LUKI 13 - DEƲE NIINƐI

A luo ʋelei maa ʋeli, na laale wa za

¹ Nu taniga te ɣɛni na nà maziɛ kpɔɔƃɔɔgi nɔ ma niitiɛ te faa woni Ziizɛ ma é vile Geealali veai niitiɛ va Paila te vaani, na ɣa ɣɛɛ na é kɛ te maŋamai zupu ga ta zalaɣa lo ŋɛniitiɛ te maŋamai.

² É te woi ɣaa woteni é ɣɛ te ma,“? Wo ɣigi zu, Geealali veai natiɛ te ɣɛni ga faa yowũ wala‐ɣɛɛ vea é leve Geealali veai zɔitiɛ ɣaazɔ va nà ɣavele laa‐nɔwɔ‐wogi wo saƃui ma te vɛ?

³ Gè bo wiɛ, ɛ́ lɛ ŋɛ na. Kɛ̀ kɛni nɔ wo wulu ɣaa ʋe faa yowũ va. Na laale wo pɛ wo zu ɣa ƃɔnɔ wo nɔ ŋɛ na.

⁴ ?Ƃaa nu puugɔ kai lɔsavai natiɛ sebei looni te ma é te vaa Silõa lai zu, wo ɣigi zu te ɣɛni ga faa‐ŋala‐ŋala gwala‐ɣɛɛ vea é leve numai zɔitiɛ ɣaazɔ va te ɣɛni zeini Yɛlusulɛɛ lai zu?

⁵ Gè bo wiɛ, ɛ́ lɛ ŋɛ na. Kɛ̀ kɛni wo wulu ɣaa ʋe faa yowũ va. Na laale wo pɛ wo zu ɣa ƃɔnɔ wo ŋɛ na.”

Sakpegi é ʋile gɔɔʋa wului ʋa ɛ́ lɛ ʋaa

⁶ Ziizɛ sakpegi zɔɔni é ɣɛ tea, “Zunu ta gɔɔva wulu zeini ná kpalagi zu. Tɔwɔ é vaani yíɛ mavaa ɣaa ziɛ gá, ɛ́ lɛ ta vɛtɛni.

⁷ É ɣɛni sa kpalagi‐zu‐ƃɛtɛ nui ma, ‘Wɛlɛ! Kwena saagɔi nii yee wu kɛ̀ɛvɛ vaazu gìɛ gɔɔvai nii mavaa ɣaa ziɛ gá, nà wɔ gɛ̀ lɛ ta vɛtɛni gá. Mawului wɔ. Zɛƃɛ ƃɛtɛ ɣa a ɣɛ bosu zui ma?’

⁸ Nà wɔ ge goi ɣaa woteni é ɣɛ ma, ‘ƃe nɔ ba, kèea, é yɛ na kwenagi nii zu ƃalaa. Gà maa wɔ gè maa lite gè nikɛ ƃoo wu tɔɔ.

⁹ Ani yá vaa na, na wala ɣa ɣɛ ga faa vagɔ. Kɛ̀ ani ɛ́ lɛ ɣɛ na ɣɛɛni, gà sa gà pɔ.’ ”

Ziizɛ seeƃɛ ŋaza nui ʋaloni ga doowo foloi

¹⁰ Ziizɛ ɣɛni kala‐bo bosu Gala‐feli wɔta ɣila bu ga doowo folo.

¹¹ Tɔwɔ ŋaza nu ta ɣɛni na gɔʋɛ yowũi yá nu zeeƃɛ nà kɛɛ pulu ga kwena puugɔ kai lɔsava. Maa vɛi ɣɛ ɛ́ lɛ ƃega zoo ɔ́ ɣaa lɔ.

¹² Tei Ziizɛ wɛlɛni ba é tilini é ɣɛ ma, “Ŋaza nu, è wulovɛ sa yà zeeƃɛi zu.”

¹³ É yee vɛɛni sa ɣɛ ŋaza nui va, nà wɔ ge ɣaa lɔ ga maa ʋilea yíɛ Gala daa maa lɛ.

¹⁴ Kɛ̀ nui na Ziizɛ valoni ga doowo foloi maʋai wãla pele ma Gala‐feli wɔtai maazu‐ʋaa‐wo nui ma, é ɣɛni numaitiɛ ma, “Folo lɔzita ɣa dɔwɔ wui zu te ga foloitiɛ pagɛi nu tii ɣɛ te ma. A wiɛ va nà ʋoloitiɛ ma tiɛ wo valo, kɛ̀ ɛ́ lɛ ga doowo foloi.”

¹⁵ De maliɣii zɛba sa é goi ɣaa wote é ɣɛ ma, “Wai ŋɛ ni ga daa‐nɛɛ‐wũ‐ba vea, kɛ̀bɛ wo ɣile‐giledai wa vɛɛzu wa nikɛ zinaa va ɔɔ wa zoo‐ʋaalega wiɛ te wulo te mawɔtaitiɛ wu wiɛ lo te luo ga doowo foloi wiɛ li ga tiɛ ga te ƃoale, kɛlɛi?

¹⁶ ?Ɛ́ lɛ ga faa vagɔ ga ŋaza nui nii Seeta gilia kwena puugɔ kai lɔsava yee wu é wulo gilii zu ga doowo foloi? Na ɣa ga ŋaza nui nii é ga Eeƃɔlɔhɛ̃ɛ manu zuwui ta.”

¹⁷ Tei sa é nii woni, taitiɛ ɣaazɔ te ɣɛni ga ná to‐da vea wũfe ge vilini te ma. Tɔwɔ numaitiɛ ɣaazɔ te kuu‐zu‐nɛɛ wuloni ƃaa‐la‐ma ʋai ɣaazɔ zu é kɛɛni.

Sakpegi é ʋile “mɔsitai” maɣai ʋa

¹⁸ Ziizɛ ɣɛni tea, “Gala na masadai wulovɛ ga zɛƃɛ? Zɛƃɛ ɣa gà po kɔ̃ɔ ma?

¹⁹ Maʋaa wulovɛ è ɣɛ “mɔsita” wului maɣai gilagi zunui siɣini é sei ná tulugi zu. Tɔwɔ é ƃɛtɛni é ɣɛ ga gulu. Na ɣa ɣɛɛ na wɛ̃niitiɛ te laɣa toni mavekegitiɛ ɣa.”

Sakpegi pilegɛi kpoolo‐ʋɔɔ ƃokolo ŋɛnii ʋa

²⁰ Ziizɛ ɣɛni wɔnɔ tea, “Zɛƃɛ ɣa gà Gala na masadai wo kɔ̃ɔ ma?

²¹ Kulovɛ è ɣɛ kpoolo‐ʋɔɔ ƃokolo ŋɛnii nii ŋaza nu siɣini é pu felavai nii zu é ɣɛni ga kpɔlɔ‐su ɣila é yɛsu ƃɔɔ é kpɔgɔpɛ kpokolo.”

Kpo zeɣei daa ƃoolagɛi

²² Ziizɛ liini sa yíɛ leve‐teve taitiɛ zu ta kpaƃaitiɛ yíɛ kala‐bogi wo yíɛ li ga Yɛlusulɛɛ vele.

²³ Nu ta ɣɛni ma,“? Gè maliɣii, niitiɛ te vaazu baloi wosu ta nɔ ga nu ɣile‐gile?” É ɣɛni te ma,

²⁴ “A wɔ ga wo leve ga kpo zeɣe la ƃoolagɛi laavɛ vele. Gè bo wiɛ, su‐wulo‐zu ɣa ga nu lamaa ɣa pele ɣaa ziɛ ga te lɛ, tɔwɔ mazobo gɛ lɛ ɣɛɛ tiɛ.

²⁵ Folo ɣila pɛlɛ wũda nui ɣa wu ziɣi na é pɛlɛi laa wulu, wa sa wa vɛɛ ga loga ga ŋetea vele wiɛ kpogi luƃo wiɛ ɣɛ tea, ‘Gè maliɣii, daa lao gé luo.’ Tɔwɔ tɔ sa a wo woi ɣaa wote é ɣɛ wo ma, ‘Vɛ wo ziɣia na gè lɛ ná wɛ̃ni.’

²⁶ Wa wɔ wa sa wa ɣɛ ɣɛɛzu ma, ‘Gé laa miini gé dɔɔ ƃoale è ɣaazu ma, yà wɔ è kala‐bo boni kui yɔɔzu.’

²⁷ Tɔwɔ towaa ɣɛ wɔnɔ wo ma, ‘Vɛ wo ziɣia na gɛ̀ lɛ ná wɛ̃ni. A ziɣi kòba, wai ɣaazɔ wo ga tuo‐vele‐yowũ lii‐ɣɛɛ veaitiɛ!’

²⁸ Ná ɣa wa ɣɛ kpee loozu na wiɛ yĩ gaa mi. Na ɣa ga wa wɛlɛ na Eeƃɔlɔhɛ̃ɛ va ta Aize é vɛɛ Yeekɔ va ta Gala daa woo‐wo beaitiɛ ɣaazɔ te Gala na masadai zu, wa wɔ wa ɣagi te yee zɔi wo va wo wulo na wulu vele.

²⁹ Numaa ta wulo ga folo wulo‐zu vele te wulo ga folo lii‐zu vele te wulo wɔnɔ ga nu yee za‐su vele ƃɔga nu wɔwɔ yee‐su vele foloi ʋaa va te va tiɛ laa mi Gala na masadai zu.

³⁰ A wɛlɛ! Taniga ta na te ga nu ɣaa‐ƃelaga, tɔwɔ ta ɣɛ ga nu maa wũga. Taniga te wɔnɔ na te ga nu maa wũga ta ɣɛ ga nu ɣaa‐ƃelaga.”

Ziizɛ na wõilai Yɛlusulɛɛ laa ʋaa ma

³¹ Nà maziɛ daa yɔɔzuvɛ nɔ Favilesiitiɛ te taniga te vaani te ɣɛ Ziizɛ ma, “Ziɣi vɛ è li, toku ge zei ga masagi Yɛloo wõini é è vaa.”

³² Ziizɛ ɣɛ te ma, “A li wo bo zazawui na ma ga gà gɔʋɛ yowũa ƃɛɛzu numaa wulu gìɛ seeƃɛ valo zaa vɛɛ ŋina va. Na ɣa ɣɛɛ na foloi sava kelei gà wolo nà tii ma.

³³ Na pɛ ge ɣɛɛvɛ, kɛni gà ɣɛ nà siɛi ma zaa ta ŋina é vɛɛ na wulu ʋoloi va. Ƃɔvɛlaale ɛ́ lɛ zolowoga ga Gala daa woo‐wo nu zu ƃɔnɔ wo ŋada ƃɔnɔ é wulo Yɛlusulɛɛ wulu.

³⁴ Ee Yɛlusulɛɛ lai, Yɛlusulɛɛ lai, yài è Gala daa woo‐wo beaitiɛ vaazu, niitiɛ te levegɛi è wɔ vɛ yìɛ te vaa ga te zɔɔ ga kwɔti, siɛ tamaa zu gɔ̀ wõi ɣɛ gè è zu veaitiɛ ɣaa lɛ ba è ɣɛ duu dee lɛɛ ɣa dea ɣaa lɛ ba wove bu, tɔwɔ tɛ lɛ ƃega kɛ!

³⁵ Tɔwɔ dàa wulovɛ sa yà vɛlɛi ʋaa zu. Gè bo yìɛ, ɛ̀ lɛ sa pɛ̀tɛga é yɛsu sa yìɛ bo yiɛ ɣɛ tea, ‘Tuuyiɛ ɣa ɣɛ nui nii ma é vaazu de maliɣii Gala na daa‐zeigi zu.’ ”