JƆ̃ 3 - DEƲE NIINƐI

Ziizɛ ƃɔga Nɛkɛdiimɔ

¹ Favilesi nu ta ɣɛni na daa ga Nɛkɛdiimɔ. É ɣɛni ga Dusiitiɛ te wũ‐tuo nui gila.

² Zunui nii vaani Ziizɛ wɔ ga kpidi é yɛ ma, “Gé kwɛ̃ni ga yà ga kala‐mɔi kuloai Gala ta é va. Ƃɔvɛlaale nu nɛpɛ gɛ lɛ zooga ɔ́ fai niitiɛ ɣɛ è kɛɛ è dɛ ga seelea, kɛni Gala ge ɣɛ manui wulu.”

³ Ziizɛ gaa wote zéea é ɣɛ ma, “Gè bo yìɛ ga gaama, kɛni ta nu ɣa wɔnɔ ga niinɛ, na laale ɛ́ lɛ wɛlɛɛ Gala na masadai va.”

⁴ Nɛkɛdiimɔ ɣɛ ma, “Ta nu ɣa ɣɛ le ani pɔlɔ zaɣagɛ? Dée ɣa mawo siɣi wɔnɔ é ka?”

⁵ Ziizɛ gaa wote é ɣɛ tea, “Gè bo yìɛ ga gaama, kɛni ta nu ɣa ziɛi ƃɔga Gala baa ŋinɛgi te zaala zu, na laale ɛ́ lɛ lɛɛ Gala na masadai zu.

⁶ Nui kai ŋaza nu vɛ tɔ nɔ ga nu ƃuse. Nii wɔgi kai Gala baa ŋinɛgi zaala zu tɔ ga Gala baa ŋinɛgi na dɔ.

⁷ Kɛ̀ɛ ʋai è ma, ‘Kɛni ta wo ɣaa wɔnɔ ga niinɛ’ é mɛ lɛ vili yìɛ ga ki‐gaa‐ziɛ.

⁸ Fãgai ɣa va vɛ é wõini é va na. Yà tigi mɛni, kɛ̀ ɛ̀ lɛ siɣi‐zu wɛ̃ɛga ɔ́ nɔ ɣɛ ga dii‐zu.” Vele ɣa na é la ga nui nɛpɛgi kai Gala baa ŋinɛgi zaala zu.”

⁹ Nɛkɛdiimɔ ɣɛ ma, “Nii ɣa ɣɛ ɣɛ le?”

¹⁰ Ziizɛ gaa wote zéea é ɣɛ ma,“?È ga kala‐mɔɔ Yezɔi yui ʋaa ma, ɛ̀ dɛ nii ɣaa ɣaani?

¹¹ Gè bo yìɛ ga gaama, gá ƃɔɛ é vile nii va gé kwɛ̃ni gé seele woo ʋe nii ʋaa ma gé pɛtɛga, kɛ̀ wɛ lɛ yee zeiya gá zeele woi wu.

¹² Ŋeteai nii zu ʋaa mu ka gè boga wiɛ wɛ lɛ gòi ziɣini ga gaama, ani gà Gala ta ʋaa wo na wiɛ wa zoo ɣɛ le wo siɣi ga gaama?

¹³ Nu nɛpɛ gɛ dɛ lɛɛni Gala ta é wulo nui nii wulu é wuloa na é vile, na ɣa ga nu ƃuse lui.

¹⁴ È ɣɛ velei Mooze kaali wo‐kɔ̃ɔgi wu ziɣini la kpooʋei zu é tɛ, vele nɔ na é la ga nu ƃuse lui. Kɛni ta bu ziɣi te tɛ,

¹⁵ kɛɛ ʋaa ma nui nɛpɛ yá máʋaa ziɣi ga gaama, zɛʋui nii kwɛ̃ɛ gɛ lɛ ba é ɣɛ manui ya.”

¹⁶ Gala ge zui wõini ga kavele teegɔ. Na ma é duu ɣilekpugi ʋeeni kɛɛ ʋaa ma nui nɛpɛ yá maʋaa ziɣi ga gaama é mɛ lɛ za, kɛ̀ é zɛʋui nii zɔlɔ wo kwɛ̃ɛ gɛ lɛ ba.

¹⁷ Gala ge dúi leveni zui zu. Ɛ́ lɛ teveni ga é faa vɛɛ zui va, kɛ̀ to mu é kɛɛni ga zui wulo faa zu dúi zaala zu.

¹⁸ Nui é maʋaa ziɣia ga gaama, faa lɛ yɛni ma. Nui ɛ́ lɛ maʋai ziɣini ga gaama, faa yɛga sa manui ma, ƃɔvɛlaale ɛ́ lɛ dɛ Gala duu ɣilekpugi na daa‐zeigi ʋaa ziɣini ga gaama.

¹⁹ Nii ɣa é ga faa‐yɛ‐mai. Na ɣa ga ŋada wodoai vaa zui zu. Kɛ̀ numaitiɛ te wõini ga kpidi to mu é leve ŋada wodoai va, ƃɔvɛlaale te ɣɛɛ ʋaitiɛ yowũvɛ.

²⁰ Toku ge zei ga nui nɛpɛ é faa yowũ ɣɛɛzu, silivɛ ga ŋada wodoai. Ɛ́ lɛ vaa ŋada wodoai zu, kɛɛ ʋaa ma kɛ́ɛ‐zɔgitiɛ maa mɛ lɛ wodo.

²¹ Kɛ̀ nui é gaamai ɣɛɛzu towaa va ŋada wodoai zu, kɛɛ ʋaa ma te kɛ́ɛ ʋaitiɛ vɛtɛ ga gaa wodoa ga te ɣɛɛvɛ Gala saala zu.

Ziizɛ ƃɔga Bataize‐ɣɛɛ Jɔ̃

²² Tei sa nii wuloni ba, Ziizɛ ƃɔga ná kala dopoitiɛ te liini Yudiiya yui zu. Ná ɣa ta tiɛni te ɣɛni na tiɛ bataize ɣɛ.

²³ Jɔ̃ ƃalaa ɣɛni bataize yɛɛzu ŋada ta ná laa ga Eena, ƃɔvɛlaale ziɛ lamaa ɣɛni na. Nii yɛɛni Seelɛ̃ lai wobavɛ. Numaa te vaani sa é bataize ɣɛ ga tiɛ.

²⁴ Ƃɔvɛlaale tɛ lɛ ŋɛni dɛ Jɔ̃ vilini kpidi vɛlɛ wu.

²⁵ Jɔ̃ na kala dopoitiɛ ƃɔga Dusi nu ta te yɛpɛni é vile maa‐ziɣi yekegi va.

²⁶ Te vaani Jɔ̃ wɔ te ɣɛ ma, “Kala‐mɔi, nui wa tɔ wo ɣɛni Jɔdɛ̃ yiɛ wuluve yìɛ seele woo ʋe faa ma, tɔ sa bataize ɣɛɛzu. Nui ƃɔgɔpɛ ka sa liizu pɔ́.”

²⁷ Jɔ̃ gaa woteni te ya é ɣɛ tea, “Nu nɛpɛ gɛ lɛ zooga ɔ́ ŋɛni ta nɛpɛ sɔlɔ wo kɛni nii yá wulo Gala ta é ʋe zéea.

²⁸ Wa ƃɔɔ wa zoo wo seele woo ʋe fàa ma ga gè boni ga ‘Nà lei gɔ̀ ɣɛ ga Kolai.’ Kɛ̀ ‘Gala ge tèvega túo.’

²⁹ Nui nii ŋaza nui fáa ma ga é kulo, towa ŋaza nui ɣa ɣɛ ga pó. Kɛ̀ nii é nɔ ga ná siɛ‐pulu é loni koba towaa kuu‐zu‐nɛɛ wulo ŋaza‐wulo nui woi‐mɛni fai ƃalaa ma bɛ́. Na mave‐lei ma nà kuu‐zu‐nɛi ziilia kwɛ̃ɛ ma.

³⁰ Kɛni Kolai ɣa ɣɛ ga nui to‐su wɔɔlɔi, nɔ̀wɔ gè ɣɛ ga nui to‐su vɛnɛi.”

Nui é ziɣia Gala ta é ʋa

³¹ Nui é ziɣia de wũ maazu vele tɔ ŋɛni pɛ maazu. Nui é ga zui‐ɣa nu, zui wo be. Towaa ƃɔɛ é vile zui maʋaa va. Nui é ziɣia Gala ta tɔ ŋɛni ƃɔgɔpe maazu.

³² Towaa nii mazeele woo ʋe é pɛtɛga ta nii é mɛniga. Kɛ̀ na pɛ ge ɣɛɛvɛ nu nɛpɛ gɛ lɛ yee zeizu ná seele woi wu.

³³ Nui yá yee zei ná seele woi wu, nii ɣa manui ɣa dɛ ga zee‐wogi. Na ɣa ga é dɛ ga Gala ka ga gaama Ɣala.

³⁴ Toku ge zei ga nui Gala ge tevega towaa Gala goi wo, ƃɔvɛlaale Gala gɛ lɛ baa ŋinɛgi maʋaa wɛ̃ɛ tevezu ɔ́ fe zéea.

³⁵ De ɣeea Gala é dúi wõini. Na ɣa ɣɛɛ na é ŋɛni ƃɔgɔpɛ feea zéea.

³⁶ Nui yá dúi maʋaa ziɣi ga gaama, towaa zeʋui nii zɔlɔ wo kwɛ̃ɛ gɛ lɛ ba. Nui lɛ dúi woo mɛniga, zɛʋui nii kwɛ̃ɛ gɛ lɛ ba manui lɛ vilega ga ta. Kɛ̀ Gala na zii‐ɣaa‐wãlai ɣa ziiti ma.