JƆ̃ 21 - DEƲE NIINƐI

Ziizɛ wuloni ná kala dopoi lɔfela ɣaazu

¹ Tei nii wuloni ba, Ziizɛ ƃɔɔ maʋaa ɣaa wodoni wɔnɔ ga ná kala dopoitiɛ Taibilia yiɛ walai laavɛ. É ƃɔɔ maʋaa ɣaa wodoni pelei nii zu vele.

² Saimɔ Pite, Taamɔ nii ta tili ga Yoogi, Natania nii é ga Keena lai zu nu Geealali yui zu, Zɛbɛdi dea zinaitiɛ é vɛɛ kala dopo ta ƃɔnɔ felegɔ va te ɣaa lɛi ɣɛ ba ŋada ɣila.

³ Saimɔ Pite ɣɛni sa te ma, “Gà liizu feza kpɛɛzu.” Ta wɔ te ɣɛ ma, “A da li da wani.” Te wulo sa te li te vili kẽegi zu. Kɛ̀ tɛ lɛ ŋɛni ta nɛpɛ soni na maƃidii.

⁴ Tei sa gela ɣɛni bosu, Ziizɛ liini é lo ziɛ laavɛ. Tɔwɔ kala dopoitiɛ tɛ lɛ ŋɛni kwɛ̃ni ga Ziizɛ ve.

⁵ Ziizɛ ɣɛni te ma, “Lopaa, feza ka wo ya?” Te ɣɛ ma, “Ƃa.”

⁶ É ɣɛ te ma, “A ƃelei vili ga wo yee za‐su vele kẽegi ʋaa va. Wa sa wa ta zɔlɔ wo.” Na ma te ƃelei vilini. Tei sa na ɣɛɛni, mazobo gɛ lɛ ŋɛni te vɛ ga te ƃelei lɛ kẽegi zu fezagi wala lama pele ma su.

⁷ Kala dopoi nii Ziizɛ wõiyai ɣɛ la é ɣɛ Pite ma, “De maliɣii ve!” Tei Saimɔ Pite mɛnini ga de maliɣii ɣɛni le, é ná seɣei looni wɔba, ƃɔvɛlaale é ɣɛni ga ƃuume tii‐ɣɛɛ ʋai ma. É wudɛni sa é vili ziɛi wu.

⁸ Kɛ̀ kala dopoi zɔitiɛ te ɣɛni kẽegi zu tiɛ va, tiɛ ƃelei ƃokpo nii daa ʋegɛi ɣɛ ga feza. Ƃɔvɛlaale te maa lɛ ŋɛni woozani kake va. Siɛ ziɣi na é li kake ma ɔ́ zoo é ziiti yaali wũ gila su.

⁹ Tei te lɛɛni kake ɣa, te wɛlɛni tiɣi ŋabu va feza ge laani gá te wɛlɛ wɔnɔ kpoolo‐ʋɔɔ va.

¹⁰ Ziizɛ ɣɛ te ma, “Fezagitiɛ wo te zoga ŋɛ ni, a va ga ta.”

¹¹ Saimɔ Pite vilini sa kẽegi zu é ƃelei lɛ kake ɣa daa ʋegɛi ga feza kpaaza. Fezagi ɣɛni su ga wũ gila zee looluo kai sava. Velei ƃalaa fezagi lamai ɣɛ la su, ƃelei lɛ ŋɛni leve‐leveni gá.

¹² Ziizɛ ɣɛni te ma, “A va wo subu laa‐mii bo.” Tɔwɔ é ɣɛni ga kala dopoitiɛ te ta nɛpɛ na mɛni‐masa‐kɛ̃ɛ ʋaa ga te gaa zaɣa kɛ te ɣɛ ma, “Ƃɛ ɣa ga yìɛ?” Te ɣɛni ga kwɛ̃ɛga ga de maliɣii ve.

¹³ Ziizɛ vaani sa é kpoolo‐ʋɔi ziɣi é teve te wɔ. Vele nɔ na é kɛɛni la ga fezagi.

¹⁴ Ziizɛ wu ziɣiai ma saa ya yíɛ ƃɔɔ maʋaa ɣaa wodo ga ná kala dopoitiɛ ná zei‐zu sava kelei ɣɛni ga na.

Ziizɛ ƃɔga Pite

¹⁵ Tei sa te woloni subu laa‐miigi ma, Ziizɛ ɣɛni Saimɔ Pite ma, “?Jɔ̃ dui Saimɔ, è wõivɛ gàazu é leve niitiɛ ta dɔ wõilai va te boga gàazu?” Nà ɣɛ ma, “Ooi, màliɣii. È kwɛ̃ni ga gè è wõini.”

¹⁶ Ziizɛ ɣɛ ma, “Nà baala zuwuitiɛ ɣaa wɔ.” É boda fele kelei ɣɛɛni kɔnɔ é ɣɛ ma, “?Jɔ̃ dui Saimɔ, è wõivɛ gàazu?” Nà ɣɛ ma,“Ooi, màliɣii. È kwɛ̃ni ga gè è wõini.” Ziizɛ ɣɛ ma, “Ƃala zo nà baalagitiɛ ma.”

¹⁷ Ziizɛ boda sava kelei ɣɛɛni é ɣɛ ma,“ ?Jɔ̃ dui Saimɔ, è wõivɛ gàazu?” Pite yii zuulini ga tei é woi nii woda sava kelei ɣɛɛni yíɛ ɣɛ ma, “È wõivɛ gaazu?” É ɣɛni sa ma, “Màliɣii, è faa pɛ kwɛ̃ni. È kwɛ̃ni ga gè è wõini.” Ziizɛ ɣɛ ma, “Nà baalagitiɛ ɣaa wɔ.

¹⁸ Gè bo yìɛ ga gaama, tei è ɣɛni ga bu‐ziɣi niinɛ, ɔ̀ wulu ɣili vɛ nɛpɛ ɔ̀ ná wõi ɣɛ yiɛ ziɛ yìɛ li na. Kɛ̀ yà wɔlɔ zaɣa na, yà yee zu zakpa nu ta ƃɔnɔ ge è ɣili é li ga yìɛ vɛ ɛ̀ lɛ wõini ɔ̀ li na.”

¹⁹ É nii woni ga é dɛ ga sai nii mazii Pite ɔ́ bo ga é ƃaa laa la Gala ma. Tei sa na wuloni ba, é ɣɛni ma, “Vile pùlu.”

Ziizɛ ƃɔga kala dopoi zɔi

²⁰ Pite liteni é wɛlɛ kala dopoi nii va Ziizɛ wõiyai ɣɛ la, nii tɔtɔgɛi ɣɛ Ziizɛ va kpɔkɔ laa‐miigi‐wo‐suvɛ, na ɣa ga kala dopoi nii é ɣɛni Ziizɛ ma, “Màliɣii, ƃɛ ɣa é vaazu wulozu ga è wɔwɔ wulu wɔɔ?”

²¹ Tei Pite wɛlɛni kala dopoi ƃɔɔ va é ɣɛni Ziizɛ ma, “Màliɣii, zunui nii maʋaa ɣa ɣɛ le?”

²² Ziizɛ ɣɛ ma, “Ani towaa ɣɛ na ga zìi‐ma ʋaa ga é ɣɛ na é yɛsu gè va, zɛƃɛ ɣa é su è vɛ? Vile pùlu!”

²³ Woi nii ziɛni Kolai maa veaitiɛ la tili ga kala dopoi nii lɛ vaazu zaazu. Tɔwɔ Ziizɛ lɛ boni ga lɛ vaazu zaazu. Kɛ̀ é ɣɛni tea, “Ani tɔ ga zìi‐ma ʋaa ga é yɛ na é yɛsu gè va, zɛƃɛ ɣa é su è vɛ?”

²⁴ Kala dopoi nii ɣa é fai niitiɛ mazeele woo ʋeezu. Towa é fai niitiɛ wonɛɛ. Gé kwɛ̃ni ga ná seele woi ɣa ga gaama.

Te pɛ so‐suʋɛ too la

²⁵ Tɔwɔ faa lamaa ƃalaaga ta na Ziizɛ te ɣɛɛni. Te ƃɔgɔpɛ tɔ ɣɛ na te wonɛ, kìgi zu kɔlɔitiɛ tɔ wonɛ te zu tɛ lɛ ƃega wooli zui tɔ ɣagi zu.