FAA WULOAI KƐNƐ MA 17 - DEƲE NIINƐI

Ŋaza nui é ƃɔɔ wala ɣɛɛ ga yaawo

¹ Tei sa na ɣɛɛni, Gala ta ɣeela lɔfelaitiɛ koko lɔfelai ɣɛni te ya te ɣila ge vaani é ɣɛ mà, “Va, fai é vaazu yɛsu ŋaza nui nii ma é ƃɔɔ wala ɣɛɛ ga yaawo gè máʋai lɛ ga yìɛ. Na ɣa ga ŋaza nui nii é zeini ziɛ lamaa ɣa.

² Towa ta zui‐ɣa ɣalasoga te wɛ̃ɛ‐ziɛ boga. Na ɣa ɣɛɛ na ná wɛ̃ɛ‐ziɛ‐bo tuoi maŋasa vai mayiɛi ɣa é zui‐ɣa vea zoga è ɣɛ dɔɔ.”

³ Gala baa ŋinɛgi ná wuuni gàazu Gala ta ɣeelai ƃɔɔ li sa gàazu kpooʋei zu, gè wɛlɛ ŋaza nu ta va zeini file zuo ƃoei kɔma máa ƃoaleai ga Gala daa‐ŋala‐ŋala daa‐zeiga. Wũgi ɣɛni gá lɔfela, melaitiɛ te puu.

⁴ Ŋaza nui nii maa ɣiliai ɣɛ ga seɣe ƃoei diizɔ ta seɣe ƃoei kpele‐tete. Máa ɣiliai ɣɛ kɔnɔ ga zɛni ta tɔnɔ‐ba wɔti é vɛɛ ʋolo‐ʋolo ba. Na ɣa ɣɛɛ na zɛni kɔpu ɣɛni zéea daa ʋegɛi ga ŋɛniitiɛ te vɛlɛ lɛ nu vɛ é vɛɛ ná wɛ̃ɛ‐ziɛ‐bogai mamaa‐wuo lala yekegi va.

⁵ Na ɣa ɣɛɛ na daa‐zei ponɛi ɣɛ tódalavɛ é ga daa‐zeigi nii su‐wulo‐zuvɛ loowuai nu ƃuse va. Daa‐zeigi na ɣɛni ga “Babelɔ̃ laa ƃakpa walai, nii é ga ŋazaitiɛ te ƃɔɔ ɣɛɛ ga yaawo te lee é vɛɛ faitiɛ va te zui ɣa te vɛlɛ lɛ nu vɛ.”

⁶ Na ɣɛɛzu gìɛ wɛlɛ ŋaza nui ƃɔɔ va sogɛi Gala na dɔ numaitiɛ te maŋamai vɛ ga dɔɔ ɣavele. Taitiɛ te laa zeini bu te te vaa Ziizɛ mazaƃu ma, sogɛi ɣɛ natiɛ te maŋamai vɛ ƃalaa pɛ. Tei gè wɛlɛni bá, máʋai vilini mà ga ki‐gaa‐ziɛ ƃakpa wala.

⁷ Kɛ̀ Gala ta ɣeelai ɣɛni mà, “Zɛƃɛi é piliga è ma ga ki‐gaa‐ziɛ? Gà ŋaza nui nii maʋai zu‐wulo‐zuvɛ lɛ ga yìɛ ta file zuoi nii wũgi gá lɔfela, melai puu. Na ɣa ga file zuoi nii ŋaza nui ƃɔɔ zeini kɔ́ma.

⁸ File zuoi na è pɛtɛni é ɣɛni na. Tɔwɔ ɛ́ lɛ sa na. Tɔ vaazu wulozu ƃɛkpɛ zeɣei zu su‐ƃɔnɔ‐wo fai ma. Na ɣa ɣɛɛ na zui‐ɣa veai niitiɛ ta laa‐zeigitiɛ tɛ lɛ wonɛni ʋululai mawɔlɔi zu é ziɣi ƃɔɔ ŋeteai‐lɔɔ‐zei ʋolo ma, towaa vili te ma ga ki‐gaa‐ziɛ ga te wɛlɛ file zuoi va. Ƃɔvɛlaale é ɣɛni wɔnɔ na, kɛ̀ ɛ́ lɛ sa na. Tɔwɔ yíɛ va kɔnɔ vaazu.

⁹ Nii ɣa pagɛi kele‐ɣele nu ɣi gaa ziɛ ma. File zuoi wũ dɔfelai é gá tɔ ga gizi lɔfelai natiɛ ŋaza nui zeini te ma.

¹⁰ Ta wɔnɔ ƃalaa pɛ ga ɣalaso dɔfelai nii dooluo loa bu, gila gìɛ dɛ ɣalasodai ɣɛ, zɔi wɔ gɛ lɛ dɛ vaani. Tɔwɔ yá vaa na, pagɛ é yɛ nɔ na ga ta wolo.

¹¹ A lii na ga file zuoi nii wɔɔ la vele é ɣɛni na, tɔwɔ ɛ́ lɛ sa na, towa é ga ɣalasogitiɛ te lɔsava kelei. Kɛ̀ tɔwɔ pɛ́ɛvɛ ŋɛni zei‐zu lɔfelaitiɛ va. Sú wɔ ka vaazu ƃɔnɔ wosu.

¹² Na ɣa ɣɛɛ na mámela puugɔitiɛ è te vɛtɛni ta ga ɣalaso puugɔi niitiɛ tɛ lɛ dɛ maazu‐ʋaa‐wo‐bo gaa‐ƃai maa zɔlɔ woni. Kɛ̀ ta vaazu vɛɛzu file zuoi va te ɣalaso gaa‐ƃai maa zɔlɔ wo ɣalava ɣilekpu kpẽi faa ma.

¹³ Masagi niitiɛ ɣigi ɣa ɣile. Tɔwɔ ta ta ɣaa‐ƃai ʋe file zuoi ya.

¹⁴ Ta kɔɔ loo Baala Zuwui ma, nà wɔ zée leve te va, toku ge zei ga taitiɛ te ga numaa te maliɣia Baala Zuwui ɣa é ga natiɛ te maliɣii é ga ɣalasoga ta ɣalasogi. Na ɣa ɣɛɛ na taitiɛ te bá ta ga numai niitiɛ te liligɛi Gala bɛ zée ƃakogɛi te va te ga numaitiɛ nu ɣa la ga tiɛ. Ta ɣa te vɛɛni bá te yee leve te wɔɔ yɔ̃wɔitiɛ va.”

¹⁵ Tei sa na ɣɛɛni, Gala ta ɣeelai ɣɛni mà, “Ziɛi niitiɛ è te vɛtɛni vɛ ŋaza nui nii é ƃɔɔ ɣɛɛ ga yaawo é ɣɛni zeini na, ta ga nu ƃusea te ga nu ƃuluga te ga ziiniga te ga zii woo‐wo bea.

¹⁶ Mela puugɔi è pɛtɛni te vɛɛ file zuoi va ta zili ga ŋaza nui nii é ƃɔɔ ɣɛɛ ga yaawo. Ta máa ʋoo é ɣɛ ga ƃuse te teve gá kpenegele te gala ga ŋabu.

¹⁷ Ƃɔvɛlaale Gala ge pua te yii zu ga te ziɛ ga ná deʋei te ɣigi ɣɛɛ vele ma ɣile tiɛ ta ɣalaso gaa‐ƃai ʋe file zuoi ya ga é yɛ su Gala daa woi leve ma.

¹⁸ Ŋaza nui wɔgi è pɛ́tɛni tɔ ga taa ƃakpa walai na gaa‐ƃaa zéea zui‐ɣa ɣalasogitiɛ maazu.”