JƆ̃ 18 - DEƲE NIINƐI

Ziizɛ zo fai

¹ Tei Ziizɛ woi niitiɛ woni, ta ná kala dopoitiɛ te wuloni te li te leve gizi zɔɔ‐zuvɛ ná laa ga Kedelɔ̃ vɛ ŋada vapa ta ɣɛni na. Ta ná kala dopoitiɛ te liini na.

² Tɔwɔ Dudia nii é wuloni ga Ziizɛ wɔwɔ wulu wɔɔ é ɣɛni ga ŋada vapagi nii zu wɛ̃ɛga ƃalaa pɛ. Ƃɔvɛlaale Ziizɛ ƃɔga ná kala dopoitiɛ tɔ wũi na ti‐ti.

³ Na ma tei Dudia sɔdasi ƃulu sɔlɔ woni é vɛɛ numaitiɛ va te ɣɛni laa‐ʋaale gwalaitiɛ va ta zɔitiɛ wɔnɔ te ɣɛni Favi‐lesiitiɛ va, ta tiɛni te liini ŋada vapagi nii zu ga laboa é vɛɛ sɔmɔga va ta kolu ŋɛnia.

⁴ Tei sa fai niitiɛ ɣaazɔ wɛ̃ɛgɛi ɣɛ Ziizɛ vɛ te ɣɛni vaazu ɣɛɛzu la, é wuloni é va é lo é ɣɛ te ma, “Ƃɛ ɣa wo gaa ziɛzu.”

⁵ Te gaa woteni zéea te ɣɛ ma, “Nazɔi Yiizɛ ve.” Ziizɛ ɣɛ te ma, “Nà ɣa.” Dudia nii é wuloni ga kɔwɔ wulu wɔɔ é ɣɛni loni na ta tiɛni.

⁶ Tei Ziizɛ ɣɛni te ma, “Nà ve,” te liini ga wulu vele ʋii te loo zuwãvɛ.

⁷ É te ɣaa zaɣa kɛɛni wɔnɔ é ɣɛ tea, “Ƃɛ ɣa wo gaa ziɛzu?” Te ɣɛ ma, “Nazɔi Yiizɛ ve.”

⁸ Ziizɛ gaa wote é ɣɛ tea, “Gè boga wo ma ga nà ɣa. Na ʋaa ma ani wa gàa ziɛzu, a ƃe ba numai niitiɛ te bà te li.”

⁹ Nà ɣa ɔ́ woi nii leve ma Ziizɛ boni yíɛ ɣɛ Gala ma, “Niitiɛ è te ʋeeni zèea, gɛ̀ lɛ valani ta ma.”

¹⁰ Boa zɔkpɔ ɣɛni Saimɔ Pite ya. É kuloni ga é pili laa‐ʋaale gwalaitiɛ te mawũgi na duoi ma é nà yee‐za‐su vele wui leve ba. Duoi na laa ɣɛni ga Makɛsi.

¹¹ Ziizɛ ɣɛni Pite ma, “Yà woa zɔkpɔi lɔ taɣa ga. ?Gè mɛ lɛ ƃoale ga kpoale ŋɛnii kèea Gala feea zèea ʋaa ve?”

Ziizɛ ɣɛɛ ʋai Eena laa wu

¹² Na ʋaa ma sɔdasi ƃɔgi kpɔga ta ɣeeapi é vɛɛ numaitiɛ va te ɣɛni Dusiitiɛ va te Ziizɛ zoni te giii.

¹³ Te liini la Eena wɔ ga maa wũ, ƃɔvɛlaale Eena ɣɛni ga Keeafa noko. Keeafa wɔ ka é ɣɛni ga laa‐ʋaale gwalaitiɛ te mawũgi kwenagi na zu.

¹⁴ Keeafa ɣa é Dusiitiɛ lɛnɛni ga tɔ ga ta wulo‐su‐nu‐ma ʋaa ga nu ɣila ge za numaitiɛ ʋaa ma.

Pite Ziizɛ maʋaa zakpeni

¹⁵ Saimɔ Pite vileni Ziizɛ wulu. Vele wɔ nɔ na kala dopoi ta ƃɔnɔ ge kɛɛni la. Tei tɔwɔ kala dopoi nii ɣɛni ga laa‐ʋaale wũ‐tuo nui wɛ̃ɛ nu, é vɛɛni Ziizɛ va te lɛ laa‐ʋaale wũ‐tuo nui ƃɔɔ na siɣigi zu.

¹⁶ Kɛ̀ Pite ɣɛni loni ŋeteavɛ siɣi zeɣei laavɛ. Na ma kala dopoi zɔi é ɣɛni ga laa‐ʋaale wũ‐tuo nui wɛ̃ɛ nu é wuloni é ƃɔɛ ŋaza nu lomai wɔ é ɣɛni ga kpo zeɣei laavɛ maazu‐vɛtɛ nui. É Pite ziɣi sa te lɔ siɣigi zu.

¹⁷ Kpo zeɣei maazu‐vɛtɛ ŋaza nu lomai ɣɛni Pite ma, “?Yà ƃalaa, ɛ̀ lɛ ga zunui nii na kala dopoi ta?” Pite ɣɛ ma, “Gɛ̀ lɛ ga ta.”

¹⁸ Tɔwɔ tii‐ɣɛɛ veaitiɛ vɛɛ Dusiitiɛ vaa veaitiɛ va te tiɣi ŋabu looni, ƃɔvɛlaale kɔɔlɛi ɣɛni vaazu. Te ɣɛni sa loni tiɛ wɔɔlɛ. Pite tɔ ƃalaa é ɣɛni te woba é loni yíɛ wɔɔlɛ.

Laa‐ʋaale wũ‐tuo nui Ziizɛ ɣaa zaɣa kɛɛni

¹⁹ Laa‐ʋaale wũ‐tuo nui Ziizɛ ɣaa zaɣa kɛɛni é vile ná kala dopoitiɛ va ta ná kala‐bogi.

²⁰ Ziizɛ goi ɣaa woteni é ɣɛ ma, “Gè ƃɔɛni zui wɔ kɛnɛ ma. Kɛ̀ɛvɛ kala‐bo bosu wɔ Gala‐feli wɔtaitiɛ wu ta Gala‐feli wɔta walai. Na ɣa ga vɛ Dusiitiɛ ƃɔgɔpɛ ta ɣaa lɛ ba na. Gɛ̀ dɛ faa ta nɛpɛ boni doowu zu.

²¹ Zɛƃɛi é kɛɛ yìɛ gàa zaɣa kɛ? Niitiɛ te gòo mɛniga te ɣaa zaɣa kɛ faitiɛ ma gè boga te ma. Niitiɛ gè te woga te te wɛ̃ni.”

²² Tei Ziizɛ nii woni, Dusiitiɛ vaa veaitiɛ te ɣɛni loni ná woba te ɣila ge yee laani su yíɛ ɣɛ ma,“?Vele ɣa na yà laa‐ʋaale gwalaitiɛ te mawũgi woo zu loo la?”

²³ Ziizɛ goi ɣaa woteni é ɣɛ ma, “Ani gɛ̀ lɛ ƃɔɛni ga pagɔ, fai gɛ̀ lɛ kɛɛni ga pagɔ mazeele woo ʋe. Kɛ̀ tɔwɔ ani kpɔ̀ɛvɛ ga gaama vele, zɛƃɛi é kɛɛ yìɛ dòwa?”

²⁴ Eena é Ziizɛ yɛni ga gilia é teve laa‐ʋaale wũ‐tuo nui Keeafa wɔ vɛ.

Pite Ziizɛ maʋaa zakpeni kɔnɔ

²⁵ Saimɔ Pite ɣɛni sa loni yíɛ wɔɔlɛ. Te ɣɛ ma, “?Yà ƃalaa, ɛ̀ lɛ ga ná kala dopoi ta?” É zakpeni ma é ɣɛ tea, “Gɛ̀ lɛ ga ta.”

²⁶ Laa‐ʋaale wũ‐tuo nui na tii‐ɣɛɛ nu ɣila ge ɣɛni na dáa laa zu vilegɛi zunui nii va Pite gui leveni. Zunui na Pite ɣaa zaɣa kɛɛni é ɣɛ ma, “Kɛ̀bɛ gè wɛlɛni yìɛ bá ŋada vapagi zu, kɛlɛi?”

²⁷ Pite zakpeni ma kɔnɔ. Na ɣɛɛni ƃɔɔ nɔ, tɛɛ zinɛi wɔkwɛlɛ.

Ziizɛ ɣɛi ma Paila laa wu

²⁸ Te wuloni ga Ziizɛ Keeafa na pɛlɛi wu te lii la gɔmɛti nu walai na pɛlɛi la. É ɣɛni ga subu‐zubu. Dusiitiɛ ɣagi tɛ lɛ lɛɛni gɔmɛti nu walai na pɛlɛi wu, kɛɛ ʋaa ma te maa mɛ lɛ woola. Ƃɔvɛlaale te ɣɛni wõizu te teve‐maazu wui mamii ŋɛnigi mi.

²⁹ Na ʋaa ma Paila wuloni é li te wɔ vɛ é ɣɛ tea, “Zunui nii zɔgi wo vaa la tɔ ga zɛƃɛ?”

³⁰ Te gaa woteni zéea te ɣɛ ma, “È ɣɛ zunui nii lɛ ŋɛni faa yowũ ɣɛɛzu, gɛ́ lɛ ƃega vaa la è wɔ.”

³¹ Paila ɣɛni te ma, “Wa ƃɔɔ a siɣi wo lii la wo wɛlɛ ná faa‐wogi zu va è ɣɛ velei wa lɔgi la.” Dusiitiɛ te ɣɛni ma, “Gaa‐ƃaa lɛ gé ya ga gé nu nɛpɛ paa.”

³² Nii ɣɛɛni ga é woi leve ma Ziizɛ boni. Na ɣa ga tei é dɛɛni ga velei ɔ́ zaa la.

³³ Paila lɛɛni kɔnɔ pɛlɛi wu é Ziizɛ lili é gaa zaɣa kɛ é ɣɛ ma, “?Yà ga Dusiitiɛ ta masagi?”

³⁴ Ziizɛ gaa woteni é ɣɛ tea, “?Yà nii wosu ga ƃɔɔ woo, ƃaa nu ƃalaaga ɣa te boga yìɛ é vile bà?”

³⁵ Paila goi zu loo é gaa zaɣa kɛ é ɣɛ ma,“?Gà ga Dusi nu? È ƃɔɔ numaitiɛ vɛɛ te malaa‐ʋaale gwalaitiɛ va ta ɣa te vaa ga yìɛ pɔ̀. Zɛƃɛ ɣa è kɛɛ?”

³⁶ Ziizɛ goi ɣaa wote é ɣɛ tea, “Nà masadai lɛ ga zui nii zu masada. È ɣɛ nà masadai ɣɛni ga zui nii zu masada, nà tii‐ɣɛɛ veaitiɛ tɔ ŋapi wɔ kɛɛ ʋaa ma zèe mɛ lɛ la Dusiitiɛ ya. Kɛ̀ nà masadai lɛ ziɣini zui nii zu.”

³⁷ Paila ɣɛ ma, “Yà ga masa, kɛ́lɛ́i.” Ziizɛ gaa woteni é ɣɛ ma, “Yà ɣa è boga ga gà ga masa. Zaƃui te kàani ma tɔ ga gè seele woo ʋe gaamai ʋaa ma. Nii mazaƃui ɣa gè vaani ma zui zu. Nui nɛpɛ é gaamai ʋaa ma towaa gòi mɛni.”

³⁸ Paila ɣɛ ma, “Zɛƃɛ ɣa é ga gaamai?” Tei Paila nii woni, é wuloni é li Dusiitiɛ wɔ vɛ kɔnɔ é ɣɛ te ma, “Gè lɛ wɛlɛni sɔ yowũ nɛpɛ ba bá.

É woni ga Ziizɛ za

³⁹ Kɛ̀ tɔ ga wo ɣɛɛ ʋaa wɔlɔ‐zaɣa ga gè ƃe pilisine ɣila ba wo ʋaa ma teve‐maazu wui zu. ?Wo wõini gè ƃe Dusiitiɛ ta masagi va wo ʋaa ma?”

⁴⁰ Te lobani kɔnɔ tiɛ ɣɛ tea, “Zunui nii laale. Kɛ̀ ƃe Balaaba va.” Balaaba wɔ ge ɣɛni ga nui é ɣɛ wɔɔzu gɔmɛtii wɔ.