FAA WULOAI KƐNƐ MA 20 - DEƲE NIINƐI

Kwena wulu gilagi

¹ Tei sa na ɣɛɛni, gè wɛlɛni Gala ta ɣeela ta va kuloai gee wɔlɔgi zu yíɛ yii ƃɛkpɛ zeɣei la ƃogi mayiliɣii zéea ta yɔ̃wɔ ƃakpa wala.

² É ŋɛni maa‐yiki‐yikigi zoni. Na ɣa ga wɔlɔ‐wɔlɔ wɔlɔ‐wɔlɔ ɣaalii nii é ga dɛvele, dáa wɔnɔ ga Seeta. É gilini ga é kɛ gilii zu ga kwena wulu gila.

³ É zɛba sa é pili zeɣei zu é daa wulu é daa ƃakpa, kɛɛ ʋaa ma é mɛ lɛ sa wɔlɔ‐wɔlɔ ziitiɛ ɣaa wɔlɔ é yɛsu kwena wulu gilagi leve. Na ɣa wulo na ba, pagɛ dɛ te fũi ga ta wolo.

⁴ Gè wɛlɛni sa masa kpɔkpɔga va. Taitiɛ te ɣɛni zeini kpɔkpɔgi niitiɛ ɣa te ɣɛni ga numai niitiɛ faa‐wo gaa‐leve ʋai maɣaa‐ƃai ʋeeni te ya. Gè wɛlɛni ƃalaa pɛ numai niitiɛ te mawɔʋɛitiɛ va. Na ɣa ga niitiɛ te te wũ teveni ta zeele woi ʋaa ma Ziizɛ ʋaa ma ta Gala daa woi‐wo fai. Ta ɣa tɛ lɛ file zuoi ʋelini ɔ́ nɔ ɣɛ ga mawo‐kɔ̃ɔgi. Tɛ lɛ file zuoi yee‐wo maa zɔlɔ woni ɔ́ vɛɛ te lodalavɛ ɔɔ te yeetiɛ va. Te yɛʋui looni te zu wɔnɔ te vɛɛ Kolai va ga te masadai ɣɛ ga kwena wulu gila.

⁵ Saa veaitiɛ mataitiɛ te yɛʋui lɛ looni te zu kɔnɔ é yɛsu kwena wulu gilagi leve. Nii ɣa é ga bu‐ziɣi‐saa‐ya ʋai mamaa wũgi.

⁶ Tuuyiɛ ɣa ɣɛ nui nii ma, máa wuai wɔnɔ. Na ɣa ga nui nii pɔɔ laa ɣa ɣɛ bu‐ziɣi‐saa‐ya ʋai mamaa wũgi va. Sai fele kelei na gaa‐ƃaa lɛ na ɣavele veaitiɛ maazu. Kɛ̀ ta ɣɛ ga Gala na laa‐ʋaalega te ɣɛ wɔnɔ ga Kolai na laa‐ʋaalega. Na ɣa ɣɛɛ na ta tiɛni ta masadai ɣɛ ga kwena wulu gila.

Te yee‐leve fai Seeta va

⁷ Kwena wulu gilagi ɣa leve na, ta Seeta ʋũi é wulo ná pilisinelai zu.

⁸ Na ɣa ɣɛɛ na towaa ziitiɛ ɣaa wɔlɔ te zui mazoku sei‐zu naagɔitiɛ zu, na ɣa ga Gɔ ƃɔga Magɔ, ga é te ɣaa lɛ ba kɔɔ‐wɔɔ ʋaa ma. Nu liigoi te le maʋaa wulovɛ è ɣɛ yuwu wukũigi va yãazegi liigo.

⁹ Te ziɛni zuu ƃakpa walai nii ɣa leelia, te zɛba te Gala na dɔ numaitiɛ te ƃuwui maa ɣali ta taa walai nii wõi numaa ma. Kɛ̀ ŋabu wuloni Gala ta é te ɣala kpai.

¹⁰ Na ɣa ɣɛɛ na dɛvele nii é te ɣaa wɔlɔni, te nà vilini ŋabu yɛkɛ‐yɛkɛgi nii ɣa é ɣɛni zosu fukɛ va vɛ file zuoi ƃɔga zɛɛ ʋaa Ɣala daa woo‐wo nui te ɣɛni na. Ta ɣɛ sa laƃazu kpidi vɛɛ folo va wɔlɔ‐wɔlɔ ta wɔlɔ‐wɔlɔ.

Gaa‐ƃela faa‐wo gaa‐leveai

¹¹ Tei na ɣɛɛni, gè wɛlɛni masa kpɔkpɔ kwele gwala va é vɛɛ nui va é ɣɛni zeini gá. Zui vɛɛ gee va te velani bá te li, tɔwɔ ŋada nɛpɛ gɛ lɛ ŋɛni zɔlɔ woni te ʋaa ma.

¹² Na ɣɛɛzu gìɛ wɛlɛ saa veaitiɛ va, mavɛlɛ‐vɛlɛ ge vɛɛ maƃaazaga va, te loni masa kpɔkpɔgi laa wu. Kɔlɔa wɔ te laa laogɛi ɣɛ. Kɔlɔi ta ƃɔnɔ laa laogɛi ɣɛ ƃalaa pɛ nii é ga ʋululai mawɔlɔi. Nii ponɛi kɔlɔi natiɛ zu, towa saa veaitiɛ ta ʋaa‐wogi ɣaa leveni ma. Na ɣa ga ta ʋaa‐wogi ɣaa leveni fai niitiɛ ma te kɛɛni.

¹³ Saa veaitiɛ te ɣɛni yuwu wu te wuloni. Nii é ga “Saa” ta “Saa vea ɣɛɛ‐zuvɛ,” natiɛ te ta dɔ zaa veaitiɛ wuloni. Na ɣa ɣɛɛ na te pɛ ta ʋaa‐wogi ɣaa leveni fai niitiɛ ma te te ɣɛɛni ŋeteai zu.

¹⁴ “Saa” ƃɔga “Saa vea ɣɛɛ‐zuvɛ” te natiɛ vilini ŋabu yɛkɛ‐yɛkɛgi zu. Ŋabu yɛkɛ‐yɛkɛgi nii ɣa é ga sai fele kelei.

¹⁵ Tɔwɔ ani nu ta nɛpɛ na daa‐zei gɔ ƃe na vɛtɛsu ʋululai mawɔlɔi zu, tɔ manui vili ŋabu yɛkɛ‐yɛkɛgi zu.