HIIƂULUITIƐ 10 - DEƲE NIINƐI

¹ Tei tɔwɔ tɔgi nɔ ga faa vagɔitiɛ te vaazu vaazu te maa niini, tɔ lei ɔ́ ɣɛ ga te maƃɔɔƃɔɔgi, ɛ́ lɛ zooga wɔlɔ‐wɔlɔ taitiɛ ta lɔtɔ Gala ba ɔ́ te ɣɛ ga numaitiɛ maa‐wulo‐zu lɛ ɣɛɛ te ʋaa va zalaɣai nii mavele ma ta kulo ga kwena‐kulo vele ɣile‐gile.

² Ɔ́ ƃe na ɣɛɛzu ga na, kɛ̀bɛ zalaɣa‐wulo ʋai wɛ̃ɛ gɔ leve, kɛlɛɛ? È ɣɛ Gala‐feli veaitiɛ te maa wua wɔlɔ ɣile, faa yowũ maɣi‐gaa‐ziɛ lɛ ƃega ɣɛ te ɣa.

³ Kɛ̀ nu ɣi ka loo faa yowũ zu zalaɣai niitiɛ zaala zu ta te wulo ga kwena‐kulo vele ɣile‐gile.

⁴ Toku ge zei ga ɛ́ lɛ zolowoga ga nikɛ zine ƃɔga bilia te maŋamai faa yowũ ziɣi nu va.

⁵ Na mazaƃu ma, tei Kolai vaani zui zu é ɣɛni Gala ma, “Ɛ̀ lɛ zalaɣa wõi ɣɛɛni ta faa‐nɛɛ‐ɣɛɛ ʋaa è vɛ, kɛ̀ nu ƃuse lɔtɔi ɣa è kàvele ƃɛtɛni su.

⁶ Gala zalaɣa‐wuloa ƃɔga zalaɣa‐wuloa faa yowũ― ɣɛɛ ʋaa ma ɛ̀ lɛ natiɛ ziɣini ga yii‐ma.

⁷ Na ma gè boni gè ɣɛ è ma, ‘Wɛlɛ, gè vaa ga gè è yii‐mai ɣɛ, ee Gala,’ è ɣɛ velei ponɛi la é vile bà kpiti kɔlɔi zu.”

⁸ È ɣɛ velei bogɛi la bɛ́ ná maazuvɛ yíɛ ɣɛ tea, “Zalaɣa‐wuloa, faa‐nɛɛ‐ɣɛi è vɛ ta gala zalaɣa‐wuloa é vɛɛ zalaɣa‐wuloa va faa yowũ ʋaa ma, ɛ̀ lɛ natiɛ wõi ɣɛɛni ɔ́ nɔ ɣɛ ga è te ziɣi ga yii‐ma.” Zalaɣai natiɛ ta wulo tɔgi laa woi mavele ma.

⁹ É ta woni wɔnɔ na wulu é ɣɛ tea, “Wɛlɛ, gè vaa ga gè è yii‐mai ɣɛ.” Tɔ mamaa wũgi ƃalesu gá kɛɛ ʋaa ma é fele kelei maʋaa maala leve.

¹⁰ Gala zii‐mai na mavele ma de wuloa su leelaa ga Gala na dɔa. Na wɔ ge ɣɛɛni nu ƃuse lɔtɔi é ɣɛ Ziizɛ Kolai ma nà wulo vele ma ga zalaɣa, ná ɣɛ nɔ ɣile, nà wɔ ge kulo‐ɣɛɛ wo.

¹¹ Tɔwɔ laa‐ʋaalegi zɔi ta nɛpɛ ka lo ga gela‐bo pele ɣile‐gile ná tii‐ɣɛɛ‐zuvɛ yíɛ zalaɣa zii ɣile‐gilegitiɛ wulo nɔ wɔ, nà wɔ gɛ lɛ wɔlɔ‐wɔlɔ zooga ɔ́ faa yowũ ziɣi nu va.

¹² Kɛ̀ zalaɣa gilagi nii é siɛ mazii ɣaazɔ ʋaa ma, tei Kolai é na wuloni faa yowũ ʋaa ma, é zeini ga Gala zee za‐su vele.

¹³ Na ɣa ɣɛɛ na towaa yɛ ná maa kpowũsu é yɛsu kɔ́ɔ yɔ̃wɔitiɛ te vɛɛ kɔ́wɔ wu.

¹⁴ Ƃɔvɛlaale zalaɣa ɣilagi‐wulo vele ma bɛ́ siɛ gaazɔ ʋaa ma, numai niitiɛ te wuloai su ga Gala na dɔa é kɛɛ maa‐wulo‐zu nɛpɛ gɛ lɛ yɛni te ʋaa va.

¹⁵ Gala baa ŋinɛgi ƃalaa ɣa seele woo ʋeezu de ɣaazu ma. Tɔ bosu ga de maliɣii Gala ka ɣɛɛzu tea,

¹⁶ “Deʋei nii ɣa gè vaazu daazu te ya ga ná luo vele. Gà nà tɔgitiɛ wu te yii zu, na ɣa ɣɛɛ na gè ponɛ te ɣigi ma.”

¹⁷ Tɔ ta vɛɛzu wɔnɔ ba yíɛ ɣɛ tea, “Gɛ̀ lɛ sa wɔlɔ‐wɔlɔ ta ʋaa yowũitiɛ laa ga yee ƃeɣa ta te ɣɛɛ‐zɔgi niitiɛ tɛ lɛ pele ma.”

¹⁸ Vɛ fai niitiɛ te zu‐ʋaa‐yɛ faa na, zalaɣa‐wulo ʋaa lɛ sa ɣɛɛ wɔnɔ na faa yowũi ʋaa ma nu ɣa kɛ.

A de lɔtɔ ga gaama ɣi

¹⁹ Na ma, nà numaa, de yee laa ʋũigɛ ga de lɛ ŋada maa wuai zu Ziizɛ maŋamai zaala zu.

²⁰ A da lɛ na pelei ʋaa ma é daa laoga de luo é ga ŋetea niinɛi mavelei, kɛɛ ʋaa ma de li seɣei wuluvɛ é ŋada maa wuai mavɛlɛi laavɛ. É nii ɣɛɛni dɔtɔi‐wulo vele ma ga zalaɣa.

²¹ Na ɣa ɣɛɛ na tei tɔwɔ laa‐ʋaale kpakpa wala de ya Gala na pɛlɛi maazu,

²² pagɛ de lɔtɔ ga gaama ɣi ga duo lala vele ƃɔɔƃɔɔ zee‐la‐ma zaala zu, de yii maa wuai faa yowũ ɣi‐gaa‐ziɛi zu Ziizɛ maŋamai vɛ, de lɔtɔi maa wuai ga ziɛ yele‐kele.

²³ Pagɛ de ɣata da ɣi‐togi mawoi‐wuloa va la diɛ bo de mɛ lɛ ɣɛ ziɣizu pulu dɔ li ŋɛ ni dɔ li ŋɛ ni. Toku ge zei ga nui é ki‐togi woga ga diɛ tɔ ga nui nu ɣa laa la.

²⁴ Na ɣa ɣɛɛ na maa nɛɛvɛ a de ɣi gaa ziɛ ga velei da ɣiini zii wu ziɣi la ga wõila ɣɛ de ya diɛ tii vagɔ ɣɛ.

²⁵ A de mɛ lɛ ƃe wũi faa va ŋada ɣila, è ɣɛ velei sa nà mɔɔ la nui taniga ya. Kɛ̀ to mu a diɛ ɣiini zii lɔ. Wa nii ɣɛ è ɣɛ velei sa wo wɛlɛzu la ŋeteai ɣaa‐ƃela foloi va yíɛ lɔtɔ.

²⁶ Ƃɔvɛlaale ani da ɣele‐ɣele na gaamai maʋai zu diɛ kɔnɔ gaa ɣili diɛ faa yowũ ɣɛ, zalaɣa lɛ sa ɣɛɛ na faa yowũ ʋaa ma.

²⁷ Kɛ̀ faa‐yɛ‐maa maa‐yiki‐yiki ka de ɣaazu ɣa ɣɛ tuo ta ŋabui goei leveai. Na ɣa ga ŋabui nii yá Gala kɔɔ yɔ̃wɔitiɛ ɣala ʋuwã.

²⁸ Nui é tɔgi na ŋala‐ŋalaga dái Mooze ya manui ɣa za seele felegɔ‐saagɔ woo ma gaazu‐maa‐wõi‐ɣaa ʋaa lɛ ɣɛɛ ba.

²⁹ Wo ɣigi zu tɔ gaa‐wãlaa liigo zɛƃɛ ɣa sa yá ƃɛ nui nii ma, na ɣa ga nui nii gaazu levega Gala dui ma é ƃaa wulo deʋei maŋamai ma, na ɣa ga ŋamai nii é nui ƃɔɔ wuloa su leelaa ga Gala na dɔ? Na ɣa ɣɛɛ na é kɛ Gala baa ŋinɛgi woei leve, na ɣa ga Gala baa ŋinɛgi yá gaazu‐maa‐wõi‐ɣai wo.

³⁰ De nui nii wɛ̃ni é ɣɛni tea, “Pɔ̀ɔ laa ɣa ga faa‐woto‐kuloai. Nà ɣa gà faa woto kulo.” De woi nii wɛ̃ni wɔnɔ é woni ga “De maliɣii ɣa ná numaitiɛ ta ʋaa‐wogi ɣaa leve.”

³¹ Tɔ ga faa maa‐lua ga nu vili faa zu ʋululai maƔalagi ya.

³² Kɛ̀ a ɣi zɛ wɔlɔ‐wɔlɔi zu tei wo ɣi daa wodoni wo yii lɔ daa‐nɔwɔ‐wo kpaa‐ƃaagitiɛ ya wiɛ ɣɛ te ɣa talakpa‐talakpa.

³³ Ɔ́ ɣɛ ga siɛ ta wo wuloai zɛ‐sɛ pɛ gaazu ga te wo zo pele yowũ faa ƃoei yìɛ zei wo ma, ɣee ta niitiɛ na mazii ɔ́ ɣɛ ɣɛɛzu ga tiɛ wiɛ ɣɛ ga te vaa‐vɛɛ‐ba.

³⁴ Ƃɔvɛlaale pilisinea te maa‐wõi ɔ́ wo zo. Na ɣa ɣɛɛ na wiɛ laa zei bu ga kuu‐zu‐nɛɛ ga te wo weli kulo wo ya ga gaa‐ƃaa, toku ge zei ga wo ɣɛni ga kwɛ̃ɛga ga wo weli ka na pagɛi é leve natiɛ va é ga ŋɛnii yá yɛ na wɔ.

³⁵ Na ma a mɛ lɛ wa luo lala ʋai loo ya. Tɔ ga ŋɛnii nii tɔnɔ wala ƃakpai ba.

³⁶ Toku ge zei ga zii‐lɔɔ‐wulo ʋai maƃala ɣa wo ma, kɛɛ ʋaa ma wo Gala zii‐mai ɣɛ, na ɣa ɣɛɛ na nii wo ɣi togɛi la wo maa zɔlɔ wo.

³⁷ Ponɛvɛ Gala kɔlɔi zu mawoi ga “Na ta wolo ɣa kɛ dɛ. Na ɣa ɣɛɛ na nui nii é vaazu vaazu tɔ sa a va. Ɛ́ lɛ toa pulu.

³⁸ Kɛ̀ nà tele‐bo tuo‐wo nui ɣa ŋeteai ɣɛ ga zee‐la‐ma. Ani yá vili na wulu, nà kagi zii‐laa nɛpɛ gɛ lɛ ɣɛɛ zèea maʋaa ma.”

³⁹ Kɛ̀ numai niitiɛ ta vili wulu te zu ŋala‐ŋala, a dɛ lɛ ga natiɛ te ta. Niitiɛ zee‐la‐ma te ya tiɛ yɛʋui maazu vɛtɛ natiɛ ɣa de ga te ta.