FAA WULOAI KƐNƐ MA 19 - DEƲE NIINƐI

¹ Tei na wuloni ba, gè woo ta mɛnini máʋaa wuloai è ɣɛ Gala ta vea te maƃɔ kpakpa woo tiɛ loba tiɛ ɣɛ tea, “A de de maliɣii laa maa lɛ! Balola, saala‐mala é vɛɛ gaa‐ƃaa va ta ga da Ɣalagi wo.

² Ƃɔvɛlaale ná faa‐wo gaa‐leveai ɣa ga gaama é pele ma. É faa vɛɛ ŋaza nui nii va é ƃɔɔ wala ɣɛɛ ga yaawo. Na ɣa ga nii é zui ŋala‐ŋalaga ga ná wɛ̃ɛ‐ziɛ‐bogai. Gala ge ná tii‐ɣɛɛ veaitiɛ te maŋamai mawui kuloa bá.”

³ Te boni kɔnɔ tiɛ ɣɛ tea, “A de de maliɣii laa maa lɛ! Tai nii ɣala luulii ɣa ɣɛ lɛɛzu wɔlɔ‐wɔlɔ ta wɔlɔ‐wɔlɔ.”

⁴ Tei sa na ɣɛɛni, nuwuti zee felegɔ kai naagɔi vɛɛ ʋulu ŋɛni naagɔitiɛ va te vɛɛni te Gala feli. Na ɣa ga Galagi nii é zeini masa kpɔkpɔgi ɣa. Te ɣɛni ɣɛɛzu tea, “Nà nɔ yá ɣɛ! A de de maliɣii laa maa lɛ!”

Baala Zuwui na ŋaza‐wulo wui

⁵ Tɔwɔ woo ta wuloni masa kpɔkpɔgi ɣalama yíɛ ɣɛ tea, “Waitiɛ ɣaazɔ wo ga Gala na tii‐ɣɛɛ vea, wiɛ luo bá, wo mavɛlɛ‐vɛlɛ ge vɛɛ maƃaazaga va a da Ɣalagi laa maa lɛ.”

⁶ Na ɣɛɛzu gìɛ wɔnɔ woo ta mɛni nii maʋaa wuloai ɣɛ è ɣɛ nu ƃulu kpakpa wala woo, kuloai wɔnɔ è ɣɛ ziɛ lamaa zulu ti, kuloai è ɣɛ gee ƃɛdɛ ɣee ɣaa‐ƃaa‐ƃaa goo, tiɛ loba tiɛ ɣɛ tea, “A de de maliɣii laa maa lɛ! Ƃɔvɛlaale de maliɣii nii é ga da Ɣalagi gaa‐ƃai ƃɔgɔpɛ ge zéea tɔ masadai ɣɛɛzu.

⁷ Pagɛ a de kuu‐zu‐nɛɛ wulo diɛ lɛ kpɔ̃‐kpɔ̃ ga kuu‐zu‐nɛɛ diɛ ƃaa la má. Ƃɔvɛlaale Baala Zuwui na ŋaza‐wulo wui ziitia. Ŋaza nui wɔgi é vaazu kulozu nà ɣavele ƃɛtɛvɛ sa.

⁸ Te ʋaani bu zéea ga máa ɣili ga gbaza pa‐pa yíɛ ʋolo máa wuai yawu.” Toku ge zei ga gbaza pa‐pagi ɣa ga Gala na dɔ numaitiɛ te ɣɛɛ ʋai niitiɛ te ga tele‐bo tuoi.

⁹ Gala ta ɣeelai ɣɛni mà, “Fai nii wonɛ. Na ɣa ga tuuyiɛ ɣa niitiɛ ma te liligɛi Baala Zuwui na ŋaza‐wulo laa‐mii ŋɛnii ma.” Na ɣa wulo na ba, é ɣɛni mà, “Niitiɛ ta ga Gala daa woo ƃɔɔ‐ƃɔɔga.”

¹⁰ Tei sa na ɣɛɛni, gè vɛɛni Gala ta ɣeelai wɔwɔ wu ga gè feli. Kɛ̀ é ɣɛni mà, “Mɛ lɛ na ɣɛ! Gà nɔ ga è wɔɔ lii‐ɣɛɛ nu è vɛɛ è vaitiɛ va te lai ga Ziizɛ mazeele woi. Gala ka yà feli.” Ƃɔvɛlaale gaamai nii Ziizɛ maʋaa wuloni kɛnɛ ma towa é ki‐gaa‐ziɛ vilisu Gala daa woo‐wo beaitiɛ ɣigi zu.

Soo wele kɔma nui

¹¹ Na ɣɛɛzu gìɛ wɛlɛ Gala ta va ná laa laogɛi, gè wɛlɛ soo wele ba na. Nui é ɣɛni zeini kɔma tɔ tili ga “Nui nu ɣa laa la” tiɛ tili ga “Gaamai.” Towaa faa‐wo gaa leve é kɔɔ vɛɛ numaa va tele‐bo tuoi zu.

¹² Gaazu ɣɛzɛgitiɛ te wulovɛ è ɣɛ ŋabu‐zo, na ɣa ɣɛɛ na masa bɔɔlɔ tamavɛ wũmɔ. Ná daa‐zeigi wonɛi ɣɛ é ga nii nu ta nɛpɛ gɛ lɛ faa wɛ̃ni ɔ́ vile bá é wulo tɔ ɣagi wulu.

¹³ Seɣe ɣɛni má é ga seɣei nii te kpoeini ga ŋama. Daa‐zeigi ta tili da tɔ ga “Gala daa woi.”

¹⁴ Gala ta zɔdasi ƃulugitiɛ maa ɣiliai ɣɛ ga gbaza pa‐paga tiɛ wele te maa wuai yawu, natiɛ te vileni púlu te soo welega wɔma.

¹⁵ Boa zɔkpɔ ɣaa‐liɛ‐liɛ ge wuloni dá é ga ŋɛnii nii zée ɣa leve da ziitiɛ va. Na ɣa ɣɛɛ na towaa te maazu ʋaa wo ga kolu lukpo. Towaa ŋasa vai ɣizi ŋasa‐vaa‐ɣizi kɔɔwɔi zu. Na ɣa ga Galagi nii gaa‐ƃaa pɛ ge zéea ná goei‐leve maa‐yiki‐yikigi.

¹⁶ Daa‐zei ponɛi ɣɛ ná seɣei ma ta kpalai. Malaa‐zeigi ɣɛni ga “Ɣalasoga ta ɣalasogi, taitiɛ te ga numaa te maliɣia natiɛ te maliɣii.”

¹⁷ Gè wɛlɛni na wulu Gala ta ɣeela va é loni foloi zu yíɛ wɛ̃niitiɛ ɣaazɔ lili ga woo wala. Na ɣa ga niitiɛ te lɛi ɣɛ ƃɔɔ tiɛ wove. É ɣɛni ɣɛɛzu te ma, “A va wo ɣaa kpɔ ba Gala na daa‐mii ŋɛni ƃakpa walai ma.”

¹⁸ É boni te ma ga “A va wo ɣalasogitiɛ te mazuoi mi ta sɔdasi maazu nu walaitiɛ, natiɛ te ga kee‐ɣaa‐ƃaa zinaitiɛ te mazuoi, ta soitiɛ te mazuoi é vɛɛ te ƃize veaitiɛ mazuoi va ta nu pɛ mazuo, dua vɛɛ wɔɔlɔa va, mavɛlɛ‐vɛlɛ ge vɛɛ maƃaazaga va.”

¹⁹ Na ɣa ɣɛɛ na gè wɛlɛni file zuoi va ta zui‐ɣa ɣalasogitiɛ é vɛɛ ta zɔdasi ƃuluga va te ɣaa lɛi ba ga te kɔɔ loo nui nii ma é ɣɛni zeini soi wɔma é vɛɛ ná sɔdasiitiɛ va.

²⁰ Tɔwɔ te file zuoi zoni sa é vɛɛ zɛɛ ʋaa Ɣala daa woo‐wo nui nii va é faa ƃaazaga ɣɛɛni gáazu ma. Numaitiɛ te file zuoi yee‐wogi maa zɔlɔ woni te mawo‐kɔ̃ɔgi ʋeli, é natiɛ ɣaa wɔlɔni na mavelei ma. Niitiɛ felegɔitiɛ te yɛni ga maʋulu te te vili ŋabu yɛkɛ‐yɛkɛgi zu é ɣɛni zosu è ɣɛ fukɛ ɣa ɣɛ ɣalazu.

²¹ Nui nii é zeini soi wɔma towaa é zɔitiɛ matai vaani ga boa zɔkpɔi. Na ɣa ga boa zɔkpɔi yá wulo dáa vele‐zuvɛ. Na ɣa ɣɛɛ na wɛ̃niitiɛ ɣaazɔ te wo kpaani ma ga te mazuoi.