FAA WULOAI KƐNƐ MA 5 - DEƲE NIINƐI

Kpiti kɔlɔi ƃɔga Baala Zuwui

¹ Nui é ɣɛni zeini masa kpɔkpɔgi ɣa, gè wɛlɛni kɔlɔ maa‐ƃiliga va zée‐zagi ɣa. Ponɛi ɣɛ su vele ta pulu vele, dáa ƃakpagɛi ga kɔlɔ‐laa‐ƃakpa ŋɛni lɔfela.

² Gè wɛlɛni wɔnɔ Gala ta ɣeelai ta va sú ƃai. É ɣɛni bosu ga woo maa zeezea yíɛ ɣɛ tea, “Ƃɛ ɣa kuloai bu bɛ́ ga é kɔlɔ maa‐ƃiligai nii laa lao é daa‐ƃakpa ŋɛniitiɛ ɣale‐ɣale nii mavele ma?”

³ Zui ɣa pɛ, gee‐zuvɛ pɛ, zui wu pɛ, nu ta nɛpɛ gɛ lɛ ŋɛni naa ta ɔ́ zoo ɔ́ kɔlɔi laa lao ɔ́ nɔ ɣɛ ga é wɛlɛ su va.

⁴ Gè wɔlɔni ga tamaa, ƃɔvɛlaale nu ta nɛpɛ gɛ lɛ zɔlɔ woni ɔ́ kulo bu ga é kɔlɔi laa lao ɔ́ nɔ ɣɛ ga é wɛlɛ su va.

⁵ Nuwutiitiɛ te ɣila ge ɣɛ sa mà, “Mɛ lɛ wɔlɔ. Wɛlɛ! Zalai é Juda nu zuwui zaama é ga Deeve mawulo‐bai ta towa zée zia ná wu ga yá zoo é kɔlɔi laa lao é daa‐ƃakpa ŋɛni lɔfelaitiɛ ɣale‐ɣale.”

⁶ Gè wɛlɛni sa Baala Zuwu va loni masa kpɔkpɔgi zaamavɛ máa ɣaligɛi ʋulu ŋɛni naagɔitiɛ vɛ ta nuwutiitiɛ. Ɔ̀ ka ga baala zuwui nii te paani. Melai ɣɛni lɔfela, gaazu ɣɛzɛgi lɔfela. Niitiɛ ta ga gaa‐ƃaa ŋɛni lɔfelaitiɛ te Gala zeea, niitiɛ é te levega zui wɔlɔ‐kɔlɔ ma ɣaali.

⁷ Nui é ɣɛni zeini masa kpɔkpɔgi ɣa, Baala Zuwui liini é kɔlɔi zo zée‐zagi ɣa.

⁸ Tei é kɔlɔi zoni, ʋulu ŋɛni naagɔitiɛ ƃɔga nuwuti zee felegɔ kai naagɔi te looni dáa wu. Kweni ge ɣɛni te ɣile‐giledai ya é vɛɛ zɛni kokoa va te laa ʋegɛi ga ŋɛnii nii ta gala kũ‐nɛɛ‐nɛɛ giɛ wulo. Na ɣa é ga Gala na dɔ numaitiɛ ta Ɣala‐feliai.

⁹ Na ɣa ɣɛɛ na te gui niinɛ looni tiɛ ɣɛ tea, “Kulovɛ bu yìɛ ga è kɔlɔ maa‐ƃiligai ziɣi è daa‐ƃakpa ŋɛniitiɛ laa lao, ƃɔvɛlaale te è vaani. Tɔwɔ è maŋamai é numaa wũ maa woni Gala faa ma. Na ɣa ga numaitiɛ te wuloni zii ɣaazɔ zu ta zii woo‐wo bea mazii ɣaazɔ é vɛɛ zuu ɣaazɔ va.

¹⁰ Na ɣa ɣɛɛ na è te ɣɛɛ ga masada zei‐zu ɣila è te ɣɛ ga gá Ɣalagi na laa‐ʋaalega, tɔwɔ ta vaazu masada ɣɛɛzu zui zu.”

¹¹ Tei gè ɣɛni wɛlɛzu, masa kpɔkpɔgi pɛ, ʋulu ŋɛniitiɛ pɛ é vɛɛ nuwutiitiɛ va, gè Gala ta ɣeela lamaa woo mɛnini te wukũi ba. Gala ta ɣeelaitiɛ te ɣɛni ga wulu tama‐lama‐lama nu lɛ ŋɛni te lii kwɛ̃ni.

¹² Te ɣɛni bosu ga woo wala tiɛ ɣɛ tea, “Kulovɛ bu Baala Zuwui nii vɛ te paa ga é gaa‐ƃaa maa zɔlɔ wo ta kpɛtɛ é vɛɛ kele‐ɣele ba ta zee‐zu‐ƃaa. É vɛɛ wɔnɔ wũfe‐ma va ta saala‐malai é vɛɛ tuuyiɛ va!”

¹³ Na ɣa ɣɛɛ na ʋulu ŋɛnii nɛpɛ é gee‐zuvɛ ta zui ɣa é vɛɛ zui wu va ta yuwu wu, te pɛ gè te woo mɛnini tiɛ ɣɛ tea, “Nui é zeini masa kpɔkpɔgi ɣa é vɛɛ Baala Zuwui va, tuuyiɛ ɣa ɣɛ te ma fãa, wũfe‐ma ɣɛ te vɛ, saala la te ma te yee zu ƃaa wɔlɔ‐wɔlɔ ta wɔlɔ‐wɔlɔ!”

¹⁴ Ʋulu ŋɛni naagɔitiɛ te ɣɛ sa tea, “Towaa ɣɛ ŋɛ na.” Nuwu‐tiitiɛ wɔ te loo zuwãa te Gala feli.