MAKI 2 - DEƲE NIINƐI

Ziizɛ kɔwɔ‐za‐ma nui ʋaloni

¹ Tei sa é kuu ɣɛɛni su fele, é vaani wulu Kapɔɔnia. Te boni ga tɔ ná pɛlɛ ta wu.

² Nu lamaa ɣaa lɛɛni ba na. Na ʋaa ma ŋada yãka lɛ ŋɛni na nu ʋaa ma pɛlɛi laavɛ ƃalaa. É ɣɛni Gala goi wosu te ma.

³ Nu taniga te vaani pɔ́ ga nui zée zai ma ta kɔ́wɔ. Nu naagɔ ɣa é siɣini.

⁴ Tei sa tɛ lɛ ƃega lɔtɔ pele ɣa ba kpɔ bɛ, te pɛlɛi loso leveni keeɣi daavɛ te bebei yii na. Na ɣa ga nii kɔwɔ‐za‐ma nui ɣɛni su.

⁵ Tei Ziizɛ wɛlɛni ta yee‐la‐mai va, é ɣɛni seeƃɛ nui ma, “Dùu, yà ʋaa yowũitiɛ te zu ʋaa yɛga.”

⁶ Tɔwɔ tɔ‐dɛɛ ɣala‐mɔi taniga te ɣɛni zeini na tiɛ gaa‐zaɣa bo ɣigi zu tiɛ ɣɛ tea,

⁷ “Zɛƃɛi é kɛɛ zunui nii yíɛ nii ɣavele ʋai wo? Tɔ ga Gala daa‐ŋala‐ŋala faa! Ƃɛ ɣa a faa yowũ zu ʋaa yɛ é wulo Gala tɔ ɣilekpu pulu?”

⁸ Ziizɛ ta ɣi‐gaa‐ziɛi ɣaa ɣaani ga maa ʋilea ga ta gaa‐zaɣa bosu ɣi su ŋɛ na. Na ma é ɣɛni te ma, “Zɛƃɛi é kɛɛ wo gaa‐zaɣa‐kɛɛ wosu ɣi su ŋɛ na?

⁹ Zɛƃɛ ɣa bosu ʋii ƃɛi seeƃɛ nui ma? Tɔ ga nu ɣɛ ma, ‘Yà ʋaa yowũitiɛ te zu ʋaa yɛga’ ɔɔ nu ɣɛ ma, ‘Wu ziɣi è yà vebei ziɣi è ziɛ’?

¹⁰ Kɛ̀ gà nii ɣɛɛzu kɛɛ ʋaa ma wo kwɛ̃ɛ ga gaa‐ƃaa ɣa nu ƃuse lui ya ga é faa yowũ zu ʋaa yɛ.” Ziizɛ ɣɛ sa kɔwɔ‐za‐ma nui ma,

¹¹ “Gè ɣɛ yia, wu ziɣi è yà vebei ziɣi è li wɔ pɛlɛ wu.”

¹² É wu ziɣini sa é ná bebei ziɣi é wulc te pɛ te ɣaazu ma. Na ma gwala wuloni ga te pɛ. Te Gala daa maa iɛɛni tiɛ ɣɛ tea, “Gɛ́ dɛ wɛlɛni nii ɣavele ʋai ta nɛpɛ ba.”

Ziizɛ Liiʋai lilini

¹³ Ziizɛ wuloni kɔnɔ tai va é li ziɛ walai ma. Kpɔgi pɛ ge ɣaa lɛ ba ma é te ɣala bo.

¹⁴ Tei sa é ɣɛni levesu, é wɛlɛni Afia dui Liiʋai va zeini gɔmɛti naʋolo‐wulo wɔfisii zu. Ziizɛ ɣɛni ma, “Vile pùlu.” É wu ziɣi é vile nà wulu.

¹⁵ Tei Ziizɛ ƃɔga ná kala dopoitiɛ te ɣɛni laa miizu Liiʋai na pɛlɛi wu, gɔmɛti naʋolo‐wulo vea lamaa vɛɛ niitiɛ va te luo velei lɛ vani te ɣɛni laa miizu ta tiɛni. Ƃɔvɛlaale te lamaa te vileni púlu.

¹⁶ Tɔ‐dɛɛ ɣala‐mɔi niitiɛ te ɣɛni ga Favilesia tei te wɛlɛni Ziizɛ va tiɛ laa mi ta numai niitiɛ te luo velei lɛ vani é vɛɛ gɔmɛti naʋolo‐wulo veatiɛ va, te ɣɛni ná kala dopoitiɛ ma, “Zɛƃɛi é kɛɛ ta gɔmɛti naʋolo‐wulo veaitiɛ tiɛ laa mi é vɛɛ niitiɛ va te luo velei lɛ vani?”

¹⁷ Kɛ̀ tei Ziizɛ mɛnini, é ɣɛni te ma, “Taitiɛ te lɔtɔ zu wodoai zowo maƃala lɛ te ma, kɛni niitiɛ te zeeƃɛzu. Gɛ̀ lɛ vaani ga gè tele‐bo tuo‐wo bea lili, kɛ̀ niitiɛ ve te luo vele lɛ vani.”

Gaa‐zaɣa‐kɛi é vile zi‐dɔɔ ʋa

¹⁸ Jɔ̃ na kala dopoitiɛ vɛɛ Favilesiitiɛ va te ɣɛni zi su. Numaa te vaani sa Ziizɛ wɔ vɛ te ɣɛ ma, “Zɛƃɛi é kɛɛ Jɔ̃ na kala dopoitiɛ vɛɛ Favilesiitiɛ ta ɣala dopoitiɛ va ta vili zi su, yà dɔ ɣala dopoitiɛ tɛ lɛ viliga ta zu?”

¹⁹ Ziizɛ ɣɛ te ma, “?Wɛ̃ɛtiɛ ta va ŋaza‐wulo wui ma ta kɛ te zi dɔ, tɔwɔ ŋaza‐wulo nui nɔ dɛ te woba? Ani nɔ ŋaza‐wulo nui ɣa te woba, tɛ lɛ kɛɛ tɔ zi dɔ.

²⁰ Siɛ ta ɣa ziiti ga te ŋaza‐wulo nui ziɣi te woba te lii la. Nà maʋoloi wɔ ta sa ta zi dɔ.

²¹ Seɣei nii lɛ dɛ looni ziɛ wu, nu lɛ seɣe zaɣa zu vɛɛ la. Ani yà kɛɛ na, su‐vɛɛgi ɣa leve ba. Na ɣa ga maniinɛi ɣa leve mawɔlɔ‐zaɣagi va. Mazaɣai zu wɔ ka sa a wɔɔlɔ ma na.

²² Na ɣa ɣɛɛ na nu lɛ dɔɔ lakpa‐ga‐niinɛ wua dɔɔ woole wɔlɔ‐zaɣa su. Ani manui ɣa na ɣɛɛ na, dɔɔ lakpa‐ga‐niinɛi ɣa goolei wuule é wu, goolei ŋala‐ŋala. Dɔɔ lakpa‐ga‐niinɛ kee ɣaa ƃai towaa ɣɛ goole niinɛ wũdu‐wũdugi ʋaa ma.

Gaa‐zaɣa‐kɛi é ʋile doowo foloi ʋa

²³ Ziizɛ ɣɛni levesu kpala ta zu ga doowo folo ɣila. Tei sa te ɣɛni liizu, ná kala dopoitiɛ te vɛɛni ga dɔɔlɔ ƃazii ƃolo‐kpologa ga.

²⁴ Favilesiitiɛ te ɣɛni sa ma, “Zɛƃɛ ɣa é kɛɛ te nii ɣɛɛzu lɛ tɔ su ga nu kɛ ga doowo folo?”

²⁵ E ɣɛni te ma,“? Tei Deeve ƃalai ɣɛ pulu má ta numaitiɛ te ɣɛni bá, nii é kɛɛni wɛ lɛ dodoni Gala kɔlɔi zu?

²⁶ Na ɣa ga velei é lɛɛni la Gala na pɛlɛi wu, Abiata ɣɛi ma ga laa‐ʋaale gwalai, é kpoolo‐ʋɔi nii mi dái ɣɛ na Gala gaazu, é ga kpooloi nii ɛ́ lɛ ŋɛni tɔ su ga nu ta nɛpɛ ge mi é wulo laa‐ʋaalegitiɛ wulu. Tɔwɔ é miini é ta ʋe niitiɛ ya ƃalaa te ɣɛni bá.”

²⁷ Ziizɛ ɣɛni wɔnɔ te ma, “Gala ge doowo foloi wuloni ŋetea nu ƃuse ʋaa ma. Kɛ̀ ɛ́ lɛ nu ƃuse wuloni ŋetea doowo foloi ʋaa ma.

²⁸ Na ʋaa ma nu ƃuse lui ɣa doowo foloi maazu ƃalaa pɛ.”