai lɛ é ná gaa‐ƃai maʋaa wulo kɛnɛ ma, ɔ̀ kɛ le? Kilaa ʋaa zu ani ɔ́ zii‐lɔɔ wala wulo na zii‐ɣaa‐wãla ŋɛni yãkai niitiɛ ya te ƃɛtɛi ga te zu ŋala‐ŋala,

²³ yiɛ nii ɣɛ ga é ná saala‐malai zu ƃakpa ʋai lɛ gaazu‐maa‐wõi‐ɣaa ŋɛni yãkaitiɛ ʋaa ma, niitiɛ é te maʋai yɛni ná luo é te ɣavele ƃɛtɛ saala‐malai ʋaa ma.

²⁴ Da wɔ ka de ga gaazu‐maa‐wõi‐ɣaa ŋɛni yãkai niitiɛ. De liligɛi, da wɔ dɛ lɛ nɔ wuloni Dusiitiɛ zaama, de taniga wuloai ƃalaa pɛ zii ƃalaagitiɛ zaama.

²⁵ È ɣɛ velei Gala ge bosu la Hozeea na kɔlɔi zu Gala kɔlɔi ʋaa va yiɛ ɣɛ tea, “Niitiɛ tɛ lɛ ŋɛni ga nà numaa, gà te lili ga nà numaa, nii wɔgi lɛ ŋɛni ga ẁõila nu gìɛ tili ga ẁõila nu.”

²⁶ “Tɔwɔ vɛ ƃɔɔƃɔɔgi nɔ gè boni na te ma ga ‘Wɛ lɛ ga nà numaa’, ná nɔ ɣa gà te lili na ga dèa, nài gè ga ʋululai maƔalagi.”

²⁷ Aizeea faa woni ga woo maa zeezea é vile Yezɔi va yiɛ ɣɛ tea, “Velei ƃalaa Yezɔi deaitiɛ ta lama da te ɣɛ ga yuwu mayãazegi liigo, te ta wolo nɔ yá valo te zaama.

²⁸ Ƃɔvɛlaale de maliɣii ɣa vaazu faa‐wo gaa levezu zui zu ga gaa‐ƃaa é kɛ ga maa ʋilea.”

²⁹ È ɣɛ velei Aizeea zɛni la ná luo é bo yíɛ ɣɛ tea, “È ɣɛ kɔɔ ƃɔgi maliɣii lɛ gé leaitiɛ yɛni na, de maʋaa ɔ́ ɣɛ ga Saadɔ̃ lai zu veaitiɛ ɣavele de maʋaa wulo ga Gɔmɔɔla lai zu veaitiɛ.”

Tele‐bo tuoi lɔɔ ɣa vile zee‐la‐ma va

³⁰ Zɛƃɛ ɣa mu da bo? Da bo ga zii ƃalaagitiɛ mugi tɛ lɛ vileni tele‐bo tuo ɣaa‐ziɛ ʋaa wulu ta ɣa te tele‐bo tuoi ɣalama maa zɔlɔ woga. Na ɣa ga tele‐bo tuoi nii maa zɔlɔ wogɛi zee‐la‐ma zaala zu.

³¹ Kɛ̀ to mu Yezɔitiɛ te yɛga tele‐bo tuoi nii mavele ɣaa ziɛzu maʋaa ziɣiai Gala na tɔgi la tɛ lɛ ziɛni tɔgi zu ʋaa‐ɣɛɛ ʋaa wu.

³² Zɛƃɛi é kɛ tɛ lɛ ná maa zɔlɔ woni? Zɔi é kɛ nà yiɛ ɣɛ tɔ ga tɛ lɛ ná mavele ɣaa ziɛni zee‐la‐ma zaala zu, kɛ̀ te ɣɛni maʋai ɣɛɛzu è ɣɛ tele‐bo tuoi ɣa ɣɛ ga ŋɛnii maʋaa ɣa ziɣi tii‐ɣɛɛ ʋaa la. Te ɣalini te loo kali kwɔtii ma.

³³ È ɣɛ velei ponɛi la Gala kɔlɔi zu mawoi ga “A wɛlɛ! Gà kwɔti laazu Zaayã veaitiɛ zaama nii numaa ta ɣali da. Tɔ ga kwɔtii yá kɛ te loo. Tɔwɔ nui dái ga maʋai ɛ́ lɛ wũfega.”