KOLASAITIƐ 2 - DEƲE NIINƐI

¹ Na ma gè wõini wo kwɛ̃ ga velei gè wɔɔzu la wo ʋaa ma ga kpakpaa é vɛɛ niitiɛ va te Laodisia ta niitiɛ ɣaazɔ gá tiɛni gé ɣaazu lɛ dɛ tooni kii zu,

² kɛɛ ʋaa ma te yee ɣa vili na kii zu wõila zu te yii lɔ, faa ɣaa‐ɣai nii sakpe gɛ lɛ maʋaa va nà ƃakpa te ya ta Gala zeea ʋai nii doowugɛi yɛga nà maɣele‐ɣelegi. Nà wɔ ka ga Kolai maʋai.

³ Towa kele‐ɣelegi ƃɔga faa‐ɣaa‐ɣaa ʋai te zu‐lɔnɔi ɣaazɔ loowugɛi zéea.

⁴ Gà nii wosu ga nu mɛ lɛ wo ziɣi pele va ga gaa‐wɔlɔ goo.

⁵ Toku ge zei ga velei ƃalaa nà kagi gɛ̀ lɛ la wo woba, nà ki‐gaa‐ziɛi ɣa wo woba, giɛ kuu‐zu‐nɛɛ wulo é vile faitiɛ va te lai ma wo ya ga pagɔ ta wo laa ʋai ga Kolai ga kpaanaga.

Zɛʋui laa‐ʋe fai nu ya Kolai zaala zu

⁶ Na ma è ɣɛ velei nɔ wo yee zeiya la Ziizɛ Kolai wu ga wo maliɣi, a wa ŋeteai ɣɛ ga velei nɔ wo la su ɣilekpu wa tiɛni,

⁷ wo yãta viligɛi wo maʋaa liai ga zee luo vele wo ɣɛɛ vele ma su ɣilekpu wa tiɛni, wo ɣatagɛi wa yee‐la‐mai va, è ɣɛ velei nɔ kala‐bogi wogɛi la ga wiɛ. A ɣɛ wɔnɔ ga mama tamaa ʋee vea Gala bɛ.

⁸ A mɛ lɛ ƃe ba nu ta laa ɔ́ zoo wo la ga ná kuu‐zu laali ta gaa‐wɔlɔ yãka, manui wɔ ɛ́ lɛ ɣɛɛ kɛɛzu Kolai na dɛi mavele ma. Kɛ̀ to mu yíɛ kɛ nu ƃuse yaa ʋai mavele ma yíɛ wɔnɔ kɛ zuu ƃɔga gee te zu ɣaa‐ƃai mavele ma.

⁹ Ƃɔvɛlaale Kolai lɔtɔi zu ɣa Gala kagi na ga gaa woolia.

¹⁰ Tɔwɔ wo ɣɛɛ vele ma su ɣilekpu wa Kolaini wo zɛʋui maa zɔlɔ woga ga daa ʋega. Towa é ga maazu‐ʋaa‐wo‐bo fai mawũ ta gaa‐ƃai ɣaazɔ.

¹¹ Sei‐kpoto‐mai woni ga wiɛ wo ɣɛɛ vele ma su ɣilekpu wa tiɛni. Ɛ́ lɛ ga sei‐kpoto‐mai ƃɔɔ wo ga nu ƃuse yee ƃeɣa, kɛ̀ tɔ ga nu ƃuse lɔtɔi‐wulo ʋai wo ma Kolai na sei‐kpoto‐mai zaala zu.

¹² Na ɣa ɣɛɛ na wo vɛɛni wɔnɔ bá te wo loowu bataizɛi mavele ma wo vɛɛ bá ƃalaa pɛ te wo wu ziɣi saa ya wo laa vele ma ga Galagi nii é bú ziɣini saa ya nà ná gaa‐ƃaa ʋai.

¹³ Wai wɔlɔ wo zai ɣɛ wa lɔ‐kãla‐ŋala tuoi zu ta wo zei tɛ lɛ ŋɛni boni kpoto ma nà maʋai, Gala ge wo vɛɛni Kolai va é zɛʋu loo wo zu. É nii ɣɛɛni tei sa é de zu ʋaa yɛni da lɔ‐kãla‐ŋala fai ɣaazɔ zu.

¹⁴ Na ɣa ɣɛɛ na nii tɔgi boni ga é ɣɛ ga de vaa ʋaa, é natiɛ ziɣia ma. É te ziɣini de wũmɔ é da ga tee kpako pele ma gului ma.

¹⁵ Ɣalasoda vɛɛ gaa‐ƃaa va Kolai é ta wolu ŋɛnii wuloa te ya é te ɣɛ ga po‐kɔ̃ɔ kɛnɛ zaama. Zée leve sa te va ná saa ʋai zaala zu gului ma.

¹⁶ Na ma a mɛ lɛ ƃe ba nu ta nɛpɛ gɔ faa yɛ wo ma daa‐mii ŋɛni ʋaa zu ta kpoale ŋɛni ƃoale ʋaa ɔ́ nɔ ɣɛ ga manui kɛ kuu‐ɣaa ʋaa zu ɔɔ ɣalo‐toga niinɛ ʋaa ɔɔ doowo foloi ʋaa.

¹⁷ Fai nii é vaazu ɣɛɛzu niitiɛ ta nɔ ga maʋai maa niini. Kɛ̀ maƃɔɔƃɔɔgi ɣa Kolai ya.

¹⁸ A mɛ lɛ ƃe ba nu ta ɔ́ wo ʋuulu, manui ɔ́ ɣɛ bosu ga wa ɣa wɛ lɛ ƃɔɔ maa yiizu, wɛ lɛ wɔnɔ Gala ta ɣeelaa ʋelizu, manui ɔ́ ɣɛ wɔnɔ ná dɛi ziɣizu ga velei ná ɣa wuu la gáazu yíɛ ƃɔɔ wɔɔlɔ zaƃu wɔ gɛ lɛ ɣɛɛ ba, yíɛ ná dɛi ziɣi nɔ ga ŋeteai nii zu ɣi‐gaa‐ziɛi

¹⁹ ɛ́ lɛ ɣataga nii va é ga de mawũgi. Da ɣa de ga malɔtɔi. De vile‐pilegɛ kii la de logɛi kpãa de lɔ̃ɔdavɛtiɛ zaala zu ta de mayãtaitiɛ. De mawũgi zaala zu da ƃɛtɛ ga Gala na deʋei.

Ŋetea wɔlɔ‐zaɣagi ta maniinɛi

²⁰ Ani wo vɛɛvɛ Kolai va ga wa tiɛni wo za kɛɛ ʋaa ma wo ƃe ge leve zuu ƃɔga gee te zu ɣaa‐ƃai va, wa luo mu ɣɛ le sa è ɣɛ wa ɣɛ dɛ ga ŋeteai nii zu vea? Wa leve ɣɛ le wo ƃɔɔ wolo tɔgi vɛ?

²¹ Natiɛ ta ga è ɣɛ velei ta bo da ga, “Nu mɛ lɛ nii ɣɛ, nu mɛ lɛ ŋɛnii nii wɔ̃ɔ, nu mɛ lɛ ʋowũ ŋɛnii nii va.”

²² Tɔwɔ tiɛ ʋa nɔ ŋɛnii niitiɛ ma ta ɣɛ tii ɣɛɛzu ga tiɛ tiɛ ŋala‐ŋala. Ta ɣɛ siɣizu nɔ nu ƃuse yaa lɔga la ta nu ƃuse na kala‐bo.

²³ Ƃɔɔƃɔɔ su niitiɛ ɣaazɔ wulovɛ nɔ è ɣɛ kele‐ɣele fai niitiɛ ta ɣɛ nu wũ katasu Gala maʋaa va ga gaa wãla. Ta kɛ nu maa yii faa ƃaanaga tiɛ la nu lɔtɔi ma. Kɛ̀ te malɔnɔ nɛpɛ gɛ lɛ ba. Tɛ lɛ ga ŋɛniitiɛ ta nu ƃe teve nu ƃuse ŋeteai zu yii‐ma‐ɣɛɛ ʋaa va.