MAKI 16 - DEƲE NIINƐI

Ziizɛ wu‐ziɣi ʋai saa ya

¹ Tei doowo foloi leveni, Meele Mɛdaliini ƃɔga Jĩi dee Meele é vɛɛ Saloomi va te gulo viɛ wũ‐nɛɛ‐nɛɛ geeani kɛɛ ʋaa ma te lii la te siɛ Ziizɛ mawomai ma.

² Te liini kabai la ga Laali ʋoloi ga subu‐zubu woza ɣɛi ma ƃɔɔ nɔ siɣizu ma.

³ Te ɣɛni ɣɛɛzu ɣii ma, “Ƃɛ ɣa yá kwɔtii ɣili‐kili é siɣi kabai la de vɛ?”

⁴ Tei te wũ bu ziɣini, te wɛlɛni kwɔtii va kili‐kiligɛi siɣiai kabai la. Kpakpai ɣɛ ga ʋikɛ.

⁵ Tei te lɔɔni kabai zu, te wɛlɛni zolopo ta va é zeini ga te yee za‐su vele yogbo kwele ge kɔ ba. Maʋai te ɣɛɛni pɔ̃ɔ.

⁶ É ɣɛni te ma, “Màʋai mɛ lɛ wo ɣɛ pɔ̃ɔ. Wa Nazɔi Yiizɛ ɣaa ziɛzu nii te kpakoni gului ma. É wu ziɣia saa ya. Ɛ́ lɛ vɛ. A wɛlɛ vɛ va te daani na.

⁷ Kɛ̀ a li wo bo kala dopoi zɔitiɛ ma é vɛɛ Pite va wo ɣɛ te ma, ‘Tɔ liizu wo luo Geealali. Ná ɣa wa pɛtɛ na, è ɣɛ velei é boni la wo ma.’ ”

⁸ Te wuloni kwɔti ɣabai zu te vela ga kpize, ƃɔvɛlaale te ɣɛni ƃelizu ga duo. Tɛ lɛ faa ta woni nu nɛpɛ ma, ƃɔvɛlaale te ɣɛni luozu. Maki na kɔlɔi wɛ̃ɛ ma ɣaa. Kɛ̀ kɔlɔ wɔlɔ‐zaɣagi taniga te woi niitiɛ ʋɛɛni ba:

Mawoozagi wɛ̃ɛ‐suʋɛ Ziizɛ wuloni Meele Mɛdaliini ɣaazu

⁹ Tei Ziizɛ wu ziɣini saa ya ga doowo folo wuloa‐ga subu, é wuloni Meele Mɛdaliini ɣaazu ga maa wũ pa. Na ɣa ga nui wɔlɔ é gɔʋɛ yowũ lɔfela ƃɛɛni pulu.

¹⁰ Meele liini sa é bo niitiɛ ma te ɣɛni Ziizɛ va, tei te maa wõiyai ɣɛ tiɛ kpee loo.

¹¹ Kɛ̀ tei te mɛnini ga zɛʋui ɣɛni zéea, na ɣa ɣɛɛ na Meele pɛtɛga, tɛ lɛ ŋɛni laazu ga na.

Ziizɛ wuloni kala dopoi felegɔ ɣaazu

¹² Na wuloa su niitiɛ te ɣɛni bá wɔlɔ, é wuloni felegɔ ɣaazu ga pele zii ƃalaa su vele, tei natiɛ te ɣɛni liizu kpala ga.

¹³ Te liini wulu te bo te vai zɔitiɛ ma te ɣɛni na wulu, kɛ̀ tɛ lɛ te woi ziɣini ga gaama.

Ziizɛ wuloni kala dopo puugɔ kai gilagi ɣaazu

¹⁴ Tei na wuloni ba, Ziizɛ wuloni kala dopo puugɔ kai gilagitiɛ ɣaazu ta letele te ɣɛi ma laa miizu. É yii ɣaa wãlani te ma toku ge zei faa ziɣizu ƃaa ʋai va te vɛ ga gaama ta ta wui‐zu‐ƃɔlɔgi ƃɔvɛlaale bu ziɣiai ma saa ya taitiɛ te pɛtɛni tɛ lɛ te woi ziɣini ga gaama.

¹⁵ É ɣɛni te ma, “A li zui ɣaazɔ zu wo woo niinɛ vagɔi wo nu ƃuse ɣaazɔ ma.

¹⁶ Nui yá siɣi ga gaama te bataize ɣɛɛ la towaa valo. Kɛ̀ nui lɛ siɣini ga gaama faa ɣa yɛ ma.

¹⁷ Taitiɛ ta siɣi ga gaama, niitiɛ ɣa ta te ɣɛ te dɛ ga seelea: Ta gɔʋɛ vowũa ƃɛ numaa wulu nà daa‐zeigi zu tiɛ zii woo niinɛa wo.

¹⁸ Ani ta kaali zo na ɔɔ te sale yowũ ƃoale, ɛ́ lɛ faa ɣɛɛ ga tiɛ. Ta yee vɛɛ seeƃɛ vea ma natiɛ tiɛ valo.”

Gala ge lɛɛni ga Ziizɛ pɔ́ ʋɛ

¹⁹ Tei sa de maliɣii Ziizɛ ƃɔɛni te wɔ, Gala ge siɣini é lɛɛ la wɔ vɛ. É zei sa ga Gala zee za‐su vele.

²⁰ Te liini te Gala goi wo ŋada ƃɔgɔpɛ. De maliɣii ɣɛni te va tiɛ tii ɣɛ ta tiɛni. É te woi maa viini ga velei seelea te ɣɛni la ba.]