LOOMƐITIƐ 13 - DEƲE NIINƐI

Goo‐mɛni‐kuloai wo maazu nui ya

¹ Pagɛ nu pɛ ge kolo wulo numaitiɛ vɛ gɔmɛti leʋe te la, ƃɔvɛlaale gaa‐ƃaa nɛpɛ gɛ lɛ ɣɛɛ nu ta ya maɣaa‐ƃai ɔ́ ƃe wulozu Gala zeea. Gaa‐ƃai niitiɛ te ŋetea Gala ka é te maʋaa maala levea.

² Na ma nui nɛpɛ yá lo numai niitiɛ la gaa‐ƃaa te ya maazu, manui lo ka na é bosu numaitiɛ la Gala ge te wuloa. Tɔwɔ taitiɛ wɔgi ta lo natiɛ la ta faa yɛ ƃɔɔ ma.

³ Toku ge zei ga maazu‐ʋaa‐wo‐bo bea tɛ lɛ ga tuo‐vele‐vagɔ vea luo‐ba vea, kɛni tuo‐vele‐yowũ‐wulo vea. Kɛ̀bɛ ɛ̀ lɛ wõini ɔ̀ ɣɛ luozu nui nii va gaa‐ƃaa zéea è maazu, kɛlɛɛ? Ani na ve mu, nii pagɛi yɛ na ɣɛ. Na ɣa ɣɛɛ na towaa yee zei è wu.

⁴ Ƃɔvɛlaale tɔ ga Gala na tii‐ɣɛɛ nu yà wulo‐nu‐ma ʋaa ma. Kɛ̀ ani yà na fai nii ɣɛɛzu lɛ pele ma, yà luo, toku ge zei ga ɛ́ lɛ nɔ boa zɔkpɔi ziɣia ƃɔɔvɛ. Tɔ tii ɣɛɛzu Gala bɛ ga é ná zii‐ɣaa‐wãlai laa ziiti tuo‐vele‐yowũ‐wulo nu ma.

⁵ Na ma kɛni nu ɣa kolo wulo. Ɛ́ lɛ nɔ ga é na ɣɛ Gala na zii‐ɣaa‐wãlai mɛ lɛ ziili ma, kɛ̀ towaa kɛ ga velei maɣi‐gaa‐ziɛi ɣa vili da ma ga tɔ ga gaama ga é kɛ.

⁶ Nii mazaƃu ɣilagi nɔ ɣa wa gɔmɛti naʋolo ʋee la, ƃɔvɛlaale taitiɛ gaa‐ƃaa te ya numaa maazu ta ga Gala na tii‐ɣɛɛ vea te fai nii ƃɔɔƃɔɔ nɔ ma.

⁷ Te pɛ zɔi yá zolowo te maʋaa ma, a fe te ya. Niitiɛ te ga gɔmɛti naʋolo‐wulo vea, a gɔmɛti naʋoloi ʋe natiɛ ya. Niitiɛ wɔnɔ te ga zuu vaa ʋaa‐ɣɛɛ naʋolo‐wulo vea, wo teve natiɛ wɔ. Niitiɛ pagɛi wũfe‐ma wo ga tiɛ, a wũfe natiɛ ma, niitiɛ pagɛi ƃaa ƃakpa la te ma, wo ƃaa ƃakpa la natiɛ ma.

Wõilai ɣiini faa ma

⁸ A mɛ lɛ ŋɛni ta nɛpɛ so nu ma ga kui é wulo wõilai wulu yá ɣɛ de ma ga kui ɣiini faa ma. Ƃɔvɛlaale nui yá wõi ga bɔɔ nu, towa é zia ga Gala na tɔgi laa woi.

⁹ Tɔgi niitiɛ te ga “Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo, mɛ lɛ nu vaa, mɛ lɛ wũmɔ wo, mɛ lɛ nu weli mayii vili wuu zu,” é vɛɛ sa tɔgi zɔitiɛ ta nɛpɛ ba te pɛ te zogɛ too la woo ŋɛɛ ɣilagi nii zu. Na ɣa ga “È wõi ga è wɔɔ nu è ɣɛ velei è ƃɔɔ wõini la.”

¹⁰ Nui wõila zéea ɛ́ lɛ tuo vele yowũ wuloa ga bɔɔ nu. Na ma wõi‐ɣɛ‐ma luo‐wogai ɣa é ga nu ziai ga Gala na tɔgi.

Da valolai maa ƃuovɛ

¹¹ Niitiɛ ta wulo na su, wo kwɛ̃ni ga velei siɛgi nii ɣavelei la. Na ɣa ga velei kui daa ʋega la ga wo ɣaazu lao sa, toku ge zei ga da valolai maa ƃuovɛ de va nii zu é leve velei va é ɣɛni la tei de Kolai ʋaa ziɣini ga gaama ga maa wũ.

¹² Kpidii bɔɔlɔ kele tevevɛ sa ba, gela‐boga zu ƃuai. Na ma a de kpidi luoitiɛ loo ya. A de kɔɔ‐wɔɔ maa‐ɣili bo ga de ɣɛ ga ŋada wodoai mawuluƃoa.

¹³ A de pele‐ma luo wo è ɣɛ da ɣɛ ziɛzu gela‐boga zu. A de mɛ lɛ kɛ gaa‐vala‐ba wuu‐zu‐nɛɛ‐wuloa zu ta dɔɔ‐ƃoalea ga é de zo é vɛɛ ƃaa‐wulo‐ma luo‐woga va ta wũfe tala luo. A de mɛ lɛ wɔnɔ kɛ kpɔɛ‐woga zu ɔ́ nɔ ɣɛ ga sili.

¹⁴ Kɛ̀ a de maliɣii Ziizɛ Kolai ziɣi yii zu wo mɛ lɛ pele ta nɛpɛ gaa ziɛ ƃɔɔ ʋaa ma ga niitiɛ te mayii viligɛi nu ƃuse wuu zu wo te ɣɛɛ la.