JƆ̃ 19 - DEƲE NIINƐI

¹ Paila é Ziizɛ ziɣini é kɛ te dowa.

² Sɔdasiitiɛ te ŋai fɛlɛ sa ga masa bɔɔlɔ kavele te pɛɛ wũmɔ. Na ɣa ɣɛɛ na te maa ɣili ga yogbo kpoei.

³ Te va pɔ́ tiɛ ɣɛ ma, “Dusiitiɛ ta masagi, è yĩsɛ‐o!” Na ɣa ɣɛɛ na te dowa gaazu ga yee.

⁴ Paila wuloni wɔnɔ é ɣɛ Dusiitiɛ ma, “A wɛlɛ. Gà kulozu gè vaa la wo wɔ kɛɛ ʋaa ma wo kwɛ̃ɛ ga gɛ̀ lɛ wɛlɛzu sɔ yowũ nɛpɛ ba.”

⁵ Na ʋaa ma Ziizɛ wuloni ŋeteavɛ ŋai bɔɔlɔgi wũmɔ yogbo kpoeigi kɔba. Paila ɣɛ te ma, “Zunui ɣaa!”

⁶ Tei laa‐ʋaale gwalaitiɛ ƃɔga te vaa veaitiɛ te wɛlɛni Ziizɛ va, te lobani tiɛ ɣɛ tea, “Kpako gului ma! Kpako gului ma!” Paila ɣɛ te ma, “Wa ƃɔɔ a siɣi wo kpako, ƃɔvɛlaale gɛ̀ lɛ wɛlɛzu sɔ yowũ nɛpɛ ba.”

⁷ Dusiitiɛ te gaa wote Paila ya te ɣɛ ma, “Tɔ ka gé ya. Tɔgi na laa woi ma kɛni yá za, ƃɔvɛlaale é ƃɔɔ wuloa ga Gala duu.”

⁸ Tei Paila é woi niitiɛ mɛnini, é luoni é leve kɛɛzu va.

⁹ É lɛ kɔnɔ pɛlɛi wu é ɣɛ Ziizɛ ma, “Minɛ nu ɣa ga yìɛ?” Kɛ̀ Ziizɛ lɛ gaa woteni.

¹⁰ Na ʋaa ma Paila ɣɛni ma,“?Ɛ̀ lɛ ƃɔɛzu pɔ̀? Ɛ̀ lɛ kwɛ̃ni ga gaa‐ƃaa ɣa zèea ga gè ƃe yìɛ, gaa‐ƃaa kɔnɔ zèea ga gè è ƃako gului ma?”

¹¹ Ziizɛ gaa wote zéea é ɣɛ ma, “Gaa‐ƃaa lɛ ƃega ɣɛ è ya màazu è ɣɛ maɣaa‐ƃai lɛ wuloni ga è maazu vele. Na ma nui mugi é zèe laa è ya towa ná faa yowũi wala ƃakpai.”

¹² Tei Paila nii mɛnini, é pele ɣaa ziɛni ga é ƃe Ziizɛ va, kɛ̀ Dusiitiɛ te lobani tiɛ ɣɛ tea, “Yà ƃe na zunui nii va, a kɛ tii ɛ̀ lɛ wõini ga ɣalaso gwalai Siiza. Nui nɛpɛ yá ƃɔɔ ɣɛ ga masa, a kɛ tii manui ɣa zeizu Siiza laa ma ga yowũa.”

¹³ Tei Paila é woi niitiɛ mɛnini, é Ziizɛ wuloni ŋetea. É zei sa vɛ ɔ́ zei na yíɛ faa‐wogi wo. Sei nii wo‐suvɛ ɣɛni ŋadɛivɛ vɛ ná laa ɣɛni ga Peemɛ. Ná laa ɣɛni ga Gabata Hiiƃulu woi zu.

¹⁴ É ɣɛni ga kavele‐ƃɛtɛ ʋolo teve‐maazu wui ʋaa ma é ga folo gaa‐lɔ‐ga laa yɔɔzu. Paila ɣɛ Dusiitiɛ ma, “Wa masagi ɣa!”

¹⁵ Te lobani tiɛ ɣɛ tea, “Lii la è paa! Lii la è paa! Kpako gului ma!” Paila ɣɛ te ma “?Gè wa masagi ƃako?” Laa‐ʋaale gwalaitiɛ te gaa wote te ɣɛ ma, “Masa kpɔnɔ gɛ lɛ gé ya é wulo Siiza wulu.”

¹⁶ É Ziizɛ yee la sa te ya ga te kpako. Na ʋaa ma te Ziizɛ ziɣini sa

Te Ziizɛ ƃakoni gului ma

¹⁷ te wulo la yíɛ li ga ƃɔɔ vɛɛ‐pulu wulu likpii ŋada ta ná laa ga wũ fooyo ŋada laavɛ. Hiiƃulu woi zu ná laa ɣa ga Gɔgata.

¹⁸ Ná ɣa te kpakoni na gului ma é vɛɛ nu felegɔ va, gila ge ga kakamavɛ zɔlaavɛ vele, gila ge ga zɔlaavɛ vele, é te yɔɔzu.

¹⁹ Paila daa‐zei ponɛni ƃalaa pɛ é pɛɛ gului va. Su woi ɣɛni ga “Nazɔi Yiizɛ, Dusiitiɛ ta masagi.”

²⁰ Dusi lamaa daa‐zeigi nii lodoni, ƃɔvɛlaale vɛ te Ziizɛ ƃakoni na ná maa ƃuai ɣɛ tai va. Daa‐zeigi wonɛi ɣɛ Hiiƃulu woi zu ta Latẽ woi é vɛɛ Geliiki woi va.

²¹ Dusiitiɛ ta laa‐ʋaale gwalaitiɛ te ɣɛni Paila ma, “Mɛ lɛ ponɛ ga ‘Dusiitiɛ ta masagi,’ kɛ̀ ponɛ ga ‘Zunui nii boga é ɣɛ tea, nà ɣa gè Dusiitiɛ ta masagi.’ ”

²² Paila gaa wote é ɣɛ tea, “Nii gè ponɛɛ, ponɛɛ ɣa ga ponɛɛ.”

²³ Tei sɔdasiitiɛ te Ziizɛ ƃakoni, te maa zɔɔlaitiɛ ziɣini te gaa wɛɛla ɣɛ su naa. Sei‐zu ɣila ge ɣɛni sɔdasi gila faa ma. Kɛ̀ ná too‐kɔ‐bai zɔlɔ po gɛ lɛ ŋɛni ba é ziɣi kala‐gavɛ é yii kɔwaavɛ.

²⁴ Na ma te ɣɛni ɣiini ma, “A de mɛ lɛ beli‐veli gá. Kɛ̀ a de taali ta ɣɛ maʋaa ma ga kpɔzɔ‐loo ʋaa ɣavele a de pɛtɛ ga nui yá ɣɛ ga pó.” Nii ɣɛɛni kɛɛ ʋaa ma nii ponɛi Gala kɔlɔi zu mawoi leve ma. Mawoi ɣa ga “Te màa zɔɔlaitiɛ ɣaa wɛɛni vɛ, te taali ɣɛ nà seɣei ʋaa ma.” Na ɣa sɔdasiitiɛ te kɛɛni.

²⁵ Taitiɛ te ɣɛni loni gului nii woba Ziizɛ ɣɛni ma te ɣɛni ga Ziizɛ dee ƃɔga Ziizɛ dee deɣei nii daa ɣɛ ga Meele é ga Keloopɛ ŋazai é vɛɛ Meele Mɛdaliini va.

²⁶ Tei Ziizɛ wɛlɛni dée va é loni na ta wõila ɣala dopoi, é ɣɛni dée ma, “Wɛlɛ! È lui ɣa!”

²⁷ É ɣɛ wɔnɔ kala dopoi ƃɔɔ ma, “Wɛlɛ! È lee ɣa!” É ziɣi siɛ̀gi na ma kala dopoi Ziizɛ dee ɣɛɛni ga ná pɛlɛ wu nui ta.

Ziizɛ zaa ʋai

²⁸ Tei na wuloni ba, Ziizɛ kwɛ̃ɛni ga fai ƃɔgɔpɛ ge leveni sa ma. Na ʋaa ma é ɣɛni tea, “Kpoale‐wõi ɣa mà.” É nii woni ga é Gala kɔlɔi zu woi leve ma.

²⁹ Koko ɣɛni na daa ʋegɛi ga dɔɔ ƃoda. Na ʋaa ma sɔdasiitiɛ te su‐wuo dɔɔni dɔɔ ƃodai wu é zɛvɛ ʋɛʋɛ̃i te dɔ gulu mazii ta ɣa daa ga “hesa” te teve dáavɛ.

³⁰ Tei Ziizɛ dɔɔ ƃodai ta ƃoaleni, é ɣɛni tea, “Tii laa wulovɛ sa.” É wũ pile sa é za.

Te kpãi wuuni Ziizɛ va kakamavɛ

³¹ Foloi na ɣɛni ga kavele‐ƃɛtɛ ʋolo teve‐maazu wui ʋaa ma. Doowo foloi é ɣɛni vaazu é ɣɛni ga doowo folo ɣaa wua. Na ʋaa ma Dusiitiɛ tɛ lɛ ŋɛni wõini pomaitiɛ tɔ yɛ pɛɛ‐pulu wulu likpiitiɛ ma ga doowo foloi na. Nii mazaƃui ma te Paila ɣaa zaɣa kɛɛni ga é kɛ te te wɔwɔitiɛ ɣale‐ɣale te te wulo gului ma te li ga tiɛ.

³² Na ʋaa ma sɔdasiitiɛ te vaani te nu maa wũgi wɔwɔitiɛ ɣale te zɔi wɔwɔitiɛ ɣale, niitiɛ ta Ziizɛni te ƃakogɛi ɣɛ gului ma.

³³ Kɛ̀ tei te ziitini Ziizɛ ma te pɛtɛ ga sai ɣɛ sa, tɛ lɛ ŋɛni kɔwɔitiɛ ɣaleni.

³⁴ Kɛ̀ sɔdasi gila ge kpãi wuuni ba kaka‐mavɛ. Ŋama wulo na ta ziɛ ga maa ʋilea.

³⁵ Nui é wɛlɛni nii va é seele woo ʋeeni ga wa ƃalaa wo siɣi ga gaama. Ná seele woi ɣa ga gaama. É kwɛ̃ni ga tɔ gaamai wosu.

³⁶ Niitiɛ te ɣɛɛni kɛɛ ʋaa ma Gala kɔlɔi zu woi leve ma. Mawoi ɣa ga “Kái gila kpalaa lɛ ɣalea.”

³⁷ Na wulu kɔnɔ Gala kɔlɔi zu woi ta ƃɔnɔ ka bosu yíɛ ɣɛ tea, “Ta wɛlɛ nui nii va te kpãi wuuni ba.”

Ziizɛ loowu fai

³⁸ Tei sa na wuloni ba Zoosɛ nii é ɣɛni ga Alematia nui é Ziizɛ mawomai ʋelini Paila ma ga é lii la. Paila ʋaani bu zéea. Na ma é vaani é li ga pomai. Zoosɛ nii ɣɛni ga Ziizɛ wulu nui ta, kɛ̀ é ɣɛni le doowu zu Dusiitiɛ ta luo‐bai ma.

³⁹ Nɛkɛdiimɔ nii ƃalaa pɛ é vaani Ziizɛ wɔ ga maa wũ ga kpidi, é vaani ga gulu mala kũ‐nɛɛ‐nɛɛ sei‐zu felegɔ su puai ga kii. Gulu mala kũ‐nɛɛ‐nɛɛgi nii lamai ɣɛ ga ʋikɛ.

⁴⁰ Te Ziizɛ mawomai ziɣini te gulu mala kũ‐nɛɛ‐nɛɛgi wu gbaza su te maa ƃiti da. Vele ɣa na Dusiitiɛ tɔ doowugi wo da.

⁴¹ Tɔwɔ vɛ te Ziizɛ ƃakoni na ŋada ta ɣɛni ná maʋaa va ná vagɛi. Ná ɣa kwɔti ɣaba ɣɛni na nii tɛ lɛ ŋɛni dɛ wɔlɔ nu loowuni su.

⁴² Tei tɔwɔ kwɔti ɣabai nii maa ƃuai ɣɛ, te Ziizɛ loowuni su. Te nii ɣɛɛni ƃɔvɛlaale é ɣɛni ga Dusiitiɛ ɣavele‐ƃɛtɛ ʋolo teve‐maazu wui ʋaa ma.