JƆ̃ 9 - DEƲE NIINƐI

Ziizɛ zunui valoni te kaani gaazu wuai

¹ Tei Ziizɛ ɣɛni levesu, é wɛlɛni zunu ta va nii te kaani gaazu wuai.

² Ná kala dopoitiɛ te gaa zaɣa kɛɛni te ɣɛ ma, “Kala‐mɔi, ƃɛ ɣa é faa yowũ ɣɛɛni, zunui nii ƃaa kaa veaitiɛ ve, na ɣa te kaa la gaazu wuai?”

³ Ziizɛ gaa wote é ɣɛ tea, “Ɛ́ lɛ ga zunui nii ɣa é faa yowũ ɣɛɛ ɔ́ nɔ ɣɛ ga kaa veaitiɛ. Kɛ̀ nii ɣɛɛvɛ ga Gala na tii lɛ ga numaa zunui nii maʋai maazu.

⁴ Nui é tèvega kɛni a da ná tii ɣɛ tei folo gee ma. Kpidi ɣa vaazu vɛɛzu ga nu nɛpɛ gɛ lɛ sa tii ɣɛɛ.

⁵ Ani nɔ gà zui zu, nà ɣa gè ga zui maŋada wodoai.”

⁶ Tei é nii woni, é laa yiɛ wuuni zuwãvɛ é pɔlɔ ɣaa mɔɔ la é siɛ gaazu‐wuu nui ɣaazu

⁷ é ɣɛ ma, “Li è wuo kpĩigi zu daa ga Selõa.” Daa‐zeigi na zu‐wulo‐zu ɣa ga “Tevegɛ.” Na ʋaa ma é liini é wuo é va wulu yíɛ sa wɛlɛ.

⁸ Síi yɔ̃wɔitiɛ vɛɛ zɔitiɛ va te pɛtɛni wɔlɔ kɛ́i ma ga feli‐wo nu te ɣɛni tea, “?Zunui lɛ ga nii ɔ́ zei yíɛ felii wo?”

⁹ Taniga te ɣɛni tea, “Tɔ ve.” Zɔitiɛ wɔ te ɣɛ tea, “ƃa. Kulovɛ la.” Nui te baloi woni la é ɣɛni tea, “Nà ɣa gè ga manui.”

¹⁰ Te ɣɛ ma, “È ɣaazuvɛ leveni ɣɛ le mu é ziɣi ma?”

¹¹ É gaa wote é ɣɛ tea, “Zunui daa ga Ziizɛ é pɔlɔ ɣaa mɔɔni é siɛ gàazu é ɣɛ mà, ‘Li Selõa è wuo.’ Dìi vele ɣa na ɣɛ gè wuo, gàazuvɛ wɔ ge ziɣi sa ma.”

¹² Te ɣɛ ma, “É wɔ?” É ɣɛ tea, “Gɛ́ lɛ kalama wɛ̃ni.”

Favilesiitiɛ te faa woni é vile zunui valo ʋai va

¹³ Nui gaazu wuai ɣɛ wɔlɔ te vaani la Favilesiitiɛ wɔ vɛ.

¹⁴ Tɔwɔ doowo folo ɣa Ziizɛ pɔlɔi ɣaa mɔɔni la é gaazuvɛ ziɣi ma.

¹⁵ Favilesiitiɛ te gaa zaɣa kɛɛni kɔnɔ ga velei gaazuvɛ leveni la é ziɣi ma. É ɣɛ te ma, “É pɔlɔ ɣaa‐mɔi ziɛni gàazu gè wuo gìɛ sa wɛlɛ.”

¹⁶ Favilesii ʋikaa te ɣɛni tea, “Zunui nii lɛ ziɣini Gala pɔ vɛ. Ɛ́ lɛ doowo folo lɔgi maazu vɛtɛsu.” Kɛ̀ zɔitiɛ te ɣɛni tea, “Nui é ga faa yowũ‐ɣɛɛ nu towaa leve ɣɛ le é fai nii mazii ɣɛ é dɛ ga seele?” Te ɣaa wɛɛ su sa woo ma.

¹⁷ Na ʋaa ma te boga kɔnɔ zunui ma gaazu wuai ɣɛ wɔlɔ te ɣɛ ma, “?Tei tɔwɔ é è ɣaazuvɛ ziɣia ma, è ɣɛ le é vile ba?” É ɣɛ tea, “Tɔ ga Gala daa woo‐wo nu.”

¹⁸ Dusiitiɛ tɛ lɛ siɣini ga gaama ga gaazu wuai ɣɛ na ɣa ɣɛɛ na gaazuvɛ ziɣi ma é yɛsu sa te kaa veaitiɛ lili.

¹⁹ Te te ɣaa zaɣa kɛɛni te ɣɛ te ma, “Wo luu ɣaa? Nii wo bosu ga te kaani gaazu wuai? É levega ɣɛ le sa é wɛlɛzu?”

²⁰ Kaa veaitiɛ te gaa woteni te ɣɛ tea, “Gé kwɛ̃ni ga gé luu ɣa. Gé kwɛ̃ni kɔnɔ ga te kaani gaazu wuai.

²¹ Kɛ̀ velei é levega la sa é wɛlɛzu, gɛ́ lɛ kwɛ̃ni. Nui kɔnɔ ƃalaa é gaazuvɛ ziɣia ma, gɛ lɛ manui wɛ̃ni. A gaa zaɣa. Kulovɛ sa bu bɛ́. Towaa ƃɔɛ ƃɔɔ ʋaa ma.”

²² Kaa veaitiɛ te nii woni, ƃɔvɛlaale te ɣɛni luozu Dusiitiɛ va. Toku ge zei ga Dusiitiɛ te zeini sa ma te bo ga ani nu nɛpɛ ka laa wu ziɣi na Ziizɛ maʋaa ma é bo ga towa é ga Kolai, ta kulo Gala‐feli wɔtai maʋaa va.

²³ Na ʋaa ma kaa veaitiɛ te ɣɛni tea, “Kulovɛ sa bu bɛ́. A gaa zaɣa.”

²⁴ Na ʋaa ma zunui gaazu wuai ɣɛ wɔlɔ te tilini kɔnɔ te ɣɛ ma, “Gala daa maa lɛ baloi nii ʋaa ma. Gé kwɛ̃ni ga zunui nii ná dɛi tɔ ga faa yowũ‐ɣɛɛ nu.”

²⁵ É gaa woteni é ɣɛ tea, “Gɛ̀ lɛ kwɛ̃ni ga ani tɔ ga faa yowũ‐ɣɛɛ nu ƃaa ɛ́ lɛ ga faa yowũ‐ɣɛɛ nu. Faa ɣilagi nii nɔ gè kwɛ̃ni. Na ɣa ga velei ƃalaa gàazu wuai ɣɛ la, gà sa wɛlɛzu.”

²⁶ Te ɣɛ ma, “Zɛƃɛ ɣa é kɛɛni ga yìɛ? É leveni ɣɛ le é è ɣaazuvɛ ziɣi ma?”

²⁷ É gaa wote te ya é ɣɛ tea, “Gè boga sa wiɛ. Kɛ̀ wɛ lɛ ŋɛni wui toni ma. Aƃɛi é kɛɛ wo wõini wo mɛni kɔnɔ? Wo wõini wo ɣɛ ga ná kala dopoi ta wa ƃalaa?”

²⁸ Te lowani gaazu tiɛ ɣɛ tea, “Yà ga ná kala dopo. Kɛ̀ gá dɛi gá ga Mooze na kala dopoa.

²⁹ Gé kwɛ̃ni ga Gala ge ƃɔɛni Mooze wɔ. Kɛ̀ zunui nii na dɛi, vɛ é ziɣia na gɛ́ lɛ ná wɛ̃ni.”

³⁰ Zunui gaazu wuai ɣɛ wɔlɔ é gaa woteni é ɣɛ tea, “Ki‐daa‐vili faa ɣa ga nii! Vɛ zunui nii ziɣia na wɛ lɛ ná wɛ̃ni. Na pɛ ge ɣɛɛvɛ é gàazuvɛ ziɣia ma.

³¹ De kwɛ̃ni ga Gala gɛ lɛ wui loga faa yowũ‐ɣɛɛ nu woo ma. Kɛ̀ ani nu nɛpɛ ka ɣɛ na ga Gala‐feli nu yíɛ zii‐mai ɣɛ, Gala ka wui lo manui woo ma.

³² É ziɣi ƃɔɔ ŋetea lɔɔ‐zei ʋolo ma nu lɛ dɛ wɔlɔ‐wɔlɔ mawoo ta mɛnini ga nu nɛpɛ ge nui nii ɣaazu ziɣini ma te kaani gaazu wuai.

³³ È ɣɛ zunui nii lɛ ŋɛni ziɣini Gala pɔ vɛ, ɛ́ lɛ ƃega zoo ɔ́ faa ta nɛpɛ kɛ.”

³⁴ Te gaa wote zéea te ɣɛ ma, “?Yài te è ɣaa faa yowũi nii zu kwɛ̃ɛ gɛ lɛ ba, yà ɣaa ƃaazu ga è gé ɣala bo?” Tei sa na ɣɛɛni, te kuloni Gala‐feli wɔtai maʋaa va.

Nu ɣaazu‐wuu ʋai ga Gala fai wɔɔ la vele

³⁵ Ziizɛ mɛnini ga te kuloni sa Gala‐feli wɔtai maʋaa va. É gaa ziɛni é pɛtɛ é ɣɛ ma, “?È nu ƃuse lui ʋaa ziɣia ga gaama?”

³⁶ Zunui gaa woteni é ɣɛ ma, “Ƃɛ ve, màliɣii, kɛɛ ʋaa ma gè maʋaa ziɣi ga gaama?”

³⁷ Ziizɛ ɣɛ ma, “È wɛlɛɛ bá. Towaa é ƃɔɛzu è wɔ.”

³⁸ Nà ɣɛ ma, “Màliɣii, gè siɣia ga gaama.” É vɛɛ sa kɔwɔ wu.

³⁹ Ziizɛ ɣɛ tea, “Gè vaani zui zu faa‐wo gaa‐leve ʋaa ma, kɛɛ ʋaa ma niitiɛ tɛ lɛ wɛlɛzu te wɛlɛ, niitiɛ wɔgi te wɛlɛzu natiɛ ɣaazu wuu.”

⁴⁰ Favilesiitiɛ te ɣɛni koba te taniga te nii mɛnini te ɣɛ ma, “?Gé ɣaazu wuuvɛ ƃalaa pɛ?”

⁴¹ Ziizɛ ɣɛ te ma, “È ɣɛ wo ɣaazu wuai ɣɛ, faa lɛ ƃɛga ɣɛ wo va. Kɛ̀ wo boga wo ɣɛ tea, ‘Gá wɛlɛzu.’ Na ʋaa ma wa ʋaa yowũi é wo va, towaa yɛ wo va.”