TE ƔƐƐ VAITIƐ 6 - DEƲE NIINƐI

Nu lɔfela wulo ʋai

¹ Siɛgi nii kala dopoitiɛ te maƃɔgi zu ɣɛni wɔɔlɔzu la, niitiɛ tɔ Geliiki woi wo te zili zaɣani é vile zɔitiɛ va tɔ Hiiƃulu woi wo. Te nii ɣɛɛni ƃɔvɛlaale tɔ ɣɛ na sɔɔlai ɣaa wɛɛzu folo ɣile‐giledai zu, tɛ lɛ ƃega ƃala ga ta dɔ wo ŋazaitiɛ, na ɣa ga po ŋazai niitiɛ zunu ʋaa lɛ ŋɛni te va.

² Nu puugɔ kai felegɔitiɛ te kala dopoi ɣaazɔ lilini te ɣɛ tea, “Ɛ́ lɛ ga gaama ga gé ƃe Gala goo‐wo fai va gé nu wɔ̃nɔ yeke kɛ.

³ Na ma nà numaa, a zinaa lɔfela wulo zaama niitiɛ te lɔwɔi vagɛi te yii laa ʋegɛi ɣɛ Gala baa ŋinɛgi vɛ ta kele‐ɣele. Nui niitiɛ ɣa gá yee ƃado tiɛ tii nii ʋaa ma.

⁴ Kɛ̀ gá wũ kpado Gala‐feliai ma ta Gala goo‐wo tii‐ɣɛɛ.”

⁵ Na ɣa ɣɛɛ na nii te boni é nu ƃɔgi nii ɣaazɔ yii laani. Te Setiifẽ wulo, zunui nii daa ʋegɛi ɣɛ ga zee‐la‐ma zíi laa ʋegɛi Gala baa ŋinɛgi vɛ, é vɛɛ sa numai niitiɛ va. Natiɛ ta ga Fele, Pɔlakulɔ, Nikeenɔ, Timɔ, Paamena é vɛɛ Nikoleea va nii é ga Ãteya nui é vileni Dusi luoi wulu.

⁶ Te vaani ga numai niitiɛ Ziizɛ na keelaitiɛ ɣakala, natiɛ te Gala feli te yee vɛɛ te wũmɔ.

⁷ Gala goi zu wɔɔlɔni ma. Kala dopo liigoi é ɣɛni Yɛlusulɛɛ maa wɔɔlɔni ga ʋikɛ. Na ɣa ɣɛɛ na laa‐ʋaalegitiɛ lamaa te ɣɛni goo‐mɛni kulozu zee‐la‐mai nii zu.

Setiifɛ̃ zo fai

⁸ Setiifɛ̃ nii kpɔ‐ba wɔɔlɔi ɣɛ bɛ́ zee laa ʋegɛi ga gaa‐ƃaa, é faa maa‐wɔlɔ‐wɔlɔ kpaazaga ɣɛɛni é faa ƃaazaga lɛ ga seele numaitiɛ zaama.

⁹ Wɔɔlɔitiɛ ta Ɣala‐feli wɔtai, è ɣɛ velei tɔ Gala‐feli wɔtai nii lili da, bu veaitiɛ te taniga ƃɔga Salĩitiɛ ta Alezãduiyaitiɛ é vɛɛ sa nutiɛ va te wuloni Seliisia ta Eezia, te wu ziɣini te lo Setiifɛ̃ la kpãa ga sakpe.

¹⁰ Kɛ̀ te laa lɛ ziɛni bu ga velei é ɣɛni kele‐ɣele kpɔɛ wosu la ta velei é ƃɔɛni la Gala baa ŋinɛgi zaala zu.

¹¹ Te zɛba do sa te lɔ numaa zu doowu zu. Numai niitiɛ te ɣɛ tea, “Gé goo mɛniga yíɛ woi nii wo yá Mooze laa ŋala‐ŋala ta Gala.”

¹² Te numaitiɛ yii wu ziɣini é vɛɛ ƃalaa nuwu‐tiitiɛ va ta wuigitiɛ, te lɛɛ la ɣili‐ɣili te so te vaa la faa‐wo‐bo kpɔgi laa wu.

¹³ Te zɛɛ ʋaa zeelea wulo sa niitiɛ te ɣɛni tea, “Zunui nii lɛ wɔlɔ‐wɔlɔ ƃega faa yowũ‐woga va é vile ŋada maa wuai nii va ta tɔgitiɛ.

¹⁴ Ƃɔvɛlaale gé goo mɛniga é bo ga Nazɔi Yiizɛ nii ɣa vaazu vɛ zu ŋala‐ŋalasu, na ɣa ɣɛɛ na towaa de ɣɛɛ ʋai niitiɛ maa ʋeli Mooze daani de ya.”

¹⁵ Tai nɛpɛgi te ɣɛni faa‐wo‐bo kpɔgi zu te ɣaazu zeini ba. Te wɛlɛ na va ga gaazuvɛ wuloai ɣɛ è ɣɛ Gala ta ɣeela.