TE ƔƐƐ VAITIƐ 5 - DEƲE NIINƐI

Ananaiya ƃɔga Safaila

¹ Kɛ̀ zunui daa ɣɛni ga Ananaiya ta ŋazai Safaila te zuu ƃuo ta zɔ̃wɔ wuloni.

² É mazɔ̃wɔi ta yɛni yee wulu é li ga matai é pu Ziizɛ na keelaitiɛ ɣakala. Ŋazai ɣɛni ga nii wɛ̃ɛga.

³ Kɛ̀ Pite ɣɛ tea, “Ananaiya, aƃɛi é kɛɛ Seeta é è yii laa ʋega yìɛ zɛɛ ʋaa wo Gala baa ŋinɛgi ma yìɛ zui mazɔ̃wɔi ta yɛ yee wulu?

⁴ ?Tei dɛ sɔ̃wɔ lɛ ŋɛni wuloni, ɛ́ lɛ ŋɛni ga è wo? ?Tei ƃalaa wɔnɔ sɔ̃wɔ wuloni, è leʋe lɛ ŋɛni mazɔ̃wɔi zu? ?È leveni ɣɛ le mu yìɛ ɣi gaa ziɛ fai nii mazii ma? Nu ƃuse lei ɔ̀ zɛɛ ʋaa wo ma, kɛ̀ Gala be.”

⁵ Tei Ananaiya woi niitiɛ mɛnini, é looni é za. Duo ƃakpa vili sa nui niitiɛ nɛpɛ kɔlɔ ga te faa mɛnini é vile ba.

⁶ Zolopoitiɛ te wu ziɣini te maa ƃiti te wulo la pɛlɛi wu te doowu.

⁷ Tei sa ná ta kɛɛni kpɛ̃ɛ, ŋázai vaani pɛlɛi wu. Kí gɛ lɛ ŋɛni nii zu é ɣɛɛni.

⁸ Pite ɣɛ ma, “Ani wo zui zɔ̃wɔ wuloni ga nii liigoi, bo mà.” Ŋaza nui ɣɛ ma, “Ooi. Gé sɔ̃wɔ wuloni ga nà liigoi.”

⁹ Kɛ̀ Pite ɣɛni ma, “Tɔ ɣɛ le wo zeiya ma ga wo de maliɣii vaa ŋinɛgi zu wɔ̃ɔ? Wui lo, niitiɛ te è wɔɔ nu loowuga te wɔwɔ‐ɣa ligi ɣa sa pɛlɛ yeɣei la. Ta wulo ga yìɛ ƃalaa pɛ.”

¹⁰ É loo Pite wɔwɔ wu é za ga maa ʋilea. Tei zolopoitiɛ te lɛɛni pɛlɛi wu te wɛlɛni ba sái. Te wuloni la te doowu pɔɔ nu wobavɛ.

¹¹ Duo ƃakpa vilini Gala pɛlɛi wu vea ɣaazɔ wɔlɔ ga é vɛɛ nuitiɛ ɣaazɔ va te fai niitiɛ mɛnini.

Faa lamaa ɣɛɛvɛ ga seele ta faa maa‐wɔlɔ‐wɔlɔga

¹² Faa lamaa ɣɛɛni sa ga seele, faa maa‐wɔlɔ‐wɔlɔ tamaa ɣɛ numaitiɛ zaama Ziizɛ na keelaitiɛ zaala zu. Te pe te ɣɛni ŋada ɣila Salamɔ̃ veelii zu.

¹³ Zɔitiɛ te ta nɛpɛ zii lɛ ƃoaleni ɔ́ vɛɛ te va, kɛ̀ numaitiɛ te wũfeni tiɛ ga kpakpaa.

¹⁴ Taitiɛ te maʋaa ziɣini ga gaama, na ɣa ga zinaa vɛɛ ŋazaa va, te maƃɔ tiigoi é ɣɛni ɣaa lɛɛzu ba de maliɣii ma sa tevegɛi ɣɛ velei va te ɣɛni wɔlɔ vaazu la pɔ́.

¹⁵ Nii ɣɛni ɣɛɛzu é yɛsu tiɛ sa va pɛ ga seeƃɛ vea kui yɔɔzu tiɛ te la beteitiɛ ɣa é vɛɛ saƃaitiɛ ma va, kɛɛ ʋaa ma Pite ɔ́ ɣɛ na levesu máa niinigi leve te taniga te maazu ƃalaa.

¹⁶ Numaitiɛ te wuloni ƃalaa taitiɛ zu Yɛlusulɛɛ ligi zu tiɛ va ga seeƃɛ vea é vɛɛ niitiɛ va te loai ɣɛ gɔʋɛ yowũ vɛ te ɣaazɔ te balo maa zɔlɔ wo.

Ziizɛ na keelaitiɛ ƃɔɔlagɛ

¹⁷ Kɛ̀ laa‐ʋaale gwalai wu ziɣini é vɛɛ pulu vea ɣaazɔ va, na ɣa ga Sadusiitiɛ. Te yii laa ʋegɛi ɣɛ ga sili.

¹⁸ Te Ziizɛ na keelaitiɛ zo sa te te vili kpidi vɛlɛ walai wu.

¹⁹ Tei sa é ɣɛni ga kpidi, Gala ta ɣeelai nii kuloai ɣɛ de maliɣii vɔ vɛ é kpidi vɛlɛi maƃogitiɛ laa laoni é wulo ga tiɛ é ɣɛ tea,

²⁰ “A li wo lo Gala‐feli wɔta walai wu wo ŋetea niinɛi nii zu woi ɣaazɔ wo numaitiɛ ma.”

²¹ Tei te nii mɛnini, te lɛɛni Gala‐feli wɔta walai wu ga gela‐boga te kala‐bo bo. Na ɣa ɣɛɛ na laa‐ʋaale gwalai vaani é vɛɛ niitiɛ va te ɣɛni pulu é faa‐wo‐bo kpɔgi ɣaa lɛ ba é vɛɛ Yezɔi ʋaa‐wo‐bo nuwutiitiɛ ɣaazɔ va. É zɛba do sa é woo leve kpidi vɛlɛi la ga te va ga tiɛ.

²² Kɛ̀ tei Gala‐feli wɔta walai maa‐ƃɛɛ veaitiɛ te vaani, tɛ lɛ wɛlɛni tiɛ kpidi vɛlɛi wu. Te li sa wulu te wona bo tiɛ ɣɛ tea,

²³ “Gé wɛlɛni kpidi vɛlɛi va piligɛi su faa nɛpɛ gɛ lɛ ŋɛni ba. Na ɣa ɣɛɛ na kpidi‐vɛlɛ‐maazu veaitiɛ te loni pɛlɛi la. Kɛ̀ tei gé daa laoni, gɛ́ lɛ wɛlɛni nu ta va bu.”

²⁴ Tei Gala‐feli wɔta walai maa‐ƃɛɛ veaitiɛ te wũ‐tuo nui ƃɔga laa‐ʋaale gwalaitiɛ te woi niitiɛ mɛnini, te ɣi daa vilini ga tamaa é vile te va tiɛ ɣi gaa ziɛ nii ma ɔ́ wulo su.

²⁵ Nu ta va sa é ɣɛ te ma, “Zinaitiɛ wo te vilini kpidi vɛlɛ wu ta loni Gala‐feli wɔta walai wu tiɛ numaitiɛ ɣala bo.”

²⁶ Na ɣɛɛzu Gala‐feli wɔta walai maa‐ƃɛɛ veaitiɛ vɛɛ te wũ‐tuo nui va te li te va ga tiɛ, kɛ̀ tɛ lɛ te zoni ga ŋapi, ƃɔvɛlaale te ɣɛni luozu ga numaitiɛ te mɛ lɛ te zɔɔ ga kwɔti.

²⁷ Tei te vaani ga tiɛ, te te zeini faa‐wo‐bo kpɔgi laa wu. Laa‐ʋaale gwalai te ɣaa‐zaɣa kɛɛni.

²⁸ É ɣɛni tea, “Kɛ̀bɛ gé boni wiɛ ga kpaanaga ga wo mɛ lɛ kala‐bo bo daa‐zeigi nii zu? Na ƃalaa ɣɛɛvɛ wo Yɛlusulɛɛ lai ƃea ma ga wa ɣala‐bogi, wiɛ gaa ɣili ga wo zunui nii na saa ʋai vɛɛ gé wũmɔ.”

²⁹ Kɛ̀ Pite ƃɔga Ziizɛ na keelai zɔitiɛ te goi ɣaa woteni te ɣɛ ma, “Kɛni nɔ gá Gala goo mɛni, kɛ̀ ɛ́ lɛ ga nu ƃuse.

³⁰ De ɣeeani ta Ɣalagi é Ziizɛ wu ziɣini, nui wo paani sɛlɛ pele ma wiɛ gulu ma.

³¹ Gala ge to‐su wɔɔlɔni ga yee za‐su vele ga é ɣɛ ga wũ‐tuo nu ta balo‐wo nu, kɛɛ ʋaa ma saƃu zu Yezɔi veaitiɛ te wulu ɣaa ʋe faa yowũ va, ta ʋaa yowũitiɛ zu ʋaa yɛ.

³² Tɔwɔ gá ga fai niitiɛ mazeelea. Vele nɔ na é la ga Gala baa ŋinɛgi nii Gala ge tevega niitiɛ wɔ vɛ ta góo mɛni.”

³³ Tei te nii mɛnini, te yii ɣaa wãlani ga kavele teegɔ tiɛ wõi ɣɛ ga te te vaa.

³⁴ Kɛ̀ Favilesii ta ɣɛni faa‐wo‐bo kpɔgi zu daa ga Gameelia, é ga tɔ‐dɛɛ ɣala‐mɔɔ. Nu pɛ gɔ wũfe ma. É wu ziɣini é bo ga te zinai niitiɛ wulo ŋetea ga ta wolo.

³⁵ É ɣɛ te ma, “Yezɔi veaitiɛ, a wɛlɛ wũ maazu va ga fai wa kɛ ga zinai niitiɛ.

³⁶ Ƃɔvɛlaale za ʋoloi ɔ́ teɣa ɣɛ ziitizu, Tuuda wu ziɣini é ƃɔɔ wulo ga nu wala. Na ɣa ɣɛɛ na zinaa liigoitiɛ te vɛɛni ba tɔ zoo te ɣɛ ga nu wũ naagɔ. Kɛ̀ te paani, niitiɛ ɣaazɔ te vileni pulu te yɛzɛ. Nii wɔ ge ɣɛ nɔ ga faa yãka.

³⁷ Tei sa ná dɛi wuloni su, Dudia nii é ga Geealali nui, é wu ziɣini nu‐ɣaa‐lu siɛgi zu é numaitiɛ taniga ɣaa lɛ ba ƃɔɔ ma. Tɔ ƃalaa su ƃɔnɔ woni nɔ. Na ɣa ɣɛɛ na taitiɛ nɛpɛ te vileni pulu te zu yɛzɛ.

³⁸ Na ʋaa ma gà bosu wiɛ fai nii zu é laani ga wo yee wulo zinai niitiɛ te maʋaa zu wo ƃe te va. Ƃɔvɛlaale ani fai nii te daa wuu zu ga te kɛ ɔɔ fai nii te kɛɛ lɔɔ zeiya tɔ ga nu ƃuse ƃɛtɛ ʋaa, máʋaa ɣaa ɣa vala ba.

³⁹ Kɛ̀ ani tɔ ga Gala kpɛtɛ ʋaa, wɛ lɛ zooga wɔ te ƃe teve ba. Tani su wa yɛ su wo ƃɔɔ vɛtɛ ƃalaa ŋapi wɔɔzu Gala pɔ.” Na ma te yee zeini ná tɛnɛ goi wu.

⁴⁰ Tei sa te Ziizɛ na keelaitiɛ lilini, te te lowani te bo te ma ga te mɛ lɛ faa wo Ziizɛ na daa‐zeigi zu. Te ƃe sa te va te li.

⁴¹ Te wuloni sa faa‐wo‐bo kpɔgi zu tiɛ wuu zu nɛɛ ga kulo‐ɣɛɛ wogɛi ɣɛ te vɛ bu ga nui ƃaa ɣa wulo ma Ziizɛ na daa‐zeigi ʋaa ma.

⁴² Folo gila kpalaa tɛ lɛ ƃɔlɔni kala‐bo‐boga va ta woo vagɔi‐woga ga Ziizɛ ɣa é ga Kolai. Tɔ nii ɣɛ Gala‐feli wɔta walai wu é vɛɛ pɛlɛitiɛ wu va.