GALEESIAITIƐ 5 - DEƲE NIINƐI

¹ Kolai de wũ maa woga ga de ɣɛ wɔɔlɔlai zu. Na ma a lo kpãa. A mɛ lɛ laa zei bu wɔnɔ wɔ ɣili ga duo ɣalu.

A lo kpãa wɔɔlɔlai zu

² Nài gè ga Pɔɔ gà bosu wiɛ ga ani sei‐kpoto‐mai ɣa wo na ga wiɛ, Kolai malɔnɔ nɛpɛ gɛ lɛ ɣɛɛ sa ba wo ʋaa ma.

³ Gà wɔnɔ dɛɛzu ga nui nɛpɛ sei‐kpoto‐ma ɣa wo da tɔ ga manui vaa ʋaa ga é ziɛ ga Gala na tɔgi ɣaazɔ laa woi.

⁴ Waitiɛ wa pele ɣaa ziɛ ga wo ɣɛɛ‐zɔ yowũi mɛ lɛ ɣɛ wo va ga faa wo ziɛ vele ma ga tɔgi laa woi, wa ƃɔɔ leve Kolai va. Tɔwɔ wo ʋoolaa ɣa na a ɣɛ ná maa‐wõi‐ɣaa ƃɔ‐bai va wo loo.

⁵ Gé ɣaazu ɣa tele‐bo tuoi nii luo gé ɣigi ba Gala baa ŋinɛgi zaala zu gíɛ kɛ zee‐la‐mai mavele ma.

⁶ Toku ge zei ga nui ta Ziizɛ Kolai te su ɣilekpu sei‐kpoto‐ma ʋaa pɛ, sei‐kpoto‐ma lala ʋaa pɛ, te ta mawulo‐nu‐ma lɛ ɣɛɛ bɛ́, kɛni nɔ zee‐la‐mai nii yá ɣɛ tii ɣɛɛzu wõila zaala zu.

⁷ Wo ɣɛni kɛɛzu ga pagɔ. Ƃɛi mu ka é ƃesaga wo luo ga é wo ƃe teve goo‐mɛni‐kuloa va gaamai zu?

⁸ Te laa‐lɔ ʋai wo va maʋai lɛ ziɣini nui nii la é wo liliga.

⁹ Kpoolo‐ʋɔɔ ƃokolo ŋɛnii maɣati wolo ɣa kpoolo‐ʋɔɔ ƃumɛ ƃokolo kɔlɔ‐kɔlɔ ma ɣaali.

¹⁰ De ɣɛɛ vele ma su ɣilekpu da de maliɣiini, dàavɛ la ga wɛ lɛ vilega nu ta ƃɔnɔ na ki‐gaa‐ziɛ wulu ɔ́ leve nà dɛi va. Nui nii wɔgi é wo yii wu ziɣizu faa ɣa yɛ manui ma, é ɣɛɛvɛ ƃalaa ga nu mazii ta nɛpɛ.

¹¹ Nà numaa, ani gà dɛ nɔ bosu ga tiɛ numaa zei kpoto ma, zɛƃɛ mu ka é kɛɛ kpɔ̀ɔlagɛi dɛ nɔ? Ɔ́ ɣɛ na ŋɛ na, pɛɛ‐pulu wului nii kpesagɛi numaa ɣaazu luo tɛ lɛ Kolai ʋaa ziɣizu ga gaama, nà ɔ́ sa ziɣi ma.

¹² Kùu zu ɔ́ nɛɛ ga taitiɛ te wo ɣigi maa ɣɛɛzu yɔʋɔ te ƃɔɔ zɛɛɣɛ.

¹³ Nà numaa, te wo liliga ga wo ɣɛ ga wɔɔlɔa. A mɛ lɛ nɔ wa yee‐laa‐ʋũi fai ziɣi ga fai é pele wuloa ga wiɛ nu ƃuse yii‐mai‐ɣɛɛ ʋaa ma. Kɛ̀ a ɣɛ ga ɣiini ta mɔɔlɛ‐wo bea wõilai zaala zu.

¹⁴ Ƃɔvɛlaale Gala na tɔgi laa woi ɣaazɔ laa‐zɔ bogɛ woo ŋɛɛ ɣilagi nii zu ponɛi Gala kɔlɔi zu. Na ɣa ga “Wõi ga è wɔɔ nu è ɣɛ velei è ƃɔɔ wõini la.”

¹⁵ Kɛ̀ ani wa ɣɛ na ɣiini gĩisu wiɛ ɣiini kãla‐ŋala ga laa woo, a kɛsɛ ga wo mɛ lɛ ɣiini zɔɔzu ziɛ‐pului leve.

Gala baa ŋinɛgi lɔnɔi ta nu ƃuse yii‐ma luoi

¹⁶ Nii gè bosu towaa. A ziɛ ga Gala baa ŋinɛgi na deʋei wo mɛ lɛ nu ƃuse yii‐ma ʋaa ziɣi ga zii‐ma‐ɣɛɛ.

¹⁷ Ƃɔvɛlaale nu ƃuse yii‐ma ʋai ƃɔga Gala baa ŋinɛgi tɛ lɛ zolowoga. Na ɣa ɣɛɛ na Gala baa ŋinɛgi yii‐ma ʋai ƃɔga nu ƃuse yii‐ma ʋaa tɛ lɛ zolowoga. Toku ge zei ga fai niitiɛ ta wɔɔzu ɣii wɔ. Nii wa ɣɛ wo kɛ tiɛ wo ƃe teve kɛ́ɛ va.

¹⁸ Kɛ̀ ani Gala baa ŋinɛgi ɣa é pele wulozu ga wiɛ, wɛ lɛ tɔgi yee wu.

¹⁹ Tɔwɔ nu ƃuse yii‐ma ʋai maluoitiɛ ɣaa wodovɛ. Ta ga wɛ̃ɛ‐ziɛ‐boga, nu‐wɔtɔ tuo‐woga, ƃaa‐wulo‐ma luo‐woga,

²⁰ maa‐niini gala‐felia, maa‐wɔlɔ‐wɔlɔ sale yeke‐kɛɛ, sili, kpɔɛ, tolo, zii‐ɣaa‐wãla, nu ƃalaa nɔ ƃɔɔ ʋaa ma, daa‐za‐wuloa, gaa‐yowũ,

²¹ kuu‐zu‐yowũ‐ma, dɔɔ‐ƃakpa‐ƃoalea, zɔɔ‐zɔɔ gaa‐wo‐boga é yɛsu sa é lii la. Gà wo lɛnɛsu è ɣɛ velei gè wo lɛnɛga la wɔlɔ, ga taitiɛ ta na ɣavele ʋaitiɛ ɣɛ te wɔɔ laa lɛ ɣɛɛ Gala na masadai va.

²² Kɛ̀ Gala baa ŋinɛgi lɔnɔi ɣa ga wõila, kuu‐zu‐nɛɛ, zii‐laa, zii‐lɔɔ, tuola nɛɛ, tuo vagɔ, nu ɣɛɛ ʋai ga nui nu ɣa laa la,

²³ nu zɛ‐sɛ‐boga ta nu zu‐zo fai faa ma. Tɔ gɛ lɛ lɛɛni na ɣavele ʋaitiɛ ma.

²⁴ Tɔwɔ nu ƃuse yii‐ma ʋaitiɛ é vɛɛ mawõi‐leve‐mai va ta te maɣi‐gaa‐ziɛi, taitiɛ te ga Ziizɛ Kolai na dɛitiɛ te ƃe tevea ba è ɣɛ nu ɣa ŋɛni ƃako gulu ma.

²⁵ Ani Gala baa ŋinɛgi ɣa a de yɛʋuzu sáala zu, a de ziɛ ga Gala baa ŋinɛgi ʋo‐foi ƃalaa pɛ.

²⁶ A de mɛ lɛ wɔɔlɔ ƃɔɔ ɣaazu. A de mɛ lɛ ɣiini zii‐ɣaa‐wãla ʋaa ɣɛ. A de mɛ lɛ kuu‐zu‐yowũ wulo ga ɣiini.