HIIƂULUITIƐ 12 - DEƲE NIINƐI

Kɛɛ‐zɔ kulo‐zee‐ma ʋai de maliɣii vɛ

¹ Na ma, tei tɔwɔ de maa ɣaligɛi seele ƃulu kpakpa wala vɛ è ɣɛ tine ƃili, pagɛ ƃalaa pɛ ŋɛnii nɛpɛ biiyai de ma de kulo va de da ga tee, na ɣa ga faa yowũi nii katagɛi de va kpãa. Na ɣa ɣɛɛ na ŋɛnii nii maa‐wɔkɔ ƃize‐yɛvɛ fai laani de laa wu, de wũ gili maʋaa va.

² De ɣaazu ɣa ɣɛ Ziizɛ nii va é ga da yee‐la‐mai maʋaa maala‐leve nui é ga nui yá maʋaa laa wulo. Towa kuu‐zu‐nɛi nii é ɣɛni laani tuo na mazaƃui ma é yii lɔɔni pɛɛ‐pulu wulu likpii maʋaa ɣa wũfegi é ɣɛni vaazu wosu la nà maʋai vala gáazu. Tɔwɔ tɔ sa zeini ga nu yee za‐su vele Gala na masa kpɔkpɔgi ʋaa va.

³ A ɣi gaa ziɛ nui nii ʋaa ma é yii lɔɔ na ɣavele lo‐dai ɣa faa yowũ‐ɣɛɛ vea te boga ga tɔ ɣagi. A nii ɣɛ kɛɛ ʋaa ʋaa ma wo ʋii mɛ lɛ ƃɛɛ zii‐lɔɔ lala ɔ́ vili wo yii zu.

⁴ Wo wɔi wo bosu ga wo ƃe ge leve faa yowũ va, wɛ lɛ dɛ yɛni kɛɛzu ɔ́ kulo‐ɣɛɛ wo ga wo maŋamai wu.

⁵ Wo yeemaa tɛnɛgi ma é woni ga wiɛ mawoi ga wa ga Gala dea. Ponɛvɛ Gala kɔlɔi zu mawoi ga “Dùu, de maliɣii na nu ɣɛɛ‐zɔ‐kulo ʋai zee ma, mɛ lɛ so ga soloya ɔ́ nɔ ɣɛ ga ani yá tɔ kpɛɛ na yìɛ è ʋii ƃɛɛ.

⁶ Toku ge zei ga nui nii de maliɣii ɣa wõi ɣɛ towaa kɛɛ‐zɔ kulo zée ma. Na ɣa ɣɛɛ na nui nɛpɛ yá yee zei bu ga duu towaa kpooʋe.”

⁷ A yii lɔ tɔ‐kpɛ‐mai ɣa wo siɣi ga kɛɛ‐zɔ kulo‐zee‐ma. Gala ka luozu ga wiɛ è ɣɛ dea. Duu zɛƃɛ ɣa é na kéea lɛ kɛɛ‐zɔ kuloa zée ma?

⁸ Ani ta ƃe na wo va wo ɣɛɛ‐zɔgi lɛ wuloni wo yee ma, na ɣa ga nii pagɛi nu pɛ na dɔ laa ɣɛ ba, a kɛ tii wɛ lɛ ga boloda lea, wa ɣɛ ga wɛ̃ɛ lea.

⁹ Na ɣa wulo na su, de ɣeeani te ɣɛni ma nu ƃuse ŋeteai zu tiɛ de ɣɛɛ‐zɔ kulo de yee ma, da wɔ diɛ wũfe te ma.? Nui nii mugi teɣa é ga de ɣeeai é Gala ta nà ɣa dɛ lɛ woloa bɛ́ de yɛʋui ɔ́ yɛ de ya?

¹⁰ De ɣeeani ta dɛi te de ɣɛɛ‐zɔ kuloni de yee ma ga su ƃua ta ƃɔɔ ɣi‐gaa‐ziɛi zu. Kɛ̀ ná dɛi tɔ de ɣɛɛ‐zɔ kulozu de yee ma da wulo‐nu‐ma ʋaa ma, kɛɛ ʋaa ma de wɔɔ laa ɣɛ ná maa‐wuolai va.

¹¹ Nii zu dɛ kɛɛ‐zɔ kulo‐zee‐mai maʋaa ƃɔgɔpɛ ka wulo ga fai gaa wãlai, ɛ́ lɛ ɣɛɛ ga fai gaa nɛi. Na luo vele mawulo‐nu‐mai ɣa ɣɛ ga tele‐bo tuoi zu yii‐lai numai niitiɛ ʋaa ma te maa woloai ga kɛɛ‐zɔ kulo‐zee‐mai ƃɔɔ.

¹² Na ma wo yee é zɛlɛni wo ma pɛlɛsɔ, a bu ziɣi wo ŋibiitiɛ te zu zai wo te zu ƃaa.

¹³ Na ɣa ɣɛɛ na a pelei lete to wo wɔwɔitiɛ ʋaa ma niitiɛ te zai wo ma, te mɛ lɛ wulo da, kɛ̀ to mu te vile da.

Tɛnɛgi é vile nu ɣɛlɛ ʋai va Gala na kpɔ‐bai va

¹⁴ A wiɛ wɔ ga nu pɛ zii la wo ya, maa‐wuo ʋai nii ɣɛ wo ya nii maʋaa lɛ ɣɛ nu va ɛ́ lɛ wɛlɛɛ de maliɣii va.

¹⁵ A wɛlɛ na va ga nu ta nɛpɛ ge mɛ lɛ ƃe Gala na maa‐wõi‐ɣaa ƃɔ‐bai maa zɔlɔ wosu. A wɛlɛ na va wɔlɔ ga nu ta mɛ lɛ wu ziɣi ɔ́ ɣɛ ga ŋasa wãla‐wãla faa ɣavele ɔ́ ɣɛ ga zaƃu fai nii lɛ pele ma nà ɔ́ wulo. Na wɔ ka ɣɛɛ na fai na ɔ́ kɛ nu lamaa maa ɔ́ woola.

¹⁶ A wɛlɛ na va ga nu mɛ lɛ ɣɛ ga wɛ̃ɛ‐ziɛ‐bo nu ɔ́ ɣɛ ga Gala tuo‐wo tala nu è ɣɛ velei Iisɔ ɣɛni la, nà wɔ ka vɛ ná ɣɛ ga to‐suvɛ te ɣaa velei ma é na zɔ̃wɔ wuloni daa‐midaa ɣilekpu kpẽi faa ma.

¹⁷ Wa ƃɔɔ wo kwɛ̃ni tei sa na wuloni ba yíɛ gwala wõi ɣɛ ga é ɣɛ ga nui tuuyiɛi ɔ́ loo bɛ́, te sakpeni zéea. Toku ge zei ga ɛ́ lɛ sa pele ɣaani ga é wulu ɣaa ʋe luo velei va, velei ƃalaa é ɣɛni ná maa vele ɣaa ziɛzu la ga ɣaazu‐maa‐yiɛ.

¹⁸ Wɛ lɛ vaani ŋɛnii nii wɔ nu ɣa ʋowũ ba. Na ɣa ga è ɣɛ velei ŋabu‐zo ge la Saini ɣizii ma, kpidi, ŋada ƃidia, fãga ƃakpa,

¹⁹ puu woo, é vɛɛ woi niitiɛ va te lɛɛni mɛni bea tiɛ pee ʋe ga keela woo mɛ lɛ sa wɔnɔ wo te ma.

²⁰ Ƃɔvɛlaale tɛ lɛ ƃega ziɛ deʋei nii wu Gala ge daani te ya. Na ɣa ga “To ŋɛni ƃalaa ɣa ʋowũ na gizi gwalai va ta yɛ sɔɔzu ga kwɔti é yɛsu é za.”

²¹ Ƃɔɔƃɔɔ su ŋadɛi vɛ wala maa wuai ɣɛ é yɛsu ʋɔlɔ Mooze ɣɛ tea, “Gà ƃelizu ga duo.”

²² Kɛ̀ wo vaa gizigi Zaayã ma wo va ʋululai maƔalagi na tai zu. Na ɣa ga Yɛlusulɛɛ nii é Gala ta. Wo vaa Gala ta ɣeelai niitiɛ wɔ nu lɛ zooga ɔ́ te ɣaa lu te ɣaa lɛi ba kuu‐ɣaa ʋaa ma.

²³ Wo vaa duu‐ɣaa maa wũgitiɛ wɔ vɛ te laa ziɣiai Gala ta. Wo va wɔnɔ faa‐wo‐gaa‐leve nui wɔ nii é ga Galagi ŋɛni pɛ faa ma. Niitiɛ te ga tele‐bo bea wo vaa te mawɔʋɛitiɛ wɔ vɛ, na ɣa ga niitiɛ maa‐wulo‐zu ziɣia te ʋaa va.

²⁴ Wo vaa kɔnɔ Ziizɛ wɔ nii é ga de yɔɔzu nui ta Galani deʋe niinɛi ʋaa ma. Wo vaa ŋamai nii wɔ fazagɛi, nii é faa vagɔ wosu é leve ƃalaa Eebɔ maŋamai va.

²⁵ A wɛlɛ na va ga nui nii é kpɔɛi wosu wo mɛ lɛ yee wulo bu. Toku ge zei ga numaitiɛ zui‐zu lɛnɛgi woni ga tiɛ te yee wulo bu natiɛ ɣa tɛ lɛ wuloni su, kaalima teɣa da ɣa da wulo su ani da ɣɛlɛ na nui va é de lɛnɛsu Gala ta.

²⁶ Gói é zui ƃelini. Tɔwɔ é ki‐to boga yíɛ ɣɛ tea, “Gɛ̀ lɛ vaazu nɔ dɛ zui ƃelizu ɔ́ wɛ̃ɛ na va. Kɛ̀ gà vaazu gee wɔlɔgi ƃelizu ƃalaa pɛ.”

²⁷ Woi nii é wosu ga “Gà dɛ wɔnɔ gà kɛ,” ŋɛnii nii é kpeli woga woi na ɣa dɛɛzu ga maʋaa ɣa ƃea gá. Na ɣa ga nii kpɛtɛi. Na ɣa ɣɛ kɛɛ ʋaa ma ŋɛnii nii lɛ lubuga wó ma nà yɛ na.

²⁸ Na ma maa nɛɛvɛ a de ɣɛ ga faa‐nɛɛ‐wɛ̃ɛ bea masadai nii maa‐zɔlɔ‐wo faa ma nii ɛ́ lɛ lubuga wó ma. Nii mavelei ma felii nii Gala ka yee zei bu de ya, a diɛ na wo da a diɛ kɛ ga wũfe‐ma vele ta duo‐ba.

²⁹ Ƃɔvɛlaale Gala ka ga ŋabui yá ŋɛni ɣala ʋuwã.