LUKI 8 - DEƲE NIINƐI

Ŋazaitiɛ te vɛɛni Ziizɛ va

¹ Tei sa na wuloni ba, su lɛ ŋɛni woozani Ziizɛ li yíɛ leve‐teve taitiɛ zu ta kpaƃaitiɛ yíɛ Gala goi wo. É ɣɛni liizu natiɛ ga woo niinɛ vagɔi pilegɛi Gala na masadai va. Tɔwɔ kala dopo puugɔ kai felegɔitiɛ te ɣɛni ba.

² Ŋazaa taniga te ɣɛni ba ƃalaa pɛ. Natiɛ ta ga ŋazai niitiɛ é seeƃɛ valoni te va ta niitiɛ é gɔʋɛ yowũ ƃɛɛni te wulu. Te ɣila ge ɣɛni ga Meele nii tɔ tili ga Mɛdaliini. Towaa Ziizɛ gɔʋɛ yowũ lɔfelai ƃɛɛni pulu.

³ Kuuza ŋazai Jowana ɣɛni ga te ɣila. Kuuza na ɣɛni ga masagi Yɛloo weligi ƃawola nui. Te ɣila ge ɣɛni wɔnɔ ga Suzana é vɛɛ zɔitiɛ lamaa va. Ta ɣa Ziizɛni baa ʋaa‐ɣɛɛ ŋɛnii wuloni te weligi zu.

Sakpegi é vile woza‐vili nui va

⁴ Tei kpɔ gwala ɣaa lɛɛni ba ŋada ɣila, numaitiɛ tiɛ wulo taa ɣile‐giledaitiɛ zu tiɛ va Ziizɛ wɔ, é boni sakpe goo zu é ɣɛ tea,

⁵ “Woza‐vili nu ta liini ga é ná mɔlɔ zuwui vili. Tei é ɣɛni mɔlɔi ʋazasu, taniga te looni pelei ma, numaa te ziɛ te maazu, wɛ̃niitiɛ te te ƃoale.

⁶ Taniga te looni fasa ɣa. Tei te wɔ̃lɔni, te ʋulu‐ʋuluni ƃɔvɛlaale ná lɛ ŋɛni yɛƃɛni.

⁷ Taniga te looni ŋai saama, ta ŋaigitiɛ te ƃɛtɛ nàtiɛ te te maa ƃoale.

⁸ Taniga te loo pɔlɔ vagɔ ŋada laa te ƃɛtɛ te maɣai yíɛ ɣɛ te ɣa sei‐zu wũ gile‐gile.” Tei Ziizɛ nii woni, é woo lɛɛni é ɣɛ tea, “Nui faa‐mɛni gui wũ ba, pagɛ é mɛni.”

Sakpegi‐zɔɔ zaƃui

⁹ Tei ná kala dopoitiɛ te gaa zaɣa kɛɛni ga é sakpegi zu‐wulo‐zu lɛ ga tiɛ,

¹⁰ é ɣɛni tea, “Wa dɛi, pelei laa laogɛ wo ʋaa ma ga wo Gala na masadai zu loowu ʋaitiɛ wɛ̃ɛ. Kɛ̀ tɔ sakpe goo zu zɔitiɛ ʋaa ma, kɛɛ ʋaa ma ‘ta wɛlɛ te wɛlɛ tɛ lɛ ná maa ƃɛɛ, ta mɛni te mɛni tɛ lɛ gaa ɣaa.’

Ziizɛ sakpegi ɣavele zu wuloni

¹¹ “Sakpegi zu‐wulo‐zuvɛ ɣa. Mɔlɔ ɣai ɣa ga Gala goi.

¹² Niitiɛ te looni pelei ma ta ga numai niitiɛ te woi mɛniga, dɛvele va é kulo te ɣigitiɛ zu, kɛɛ ʋaa ma te mɛ lɛ siɣi ga gaama tɔ valo.

¹³ Niitiɛ te looni fasai ɣa ta ga numai niitiɛ ta woi mɛni te yee zei bu ga kuu‐zu‐nɛɛ. Kè te mayãtai lɛ vilini. Ta Gala goi ziɣi ga gaama nɔ ga siɛ ta wolo, kɛ̀ siɛgi ɣa ziiti na ga tɛ‐ga wo ga tiɛ, ta ziɣi pulu.

¹⁴ Niitiɛ te looni ŋaigi zu, natiɛ ta dɛi ta ga numai niitiɛ ta woi mɛni, kɛ̀ ta ɣɛ na sa ta lii wosu, ŋetea ŋɛnii maƃala ƃɔga maƃɛtɛ ʋai é vɛɛ mayii‐ma‐ɣɛɛ ʋai va nàtiɛ ta te maa ƃoale. Te maɣai wɔ gɛ lɛ sa wɔlɔɔ.

¹⁵ Niitiɛ ta loo zuu vagɔi zu ta ga numai niitiɛ ta woi mɛni te ɣata ba tele‐bo tuo zu ta zii vagɔ. Na ɣa ɣɛɛ na tiɛ yii lɔ te ɣaa‐vaa yìɛ ɣɛ te ɣa.”

Labo ɣɛɛ ʋai ŋɛni yãka wu

¹⁶ Ziizɛ ɣɛni tea, “Nu lɛ labo ɣaa zoga ɔ́ ŋɛni yãka vɛɛ maazu ɔ́ nɔ ɣɛ ga é dɔ bete wu. Kɛ̀ towaa pile labo‐zei ŋɛnii ɣa kɛɛ ʋaa ma taitiɛ ta lɛ pɛlɛi wu te wɛlɛ ŋada wodoai va.

¹⁷ Toku ge zei ga ŋɛni ta nɛpɛ gɛ lɛ na ɔ́ loowu maʋaa ɔ́ ƃe wulozu kɛnɛ ma ɔ́ nɔ ɣɛ ga doowu ʋaa ta nɛpɛ ge ɣɛ na é ƃe wulozu kala‐kala ga é ɣɛ ga numaa wɛ̃ɛ faa.

¹⁸ Na ma a ƃɔɔ maazu vɛtɛ ga velei wa wui to da faa ma. Ƃɔvɛlaale nui ŋɛnii ya zéea ta ɣa vɛɛ ba é ʋe zéea. Nii ta lɛ zéea, nii ƃalaa é kígi zu ga tɔ zéea nà ɣa wulo zéea.”

Ziizɛ dee vɛɛ déɣeitiɛ va

¹⁹ Ziizɛ dee ƃɔga déɣeitiɛ te vaani pɔ́ vɛ, tɔwɔ tɛ lɛ ŋɛni zoosu tɔ ziiti vɛ é ɣɛni na kpɔgi vɛ.

²⁰ Te boni sa má te ɣɛ ma, “È lee vɛɛ è leɣeitiɛ va ta loni ŋeteavɛ tiɛ wõi ɣɛ ga te è vɛtɛ.”

²¹ Kɛ̀ é ɣɛni te ma, “Dèe vɛɛ deɣeitiɛ va ta ga niitiɛ ta Gala goi mɛni te su ʋaa ɣɛ.”

Ziizɛ fãgai ɣaa yiini

²² É ɣɛni ga folo ɣila Ziizɛ vɛɛ ná kala dopoitiɛ va te vili ziɛ‐ɣa ŋee ta zu. É ɣɛni te ma, “A de ziɛ walai leve a dii zɔ ɣakei mavele.” Na ma te wu ziɣini sa ga te li.

²³ Te ɣɛi ma ziɛi ɣa tiɛ li, ŋii leveni ga Ziizɛ. Nà ɣɛɛzu fãga ƃakpa yìɛ teve su ga vaa ziɛi maazu. Kẽegi laa vɛɛ sa ga ʋega te ya ga ziɛ. Faa ƃoei zɛlɛni sa te wũ maazu.

²⁴ Te liini sa te Ziizɛ ɣaazu lao tiɛ ɣɛ ma, “Gá nu keea nu, gá nu keea nu, de zu ɣa ƃɔnɔ wosu!” É ɣaazu laoni sa é yii ɣaa wãla fãgai ma ta ziɛ‐ɣiligi. Nàtiɛ te ƃɔlɔ sa, ná ɣaa yii.

²⁵ É ɣɛni kala dopoitiɛ ma, “Wa yee‐la‐mai mu ge wɔ?” Te ɣɛni luozu, maʋai wala wulo ga tiɛ, tiɛ ɣɛ ɣii ma, “Ƃɛ mu ka ga nii yá fãga ƃɔga ziɛ te leʋe ƃalaa, natiɛ tiɛ goo‐mɛni kulo zéea?”

Ziizɛ zunui valoni gɔʋɛ yowũitiɛ te ɣɛni pulu

²⁶ Te ziitini sa Gɛgɛsĩi yui zu nii é ɣɛ Geealali ɣeeɣidavɛ.

²⁷ Tei ƃɔɔ nɔ Ziizɛ wuloni ziɛi ɣa é vile kakei ɣa, zunu ta wuloni tai zu ta tɔ te wũi é ga nui gɔʋɛ yowũa te ɣɛni pulu. Su woozani seɣe‐loo ʋaa lɛ ŋɛni ba. Na ɣa ɣɛɛ na ɛ́ lɛ ŋɛni pɛlɛ wu, kaba laavɛ ɣa é ɣɛni na.

²⁸ Tei é wɛlɛni Ziizɛ va, é lobani é loo daa wu yíɛ bo ga woo wala yíɛ ɣɛ tea, “Yà ʋaa zɛƃɛ ɣa é nà faa zu, yài è ga Ziizɛ, Galagi é ŋɛni pɛ maazu è ga dúu? È veevɛ, mɛ lɛ kɛ gɔ̀ laƃa.”

²⁹ É nii woni ƃɔvɛlaale Ziizɛ boni gɔʋɛ yowũi ma ga é ziɣi pulu. Toku ge zei ga ɔ́ zunui nii zo ga ɣee nɛpɛ. É ɣɛni ga pilisine. Tɔ yɔ̃wɔ lo ba te too kpeewɔ ɣa. Kɛ̀ ɔ́ natiɛ ɣale‐ɣale, gɔʋɛ yowũi lii la sa zuu ʋɔi zu.

³⁰ Ziizɛ gaa zaɣa kɛɛni é ɣɛ ma, “Yà laa‐zeigi ɣa ga ƃɛ?” É ɣɛ nà ma, “Ta ɣɛ mà ‘Nu‐ƃulu‐kpakpa.’ ” Zunui nii woni, ƃɔvɛlaale gɔʋɛ yowũ lamaa vileni pulu.

³¹ Gɔʋɛ yowũitiɛ te pee ʋeeni Ziizɛ vɛ ga é mɛ lɛ bo te ma tɔ ziɣi pulu tɔ li ƃɛkpɛ zeɣei zu.

³² Tɔwɔ taa wũi kpulu kpakpa wala ɣɛni laa miizu na gizi kakamavɛ. Gɔʋɛ yowũitiɛ te pee ʋeeni Ziizɛ vɛ ga é ƃe te va te vile bũigi natiɛ wulu. É ʋa sa bu te ya.

³³ Te ziɣini sa zunui wulu te li te vile bũigitiɛ wulu. Bũigitiɛ te ƃoloni fo te yii ziɛlavɛ ná zɛlɛgɛi te vili ziɛi wu te yɛ bu.

³⁴ Tei bũi‐maazu‐vɛtɛ beaitiɛ te wɛlɛni fai va é ɣɛɛni, te velani te li te bo tai zu te bo kɔnɔ zui na zu.

³⁵ Numaitiɛ te wuloni sa te li ga te wɛlɛ fai va é ɣɛɛ. Te vaani Ziizɛ wɔ vɛ te wɛlɛ zunui nii va é gɔʋɛ yowũitiɛ ƃɛɛni pulu é zeini Ziizɛ wɔwɔ wu, seɣe ma, kí kpɔɔƃɔɔgi vai sa pɔ. Numaitiɛ te luoni.

³⁶ Taitiɛ te wɛlɛni ná va te boni sa zɔitiɛ ma ga velei zunui valoni la. Na ɣa ga nui gɔʋɛ yowũitiɛ te ɣɛni pulu.

³⁷ Gɛgɛsĩi ligi zu veaitiɛ ɣaazɔ te boni Ziizɛ ma ga é ziɣi te woba é li, ƃɔvɛlaale duo ƃakpa vilini te ma. Na ma é vilini kẽegi zu é li wulu.

³⁸ Nui nii é gɔʋɛ yowũi ƃɛɛni pulu é pee ʋeeni Ziizɛ vɛ ga é yɛ nà va. Kɛ̀ Ziizɛ teveni yíɛ ɣɛ ma,

³⁹ “Li wulu wɔ taa zu. Nii liigoi Gala ge kɛɛ yìɛ è kulo la è bo.” É liini sa yíɛ bo ga woo maa zeezea tai wɔlɔ‐kɔlɔ ma ɣaali ga nii liigoi Ziizɛ kɛɛni bɛ́.

Jailɔ duu ŋaza nui vɛɛ ŋaza nui va é ʋowũni Ziizɛ na seɣei va

⁴⁰ Tei Ziizɛ liini wulu, nu ƃɔgi yee zeini bu, ƃɔvɛlaale te pɛ te ɣɛni maa kpowũsu.

⁴¹ Zunu ta vaani pɔ́ daa ga Jailɔ. É ɣɛni ga Gala‐feli wɔtai maazu‐ʋaa‐wo nui ta. É looni Ziizɛ wɔwɔ wu é maa nɛɛnɛ ga nà li ná pɛlɛi wu.

⁴² É nii ɣɛɛni, ƃɔvɛlaale ŋaza nu luu ɣilekpugi nɔ ɣa é ɣɛni zéea. Tɔwɔ kaa wenagi ɔ́ zoo sa é ziiti kwena puugɔ kai felegɔ zuu. Lopoi nii ɣɛni sa zaazu. Tei Ziizɛ ɣɛni liizu, numaitiɛ te zɔsɔlɔni ba te maa lite.

⁴³ Ŋaza nu ta ɣɛni na ŋama kɛɛ wuuzu ga kwena puugɔ kai felegɔ. E weli gaazɔ wɛɛni zowoa ma, tɔwɔ nu ta nɛpɛ gɛ lɛ ƃega zoo ɔ́ balo.

⁴⁴ Ŋaza nui nii vaani é leve ga pulu vele é ʋowũ ná seɣei mayifegi va. Ŋama‐wuai zu leve sa zéea ga maa ʋilea.

⁴⁵ Ziizɛ ɣɛ tea, “Ƃɛ ve é ʋowũga bà?” Tei sa nu pɛ ge sakpeni, Pite ɣɛni ma, “Kala‐mɔi, kpɔ gwalai é è maa litega tiɛ ɣizi‐ɣizi yìɛ!”

⁴⁶ Kɛ̀ Ziizɛ ɣɛni ma, “Nu ta ʋowũga bà. Ƃɔvɛlaale gè gaa ɣaa ga gaa‐ƃaa ta wulovɛ pɔ̀ vɛ é li.”

⁴⁷ Tei tɔwɔ ŋaza nui gaa ɣaani ga maa lɛ ŋɛni loowuni, é vaani yíɛ ƃeli. É looni sa Ziizɛ laa wu é kulo la é bo nu ƃɔgɔpɛ gaazu ga zaƃui é kɛɛni yíɛ ʋowũ Ziizɛ va ta velei é baloi wo da ga maa ʋilea.

⁴⁸ Ziizɛ ɣɛ sa ma, “Dùu, yà yee‐la‐mai ɣa é kɛɛ è valo. Li zii‐laa zu.”

⁴⁹ Ziizɛ ɣɛni dɛ nɔ ƃɔɛzu, nu ta wulo Gala‐feli wɔta maazu nui na pɛlɛi wu é va é ɣɛ ma, “È lui zaa. Mɛ lɛ wɔnɔ sa kala‐mɔi laa ziɣi ba.”

⁵⁰ Tei tɔwɔ Ziizɛ mɛnini, é gaa woteni é ɣɛ Gala‐feli wɔta maazu nui ma, “Mɛ lɛ luo. Siɣi nɔ ga gaama, towaa valo.”

⁵¹ Tei Ziizɛ vaani pɛlɛi la, ɛ́ lɛ ʋaani bu nu ta nɛpɛ gɔ vɛɛ ba ta tɔ tɔ lɛ bu é wulo Pite wulu ta Jɔ̃ é vɛɛ Jĩi va, é vɛɛ sa wɔnɔ lopoi dee va ta keea.

⁵² Nui ɣaazɔ ɣɛni wɔlɔzu maa‐wõi loai te ma ŋaza nu lomai ʋaa zu. Kɛ̀ Ziizɛ ɣɛni te ma, “A mɛ lɛ wɔlɔ. Ƃɔvɛlaale ɛ́ lɛ zaani. Tɔ ŋiizu.”

⁵³ Te ŋɛɛni ma kwɛ̃ɛ pele ma te vɛ ga lopoi zaavɛ.

⁵⁴ Kɛ̀ é soni zee va yíɛ tili yíɛ ɣɛ ma, “Lopoi, wu ziɣi.”

⁵⁵ Zɛʋui loo sa su wɔnɔ wulu é wu ziɣi ga maa ʋilea. Ziizɛ deʋeni é da te ya ga te ŋɛni ta ʋe zéea é mi.

⁵⁶ Náa kaa veaitiɛ ɣaazu laa ʋeni. Kɛ̀ é boni te ma ga fai é ɣɛɛ te mɛ lɛ ta nɛpɛ bo nu ma.