ƐFƐSƆITIƐ 3 - DEƲE NIINƐI

Pɔɔ na tii zii ƃalaagitiɛ ʋaa ma

¹ Nii mazaƃui ma, nai gè ga Pɔɔ gè ga pilisine Ziizɛ Kolai ʋaa ma wo mazaƃu ma, wai wo ga zii ƃalaagitiɛ—

² nà ki‐gaa‐ziɛi ɣa ga wo faa mɛniga é vile Gala na maa‐wõi‐ɣaa ƃɔ‐bai va feeai zèea ga gè daa ziiti wo ma.

³ Na ɣa ga fai nii doowugɛi yɛga, velei gè gaa ɣaa la kulo vele ma Gala bɛ kɛnɛ ma gàazu, è ɣɛ velei gè ponɛɛ la kɔlɔi nii zu ga su ƃua.

⁴ Wa nii lodo na, wa wɛlɛ na va ga velei gè fai nii ɣaa ɣaazu la doowugɛi yɛga é vile Kolai va.

⁵ Na ɣa ga fai nii gaa lɛ ŋɛni wodoni ga nu ƃusea wɔlɔ‐wɔlɔi zu, tɔwɔ maʋaa wuloa sa kɛnɛ ma niitiɛ ɣaazu te wuloai su leelaa ga Kolai na keelaa ƃɔga daa woo‐wo bea.

⁶ Fai nii gè ʋaazu ma tɔ ga tei tɔwɔ zii ƃalaagitiɛ te su ɣilekpu ta Ziizɛ Kolaini te vɛɛvɛ sa gé va gé ƃɔ weli ma, te ga nu ƃulugi nii gé su su‐veaitiɛ te ta, te wɔɔ laa wɔnɔ ki‐togi va woo niinɛ vagɔi zaala zu.

⁷ Woo niinɛ vagɔi nii ɣa gè ɣɛɛni ga malii‐ɣɛɛ nu Gala na maa‐wõi‐ɣaa ƃɔ‐bai zu ʋaa‐nɛi mavele ma, na ɣa ga nii feeai zèea ná gaa‐ƃaa lii‐ɣɛi zaala zu.

⁸ Velei ƃalaa tòai la niitiɛ ɣaazɔ wu gá tiɛni gé wuloai su leelaa ga Gala na numaa, maa‐wõi‐ɣaa ƃɔ‐bai nii woni gàazu, kɛɛ ʋaa ma Kolai weli tama‐lamagi nii maʋaa ɣaa ɣaazu ƃai gè maʋaa wo zii ƃalaagitiɛ ma.

⁹ Na ɣa ɣɛɛ na fai nii doowugɛi wɔlɔ ŋɛni‐pɛ‐kpɛtɛ Ɣalagi vɛ ga su woozaa, gè kɛ nu pɛ ge maleʋei wɛ̃ɛ,

¹⁰ kɛɛ ʋaa ma Gala na kele‐ɣelegi tamai su maʋaa wulo kɛnɛ ma gee‐wɔlɔgi‐zu masaga ɣaazu ta ná ɣaa‐ƃaa vea Gala pɛlɛi zaala zu.

¹¹ Nii ɣɛɛni ga wɔlɔ‐wɔlɔ‐kulo‐tɔsɔ leʋei zu ʋaa‐ɣɛɛ nii é kpɛtɛni ga é leve ma de maliɣii Ziizɛ Kolai zaala zu.

¹² Towa de lai la ga da va Gala pɔ ga duo lala vele sáala zu de laa vele ma la.

¹³ Na ma gà wo lɛnɛsu ga wo ʋii mɛ lɛ ƃɛɛ fai nii zu gè malaa‐nɔwɔ‐wo bosu wo ʋaa ma. Towa é saala laazu wo ma.

Kolai na wõilai wɛ̃ɛ fai

¹⁴ Nii mazaƃui ɣa gè vɛɛzu la de ɣeea wɔwɔ wu.

¹⁵ Na ɣa ga de ɣeeai nii zui zu ɣaalai ɣaazɔ ƃɔga gee‐zuvɛ ɣaalai ɣaazɔ ta daa‐zei maa zɔlɔ wo zéea.

¹⁶ Gà vɛɛzu kɔwɔ wu ga é kɛ baa ŋinɛgi é wo yii lɔ ga gaa‐ƃaa ná bɔɔlɔla walai mavele ma.

¹⁷ Na ɣa ɣɛɛ na é kɛ wɔnɔ Kolai ɣɛ wo yii zu zee‐la‐ma zaala zu. Gà vɛɛzu kɔwɔ wu ga é kɛ wo mayãta vili wo lo kpãa wõila zu,

¹⁸ kɛɛ ʋaa ma gaa‐ƃaa ɣɛ wo ya ga niitiɛ ɣaazɔ te ga Gala na dɔ numaa wo vɛɛ te va wa tiɛni wo Kolai na wõilai maʋaa wo‐ma wɔɔlɔ velei ɣaa ɣa ta zee laa wooza pelei é vɛɛ velei va maʋai zuwuai la.

¹⁹ Na ɣa ɣɛɛ na wo wõilai ƃɔɔ wɛ̃ɛ, velei ƃalaa pudɛgɛi la nu ƃuse na kele‐ɣelegi maazu. Wa kɛ ŋɛ na kɛɛ ʋaa ma nii nɛpɛ é Gala zeea wo ʋaa ma é wo yii laa ʋe da.

²⁰ Tɔwɔ Galagi nii yá zoo é faa lamaa ɣɛ de vɛ é leve niitiɛ ɣaazɔ va da zoo de feli ma ta niitiɛ da zoo de ɣi gaa ziɛ te ma gaa‐ƃai nii é tii ɣɛɛzu la de zaama mazaƃui ma,

²¹ towa daa‐maa‐lɛɛ ɣa wo da ná pɛlɛi zaala zu ta Ziizɛ Kolai. Daa‐maa‐lɛɛ ɣa yɛ wosu la ƃɔɔ wɔ ŋetea li ŋetea va. Towaa ɣɛ ŋɛ na.