FAA WULOAI KƐNƐ MA 12 - DEƲE NIINƐI

Ŋaza nui ƃɔga ŋɛni maa‐yiki‐yikigi

¹ Na ɣa wulo na ba, po‐kɔ̃ɔ kpakpa wala wuloni gee wɔlɔgi ma yíɛ dɛ ga seele ga faa ƃoei ɣa vaazu vaazu. Na ɣa ga ŋaza nu ta ɣɛni ma máa zeɣei ga foloi, ɣalogi kɔ́wɔ wu. Na ɣa ɣɛɛ na masa bɔɔlɔ ge ɣɛni wũmɔ kpɛtɛi ga sɔmɔ deka puugɔ kai fele.

² Ko ge ɣɛni ŋaza nui na va yíɛ kpee loo duu‐ɣaa wuu‐zu‐wãlai zu yíɛ wõi ɣɛ ga é dúi ɣa taƃai mazaƃu ma.

³ Na wulu wo‐kɔ̃ɔ ge wuloni wɔnɔ gee wɔlɔgi ma yíɛ dɛ ga faa ƃoei ɣa vaazu ɣɛɛzu. Na ɣa ga maa‐yiki ŋɛni ƃoei gwala ta wuloni gee wɔlɔgi ma, wũgi gá lɔfela, melai bá puu, masa bɔɔlɔ dɔfela wũgitiɛ ma.

⁴ Sɔmɔ dekaitiɛ te gee‐zuvɛ te ɣaa wɛi su sava, ŋɛnii nii te zei‐zu ɣila kpaleni ga wɔ̃gi gee wɔlɔgi ma te wu zui ma. Ŋɛni maa‐yiki‐yikigi nii wu ziɣini é lo ŋaza nui nii laa wu é ɣɛni duu‐ɣaa wuu‐zu‐wãlai zu, kɛɛ ʋaa ma nà ɔ́ dui ɣaa na é dúi mi kpai.

⁵ Ŋaza nui zunu luu ɣaani. Na ɣa ga nii é vaazu zii pɛ maazu ʋaa wosu ga kolu lukpo. Kɛ̀ te dee nui dúi ƃaloni te lɛɛ la Gala pɔ vɛ. Te liini la ná masa kpɔkpɔgi laa wu.

⁶ Ŋaza nui wɔ ge velani é li kpooʋei zu vɛ Gala ge ŋada ɣavele ƃɛtɛni na máʋaa ma. Ná ɣa tɔ gáa wɔ na folo wulu ɣila wũ felegɔ zee lɔzita yee wu.

⁷ Na ɣɛɛzu kɔɔ yìɛ wu ziɣi Gala ta. Gala ta ɣeelai Maikɔ ƃɔga Gala ta ɣeelaitiɛ te púlu te ɣɛni wɔɔzu ŋɛni maa‐yiki‐yikigi wɔ. Ŋɛni maa‐yiki‐yikigi wɔ ta ná keelaitiɛ tiɛ wɔ te wɔ.

⁸ Kɛ̀ Maikɔni te yee leveni te va. Tɔwɔ ŋada nɛpɛ gɛ lɛ ŋɛni sa te ʋaa ma Gala ta.

⁹ Te ŋɛni maa‐yiki‐yiki gwalai nii vilini ga ná wɔwɔ wuuvɛ vele. Ŋɛni maa‐yikigi na ɣa ga wɔlɔ‐wɔlɔ ɣaalii nii ta tíli ga dɛvele tiɛ wɔnɔ tíli ga Seeta nii é ga nu pɛ gaa‐wɔlɔ nui zui zu. Te pílini zui zu. Ná keelaitiɛ te vɛɛni bá te te vili.

¹⁰ Tei sa na ɣɛɛni, gè woo wala mɛnini Gala ta tiɛ ɣɛ tea, “Gá Ɣalagi na balolai ta na gaa‐ƃai é vɛɛ ná masadai va ta nui nii é yee ƃakoga bá nà na gaa‐ƃai te vaa sa. Toku ge zei ga gé vaitiɛ ɣɛɛ‐zɔ‐bo nui viligɛ sa. Towa é te ɣɛɛ‐zɔ bosu gá Ɣalagi ɣaazu kpidi vɛɛ folo va.

¹¹ Tɔwɔ te yee levega bá Baala Zuwui maŋamai zaala zu ta ta zeele woi te feeni. Toku ge zei ga te yɛʋui lɛ ŋɛni wɔɔlɔni te ɣaazu, anɛɛ ƃalaa tɔ ɣɛ zaazu.

¹² Na ma, yài è ga gee wɔlɔgi, kuu‐zu‐nɛɛ wulo é vɛɛ waitiɛ va wo gee wɔlɔgi zu. Kɛ̀‐ee, kpalo veavɛ yìɛ, yài è ga zui é vɛɛ yuwu va, ƃɔvɛlaale dɛvele vaa wo wɔ ga zii‐ɣaa‐wãla ƃakpa, toku ge zei ga é kwɛ̃ni ga ná siɛgi zu ƃuovɛ sa.”

¹³ Tei sa ŋɛni maa‐yiki‐yikigi wɛlɛni na va ga píligɛ zui zu, é vileni ŋaza nui na wulu é zunu lui ɣaani.

¹⁴ Kɛ̀ te kooɣɛ wala mawove felegɔ ʋeeni ŋaza nui ya ga é wove da é ziɣi kaalii woba é li kpooʋei zu. Ná ɣa tɔ gáa wɔ na kwena saagɔ ta tikpe zee wu.

¹⁵ Kaalii ziɛ wuloni la é ɣɛ ga ziɛ wala ɣavele é pili ŋaza nui ma ga ziɛ‐ʋegi ƃɔɔ yii ga na.

¹⁶ Kɛ̀ zui wu ziɣini ga é ƃɔ ŋaza nui va. Zui ƃɔ̀ɔ laa laoni é ziɛ walai na ƃoale é wuloni ŋɛni maa‐yiki‐yikigi la.

¹⁷ Ŋɛnii nii yii ɣaa wãlani sa ŋaza nui ya. É li ga é kɔɔ loo nà manu zuwui matai zɔitiɛ ma. Na ɣa ga numai niitiɛ te ziɛzu ga Gala na tɔgitiɛ tiɛ Ziizɛ mazeele woo ʋe.

¹⁸ Tɔwɔ ŋɛni maa‐yiki‐yikigi loni sa ɣɛ yuwu wukũigi va.