JƆ̃ 7 - DEƲE NIINƐI

Ziizɛ ƃɔga deɣeitiɛ

¹ Tei nii wuloni ba, Ziizɛ leve‐teveni Geealali yui zu. Ɛ́ lɛ ƃega leve Yudiiya yui zu, ƃɔvɛlaale Dusiitiɛ tɛ ɣeni pele ɣaa ziɛzu ga te paa.

² Tɔwɔ Dusiitiɛ ta wuu‐ɣaa ʋai nii daa ga kwɔta wui maa ƃuai sa ɣɛ.

³ Na ʋaa ma Ziizɛ deɣeitiɛ te ɣɛni ma, “Wu ziɣi vɛ è li Yudiiya yui zu, kɛɛ ʋaa ma tiitiɛ è te ɣɛɛzu yà ɣala dopoitiɛ te ɣaazu lɔ su.

⁴ Ƃɔvɛlaale nui é pulu ga ná tiitiɛ te wulo kɛnɛ ma te kwɛ̃ɛ ɛ́ lɛ ɣɛɛ kɛɛzu doowu zu. Ani yà ɣɛ na tii niitiɛ ɣɛɛzu, ƃɔɔ lɛ ga zui.”

⁵ Deɣeitiɛ te nii woni, ƃɔvɛlaale ta ƃalaa tɛ lɛ ŋɛni laani ga máʋai.

⁶ Ziizɛ ɣɛni te ma, “Siɛgi lɛ dɛ ziilini bà. Kɛ̀ wa dɛi siɛgi ziilivɛ wo va wɔ.

⁷ Zui lɛ zooga ɔ́ zili ga wiɛ. Kɛ̀ silivɛ gàazu, ƃɔvɛlaale gè seele woo ʋeea ga su ʋaitiɛ te yowũvɛ.

⁸ A li kui ma wa letele. Gɛ̀ dɛ liizu kui ma, ƃɔvɛlaale siɛgi lɛ dɛ ziilini bà tɛ‐tɛ.”

⁹ Tei sa é boni ŋɛ na, é yɛni Geealali.

Ziizɛ ɣɛɛ ʋai kui ma

¹⁰ Kɛ̀ tei sa deɣeitiɛ te liini kui ma, tɔ ƃalaa pɛ é liini na. Ɛ́ lɛ liini ga wulo vele kɛnɛ ma, kɛ̀ é liini doowu zu.

¹¹ Dusiitiɛ te ɣɛni gaa ziɛzu kui ma tiɛ ɣɛ tea, “É wɔ?”

¹² Numaitiɛ te goo‐zu‐ƃɔɛ lamaa woni é vile ba, fikaa tiɛ ɣɛ tea, “Tɔ ga nu vagɔ.” Zɔitiɛ wɔ tiɛ ɣɛ tea, “Ƃa! Tɔ numaitiɛ ziɣizu pele va.”

¹³ Na pɛ ge ɣɛɛvɛ nu nɛpɛ gɛ lɛ laa wu ziɣini maʋaa‐woga ma Dusiitiɛ ta luo‐ba ma.

¹⁴ Tei te wuloni zaama‐zu kui‐ɣaa ʋaa va, Ziizɛ liini Gala‐feli wɔta walai wu é kala‐bo bo na.

¹⁵ Ná kala‐bogi vilini Dusiitiɛ ma ga ki‐gaa‐ziɛ tiɛ ɣɛ tea, “Zunui nii levega ɣɛ le é nii ƃɔgɔpɛ kwɛ̃ɛ, tɔwɔ kala‐bo gɛ lɛ dɛ woni la?”

¹⁶ Na ʋaa ma Ziizɛ gaa woteni te ya é ɣɛ tea, “Nà kala‐bogi lɛ ga nà dɔ. Kɛ̀ nui é tèvega ná dɔ ve.

¹⁷ Ani nu ta nɛpɛ zii‐ma ɣa ga yíɛ Gala zii‐mai ɣɛ, manui ɣa kwɛ̃ɛ ga ani nà kala‐bogi wulovɛ Gala zeea ɔɔ ani gà ƃɔɛzu ga ƃɔɔ ɣaa‐ƃaa.

¹⁸ Nui yá ƃɔɛ ga ƃɔɔ ɣaa‐ƃaa, towaa ɣɛ ƃɔɔ zaala‐mala ɣaa ziɛzu. Kɛ̀ nui yá ɣɛ saala‐mala ɣaa ziɛzu nui nii ʋaa ma é tevega, manui ɣa ga gaama nui nii pɛɛ lɛ ɣɛɛ ná tuoi zu.

¹⁹ Kɛ̀bɛ Mooze togi ʋeeni wo ya, kɛlɛi? Tɔwɔ wo ta nɛpɛ gɛ lɛ ziɛzu la. Zɛƃɛ ʋaa zu mu wo pele ɣaa ziɛzu ga wo pàa?”

²⁰ Numaitiɛ te gaa wote zéea te ɣɛ ma, “Gɔʋɛ yowũ ɣa è wulu. Ƃɛ ɣa é pele ɣaa ziɛzu ga é è vaa?”

²¹ Ziizɛ gaa wote é ɣɛ tea, “Gè faa ɣila kɛɛni é vili wo pɛ wo ma ga ki‐gaa‐ziɛ.

²² Mooze sei‐kpoto‐ma ʋai laani wo ya. Ɛ́ lɛ ga Mooze ɣa é wuloni zéea, kɛ̀ é wuloni de mama gwɔlɔni zeea. Tɔwɔ wa sei‐kpoto‐ma wo ga doowo folo.

²³ ?Ani sei‐kpoto‐ma ɣa wo ga nu ga doowo foloi kɛɛ ʋaa ma Mooze na tɔgi mɛ lɛ ɣɛ ga fai nu ɣa yee wulo maʋaa zu, wo yii ɣaa wãlavɛ mà ga tei gè zunui valoa tɛ‐tɛ ga doowo foloi?

²⁴ A mɛ lɛ faa ɣaa leve nu ya ga gáazuvɛ. Kɛ̀ a gaa leve ga gaama ʋaa ɣaa‐levea.”

?Towa é ga nui Gala zee ƃakogɛi ba ga masagi?

²⁵ Na ma Yɛlusulɛɛ veaitiɛ ʋikaa te ɣɛni tea, “?Zunui nii lei tɔ ɣɛ ɣaa ƃaazu ga te paa?

²⁶ Tɔ wɔ ka é ƃɔɛzu ƃɔɔ kɛnɛ ma tɛ lɛ faa ta nɛpɛ bosu ma!? Kwɛ̃ɛ ka kilaa bogɛi maazu‐ʋaa‐wo‐bo beaitiɛ vɛ ga ƃɔɔƃɔɔ su ga nii ɣa é ga Kolai?

²⁷ Gá wɔ gé zunui nii ziɣi‐zu wɛ̃ni. Kɛ̀ Kolai ɣa vaa na, nu nɛpɛ gɛ lɛ siɣi‐zu wɛ̃ɛga.”

²⁸ Na ma Ziizɛ ɣɛi ma kala‐bo bosu Gala‐feli wɔta walai wu, é boni ga woo maa zeezea é ɣɛ tea, “Wo kwɛ̃ni wo sìɣi‐zuvɛ wɛ̃ɛ ƃalaa pɛ. Kɛ̀ gɛ̀ lɛ ƃɔɔ vaa woni. Nui é tèvega tɔ ga gaamu nu. Wa wɔ wɛ lɛ kwɛ̃ni.

²⁹ Gè kwɛ̃ni, ƃɔvɛlaale sìɣivɛ pɔ́ vɛ. Tɔ wɔ ka é tèvega.”

³⁰ Na ma te pele ɣaa ziɛni ga te so. Kɛ̀ nu nɛpɛ gɛ lɛ yee ʋowũni ba, ƃɔvɛlaale siɛgi lɛ ŋɛni dɛ ziilini ba.

³¹ Kɛ̀ nu lamaa maʋaa ziɣini ga gaama tiɛ ɣɛ tea, “?Kolai ɣa vaa na, towaa faa lamaa ɣɛ é dɛ ga seele é leve nii va zunui nii kɛɛ?”

Te sɔdasia leʋeni ga te Ziizɛ zo

³² Favilesiitiɛ te nii ɣavele woo‐zu‐ƃɔɛ mɛnini kpɔgi yiɛ bo é vile Ziizɛ va. Laa‐ʋaale gwalaitiɛ ƃɔga Favilesiitiɛ te sɔdasia leveni ga te so.

³³ Ziizɛ ɣɛ sa tea, “A da wani da lebi ma dɛ ga ta wolo. Na ɣa ɣɛɛ na nui é tèvega gà li pɔ́ vɛ.

³⁴ Wa gàa ziɛ, tɔwɔ wɛ lɛ pɛ̀tɛga. Vɛ gà ɣɛ na wɛ lɛ zooga wɔ va na.”

³⁵ Dusiitiɛ te ɣɛni sa ɣiini ma, “Minɛ ɣa zunui nii ɣɛ tɔ liizu na ga dɛ lɛ wɛlɛɛ ba? Tɔ pulu ga é li da numaitiɛ wɔ vɛ te yɛzɛgɛi Geliikiitiɛ zaama, na ɣa ɣɛɛ na é Geliikiitiɛ ɣala bo?

³⁶ Kɛi é bosu tea, ‘Wa gàa ziɛ wɛ lɛ pɛ̀tɛga, vɛ gà ɣɛ na wɛ lɛ zooga wɔ va na,’ na zu‐wulo‐zu ɣa ga minɛ?”

Zɛʋu‐ʋee yiɛi

³⁷ Kuu‐ɣaa ʋai maʋolo ɣaa‐ƃelagi ma, na ɣa ga nii é ɣɛni ga folo ɣaa wuai kui ʋaa ma, Ziizɛ loni é bo ga woo maa zeezea é ɣɛ tea, “Ani kpoale‐wõi ka nu nɛpɛ ma, é va pɔ̀ é ƃoale.

³⁸ Nui é màʋaa ziɣia ga gaama, fai nii Gala kɔlɔi boga towaa ɣɛ ga manui. Na ɣa ga tei é ɣɛni tea, ‘Zɛʋu‐ʋee yiɛ walai ɣa wulo manui yii zu é yii.’ ”

³⁹ Nii Ziizɛ boni é ʋaani Gala baa ŋinɛgi ma, nii numaitiɛ te máʋaa ziɣini ga gaama dáa ɔ́ ziiti te ma. Gala baa ŋinɛgi lɛ ŋɛni dɛ leveni te wɔ vɛ, ƃɔvɛlaale bɔɔlɔla lɛ ŋɛni dɛ ziitini Ziizɛ ma.

Numaitiɛ ɣaa‐wɛɛ ʋai woo ma

⁴⁰ Tei numaitiɛ te woi niitiɛ mɛnini, taniga te ɣɛni tea, “Nii ɣa ga Gala daa woo‐wo nu ƃɔɔƃɔɔ.”

⁴¹ Zɔitiɛ te ɣɛ tea “Nii ɣa é ga nui Gala zee ƃakogɛi ba ga masagi, na ɣa ga Kolai.” Kɛ̀ taniga te ɣɛni tea, “?Kolai ɣa ga nui yá wulo Geealali yui zu?

⁴² Kɛ̀bɛ Gala kɔlɔi boni ga Kolai ɣa ɣɛ ga Deeve manu zuwu. Na ɣa ɣɛɛ na towaa wulo Bɛfelehɛ̃ɛ, na ɣa ga tai nii Deeve ɣɛni su.”

⁴³ Na ʋaa ma numaitiɛ te ɣaa wɛɛni woo ma Ziizɛ ʋai zu.

⁴⁴ Taniga te ɣɛni wõi ɣɛɛzu ga te so. Kɛ̀ nu nɛpɛ gɛ lɛ yee ʋowũni ba.

Dusi lo‐tuoitiɛ ta yee‐la‐ma lalai

⁴⁵ Sɔdasiitiɛ te liini sa wulu laa‐ʋaale gwalaitiɛ wɔ vɛ ta Favilesiitiɛ. Natiɛ wɔ te ɣɛ te ma, “Aƃɛi é kɛ wɛ lɛ vaani la?”

⁴⁶ Sɔdasiitiɛ te ɣɛ te ma, “Nu ta lɛ dɛ wɔlɔ ƃɔɛni ga zunui nii ɣavele!”

⁴⁷ Favilesiitiɛ te gaa woteni te ya te ɣɛ tea, “?É wo ziɣia pele va wa ƃalaa pɛ?

⁴⁸ ?Maazu‐ʋaa‐wo‐bo beaitiɛ‐oo ƃaa Favilesiitiɛ‐oo, wo wɛlɛɛ te ta nɛpɛ ba é máʋaa ziɣi ga gaama?

⁴⁹ Kpɔgi niitiɛ ŋɛ ni tɛ lɛ Gala na tɔgi wɛ̃ni ta dɛi laŋa ka te va.”

⁵⁰ Nɛkɛdiimɔ nii é liini wɔlɔ Ziizɛ wɔ, na ɣa ga nii é ɣɛni ga Favilesiitiɛ te ɣila, é ɣɛni te ma,

⁵¹ “?Da zoo de nu na faa‐wo gaa leve da lɔgi zu, ani dɛ lɛ ƃeni manu va ɔ́ woo ɣaa lɛ ga maa wũ pa dɔ wɛlɛ fai nii zu va é kɛɛ?”

⁵² Te gaa wote zéea te ɣɛ ma, “?Yà ƃalaa è wulovɛ Geealali ʋaa ve? Wɛlɛ Gala kɔlɔi zu va. Yà na ɣɛɛ na yà wɛlɛ na va ga Gala daa woo‐wo nu nɛpɛ gɛ lɛ wu ziɣia Geealali yui zu.”

Daza nui nii sogɛi wɛɛ̃‐ziɛ‐boga ɣa

⁵³ [ Nui yile‐giledai liini wɔ pɛlɛ wu.