FAA WULOAI KƐNƐ MA 6 - DEƲE NIINƐI

Kɔlɔ‐laa‐ƃakpa ŋɛniitiɛ

¹ Tei sa Baala Zuwui kɔlɔ‐laa‐ƃakpa ŋɛni lɔfelaitiɛ te ɣila daa laoni, gè wɛlɛni na va. Gè zɛba sa gè ʋulu ŋɛni naagɔitiɛ te ɣila goo mɛni, gói wuloai è ɣɛ gee ƃɛdɛ yíɛ ɣɛ tea, “Va!”

² Kwɛ̀lɛzu gìɛ soo wele pɛtɛ, kile ge kpize nui ya. Te masa bɔɔlɔ feeni zéea. Na ɣa ɣɛɛ na é wuloni é vile zuitiɛ‐wulo ʋaa ma ga zée leve numaa va.

³ Tei é kɔlɔ‐laa‐ƃakpa ŋɛnii fele kelei laa laoni, gè ʋulu ŋɛnii fele kelei woo mɛnini yíɛ ɣɛ tea, “Va!”

⁴ Na ɣɛɛzu soo ta yíɛ wɔnɔ va yíɛ ƃoei kpake‐kpake. Te ʋaani bu kpize nui ya ga é zii‐laa wulo zui zu, kɛɛ ʋaa ma nu ƃusea tiɛ ɣiini paa. Tɔwɔ te boa zɔkpɔ ƃakpa wala ʋeeni zéea.

⁵ Tei é kɔlɔ‐laa‐ƃakpa ŋɛnii sava kelei laa laoni, gè ʋulu ŋɛnii sava kelei woo mɛnini yíɛ ɣɛ tea, “Va!” Na ɣɛɛzu gìɛ wɛlɛ soo lei ba, ŋɛni na bii‐wɔ̃ɔ kolui kpize nui yee va.

⁶ Tei na ɣɛɛni, gè woo ta mɛnini ɔ̀ ka è ɣɛ woi kuloai ʋulu ŋɛni naagɔitiɛ zaama yíɛ ɣɛ tea, “Mɔlɔ vãi felegɔ ɣa ga sɛni gila, podegi wɔ mavãi dɔzita ga sɛni gila. Kɛ̀ mɛ lɛ faa vɛɛ guloi va ta ŋasa vai mayiɛi.”

⁷ Tei é kɔlɔ‐laa‐ƃakpa ŋɛnii naa kelei laa laoni, gè ʋulu ŋɛnii naa kelei woo mɛnini yíɛ ɣɛ tea, “Va!”

⁸ Na ɣɛɛzu gìɛ wɛlɛ soo va dɔtɔi ɣaa wele‐kwelegɛi. Kpize nui na daa‐zeigi ɣɛni ga “Saa.” Nui dáa ga “Saa‐vea‐ɣɛɛ‐zuvɛ” nà vileni sa púlu. Zuu pɛ gaa wɛi su naa, te gaa‐ƃaa ʋeeni te ya mazɛvɛ ɣila maʋaa ma ga te náa vea vaa ga boa zɔkpɔ ta pulu ta siɛ‐ziɛ seeƃɛ é vɛɛ file zuoitiɛ va te dɔƃɔi zu.

⁹ Tei é kɔlɔ‐laa‐ƃakpa ŋɛnii doolu kelei laa laoni, numai niitiɛ te te vaani Gala daa woi mazaƃu ma é vɛɛ seele woi va te feeni, gè te mawɔʋɛitiɛ vɛtɛni Gala‐zeke‐kɛɛ vanagi wu.

¹⁰ Te lobani tiɛ ɣɛ tea, “Ee gé maazu‐ʋaa‐wo nui, yài è ga gé maliɣii, yài è maa wuai è ga gaama nui, ná zu ɣa vaazu ɣɛɛzu zɛli kɛ le ɔ̀ teɣa ɣɛ faa‐wogi ɣaa levezu, na ɣa ɣɛɛ na è gé váa ʋái mawui kulo numaitiɛ va te zui ɣa?”

¹¹ Te seɣe wele feeni sa te ɣile‐giledai ya te bo te ma ga te loowo ga ta wolo zu wooza é yɛsu te vaa líigoi niitiɛ te ga te vaa lii‐ɣɛɛ veaitiɛ te vaazu te vaazu, è ɣɛ velei nɔ ta ɣagi te te vaani la, natiɛ te kulo‐ɣɛɛ wo ga daa ʋega.

¹² Tei é kɔlɔ‐laa‐ƃakpa ŋɛnii dɔzita kelei laa laoni, gè wɛlɛni gè zui vɛtɛ é ƃeli ga kpakpaa yíɛ wu su. Na ɣa ɣɛɛ na foloi leini kpi è ɣɛ pala zeɣe, ɣalo daa‐ʋegai ƃoei è ɣɛ ŋama.

¹³ Sɔmɔ dekaitiɛ te gee wɔlɔgi ma te looni zui ma è ɣɛ “fi” mawului mavaa ɣa ɣɛ wulozu ga maƃoi yíɛ wu fãga ƃakpa vɛ.

¹⁴ Gee wɔlɔgi yɛ̃ɛlɛni è ɣɛ ta kpiti kɔlɔ maa ƃili. Na ɣa ɣɛɛ na gizi gwalai ɣaazɔ vɛɛ ziɛ ligitiɛ zu ɣaazɔ va te ziɣini ɣɛɛ‐zuvɛtiɛ.

¹⁵ Tei na ɣɛɛni, zui‐ɣa ɣalasogitiɛ vɛɛ manu ƃaazaga va ta sɔdasi‐maazu veaitiɛ, kpɛtɛ vea ta gaa‐ƃaa vea, te pɛ te vɛɛ dua va ta wɔɔlɔa, te loowuni zeɣeitiɛ zu ta kwɔtiitiɛ yɔɔzuvɛtiɛ te gizi gwalaitiɛ ma.

¹⁶ Te ɣɛni gizi gwalaitiɛ lilisu ta kwɔtiitiɛ tiɛ ɣɛ te ma, “A vɛɛ gé maazu wo gé loowu, gé ziɣi nui nii ɣaazu é zeini masa kpɔkpɔgi ɣa. Na ɣa ɣɛɛ na gé loowu Baala Zuwui na goei‐levei va.

¹⁷ Ƃɔvɛlaale ta woei‐leve ʋai maʋolo walai ziitia. Ƃɛ ɣa yá zoo é lo túo?”