FAA WULOAI KƐNƐ MA 18 - DEƲE NIINƐI

Babelɔ̃ lai wolo ʋai é vɛɛ su

¹ Tei sa nii wuloni ba, gè wɛlɛni Gala ta ɣeelai ta va kɔnɔ kuloai gee‐zuvɛ yíɛ va gaa‐ƃaa ƃakpa wala zéea. Maʋoloi kɛɛni zui maa wodo.

² É boni sa ga doba yíɛ ɣɛ tea, “Golovɛ, golovɛ, Babelɔ̃ laa ƃakpa walai wolovɛ! Towa é ɣɛɛ ga gɔʋɛ yowũa ɣɛɛ‐zuvɛ, é ga maa‐yɛ̃ɛlɛ gɔʋɛ nɛpɛ dii‐zu. Wɛ̃nii nɛpɛgi wɔnɔ maa yɛ̃ɛlɛi bɛlɛ ziɣiai nu vɛ ná ɣa ná ga te lii‐zuvɛ.

³ Su‐wulo‐zu ɣa ga zii pɛ ge ŋasa vai mayiɛi ƃoalea nii é ga tai nii na maa‐wuo lala ŋɛni‐wõi‐leve‐mai. Na ɣa ɣɛɛ na máʋai wulovɛ è ɣɛ ŋaza nui nii ta zui‐ɣa ɣalasoga te wɛ̃ɛ‐ziɛ boga. Tai nii zu yii‐ma‐ɣɛɛ zɔɔlaitiɛ te zui‐ɣa wodi‐lɔɔ vea ƃɛtɛɛ.”

⁴ Na ɣɛɛzu gìɛ woo ta ƃɔnɔ mɛni é wulo Gala ta yíɛ ɣɛ tea, “Nà numaitiɛ, a wulo tai ƃɔɔ va wo va, wo mɛ lɛ va wɔɔ laa ziɣizu ná faa yowũi zu, wa dɔ laa ɔ́ ɣɛ ná faa ƃoeitiɛ va nà mavele ma.

⁵ Ƃɔvɛlaale ná faa yowũitiɛ maziɣi togɛ sa gáa wooza é ziiti gee wɔlɔgi ma. Tɔwɔ Gala ki ka ná faa yowũitiɛ ma.

⁶ Nii nɔ é kɛɛ ga wiɛ, a na ɣɛɛ la. Kɛ́ɛ‐zɔgi é kɛɛ ga wiɛ, wo pɛɛ da wo su loo bɛ́. Kɔpui nii é ŋɛni wɔ̃ɔga su é supu, a kɔ̃ɔ mawɔpui zu fele wo supu máʋaa ma.

⁷ È ɣɛ velei é ƃaa laa la ƃɔɔ ma é zii‐ma‐ɣɛɛ ƃakpa‐wo tuoi wo, a kɛ é na liigo laƃai wo, wo nà liigo ƃee lɔ da. Tei tɔwɔ é bosu ɣigi zu yíɛ ɣɛ tea, ‘Gà ga ŋaza nu ɣalaso gè zeini masa kpɔkpɔ ga, gɛ̀ lɛ ga po ŋazai nii zini gɛ lɛ bɛ́, kpee lɛ wɔlɔ‐wɔlɔ màʋaa ma,’

⁸ vele wɔ nɔwɔ na ná faa ƃoeitiɛ ta ziiti la má folo ɣilekpu zee wu. Natiɛ ta ga siɛ‐ziɛ seeƃɛ, kpee, é vɛɛ pulu va. Na ɣa ɣɛɛ na ŋabu ɣa gala. Toku ge zei ga de maliɣii Gala nii é ná faa‐wogi ɣaa levezu gwala ɣee ɣaa ƃaavɛ.”

⁹ Zui‐ɣa ɣalasogi niitiɛ te wɛ̃ɛ‐ziɛ boga ta tiɛni te vɛɛ teve‐daa‐wulu yii‐ma‐ɣɛɛ luoi zu, ta wɛlɛ ná gala luulii va, ta wɔlɔ tiɛ loba maazu ga kpee.

¹⁰ Ta lo ƃɔɔ woozala duo maazu taƃai nii ʋaa ma yá ɣɛ bosu tiɛ ɣɛ tea, “Edei! Edei! Yài è ga taa wala ƃakpai na, yài è ga taa ɣee ɣaa ƃai è ga Babelɔ̃, faa yɛga yìɛ ɣalava ɣilekpu kpẽi zee wu.”

¹¹ Na ɣa ɣɛɛ na zui‐ɣa wodi‐lɔɔ vea ɣaazɔ te yii ɣa ɣɛ zuulizu tiɛ wɔlɔ máʋaa ma, ƃɔvɛlaale nu ta nɛpɛ gɛ lɛ sa ɣɛɛ wɔnɔ ta wodi ŋɛniitiɛ ɣeeazu.

¹² Podi ŋɛnii natiɛ ta ga: Zɛni, kani, tɔnɔ‐ba wɔti, ʋolo‐ʋolo, gbaza pa‐pa, seɣe ƃoei diizɔ, siliki, seɣe ƃoei kpake‐kpake, gulu wũ‐nɛɛ‐nɛɛ mazii ɣaazɔ, gulu zɔɔla mazii ɣaazɔ niitiɛ te zɔ̃wɔ ƃai, sɔɔlaitiɛ te ƃɛtɛi ga kpaaʋa, kolu‐ʋɔɔ ƃɔga tɔnɔ‐ba wɔti wele,

¹³ mii wulu‐wɔlɔgi nii dáa ga “senemɔ”, kize, ŋɛni wũ‐kũ‐nɛɛ‐nɛɛgi nii ta gala, gulu mala kũ‐nɛɛ‐nɛɛ mazii zei‐zu felegɔ, ŋasa vai mayiɛi, gulo, felava ʋukɛ ƃɔga mɔlɔ, nikɛ ƃɔga baala, soo vɛɛ kai nii va soo ɣa mãi, é vɛɛ dua va. Tiɛ ƃalaa nu ƃuse yɛʋui zɔ̃wɔ wulo.

¹⁴ Podi‐lɔɔ veaitiɛ ƃɔɔ ta ɣɛɛzu má. “Nii è yɛga máa‐wõi‐wõi kulozu è ɣigi zu ga è su‐lɔnɔ zɔlɔ wo, é wuloa è ya é li. Na ɣa ɣɛɛ na è valaga è maa‐ziɣi ŋɛnii ɣaazɔ ma ta yà zaala‐ma ŋɛniitiɛ. Tɛ lɛ sa wɔlɔ‐wɔlɔ vɛtɛga!”

¹⁵ Podi‐lɔɔ veaitiɛ te ɣɛni sɔɔlai niitiɛ zɔ̃wɔ wulozu é yɛsu te kpɛtɛ maa zɔlɔ wo, ta lo woozala tiɛ luo taƃai va yá ɣɛ bosu tiɛ wɔlɔ ga woo wala te ɣaazu maa yiɛi yìɛ wu.

¹⁶ Ta ɣɛ ɣɛɛzu tea, “Edei! Edei! Taa ƃakpa walai nii maa ɣiliai ɣɛ ga gbaza pa‐pa, seɣe ƃoei diizɔ ge ma ta maƃoei kpele‐tete, máa ɣiliai ga zɛni ta tɔnɔ‐ba wɔtia é vɛɛ ʋolo― ʋologa va.

¹⁷ Kpɛtɛ ŋɛnii nii ɣaazɔ zu ŋala‐ŋalaga ɣalava ɣilekpu kpẽi zee wu.” Yuwu‐ɣa ŋee gwala maazu vea vɛɛ niitiɛ va ta zei ziɛi ɣa tiɛ li siɛ ma, ta kẽe‐siɛ vea é vɛɛ niitiɛ ɣaazɔ va ta ta lii ɣɛ yuwu ɣa, te loni woozala.

¹⁸ Tei te wɛlɛni tai ɣala luulii va, te ɣɛni lobasu tiɛ ɣɛ tea, “Taa wala zɛƃɛ ɣa é ɣɛni ga taa ƃakpa walai nii ɣavele?”

¹⁹ Te ɣɛni sa fifili puuzu wũmɔ tiɛ wɔlɔ te ɣaazu maa yiɛi yiɛ wu tiɛ loba tiɛ ɣɛ tea, “Edei! Edei! Taitiɛ nɛpɛ kẽe ge te ya yuwu ɣa, taa ƃakpa walai nii zu‐ƃɛtɛ‐ŋɛniitiɛ ɣa te ta ƃɛtɛi maa zɔlɔ woni su. Tɔ wɔ ka tai nii zu ŋala‐ŋalaga ɣalava ɣilekpu kpẽi zee wu.

²⁰ Ee, wai wo Gala ta, a mawuu‐zu‐nɛɛ wulo. Wai wo ga Gala na dɔ numai zɔitiɛ é vɛɛ Ziizɛ na keelaitiɛ va ta Gala daa woo‐wo beaitiɛ, a kuu‐zu‐nɛɛ wulo. Ƃɔvɛlaale Gala ge faa vɛɛ tai nii va wo ʋaa ma.”

²¹ Tei sa na ɣɛɛni, kee‐ɣaa‐ƃaa Ɣala ta ɣeela ta fasa ƃakpa wala ziɣini ɔ̀ ka è ɣɛ kpazi‐ʋukɛ kwɔti. É zɛba é píli yuwu wu yíɛ ɣɛ tea, “Vele ɣa na Babelɔ̃ laa ƃakpa walai nii ɣa vili da ga ŋada‐zei vele bá. Na ɣa ɣɛɛ na ɛ́ lɛ sa wɔlɔ‐wɔlɔ vɛtɛga.

²² Yài è ga Babelɔ̃ lai, kweni, gui‐loo vea, koole é vɛɛ puu va te ta woo lɛ sa wɔlɔ‐wɔlɔ lɛɛ è zu. Ŋɛɛ lii ta nɛpɛ kɛɛ nu lɛ sa vɛtɛga è zu. Kwɔda‐ziɣɛ li gɛ lɛ sa lɛɛ è zu.

²³ Gulo labo lɛ sa wɔlɔ‐wɔlɔ ŋada wodoa è zu. Ŋaza‐wulo vea vɛɛ máŋazaa va te ta nɛpɛ goo lɛ sa lɛɛ è zu. Ƃɔvɛlaale è zu wodi‐lɔɔ veaitiɛ ɣa te ɣɛni ga zui‐ɣa nu ƃaazagitiɛ. Na ɣa ɣɛɛ na yà maa‐wɔlɔ‐wɔlɔ sale yeke‐kɛi é zii pɛ gaa wɔlɔni.”

²⁴ Tɔwɔ Gala daa woo‐wo beaitiɛ vɛɛ Gala na dɔ numai zɔitiɛ va é vɛɛ niitiɛ ɣaazɔ va te te vaani zui ɣa, tai nii zu ɣa te te maŋamai vɛtɛni na.