JƆ̃ 11 - DEƲE NIINƐI

Laazɔi na saa ʋai

¹ Zunu ta ɣɛni zeeƃɛzu daa ga Laazɔi. Pɔ́ taa zu ɣɛni ga Bɛtani. Bɛtani ɣɛni ga Meele ƃɔga diɛ ŋaza nui Maata te wɔ taa zu.

² É ɣɛni ga Meele nii é gulo ƃadi wũ‐nɛɛ‐nɛɛ siɛni ɣɛ de maliɣii Ziizɛ ma é kɔwɔitiɛ maa ƃale ga ná wũ deɣai. Laazɔi nii é ɣɛni seeƃɛi wosu é ɣɛni ga Meele na seela.

³ Na ʋaa ma Laazɔi na seelaitiɛ te keela leveni Ziizɛ wɔ vɛ te ɣɛ ma, “Gé maliɣii, nui è wõini la tɔ zeeƃɛzu.”

⁴ Kɛ̀ tei Ziizɛ mɛnini, é ɣɛni ná kala dopoitiɛ ma, “Seeƃɛi nii lɛ ga saa zeeƃɛ. Tɔ Gala na saala‐malai‐lɛɛ ʋaa ma kɛɛ ʋaa ma saala la Gala dui ma seeƃɛ nui nii maʋai maazu.”

⁵ Tɔwɔ Ziizɛ wõini ɣɛ ga Maata ta Maata deɣe ŋaza nui é vɛɛ Laazɔi va.

⁶ Tei Ziizɛ mɛnini ga Laazɔi ɣɛni zeeƃɛzu, vɛ é ɣɛni na keela woi ziiti ma é kɛɛni na dɛ ga folo felegɔ.

⁷ Tei nii wuloni ba, é ɣɛni ná kala dopoitiɛ ma, “A dii Yudiiya yui zu kɔnɔ.”

⁸ Kala dopoitiɛ te ɣɛ ma, “Kala‐mɔi, Dusiitiɛ te ɣɛga nɔ ɣaa ƃaazu ga te è zɔɔ ga kwɔti.?Yà liizu na kɔnɔ?”

⁹ Ziizɛ gaa woteni te ya é ɣɛ tea, “Ɣalava puugɔ kai felegɔ ɣa é gela‐boga zu, kɛlɛɛ? Ani nu ɣa ziɛ na ga gela‐boga, ɛ́ lɛ ɣaliga. Towaa ɣɛ ŋeteai‐nii‐zu ŋada wodoai vɛtɛsu.

¹⁰ Kɛ̀ ani nu nɛpɛ ka ziɛ na ga kpidi, towaa ɣali. Ƃɔvɛlaale ŋada wodoai maʋaa lɛ ɣɛɛ zii zu.”

¹¹ Vele ɣa na é ƃɔɛni la. Na ɣa ɣɛɛ na é ɣɛni te ma, “Da ziɛ‐pului Laazɔi loa ga ŋii. Kɛ̀ gà liizu gè gaazu lao.”

¹² Ná kala dopoitiɛ te ɣɛ ma, “Ani ŋii ɣa é loa la, towaa valo.”

¹³ Ziizɛ ƃɔɛni é vile Laazɔi na saa ʋai va. Kɛ̀ te kaani ga é ɣɛni ʋaazu ŋii ƃɔɔƃɔɔ ma.

¹⁴ Ziizɛ zɛba sa é bo te ma ga gaa wodoa é ɣɛ tea, “Laazɔi zaa.

¹⁵ Wo mazaƃui ma kùu zu nɛɛvɛ ga gɛ̀ lɛ ŋɛni na, kɛɛ ʋaa ma wo màʋaa ziɣi ga gaama. Kɛ̀ a dii kala‐mavɛ.”

¹⁶ Taamɔ nii tɔ tili ga Yoogi é ɣɛni baa ɣala dopoitiɛ ma, “A dii na da ƃalaa kɛɛ ʋaa ma a de za da tiɛni.”

Ziizɛ ɣa é ga bu‐ziɣi‐saa‐yai é ga zɛʋui

¹⁷ Tei Ziizɛ vaani, é ná vɛtɛni ga Laazɔi kɛɛ sa kwɔti ɣabai zu ga folo naagɔ.

¹⁸ Bɛtani ɣɛni Yɛlusulɛɛ woba. Ná ɣɛni ga maali felegɔ ziɛ‐wo‐su.

¹⁹ Dusi lamaa vaani ɣɛ Maata ƃɔga Meele te wɔ vɛ ga te te ɣaa nɛkpɛ te liɛ zunui ʋaa ma.

²⁰ Tei Maata mɛnini ga Ziizɛ ɣɛni vaazu, é liini daa wũisu. Meele ɣɛni zeini pɛlɛi wu.

²¹ Maata ɣɛni Ziizɛ ma, “Màliɣii, è ɣɛ è ɣɛni vɛ, nà seelai lɛ ƃɛga za.

²² Tɔwɔ tei ƃalaa é su, gè kwɛ̃ni ga nii zu ƃalaa nii nɛpɛ yà Gala gaa zaɣa kɛ ma towaa kɛ yìɛ.”

²³ Ziizɛ ɣɛ ma, “Yà zeelai ɣa wu ziɣi saa ya.”

²⁴ Maata ɣɛ ma, “Gè kwɛ̃ni ga towaa wu ziɣi ga bu‐ziɣi‐wo foloi saa ya ŋetea ɣaa‐ƃela foloi.”

²⁵ Ziizɛ ɣɛ ma, “Nà ɣa gè ga bu‐ziɣi‐saa‐yai gè ga zɛʋui. Nui yá màʋaa ziɣi ga gaama, é zaavɛ ƃalaa, zɛʋu ɣa ɣɛ zéea.

²⁶ Nui nɛpɛ zɛʋu zéea é màʋaa ziɣia ga gaama ɛ́ lɛ wɔlɔ‐wɔlɔ zaa. ?Nii ziɣivɛ yìɛ ga gaama?”

²⁷ Maata ɣɛ ma, “Ooi, màliɣii. Gè siɣia ga gaama ga yà ɣa è ga nui Gala ge yee ƃakoga ba ga masagi è ga Gala dui, nii é vaazu zui zu.”

Ziizɛ ɣaazu‐maa‐yiɛ looni ma

²⁸ Tei Maata nii woni, é liini é deɣe ŋaza nui Meele lili é bo ma te felegɔ ŋada laa yíɛ ɣɛ ma, “Kala‐mɔi ɣa vɛ. Tɔ è lilisu.”

²⁹ Tei Meele nii mɛnini, é wu ziɣini pu é li Ziizɛ wɔ vɛ.

³⁰ Ziizɛ lɛ ŋɛni dɛ vaani tai zu. É ɣɛni dɛ nɔ̀ vɛ ta Maata te wuini na.

³¹ Dusii taniga te ɣɛni pɛlɛi wu ta Meeleni tiɛ nà ɣaa nɛkpɛ. Tei te wɛlɛni ba é wu ziɣi pu é wulo, te vileni pulu tiɛ ka ga é ɣɛni liizu kabai la ga é kpee loo na.

³² Tei Meele vaani vɛ Ziizɛ ɣɛni na é wɛlɛ ba, é looni kɔ́wɔ wu yíɛ ɣɛ ma, “Màliɣii, è ɣɛ è ɣɛni vɛ nà seelai lɛ ƃega za.”

³³ Tei Ziizɛ wɛlɛni ba yíɛ kpee loo ta Dusiitiɛ te vaani, maa‐wõi wala looni ma zíi dowa.

³⁴ É ɣɛ sa tea, “Minɛ ɣa wo daani na?” Te ɣɛ ma, “Gé maliɣii, va è ná vɛtɛ.”

³⁵ Ziizɛ ɣaazu‐maa‐yiɛ looni ma.

³⁶ Na ʋaa ma Dusiitiɛ te ɣɛni tea, “A wɛlɛ velei va wõi la má!”

³⁷ Kɛ̀ fikaa te ɣɛni tea, “?Nui nii é gaazu‐wuu nui ɣaazu ziɣini ma ɛ́ lɛ ƃega zoo ɔ́ ɣɛ ga zaƃu ga zunui nii mɛ lɛ za?”

Te Laazɔi yɛʋui looni su wɔnɔ

³⁸ Ziizɛ vaani sa kaba laavɛ, maa‐wõi wala loai ma kɔnɔ. Kabai ɣɛni ga zeɣei teveai ɣɛ kwɔti va, kwɔti vɛɛni da.

³⁹ Ziizɛ ɣɛni tea, “A kwɔtii ziɣi da.” Maata nii é ɣɛni ga zunui nii sai ɣɛ ná seelai é ɣɛni Ziizɛ ma, “Ná wũ ka yowũ sa siɛgi nii zu, ƃɔvɛlaale sai ma é ɣɛɛ sa ga folo naagɔ.”

⁴⁰ Ziizɛ ɣɛ ma, “?Gɛ̀ lɛ boni yìɛ ga ani yà siɣi na ga gaama, yà wɛlɛ Gala na bɔɔlɔlai va?”

⁴¹ Na ʋaa ma te kwɔtii ziɣini sa da. Ziizɛ wɔ ge ɣaazu lɛɛni gee zu é ɣɛ tea, “Kèea Gala, gè è mamaga ga tei è gòi mɛniga.

⁴² Gè kwɛ̃ni ga yà gòi mɛni wɔ. Kɛ̀ gè nii woga numai niitiɛ te loni vɛ te mazaƃu ma, kɛɛ ʋaa ma te siɣi ga gaama ga yà ɣa è tèvega.”

⁴³ Tei é nii woni, é lobani yíɛ ɣɛ tea, “Laazɔi, wulo!”

⁴⁴ Zunui sai ɣɛ é wuloni sa. Zee zu ɣiliai ɣɛ ta kɔwɔ ga seɣe‐vea sakpa. Gaazu ɣiliai ga seɣe. Ziizɛ ɣɛ te ma, “A fũi wo ƃe ba é li.”

Ziizɛ maa‐ʋuɛ‐loo ʋai

⁴⁵ Na ʋaa ma Dusiitiɛ te yɛni ɣɛ Meele va te va te wɛlɛni nii va Ziizɛ kɛɛni, te lamaa te maʋaa ziɣi ga gaama.

⁴⁶ Kɛ̀ fikaa te liini Favilesiitiɛ wɔ vɛ, nii Ziizɛ kɛɛni te bo te ma.

⁴⁷ Na ʋaa ma laa‐ʋaale gwalaitiɛ ƃɔga’ Favilesiitiɛ te faa‐wo‐bo bea ɣaa lɛɛni ba te ɣɛ tea, “Zɛƃɛ ɣa a da kɛ? Ƃɔvɛlaale zunui nii ɣa faa lamaa ɣɛɛzu yíɛ dɛ ga seelea.

⁴⁸ Ani da ƃe na ba yíɛ nà ɣavelei ɣɛ, nui ƃɔgɔpɛ ta maʋaa ziɣi ga gaama. Na ɣa ɣɛɛ na Loomɛitiɛ ta va te da Ɣala‐feli wɔta walai nii zu ŋala‐ŋala é vɛɛ de mazuwui va.

⁴⁹ Kɛ̀ te ɣila ge ɣɛni na daa ga Keeafa nii é ɣɛni ga laa‐ʋaale gwalaitiɛ te mawũgi kwenagi na zu. É ɣɛni te ma, “Wɛ lɛ faa wɛ̃ni ga bɛnɛ wolo ƃalaa.

⁵⁰ Wɛ lɛ gaa ɣaazu ga tɔ ga wa wulo‐su‐nu‐ma ʋaa ga nu ɣila ge za numaitiɛ ʋaa ma. Na ɣɛ ga nu zuwui nii ƃɔgɔpɛ su mɛ lɛ ƃɔnɔ wo.”

⁵¹ Keeafa lɛ nii ziɣini yii ma ɔ́ bo, kɛ̀ kɛ́ɛ ʋai ma ɣɛ ga laa‐ʋaale gwalaitiɛ te mawũgi kwenagi na zu, é leveni da kpe é bo ga Ziizɛ ɣa za nu zuwui ʋaa ma.

⁵² Ɛ́ lɛ nɔ ga nu zuwui na tɔ ɣilekpu, kɛ̀ nii ɣa ɣɛ ga Gala deaitiɛ te yɛzɛgɛi é te ɣaa lɛ ba te ɣɛ su ɣilekpu.

⁵³ Na ma é ziɣi na maʋoloi ma, te wũ pileni ma ga velei tɔ Ziizɛ vaa la.

⁵⁴ Tei sa na ɣɛɛni, Ziizɛ lɛ ŋɛni sa ziɛ‐ziɛsu kɛnɛ ma Dusiitiɛ zaama. Kɛ̀ é ziɣini na é li ná ligi zu yui ta zu vɛ ná ɣɛni kpooʋei wobavɛ. É liini tai nii zu daa ga Iifelãi. Ná ɣa te yɛni na ta ná kala dopoitiɛ.

⁵⁵ Dusiitiɛ ta leve‐maazu wui ɣɛni sa lɔtɔsu. Numaa lamaa te wuloni taa wokoitiɛ zu te li Yɛlusulɛɛ teve‐maazu wui ɔ́ vɛɛ ziitizu, kɛɛ ʋaa ma te ƃɔɔ maa‐wuo yekegi ɣɛ Gala gaazu.

⁵⁶ Te ɣɛni Ziizɛ ɣaa ziɛzu. Tei te ɣɛni loni Gala‐feli wɔta walai wu te ɣɛni ɣɛɛzu ɣii ma, “Tɔ ɣɛ le wo wuu zu? Ɛ́ lɛ vaazu kui ma?”

⁵⁷ Tɔwɔ laa‐ʋaale gwalaitiɛ ƃɔga Favilesiitiɛ te boni ɣɛ ga ani nu nɛpɛ ge Ziizɛ ɣalama wɛ̃ni é kɛ te kwɛ̃ɛ kɛɛ ʋaa ma te so.