GALEESIAITIƐ 6 - DEƲE NIINƐI

A ziɛ ɣiini kpala‐ma ʋai wu

¹ Nà numaa, ani nu ɣa faa yowũ ɣɛɛ na ɛ́ lɛ gaa ɣilini, waitiɛ Gala baa ŋinɛgi é wo yii zu, wa ɣa wa kɛ manui loo zu ga sɛ‐sɛ‐bo pele wiɛ. Wɛlɛ ƃɔɔ maazu va, kɛɛ ʋaa ma tɛ‐ga mɛ lɛ wo ga yìɛ yà ƃalaa.

² A ziɛ ɣiini kpala ʋaitiɛ wu wiɛ ziɛ ga Kolai na tɔgi laa woi na mavele ma.

³ Ƃɔvɛlaale ani nu nɛpɛ ka ɣi gaa ziɛ na ga tɔ ga nu mazii ta, tɔwɔ ɛ́ lɛ le, a kɛ tii tɔ ƃɔɔ ɣaa wɔlɔsu.

⁴ Ƃe ba nu ɣile‐giledai é ɣaazu lɛ ga ɣɛɛ ʋai é zii la. Na ɣa ɣɛɛ na nii yá manui yii la towaa ziɣi kɛ́ɛ ʋai la, ɛ́ lɛ ga kɛ́ɛ ʋai wo‐kɔ̃ɔ fai bɔɔ nu na dɔ ma.

⁵ Ƃɔvɛlaale kɛni nu ɣile‐giledai ɣa ƃɔɔ ɣasɔi ziɣi.

⁶ Nui nɛpɛ te kala bosu ga Gala goi, ŋɛni vagɔi nɛpɛ é zéea kɛni yá ta leve kala‐bo nui wɔ.

⁷ A mɛ lɛ ƃe gaa‐wɔlɔ gɔ wo ga wiɛ. Gala gɛ lɛ ga nui nu ɣa gaa liti. Ƃɔvɛlaale ŋɛnii nɛpɛ nu ɣa sii tɔ nɔ ɣa manui ɣa gaa vai wulo.

⁸ Nui nii ɣá sii‐zii ŋɛni zii ga é yii‐ma ɣɛ nɔ la nu ƃuse lɔtɔi zu, nii yá kulo gá ga gaa vai tɔ ga kpɔɔ zu‐ƃɔnɔ‐woga. Kɛ̀ nui nii yá sii‐zii ŋɛni zii ga é wulo Gala baa ŋinɛgi lɔnɔ ma, nii manui ɣa sɔlɔ wo Gala baa ŋinɛgi ya ga ná sii‐zii ŋɛnii ɣaa vaa towaa ɣɛ ga zɛʋui nii kwɛ̃ɛ gɛ lɛ ba.

⁹ A de mɛ lɛ ƃɔlɔ ga faa vagɔ‐ɣɛɛ. Ƃɔvɛlaale ani a dɛ lɛ fii‐ƃɛɛ looni maʋai zu, mawui ɣa lɛɛ na gá, a da su‐lɔnɔ zɔlɔ wo.

¹⁰ Na ma a da kavele ɣaa na, a de faa vagɔ ɣɛ nu pɛ bɛ, niitiɛ da tiɛni de ga kaalaa ɣila zee‐la‐mai zu natiɛ ta dɔ vele ƃɔɔƃɔɔ ma.

Tɛnɛ gaa‐ƃelagi

¹¹ A wɛlɛ velei va zèe‐wogi ƃaazagɛi la kɔlɔi zu gè ponɛzu wo wɔ nà ƃɔwɔi.

¹² Taitiɛ te wõini te nu ƃuse lɔtɔi ɣaazu lɛ ga é va numaa ɣaazu, ta ɣa te wo ɣɛlɛ gbɛdɛzu ga te wo zei kpoto ma. Tɔwɔ ta na ɣɛɛzu ga Kolai na pɛɛ‐pulu wului maƃɔɔla ge mɛ lɛ wo ga tiɛ.

¹³ Ƃɔvɛlaale taitiɛ ƃalaa sei‐kpoto‐mai wogɛi ga tiɛ tɛ lɛ ziɛzu ga Gala na tɔgi. Kɛ̀ ta wõi ɣɛɛzu ga sei‐kpoto‐mai wo ga wiɛ kɛɛ ʋaa ma te ƃɔɔ wɔɔlɔ numaa ɣaazu wo lɔtɔi zaala zu.

¹⁴ Kɛ̀ kpɔɔ‐ʋaa‐wɔɔlɔ ʋai ʋoolo bà é li powũ, kɛni nɔ de maliɣii Ziizɛ Kolai zaa ʋai gului ma nà kɛ gè wɔɔlɔ. Maʋai mavele ma ɣa zuu ƃɔga gee te ƃakogɛi la ga te ƃe ge leve màʋaa va, nà wɔ kpàkogɛi ga kpè ge leve te maʋaa va.

¹⁵ Sei‐kpoto‐ma ʋai pɛ, sei‐kpoto‐ma lala ʋai pɛ, te ta lɛ ga ŋɛni ta nɛpɛ. Kpɛtɛ niinɛdai ɣa é ga faa.

¹⁶ Taitiɛ ɣaazɔ ta ziɛ ga deʋei nii, na ɣa ga Yezɔi niitiɛ te Gala faa ma, zii‐laa ɣa ɣɛ te ya maa‐wõi‐ɣaa ƃɔ‐ba wo ga tiɛ fãa.

¹⁷ É ziɣi sa za ma é li ga tuo, nu ta nɛpɛ ge mɛ lɛ ƃoei dà. Ƃɔvɛlaale Ziizɛ yee‐woga ta dɔ̀tɔi ma ga ƃadi.

¹⁸ De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo yii zu fãa, nà numaa. Na nɔ yá ɣɛ.