FAA WULOAI KƐNƐ MA 22 - DEƲE NIINƐI

¹ Gala ta ɣeelai é ʋululai mayiɛ walai lɛɛni gàazu yíɛ ʋolo è ɣɛ gelasi. To‐kala‐suvɛ ɣɛni ga Gala na masa kpɔkpɔgi é vɛɛ Baala Zuwui na dɛi va.

² É ɣɛni laani tai zu vele‐vɛɛgi zaama yíɛ yii. Ʋululai mawului ɣɛni ƃalaa pɛ ziɛ maɣake felegɔi pɛ ma, mavai mazii zei‐zu puugɔ kai felegɔitiɛ te te ɣa. Ɔ́ vaa ɣalo gile‐giledai zu. Gului nii malaitiɛ te ɣɛni ziitiɛ valo ʋaa ma.

³ Ŋɛnii nɛpɛgi koto ba ɛ́ lɛ sa ɣɛɛ tai nii zu. Kɛ̀ Gala na masa kpɔkpɔgi vɛɛ Baala Zuwui na dɛi va ta ɣɛ su. Na ɣa ɣɛɛ na ná tii‐ɣɛɛ veaitiɛ ta ɣɛ felizu.

⁴ Ta wɛlɛ gaazuvɛ va, ná daa‐zeigi wɔ ka ɣɛ te lodalavɛtiɛ.

⁵ Kpidi ʋaa lɛ sa wɔlɔ‐wɔlɔ ɣɛɛ na. Labo maʋolo maƃala lɛ ɣɛɛ te ma ɔ́ nɔ ɣɛ ga folo. Ƃɔvɛlaale de maliɣii Gala ka a ɣɛ ga ta ŋada wodoai. Na ɣa ɣɛɛ na ta sa ta masadai ɣɛ wɔlɔ‐wɔlɔ ta wɔlɔ‐wɔlɔ.

Ziizɛ váa ʋài

⁶ Gala ta ɣeelai ɣɛɛ vele ɣa na mà, “Woi niitiɛ ta ga woi kuloai bu ga nu la ga tiɛ te ga gaama woo. De maliɣii Gala, nii yá ki‐gaa‐ziɛ vili dáa woo‐wo beaitiɛ ɣigi zu, é ná keelai levega ga fai nii su lɛ woozasu é ɣɛ ƃɔɔ ti é dɛ ga ná tii‐ɣɛɛ veaitiɛ.”

⁷ Ziizɛ ɣa ɣɛɛzu tea, “Wɛlɛ! Su lɛ woozasu gè va. Tuuyiɛ ɣa ɣɛ nui nii ma yá goo‐mɛni kulo fai niitiɛ zu ná yɛga ná luo é wo kɔlɔi nii zu.”

⁸ Nài gè ga Jɔ̃, nà ɣa gè fai niitiɛ mɛnini gè te vɛtɛ. Tei tɔwɔ gè te mɛnini gè te vɛtɛ, gè vɛɛni Gala ta ɣeelai wɔwɔ wu é te lɛɛni gàazu ga gè feli.

⁹ Kɛ̀ é ɣɛni mà, “Mɛ lɛ nà ɣɛ! Gà nɔ ga è wɔɔ lii‐ɣɛɛ nu è vɛɛ è vaitiɛ va te ga Gala daa woo‐wo beaitiɛ ta niitiɛ te ziɛzu ga kɔlɔi nii laa woi. Gala ka yà feli.”

¹⁰ É ɣɛni wɔnɔ mà, “Faitiɛ te yɛga ná luo te wo kɔlɔi nii zu, mɛ lɛ te loowu. Toku ge zei ga siɛgi zu ƃuovɛ sa.

¹¹ Ƃe ba tuƃo‐vele‐yowũ‐wulo nui yìɛ dɛ nɔ tuƃo vele yowũi wulo, nii maa yɛ̃ɛlɛi é yɛ dɛ nɔ ná maa yɛ̃ɛlɛdai zu. Tele‐bo tuo‐wo nui yɛ nɔ ná tele‐bo tuoi wulu, nii maa wuai é yɛ ná maa‐wuo logi zu.”

¹² Ziizɛ ɣa ɣɛɛzu tea, “Wɛlɛ! Su lɛ woozasu gè va. Gà va ga nà faa‐zu‐loo ʋai, kɛɛ ʋaa ma nii nu ta nɛpɛ ka kɛ gè su loo bɛ́.

¹³ Nà ɣa gè ga Afa ta Womeega. Na ɣa ga mámaa wũ kpɔga maɣaa ƃela, gè ga tɔɔ‐zei‐zu ƃɔga mawɛ̃ɛ‐pele‐ma.”

¹⁴ Tuuyiɛ ɣa niitiɛ ma ta zeɣeitiɛ wuai, kɛɛ ʋaa ma é ɣɛ ga ta woo gaama ʋaa ga te wɔɔ laa ɣɛ ʋululai mawului va, na ɣa ɣɛɛ na te leve ga siɣi zeɣeitiɛ laa vele te lɛ taa walai zu.

¹⁵ Siɣigi wulu vele ɣa gilewua te la ta maa‐wɔlɔ‐wɔlɔ sale yeke‐kɛɛ vea é vɛɛ kui‐yɔɔzu wɛ̃ɛ‐ziɛ‐bo bea va ta nu‐vaa vea ƃɔga maa‐niini gala zeke‐kɛɛ vea é vɛɛ taitiɛ nɛpɛ ba te wõini ga zɛɛ ʋaa ʋaa tiɛ maluoi wo.

¹⁶ É ɣɛni tea, “Nài gè ga Ziizɛ, nà ɣa gè nà keelai levega è wɔ vɛ ga seele woi nii Gala pɛlɛitiɛ ʋaa ma. Nà ɣa gè ga Deeve manu zuwui gè ga mawulo‐bai, gè ga gusu zɔmɔ deka ʋolo‐ʋologi.”

¹⁷ Gala baa ŋinɛgi ƃɔga ŋaza nui te vaazu kulozu ga ŋaza ta ɣɛɛzu tea, “Va.” Tɔwɔ pagɛ nui nɛpɛ yá mɛni é ɣɛ tea, “Va.” Na ɣa ɣɛɛ na nui nɛpɛ kpoale‐wõi ma é va. Pagɛ nui ʋululai mayiɛi mayii viligɛi kuu zu é siɣi, sɔ̃wɔ ʋaa mɛ lɛ ɣɛ ba.

Faitiɛ zo‐suvɛ too la

¹⁸ Nài gè ga Jɔ̃, nui nɛpɛ é faitiɛ mɛnisu te yɛga ná luo te wo kɔlɔi nii zu, gà manui lɛnɛsu. Ani nu nɛpɛ ka kɔlɔi nii laa woi ta vɛɛ na bá, faa ƃoeitiɛ te maʋaa ɣavele zu wuloai kɔlɔi nii zu, Gala ka te laa ziiti manui ma.

¹⁹ Faitiɛ te yɛga ná luo te wo kɔlɔi nii zu, ani nu ta nɛpɛ ka ta ziɣi na bá, Gala ka manui wɔɔ laa ziɣi ʋululai mawului va, é pɔ́ɔ laa ziɣi taa wala maa wuai va. Na ɣa ga niitiɛ te maʋaa ɣavele zu wuloai kɔlɔi nii zu.

²⁰ Nui é fai niitiɛ te mazeele woo ʋeezu tɔ ɣɛɛzu tea, “Tɔ ga ƃɔɔƃɔɔ su ʋaa, su lɛ woozasu gè va.” Nà nɔ yá ɣɛ! Va, gé maliɣii Ziizɛ!

²¹ De maliɣii Ziizɛ na maa‐wõi‐ɣaa ƃɔ‐bai ɣa ɣɛ nu ɣaazɔ ʋaa ma fãa. Nà nɔ yá ɣɛ.