LUKI 17 - DEƲE NIINƐI

Faa yowũ

¹ Ziizɛ ɣɛni ná kala dopoitiɛ ma, “Tɛ‐gaitiɛ ta wo ga nu é ziɣi pele va ta va ƃɔɔ ti. Kɛ̀ kpalo velivɛ nui nii ma yá va ga tiɛ!

² Ɔ́ ɣɛ ga faa vagɔ manui ʋaa ma ga ani ɔ́ kwɔti vii‐vii sɛlɛ na wɔgi va é vili yuwu wu é leve kɛɛ va ga zaƃu ga lopaa woloi niitiɛ te ɣila ge ziɣi pele va.

³ A ƃɔɔ maazu vɛtɛ. Ani è wɔi ta ɣa faa yowũ ɣɛɛ na, yii ɣaa wãla ma. Tɔwɔ a wulu ɣaa ʋe na faa yowũi va, su ʋaa yɛ.

⁴ Ani yá faa yowũ ɣɛɛ na ga yìɛ folo ɣila zee wu ná zei‐zu ɣɛ lɔfela, tɔwɔ é vaala ɣɛ è wɔ vɛ lɔfela yíɛ ɣɛ è ma, ‘È veevɛ, gɛ̀ lɛ sa ta ɣɛɛ,’ kɛni yà su ʋaa yɛ.”

Zee‐la‐ma

⁵ De maliɣii na keelaitiɛ te ɣɛni ma, “Gá yee‐la‐mai zu wɔɔlɔ ma!”

⁶ De maliɣii ɣɛ te ma, “È ɣɛ zee‐la‐ma ɔ́ wɔɔlɔ na wo ya é ɣɛ ƃalaa ga “mɔsita” mawului maɣai liigo, wɔ yɛ kpodogi ta ma, ‘Lɔɔ wulo è li è zei yuwu wu.’ Tɔwɔ é goo‐mɛni kulo wo ya.”

Tii‐ɣɛɛ nui wutii

⁷ Ziizɛ ɣɛni tea,“? Tii‐ɣɛɛ nu ɣa ɣɛ na wo ta nɛpɛ zeea yíɛ tulu tɛ ɔɔ yíɛ baala maazu vɛtɛ é ziɣi kpalagi zu é va, manui ɣa ɣɛ tii‐ɣɛɛ nui ƃɔɔ ma, ‘Va de laa mi’?

⁸ Kɛ̀bɛ to mu towaa ɣɛ manui ma, ‘Ɣavele ƃɛtɛ na è nà kpɔkɔ wɔ̃nɔgi ɣili. Na ɣa ɣɛɛ na è zaama ɣili yìɛ nà daa‐mii ŋɛni ʋe zèea é yɛsu gè laa mi gè dɔɔ ƃoale. Na ɣa wulo na ba, yà sa yà laa mi yìɛ dɔɔ ƃoale.’ Kɛ̀bɛ towaa na wo má, kɛlɛi?

⁹ ?Towaa tii‐ɣɛɛ nui mama toku ge zei ga zɔitiɛ é te leʋea é te la zéea, nà te ɣɛɛni?

¹⁰ Vele nɔ na é la ga wiɛ. Niitiɛ ɣaazɔ te leʋeai te la wo ya, wa te ɣɛɛ na, a ɣɛ tea, ‘Gá ga tii‐ɣɛɛ veai niitiɛ tɛ lɛ kuloni bu. Nii nɔ é yɛga ga gé vaa ʋaa towaa gé kɛɛ. Gɛ́ lɛ ta vɛɛni na va.’ ”

Ziizɛ gee vea puugɔ valoni

¹¹ Ziizɛ ɣɛi ma pele ma yíɛ li Yɛlusulɛɛ, é leveni ga Geealali ƃɔga Sameelia te yɔɔzuvɛ vele.

¹² Tei é ɣɛni lɛɛzu taa ta zu, ta gee vea puugɔ te wũini niitiɛ te zu wuloai ɣɛ ba te loni.

¹³ Te woo lɛɛni ƃɔɔ gee zu te ɣɛ ma, “Ziizɛ, gá nu keea nui, gé ɣaazu‐maa‐wõi ɣa.”

¹⁴ Tei é te vɛtɛni é ɣɛni te ma, “A li wo ƃɔɔ lɛ ga laa‐ʋaalegitiɛ.” Tei sa te ɣɛni liizu, gee ƃeani te ma te maa ziɣi.

¹⁵ Tei sa te gila ge wɛlɛni na va ga balovɛ, é galeni ma wulu yíɛ Gala daa maa lɛ ga woo wala.

¹⁶ É looni sa Ziizɛ wɔwɔ wu yíɛ mama fe bɛ́. Tɔwɔ é ɣɛni ga Sameelia nu.

¹⁷ Ziizɛ ɣɛɛ vele ɣa na tea,“? Nu puugɔ lei ɔ́ baloi wo te maa ɔ́ ziɣi? Taawuoitiɛ wɔ mu?

¹⁸ ?Te ta nɛpɛ gɛ lɛ zooni ɔ́ gale ma ɔ́ Gala daa maa lɛ é wulo wɛ̃i nii wulu?”

¹⁹ Ziizɛ ɣɛ sa ma, “Wu ziɣi è ya lii wo. Yà yee‐la‐mai é è valoa.”

Gala na masadai vaa ʋai

²⁰ Tei Favilesiitiɛ te Ziizɛ ɣaa zaɣa kɛɛni siɛgi ma Gala na masadai vaazu la, é te woi ɣaa woteni é ɣɛ te ma, “Gala na masadai lɛ vaazu ga é ɣɛ ga ŋɛnii nu ɣa ɣaazu la ma.

²¹ Ɛ́ lɛ kɔnɔ ga tiɛ bo wiɛ ga ‘Towaa!’ ɔɔ ‘Tɔ nu!’ Toku ge zei ga Gala na masadai ɣa wo yii zu.”

²² Ziizɛ ɣɛni ná kala dopoitiɛ ma, “Siɛgi ɣa vaazu ga wiɛ wõi ɣɛ ga wo wɛlɛ nu ƃuse lui na yɛminigi zu ʋoloi ɣila ba. Tɔwɔ wɛ lɛ pɛtɛga.

²³ Na ɣa ɣɛɛ na ta ɣɛ wo ma, ‘A wɛlɛ! Tɔ nu!’ ɔɔ ‘A wɛlɛ! Towaa!’ Ta na wo na, a mɛ lɛ li na ɔɔ a mɛ lɛ vile te wulu.

²⁴ Su‐wulo‐zu ɣa ga è ɣɛ velei nɔ mea‐meai ɣa kulo la gee wɔlɔgi ma é maa wodo é ziɣi ƃɔɔ mazɛvɛ ɣila ma é loo zɔi ma, vele nɔ na nu ƃuse lui maʋai ɣa ɣɛɛ la ná kui ma.

²⁵ Kɛ̀ mamaa wũgi pa kɛni é laa nɔwɔ wo faa lamaa zu, ʋala‐wonɛɛgi niitiɛ te ɣɛlɛ ba.

²⁶ È ɣɛ velei nɔ é ɣɛɛni la Nowa na yɛmini su, vele nɔ na yá ɣɛɛ la nu ƃuse na yɛminigi zu.

²⁷ Na maziɛ su te ɣɛni laa miizu tiɛ dɔɔ ƃoale tiɛ ŋaza wulo, ŋazaa tiɛ zei zini bɛ, é yɛsu foloi na ziiti nii Nowa vilini ma ziɛ‐ɣaa ŋeegi zu. Ziɛ‐ʋegi va sa é te pɛ te zu ŋala‐ŋala.

²⁸ Vele nɔ na é ɣɛɛni la Laati na yɛmini su. Te ɣɛni laa miizu tiɛ dɔɔ ƃoale, tiɛ ŋɛni ɣeea tiɛ ŋɛni zɔ̃wɔ wulo, tiɛ sii‐zii ŋɛni zii tiɛ to‐to ŋɛnia lo.

²⁹ Kɛ̀ ʋoloi Laati wuloni la Saadɔ̃ lai va, ŋabu vɛɛ fukɛ va te wuloni gee wɔlɔgi zu te yii è ɣɛ tine ɣa ɣɛ puuzu te te zu ŋala‐ŋala.

³⁰ Vele nɔ na a ɣɛɛ la ga ʋoloi nu ƃuse lui maʋaa ɣa wulo la kɛnɛ ma.

³¹ Nà maʋoloi nui nii yá ɣɛ pɛlɛ wɔma, ná sɔɔlaitiɛ te pɛlɛi wu, pagɛ é mɛ lɛ vile ɔ́ te ziɣi. Pele zii ɣilagi nɔ zu nui nii yá ɣɛ kpalagi zu, pagɛ é mɛ lɛ gale ma wulu.

³² A ɣi zɛ Laati ŋazai maʋaa zu.

³³ Nui nɛpɛ yá ɣɛ pele ɣaa ziɛzu ga zɛʋui yɛ zéea, towaa yɛʋui vili. Kɛ̀ nui nɛpɛ yá yɛʋui vili towaa yɛ zéea.

³⁴ Gè bo wiɛ, na maƃidii nu felegɔ ɣa ɣɛ bete ɣila ga, gila ge wulo su gilagi yɛ su.

³⁵ Ŋaza felgɔ ta ɣɛ mɔlɔ ziɣezu ŋada ɣila, gila ge wulo su gilagi yɛ su.[

³⁶ Zinaa felegɔ ta ɣɛ kpalagi zu gila ge wulo sú, gilagi yɛ sú]”

³⁷ Te ɣɛni sa Ziizɛ ma, “Minɛ ɣa ɣɛ le, gé maliɣii?” Tɔwɔ é ɣɛ te ma, “Vɛ suo woma na, ná ya kooɣɛitiɛ ta ɣaa kpo na.”