JƆ̃ 17 - DEƲE NIINƐI

Ziizɛ Gala felini ná kala dopoitiɛ ʋaa ma

¹ Tei Ziizɛ woi niitiɛ woni, é ɣaazu lɛɛni gee zu é ɣɛ tea, “Kèea Gala, siɛgi ziitia. Nài gè ga è lui, bɔ̀ɔlɔ, kɛɛ ʋaa ma gè è wɔɔlɔ.

² Toku ge zei ga è gaa‐ƃaa ʋeea zèea nu pɛ maazu ga zɛʋui kwɛ̃ɛ gɛ lɛ ba gè fe niitiɛ ya è te ʋeea zèea.

³ Nii ɣa é ga zɛʋui kwɛ̃ɛ gɛ lɛ ba. Na ɣa ga te è wɛ̃ɛ, yài è ga gaama Ɣala ɣilekpugi, é vɛɛ bà, nài gè ga Ziizɛ Kolai gè ga nui è tevega.

⁴ Gè è wɔɔlɔɔ zui zu ga tei gè tii nii laa wuloa è feeni zèea ga gè kɛ.

⁵ Na ɣa ɣɛɛ na, kèea, bɔ̀ɔlɔ ƃɔɔ ɣaazu è kɛ ga bɔɔlɔlai nii é ɣɛni zèea wɔlɔ kɛ̀i ma è va ŋeteai ɔ́ vɛɛ wulozu.

⁶ “Gè è maʋaa ɣavele lɛɛ ga numai niitiɛ è te wuloni zui zu è te ʋe zèea. Te ɣɛni ga è wo, yà wɔ è te ʋe zèea. Te ziɛni ga è woi.

⁷ Te kwɛ̃ni sa ga ŋɛnii nɛpɛ è feea zèea kulovɛ è ya.

⁸ Ƃɔvɛlaale woitiɛ è te woni mà gè boni te ma. Te yee zeiya te wu te kwɛ̃ɛ ga gaama ga è wɔ vɛ ɣa gè ziɣini na. Na ɣa ɣɛɛ na te siɣia ga gaama ga yà ɣa è tèvega.

⁹ Gà è ʋelizu te ʋaa ma. Gɛ̀ lɛ è ʋelizu zui nii ʋaa ma, kɛ̀ gà è ʋelizu niitiɛ ʋaa ma è te ʋeeni zèea, ƃɔvɛlaale ta ga è wo.

¹⁰ Nà dɛitiɛ ɣaazɔ ta ga yà dɔ, yà dɛitiɛ ɣaazɔ wɔ te ga nà dɔ. Saala laavɛ mà te mazaƃui zu.

¹¹ Tɔwɔ gɛ̀ lɛ sa wɔlɔ‐wɔlɔ zui zu. Kɛ̀ ta zui zu. Gà vaazu è wɔ. Yài è ga maa‐wuo ɣeeai, ƃaa te maazu te yɛ yà laa‐zeigi nii zu è seiya bà kɛɛ ʋaa ma te ɣɛ su ɣilekpu è ɣɛ velei de la su ɣilekpu.

¹² Tei gè yɛga te woba, gè ƃaani te maazu ga te yɛ yà laa‐zeigi nii zu è seiya bà. Gè ƃaani te maazu. Gɛ̀ lɛ valani te ta nɛpɛ ma é wulo nii wulu maa nɛi ɣɛ balagi wo ma ƃɔɔ ti, kɛɛ ʋaa ma Gala kɔlɔi zu woi leve ma.

¹³ Kɛ̀ gà sa vaazu è wɔ vɛ. Gà fai niitiɛ wosu zui zu, kɛɛ ʋaa ma nà kuu‐zu‐nɛi ɣɛ ga ta ƃɔɔ wuu‐zu‐nɛi é kulo‐ɣɛɛ wo ƃɔɔ te ya.

¹⁴ Gè è woi woni te ma. Zui zilini ga tiɛ, ƃɔvɛlaale tɛ lɛ zui maʋaa ma è ɣɛ velei nɔ gɛ̀ lɛ la zui maʋaa ma.

¹⁵ Gɛ̀ lɛ è ʋelizu ga è te wulo zui va. Kɛ̀ gà è ʋelizu ga è te wulo tuƃo‐vele‐yowũ nui ya.

¹⁶ Tɛ lɛ zui maʋaa ma, è ɣɛ velei nɔ gɛ̀ lɛ la zui maʋaa ma.

¹⁷ Te wulo su leelaa ƃɔɔ ʋaa ma ga gaamai. È laa woi ɣa ga gaama.

¹⁸ È ɣɛ velei è tèveni la zui zu, vele nɔ na gè te levega la zui zu.

¹⁹ Gà ƃɔɔ wulo su leelaa ga yà dɔ te mazaƃui ma, kɛɛ ʋaa ma ta ƃalaa te ɣɛ ga nui yá wulo su leelaa ga yà dɔ gaamai zu.

²⁰ “Gɛ̀ lɛ è ʋelizu numai niitiɛ ɣilekpu nɔ ʋaa ma. Kɛ̀ gà è ʋelizu pɛ niitiɛ ʋaa ma te vaazu màʋaa ziɣizu ga gaama numai niitiɛ te woi zaala zu,

²¹ kɛɛ ʋaa ma te pɛ te ɣɛ su ɣilekpu. Na ɣa ga velei è la ga kèea Gala, nu ɣa è vɛtɛ da fai nii zu gè su, nu wɔ ge pɛ̀tɛ fai nii zu è su, na ɣa ɣɛɛ na ta ƃalaa te ɣɛ ga nuitiɛ ta te vɛtɛ fai nii zu de su, kɛɛ ʋaa ma zui zu vea te siɣi ga gaama ga yà ɣa è tèvega.

²² Bɔɔlɔlai è feeni zèea gè feeni te ya, kɛɛ ʋaa ma te ɣɛ su ɣilekpu è ɣɛ velei de la su ɣilekpu.

²³ Na ɣa ga te te vɛtɛ fai nii zu gè su è ɣɛ velei nɔ ta pɛ̀tɛ da fai nii zu è su, na ɣa ɣɛɛ na te ɣɛ ga numaitiɛ ta ɣɛ su ɣilekpu maa‐wulo‐zu lɛ ɣɛɛ maʋaa va, kɛɛ ʋaa ma zui zu vea te kwɛ̃ɛ ga yà ɣa è tèvega te kwɛ̃ɛ wɔnɔ ga è wõivɛ ga tiɛ è ɣɛ velei nɔ è wõiyai la gàazu.

²⁴ Kèea Gala, ẁõivɛ niitiɛ è te ʋeeni zèea ta ƃalaa pɛ te ɣɛ vɛ gè na, kɛɛ ʋaa ma te wɛlɛ nà bɔɔlɔlai va è feeni zèea wõilai zaala zu. Na ɣa ga wõilai nii é ɣɛni è ya fàa ma ŋeteai maʋaa lɔɔ é vɛɛ zeizu.

²⁵ Ee, yài è ga gaama ɣeeai, zui lɛ è wɛ̃ɛni. Kɛ̀ gè è wɛ̃ni. Niitiɛ wɔgi è te ʋeea zèea te kwɛ̃ni ga yà ɣa è tèvega.

²⁶ Gè kɛɛ te yà laa‐zeigi wɛ̃ɛ. Nà wɔ gà wɔnɔ gà kɛ te kwɛ̃ɛ, kɛɛ ʋaa ma wõilai nii è boga gàazu é ɣɛ te ɣigi zu. Na ɣa ɣɛɛ na tiɛ te vɛtɛ fai nii zu gè su.”