LOOMƐITIƐ 8 - DEƲE NIINƐI

Da ʋalolai ɣa Gala baa ŋinɛgi ya

¹ Na ma faa‐yɛ‐ma ʋaa nɛpɛ gɛ lɛ niitiɛ va ta Ziizɛ Kolaini te su ɣilekpu.

² Bɔvɛlaale Gala baa ŋinɛgi nii yá zɛʋu ʋɛ ná tɔgi é kùloa faa yowũ na tɔgi yee wu ta saa gé ɣɛɛ vele ma su ɣilekpu gá Ziizɛ Kolai.

³ Gala na tɔgi nii nu ƃuse lɔtɔi kɛɛ maʋaa ʋii ƃɛɛ, fai ɛ́ lɛ ŋɛni zoosu ɔ́ kɛ Gala ge kɛɛ dúi leve pele ma bɛ́ ga é ɣɛ ga faa yowũ‐ɣɛɛ nu ƃusei ɣavele, na ɣa ɣɛɛ na é ɣɛ ga zalaɣa faa yowũ ʋaa ma. Nii mavele ma é pele wuloni ga faa yowũ zu ŋala‐ŋala da nu ƃuse ŋeteai zu,

⁴ kɛɛ ʋaa ma nii Gala na tɔgi boga ga é ɣɛ tɔwɔ é pele ma, é leve ma de luo velei zu. Na ɣa ga dai dɛ lɛ ziɛzu ga nu ƃuse yii‐ma ʋai, kɛ̀ to, mu diɛ ziɛ ga Gala baa ŋinɛgi yii‐mai.

⁵ Ƃɔvɛlaale taitiɛ te ŋeteai ɣɛɛzu nu ƃuse yii‐mai mavele ma ta ɣi‐gaa‐ziɛi ɣa nu ƃuse ŋeteai zu ŋɛniitiɛ va. Kɛ̀ taitiɛ te ŋeteai ɣɛɛzu Gala baa ŋinɛgi yii‐mai mavele ma ta ɣi‐gaa‐ziɛi ɣa Gala baa ŋinɛgi yaa ŋɛniitiɛ va.

⁶ Nu ɣi‐togai nu ƃuse yii‐mai va tɔ ga saa. Kɛ̀ nu ɣi‐togai Gala baa ŋinɛgi va tɔ ga zɛʋu ta zii‐laa.

⁷ Ƃɔvɛlaale nui ki togɛi nu ƃuse yii‐mai va tɔ ga Gala kɔɔ yɔ̃wɔ. Manui lɛ kolo wuloa Gala na tɔgi laa woi vɛ. Ƃɔɔƃɔɔ su ɛ́ lɛ zooga ɔ́ kɛ.

⁸ Tɔwɔ taitiɛ te ŋeteai ɣɛɛzu nu ƃuse yii‐mai yee wu tɛ lɛ zooga tɔ Gala zii‐laa ʋaa ɣɛ.

⁹ Kɛ̀ wɛ lɛ nu ƃuse yii‐mai yee wu. Wa Gala baa ŋinɛgi yee wu, ani nɔ Gala baa ŋinɛgi ɣa wo yii zu ga ƃɔɔƃɔɔ su. Nui nɛpɛ Kolai vaa ŋinɛgi lɛ zii zu ɛ́ lɛ ga Kolai na dɔ.

¹⁰ Kɛ̀ ani Kolai ɣa wo yii zu, velei ƃalaa wo malɔtɔi ɣa zaa la faa yowũ zaƃu zu, wo yɛʋui ɣa yɛ wo ya tele‐bo tuoi mazaƃu ma.

¹¹ Ani nui nii é Ziizɛ wu ziɣini saa ya báa ŋinɛgi ɣa yɛ na wo yii zu, nui é Kolai wu ziɣini saa ya towaa zɛʋu loo wa zaa lɔtɔi zu ƃalaa pɛ báa ŋinɛgi nii zaala zu yá yɛ wo yii zu.

¹² Na ma nà numaa, kui ɣa de ma. Kɛ̀ ɛ́ lɛ ga nu ƃuse yii‐mai mawui. Ɛ́ lɛ ga kui ɣa de ma ga de ŋeteai ɣɛ nu ƃuse yii‐mai mavele ma.

¹³ Ƃɔvɛlaale wa ŋeteai ɣɛɛ na nu ƃuse yii‐mai mavele ma, wa za. Kɛ̀ ani wo ɣɛɛ‐zɔgitiɛ wo kɛɛ nu lɔtɔi zu wa te zu ŋala‐ŋala na Gala baa ŋinɛgi zaala zu, wo yɛʋui ɣa yɛ wo ya.

¹⁴ Toku ge zei ga taitiɛ ɣaazɔ Gala baa ŋinɛgi pele wulozu ga tiɛ ta ga Gala dea.

¹⁵ Gala baa ŋinɛgi lɛ vaani wo wɔ ga é wo vili duola zu wo loo wulu duo‐luo ŋeteai zu. Kɛ̀ é vaani ga é wo ɣɛ ga Gala dea. Da yɛ na bosu ga woo wala diɛ yɛ tea, “Aba”, na ɣa ga “Kèea,”

¹⁶ Gala baa ŋinɛgi tɔ ɣagi ɣa yá vɛɛ da ɣi‐gaa‐ziɛi va tiɛ seele woo ʋe ga da ga Gala dea.

¹⁷ Ani tɔwɔ da ga Gala dea, de ɣɛɛ ɣa na ga Gala kweligi kɛɛ vea. Da vɛɛ Kolai va da tiɛni de ɣɛ ga Gala kweligi kɛɛ vea, ani da vɛɛ na ba da tiɛni de laa‐nɔwɔ wo kɛɛ ʋaa ma de vɛɛ ba da tiɛni saalai la de ma ƃalaa pɛ.

Ná yee luo ʋele zaala‐malai

¹⁸ Gà ɣi gaa ziɛzu ma ga siɛgi nii zu laa‐nɔwɔ‐wogitiɛ tɛ lɛ kuloni bu ga nu te wo kɔ̃ɔ saala‐malai ma maʋaa ɣaa vaazu wodozu ga diɛ.

¹⁹ Ƃɔvɛlaale nii é ga Gala deaitiɛ te mavaa‐wulo ʋai kɛnɛ ma, Gala kpɛtɛ ŋɛnii zɔitiɛ ta ná maa kpowũsu tiɛ ná maa‐wõi‐wõi kulo.

²⁰ Su‐wulo‐zu ɣa ga Gala ge kpɛtɛ ŋɛnii zɔitiɛ lɔɔni faa yãka yee wu. Ɛ́ lɛ ga te siɣini yii ma ga te ɣɛ na, kɛ̀ tɔ ga nui nii yii‐ma é te ɣɛɛ faa yãka yee wu é te ɣi‐to‐su ɣɛ ma.

²¹ Ƃɔvɛlaale Gala kpɛtɛ ŋɛnii zɔitiɛ ta vaazu wulozu duolai zu, na ɣa ga duolai nii su‐wulo‐zu ga te zu ŋala‐ŋala. Na ɣa ɣɛɛ na wɔɔlɔlai nii saala lai ma é ga Gala deaitiɛ ta wɔɔlɔlai te na maa zɔlɔ wo.

²² De kwɛ̃ni ga Gala kpɛtɛ ŋɛnii zɔitiɛ ɣaazɔ te zei‐zu ɣɛɛvɛ ɣile tiɛ ƃala daa‐nɔwɔ‐wo gá é yɛga su zai ŋɛ ni ziitia.

²³ Ɛ́ lɛ nɔ ga Gala kpɛtɛ ŋɛnii zɔitiɛ, kɛ̀ dai de ɣɛɛ, ga nu maa wũ de wulo Gala baa ŋinɛgi zu nu ma a da ƃalasu ga wuu zu vele diɛ ná maa kpowũ ga Gala ge de ɣɛ ga dea, na ɣa é ga de lɔtɔi ɣaazɔ wũ‐maa‐wogai.

²⁴ Ƃɔvɛlaale de valovɛ ki‐togi nii zu. Ki‐togi nu ɣa ɣɛ su ʋai vɛtɛsu ɛ́ lɛ ga ki‐to. Toku ge zei ga nu ɣa leve ɣɛ lé é ɣi gaa ziɛ ŋɛnii nii vɛtɛ faa ma, tɔwɔ manui yiɛ pɛtɛ.

²⁵ Kɛ̀ ani nii dɛ lɛ pɛtɛsu de ɣi ka ɣɛ na pɛtɛ faa va, da ɣɛ ná maa kpowũsu ga zii‐lɔɔ ga de pɛtɛ.

²⁶ Vele nɔ na Gala baa ŋinɛgi ƃɔsu la de va da zobo‐bala‐bɛ ʋai ma. Ƃɔvɛlaale dɛ lɛ kwɛ̃ni ga velei maa nɛɛ de Gala feli la. Kɛ̀ Gala baa ŋinɛgi tɔ ɣagi tɔ de vaa ʋaa wosu ga velei de ƃalasu la fai nii ɣa dɛ lɛ bo pele ɣaa ga laa woo.

²⁷ Na ɣa ɣɛɛ na nui é nu ƃuse yii zu ʋeelasu é kwẽni ga nii é baa ŋinɛgi ɣigi zu, na ɣa ga Gala baa ŋinɛgi ɣa Gala na dɔ numaitiɛ vaa ʋaa wosu ga Gala zii‐ma vele.

²⁸ De kwɛ̃ni ga fai ɣaazɔ zu Gala ka tii ɣɛɛzu faa vagɔ ʋaa ma niitiɛ zaama te wõini la. Na ɣa ga niitiɛ yá te lili é ɣɛ velei é deʋea la.

²⁹ Ƃɔvɛlaale numai niitiɛ é ná yɛni ná luo é te wɛ̃ɛ, é zɛni ná luo ƃalaa wɔnɔ é deʋe ga te ɣɛ ga dui ɣavele, kɛɛ ʋaa ma dui ɣe ga duu‐ɣaa maa wũgi kaalaa lamaa zaama.

³⁰ Tɔwɔ niitiɛ é ná ɣɛni ná luo é te maʋai leʋe ta nɔ wɔnɔ é te lilini. Taitiɛ wɔgi é te lilini, é kɛɛni te ɣɛɛ‐zɔ yowũi lɛ vɛɛni te va ga faa. Niitiɛ wɔgi ɛ́ lɛ te ɣɛɛ‐zɔ yowũi vɛɛni te va ga faa é saala laani te ma.

Gala na wõilai

³¹ Zɛƃɛ ɣa sa da bo fai nii zu? Ani Gala ka de wulu, ƃɛ ɣa a faa ɣe ga diɛ?

³² ?Nui nii ɛ́ lɛ ɣi kpaani kpɔɔ lui ma, kɛ̀ to mu é ɣi kuloa maʋaa zu de pɛ de maʋaa ma, zɛƃɛ ŋɛni ɣa ɛ́ lɛ pɛɛ ba ɔ́ fe de ya?

³³ Nui nii Gala ge yee ƃadoga ba, ƃɛ ɣa yá kɛɛ‐zɔ yowũ ta nɛpɛ bo? Gala ka yá nu ɣɛɛ‐zɔ yowũi lɛ vɛɛ ba ga faa.

³⁴ Ƃɛɛ mu ka sa yá nu ɣɛɛ‐zɔ yowũi vɛɛ ba ga faa? Ziizɛ Kolai nii é zaani ɛ́ lɛ kwɛ̃ɛni na va é wu ziɣi saa ya é zei ga Gala zee za‐su vele, towa é de vaa ʋaa wosu ga ƃɔɔƃɔɔ su.

³⁵ Ƃɛ ɣa yá de wulo Kolai na wõilai yee wu? Faa ƃoei, maa‐wõi, kpɔɔla, pulu, tete, faa ƃoei a ɣɛ zɛlɛni nu wũ maazu é vɛɛ boa zɔkpɔ va, te ta nɛpɛ ka de wulo Kolai na wõilai yee wu?

³⁶ Ponɛvɛ ŋɛ ni Gala kɔlɔi zu, “Ta luo gé vaazu é mazaƃu zu, Ta gé ziɣizu ga baalagitiɛ te vaazu te vaazu.”

³⁷ Kɛ̀ na pɛ ge ɣɛɛvɛ da ɣa de wala ɣee ɣaa ƃai fai nii ɣaazɔ zu nui nii é de wõiya sáala zu.

³⁸ Ƃɔvɛlaale dàavɛ la ga é ɣɛni ga saa ƃaa vulula, Gala ta ɣeela ƃaa ɣalasoda, é ɣɛ wɔnɔ ga ŋɛnii niitiɛ za te ŋetea ɔɔ niitiɛ te vaazu ɣɛɛzu ŋetea é vɛɛ gaa‐ƃaa va te ta nɛpɛ gɛ lɛ zooga ɔ́ de wulo Gala na wõilai yee wu.

³⁹ É ɣɛni wɔnɔ ga ŋɛnii niitiɛ te de maazu vele ƃaa niitiɛ te de wɔwɔ lɔɔ vele ɔɔ Gala kpɛtɛ ŋɛniitiɛ ɣaazɔ, te ta nɛpɛ gɛ lɛ zooga ɔ́ de wulo wõilai nii yee wu Gala ge boga ga diɛ de maliɣii Ziizɛ Kolai zaala zu.