FAA WULOAI KƐNƐ MA 2 - DEƲE NIINƐI

Ɛfɛsɔ lai zu ɣeela woi

¹ É ɣɛni mà, “Niitiɛ wonɛ Gala ta ɣeelai wɔ é Ɛfɛsɔ Ɣala pɛlɛi ʋaa ma. “Bo má ga nui nii sɔmɔ deka lɔfelai zée‐zagi ɣa é ga nui nii é ziɛzu labo‐zei ŋɛniitiɛ zaama te ƃɛtɛi ga zɛni, dáa woo ɣa ga nii.

² Tɔ ɣɛɛzu tea, ‘Gè wa liitiɛ wɛ̃ni, wa mɔɔlɛ ʋai é vɛɛ wa yii‐lɔɔ‐wulo ʋai va faa ɣa. Gè kwɛ̃ni wɔnɔ ga velei wɛ lɛ zia la tuƃo vele yowũ‐wulo vea maʋaa wu, kɛ̀ to mu wo numai niitiɛ zu wɔ̃ɔga te ƃɔɔ lilisu ga Ziizɛ na keelaa, tɔwɔ tɛ lɛ le. Wo wɛlɛɛ na va ga te maʋai ɣa ga zɛɛ ʋaa.

³ Gè kwɛ̃ni ga wa zii‐lɔɔ wulozu wiɛ yii lɔ faa ɣa nà daa‐zeigi mazaƃu ma. Wa wɔ wɛ lɛ dɛ ƃɔlɔni kɛ́ɛ va.

⁴ Kɛ̀ wo ɣɛɛ‐zɔgi nii ɣa é kùu zu. Na ɣa ga wo laa wuloa wõilai nii ʋaa zu é ɣɛni wo ya ga maa wũ pa.

⁵ Na ma a ɣi zɛ na nii zu wo ziɣia pulu wo wulu ɣaa ʋe wo luo vele yowũi va wiɛ tii niitiɛ ɣɛ wo ɣɛni kɛɛzu ga maa wũ pa. Ani nà lɛ ɣɛɛni, gà va wo wɔ gè wa labo‐zei ŋɛnii ziɣi kɛɛ‐zuvɛ, kɛni wa wulu ɣaa ʋe wo luo vele yowũi va.

⁶ Tɔwɔ nii vagɛ wo maʋai zu. Na ɣa ga wo zilii bogɛi ga Nikoleea wulu veaitiɛ ta luoi. Nà wɔ sìlivɛ ga ta luoi ƃalaa pɛ.

⁷ Nui nɛpɛ faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma. Nui nii zée ɣa ziɛ ná wu, gà ʋa bu ga yíɛ zɛʋu‐ʋee wului ɣaa‐vaa mi. Na ɣa ga gului nii é Gala na ŋada vagɔi zu.’ ”

Simɔɔna lai zu ɣeela woi

⁸ É ɣɛni wɔnɔ mà, “Niitiɛ wonɛ Gala ta ɣeelai wɔ é Simɔɔna Ɣala pɛlɛi ʋaa ma. “Bo má ga nui nii fai pɛ tɔɔ zeiyai zéea fai pɛ daa wulo zéea, dáa woo ɣa ga nii. Tɔ ga nui é zaani zɛʋui loo kɔnɔ su wulu.

⁹ Tɔ ɣɛɛzu tea, ‘Gè wa ʋaa ƃoei ʋaa wɛ̃ni ta wa mɔɔlɛ ʋai (tɔwɔ wo ƃɛtɛvɛ). Na ɣa ɣɛɛ na wo laa‐ŋala‐ŋala fai wɔnɔ niitiɛ vɛ te bosu ga ta ga Dusia, tɔwɔ tɛ lɛ le, to mu te nɔ ga numaitiɛ te ɣaa kpɔgɛi Seeta ma, gè kwɛ̃ni.

¹⁰ Daa‐nɔwɔ‐wogi é ɣɛ sa é ziiti wiɛ, a mɛ lɛ luo bá. A wɛlɛ, dɛvele ɣa sa vaazu wo taniga vilisu kpidi vɛlɛ wu, kɛɛ ʋaa ma su‐wɔ̃ɔ ge wo ga wiɛ. Na ɣa ɣɛɛ na faa ƃoei ɣa zei wo ma folo puugɔ yee wu. A ɣɛ ga nui nu ɣa laa la, anɛɛ ƃalaa é ɣɛ ga wo zaa ʋaa. Na ɣa ɣɛɛ na gà vaazu ʋululai maƃaa‐la‐ma wɔɔlɔ pɛɛzu wo wũmɔ.

¹¹ Nui nɛpɛ faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma. Nui nii zée ɣa ziɛ ná wu, sai fele kelei lɛ ŋada zeiya ba.’ ”

Pɛɛgamɔ̃ lai zu ɣeela woi

¹² É ɣɛni mà, “Niitiɛ wonɛ Gala ta ɣeelai wɔ é Pɛɛgamɔ̃ Ɣala pɛlɛi ʋaa ma. “Bo má ga nui nii gaa‐fele boa zɔkpɔ ɣaa‐liɛ‐liɛgi zéea, dáa woo ɣa ga nii.

¹³ Tɔ ɣɛɛzu tea, ‘Gè kwɛ̃ni vɛ ná ga wo ɣɛɛ‐zuvɛ. Ná ɣa Seeta na masa kpɔkpɔgi na. Wo nà daa‐zeigi zoni kpãa, wɛ lɛ nà kala‐bogi ʋaa zakpeni Ãtepa na yɛmini su ƃalaa nii é ɣɛ ga nà seelei é ga nui nu ɣa laa la. Towa te paani wo zaama, vɛ ná ga Seeta ɣɛɛ‐zuvɛ.

¹⁴ Kɛ̀ faa ɣile‐gile ka é ga wo ɣɛɛ‐zɔ kùu zu. Wo taniga ta na te yee Beelɔ̃ na kala‐bogi va. Na ɣa ga Beelɔ̃ nii é Beelaki ɣala boni ga é kɔɔwɔ ƃesa Yezɔi nu zuwuitiɛ luo. É nii ɣɛɛni ga te ɣala‐bo pele ga te maa‐niini galaga‐wɔɔ laa‐mii ŋɛnii ta mi. Na ɣa ɣɛɛ na te yee vili wɛ̃ɛ‐ziɛ‐bo tuo zu.

¹⁵ Nii mavelei ma numaa taniga ta ƃalaa pɛ wo zaama te yee Nikoleea wulu veaitiɛ ta ɣala‐bogi va.

¹⁶ Na ma a wulu ʋaa ʋe wa ʋaa yowũi va. Nà laale, gà vaazu wo wɔ vɛ ga maa ʋilea gè kɔɔ laa lɛ te wu ga dàavɛ woa zɔkpɔi.

¹⁷ Nui nɛpɛ faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma. Nui nii zée ɣa ziɛ ná wu, gà Gala ta laa‐mii ŋɛnii nii ta leve pɔ́ doowugɛi. Na ɣa ɣɛɛ na gà kwɔti wele teve manui wɔ daa‐zei niinɛ wonɛi kwɔtii ƃɔɔ ma nii nu ta ƃɔnɔ nɛpɛ gɛ lɛ kwɛ̃ɛga é wulo nui nii wulu yá maa zɔlɔ wo.’ ”

Tayataila lai zu ɣeela woi

¹⁸ É ɣɛni mà, “Niitiɛ wonɛ Gala ta ɣeelai wɔ é Tayataila Ɣala pɛlɛi ʋaa ma. “Bo má ga Gala dui nii gaazu ɣɛzɛgitiɛ te ga ŋabu‐zo kavele, kɔ́wɔitiɛ wuloai ga kpaaʋa ɣalagi nii maa ɣizigɛi yíɛ ʋolo, dáa woo ɣa ga nii.

¹⁹ Tɔ ɣɛɛzu tea, ‘Gè wa liitiɛ wɛ̃ni. Gè wa wõilai wɛ̃ni gè wa yee‐la‐mai wɛ̃ɛ é vɛɛ wa wutii‐ɣɛɛ ʋai va ta wa yii‐lɔɔ‐wuloai. Kwɛ̃ɛgɛ wɔnɔ bɛ̀ ga wa lii ɣaa‐ƃelagitiɛ wala yee wudɛgɛ mamaa wũgi maazu.

²⁰ Kɛ̀ nii ɣa é kùu zu ga wo ɣɛɛ‐zɔgi. Na ɣa ga wa laa zei ŋaza nui Jɛɛzebɛ laa ƃɔɛ wu nii é ƃɔɔ lilisu ga Gala daa woo‐wo ŋaza nu yíɛ nà tii‐ɣɛɛ veaitiɛ ɣala bo yíɛ te ɣaa wɔlɔ ga te wɛ̃ɛ‐ziɛ bo, na ɣa ɣɛɛ na tiɛ maa‐niini galaga‐wɔɔ mii ŋɛni mi.

²¹ Gè kuu ʋeea zéea ga é wulu ɣaa ʋe ná faa yowũi va, kɛ̀ ɛ́ lɛ kɛɛzu ɔ́ wulu ɣaa ʋe ná wɛ̃ɛ‐ziɛ‐bo tuoi va.

²² A wɛlɛ! Gà vaazu pilisu seeƃɛ vete zu. Niitiɛ wɔgi ta tiɛni te wɛ̃ɛ‐ziɛgi wosu, gè natiɛ vili faa ƃoei ƃakpa zu, kɛni kilaa ani ta wulu ɣaa ʋe ná tuo‐vele‐yowũ‐ɣɛɛ luoi va.

²³ Na ɣa ɣɛɛ na gà déaitiɛ leve gá kpe. Gala pɛlɛitiɛ ɣaazɔ ta sa ta kwɛ̃ɛ ga nà ɣa gè ga nui yá wɛlɛ nu ɣi su va ta ná ki‐gaa‐ziɛi. Nà wɔ ka ɣɛɛ na nii gà fe wo ɣile‐giledai ya towaa ziɣi nɔ velei la kuloai la bu manui na tii vɛ.

²⁴ Kɛ̀ wai wo ga Tayataila vea mataitiɛ wo yee lɛ Jɛɛzebɛ na kala‐bogi va, wo ga numaitiɛ tɛ lɛ dɛ fai nii maa wolini nui taniga te tilisu ga faitiɛ te zuwuai Seeta maʋaa va, wa ɣa gè ɣɛɛzu wo ma, gɛ̀ lɛ faa viiya ta ƃɔnɔ nɛpɛ daazu wo ma.

²⁵ Nii nɔ wa kɛ tɔ ga wo yee ɣata nii va é wo ya é yɛsu gè va.

²⁶ Nui nii zée ɣa ziɛ ná wu, manui yee yɛ nà tiitiɛ va é yɛsu é ziiti gaa‐ƃela su, gà gaa‐ƃaa ʋe zéea ga é ɣɛ ziitiɛ maazu,

^27-28 è ɣɛ velei gè gaa‐ƃaa maa zɔlɔ woga la kèea Gala zeea. Na ɣa ɣɛɛ na towaa te maazu ʋaa wo ga kolu lukpo. È ɣɛ velei pɔlɔ ŋɛni yãkai ɣa wolo la é ɣɛ su kpulu‐kpulu, manui ɣa te wolo‐wolo ŋɛ na. Gà gusu zɔmɔ dekai ʋe manui ya.

²⁹ Nui nɛpɛ faa‐mɛni gui wũ ba, pagɛ é nii mɛni Gala baa ŋinɛgi bosu Gala pɛlɛitiɛ ma.’ ”