JƆ̃ 14 - DEƲE NIINƐI

Ziizɛ ɣa é ga pelei yá li kéea Gala ta

¹ Ziizɛ ɣɛni tea, “A mɛ lɛ yii zɛlɛ. A yee la Gala ma wo yee la mà ƃalaa pɛ.

² Kèea Gala na pɛlɛi lamavɛ su. ?È ɣɛ lɛ ŋɛni ŋɛ na, gɔ̀ bo wiɛ ga gà li gè ŋada ɣavele ƃɛtɛ wo ʋaa ma?

³ Gà li na gè ŋada ɣavele ƃɛtɛ wo ʋaa ma, gà va kɔnɔ gè li ga wiɛ, kɛɛ ʋaa ma vɛ gè na wo ɣɛ na ƃalaa pɛ.

⁴ Tɔwɔ vɛ gè liizu na wo ná mavelei wɛ̃ni.”

⁵ Taamɔ ɣɛ ma, “Gé maliɣii, vɛ è liizu na gɛ́ lɛ ná wɛ̃ni, gá pelei wɛ̃ɛ ɣɛ le?”

⁶ Ziizɛ ɣɛ ma, “Nà ɣa gè ga pelei gè ga gaamai gè ga zɛʋui. Nu nɛpɛ gɛ lɛ vaa kèea Gala pɔ, kɛni manui leve ga pɔ̀ vele.

⁷ È ɣɛ wo ɣɛni ga kẁɛ̃ɛga, wɔ kèea Gala kwɛ̃ɛ ƃalaa pɛ. É ziɣi sa zai ŋɛ ni ma é li ga tuo, wo kẁɛ̃ni sa. Wo pɛ́tɛga.”

⁸ Fele ɣɛni Ziizɛ ma, “Gé maliɣii, de ɣeea Gala dɛ ga gíɛ. Gé yii ɣa la.”

⁹ Ziizɛ ɣɛ ma,“?Fele, a de lebigi de boga ma ɛ̀ lɛ dɛ kẁɛ̃ni? Nui é pɛ̀tɛga é kèea Gala pɛtɛga. Yà ɣɛ le tea, ‘De ɣeea Gala dɛ ga gíɛ’?

¹⁰ ?Ɛ̀ lɛ siɣini ga gaama ga fai nii wa pɛ̀tɛ su tɔ nɔ ɣa wa kèea Gala pɛtɛ su? Woitiɛ gè te wosu wiɛ gɛ̀ lɛ bosu ga ƃɔɔ ɣaa‐ƃaa. Kɛ̀ kèea Gala nii é zìi zu towa é ná tiitiɛ ɣɛɛzu.

¹¹ A siɣi ga gaama ga fai nii wa pɛ̀tɛ su tɔ nɔ ɣa wa kèea vɛtɛ su. Ɔɔ a gòi ziɣi ga gaama tiitiɛ ta ƃɔɔ te mazaƃu ma.

¹² Gè bo wiɛ ga gaama, nui nɛpɛ yá màʋaa ziɣi ga gaama, tiitiɛ gè te ɣɛɛzu manui ɣa te ɣɛ ƃalaa pɛ. Towaa tii ƃaazaga ɣɛ é leve natiɛ va, ƃɔvɛlaale gà liizu kèea wɔ vɛ.

¹³ Nii nɛpɛ wa maɣaa‐zaɣa‐kɛɛ wo nà daa‐zeigi zu, gà kɛ, kɛɛ ʋaa ma saala la kèea Gala ma nài gè ga dúi sàala zu.

¹⁴ Ani wa gàa zaɣa kɛɛ na faa ta nɛpɛ ma wiɛ kɛ nà daa‐zeigi zu, gà kɛ.”

Gala baa ŋinɛgi maɣi‐togi

¹⁵ Ziizɛ ɣɛni tea, “Ani wo ẁõini, wa ziɛ ga nà tɔgitiɛ.

¹⁶ Nà wɔ gà kèea Gala feli. Towaa wo vaa ʋaa‐wo nu ta ƃɔnɔ teve é ɣɛ wo woba wɔ.

¹⁷ Na ɣa ga Gala baa ŋinɛgi yá gaamai lɛ. Zui lɛ zooga ɔ́ yee zei bú, ƃɔvɛlaale ɛ́ lɛ wɛlɛzu bá ɔ́ nɔ ɣɛ ga é kẃɛ̃. Wo kẃɛ̃ni, toku ge zei ga tɔ wo woba, tɔwɔ towaa ɣɛ wo yii zu.

¹⁸ Gɛ̀ lɛ levea wo va wɔ yɛ folo vɛ. Gà va wo wɔ.

¹⁹ Ná ta wolo zu ɣa lebi na, zui lɛ sa pɛ̀tɛga. Kɛ̀ wa pɛ̀tɛ. Tei tɔwɔ zɛʋu zèea, zɛʋu ɣa ɣɛ wo ya ƃalaa pɛ.

²⁰ Siɛgi na ɣa ziiti na, wa kwɛ̃ɛ ga fai nii wa pɛ̀tɛ su tɔ nɔ ɣa wa kèea Gala pɛtɛ su. Nii ta wo vɛtɛ su towa ta pɛ̀tɛ su, nii wɔgi ta pɛ̀tɛ su tɔ nɔ ɣa ta wo vɛtɛ su.

²¹ Nui zée nà tɔgitiɛ va yíɛ ziɛ ga tiɛ, manui ɣa é ẁõini. Nui nii é ẁõini, towa kèea Gala ka wõi. Gà manui wõi gè ƃɔɔ ɣavele lɛɛ la.”

²² Dudia ɣɛni ma, “Gé maliɣii, tɔ ɣɛ le è vaazu ƃɔɔ ɣavele lɛɛzu ga gíɛ, kɛ̀ ɛ̀ lɛ dɛɛ ga zui?” Dudiai é nii woni ɛ́ lɛ ŋɛni ga Dudia Asikaalia. É ɣɛni ga Dudia ta ƃɔnɔ.

²³ Ziizɛ goi ɣaa woteni é ɣɛ ma, “Ani ẁõi ɣa nu ma, towaa ziɛ ga gòi. Kèea Gala pɔ ka wõi ga manui. Gá kèea gá va pɔ́ gé yɛ koba.

²⁴ Nui nii ẁõi lɛ ma ɛ́ lɛ zia ga gòi. Woi wo mɛniga ɛ́ lɛ ga nà dɔ, kɛ̀ kèea nii é tèvega ná dɔ ve.

²⁵ “Gè fai niitiɛ woga wiɛ kɛ̀ɛ ʋai ma dɛ wo woba.

²⁶ Kɛ̀ kpɔ‐ba‐wo nui nii é ga Gala baa ŋinɛgi nii kèea Gala ge vaazu tevesu nà daa‐zeigi zu, towaa wo ɣala bo ga fai ƃɔgɔpɛ é wo ɣi too fai ƃɔgɔpɛ su gè boga wiɛ.

²⁷ Gà zii‐laa yɛsu wo ya. Gà nà zii‐lai ʋeezu wo ya. Gɛ̀ lɛ feezu ga zui‐zu yii‐laa‐ʋee vele. A mɛ lɛ yii zɛlɛ ɔ́ nɔ ɣɛ ga wo luo.

²⁸ Wo mɛnini tei gè boni wiɛ gè ɣɛ tea, ‘Gà li, kɛ̀ gà va wulu wo wɔ.’ È ɣɛ ẁõi ɣɛni wo ma, wɔ wuu zu nɛɛ ga tei gè liizu kèea wɔ. Ƃɔvɛlaale kèea levegɛ bà.

²⁹ Tɔwɔ gè zɛga ná luo gè bo wiɛ, kɛɛ ʋaa ma yá ɣɛɛ na wo la gàazu.

³⁰ Gɛ̀ lɛ sa wɔnɔ ƃɔɛ wo wɔ ga tamaa, ƃɔvɛlaale zui mamasagi ɣa vaazu. Gaa‐ƃaa lɛ zéea màazu.

³¹ Kɛ̀ gà kɛ è ɣɛ velei kèea Gala boga la mà, kɛɛ ʋaa ma zui kwɛ̃ɛ ga kèea wõi ɣa mà. A wu ziɣi na a dii.”