TE ƔƐƐ VAITIƐ 12 - DEƲE NIINƐI

Jĩi vaavɛ, Pite viligɛi kpidi vɛlɛ wu

¹ Na maziɛ daa yɔɔzu masagi Yɛloo woloni Gala pɛlɛi wu vea taniga ma wawu.

² É kɛɛni te Jɔ̃ diɛ Jĩi vaa ga boa zɔkpɔ.

³ Tei é wɛlɛni na va ga nà nɛɛni Dusiitiɛ vɛ, é liini ga luo é Pite zo ƃalaa pɛ. Nii ɣɛni ga kpoolo‐lɛʋɛ‐mii wuu‐ɣaa ziɛgi.

⁴ Tei é soni, é pilini kpidi vɛlɛ wu. É daa wona bo sa sɔdasia ma te levegɛi ga naa‐naa te zei‐zu naa ga te maa ƃɛ, yíɛ ɣi gaa ziɛ ga teve‐maazu wui ʋaa ɔ́ wulo na ba, é kulo é vaa la numaitiɛ wɔ.

⁵ Na ma te ƃeni Pite va é yɛ kpidi vɛlɛi wu. Kɛ̀ Gala pɛlɛi wu veaitiɛ te Gala felini maʋaa ma ga kpaanaga.

Pite wulovɛ kpidi vɛlɛ wu

⁶ Kpidii na ƃɔɔƃɔɔgi nɔ Yɛloo ɣɛni vaazu Pite wulozu la, nà ɣɛni ŋiizu sɔdasi felegɔ yɔɔzu giliai ga yɔ̃wɔ felegɔ. Na ɣa ɣɛɛ na kpidi vɛlɛ maa‐ƃɛɛ zɔdasii niitiɛ te ɣɛni pɛlɛi la, te ɣɛni kpidi vɛlɛi maazu vɛtɛsu.

⁷ Nà ɣɛɛni ƃɔɔ nɔ de maliɣii na keelai wulo na, na ɣa ɣɛɛ na ŋada wodoai ʋolo kpidi vɛlɛi wu. Gala ta ɣeelai nii é Pite maa lowani kakamavɛ yíɛ ɣɛ ma, “Wu ziɣi ga maa ʋilea.” Yɔ̃wɔitiɛ te wulo sa zée va te loo.

⁸ Gala ta ɣeelai ɣɛ ma, “Maa ɣili è yà zavalagitiɛ lɔ wɔwaa.” Nà wɔ ge kɛ ŋɛ na. É ɣɛ ma, “Yà zeɣei ƃiti ma è vile pùlu.”

⁹ É wulo é vile pulu. Ɛ́ lɛ ŋɛni kwɛ̃ni ga nii Gala ta ɣeelai ɣɛni kɛɛzu é ɣɛni ga ƃɔɔƃɔɔ su ʋaa. Kɛ̀ é ɣɛni kaazu ga ŋada ɣa nɔ é wuuzu gaazu.

¹⁰ Tei sa te leveni sɔdasi ƃulu maa wũgi va ta fele kelei, te vaani siɣigi nii la daa wuloai ɣɛ tai zu vele, malaa‐wulugi ga kolu. Daa laoni te luo ga ƃɔɔ yee. Te wulo te leve pele‐vɛɛ gila ma. Gala ta ɣeelai ziɣi pulu ga maa ʋilea.

¹¹ Pite ƃɔɔ ʋaa ɣaa ɣa sa é ɣɛ tea, “Gè laa la teɣa ga màliɣii é ná keelai levega é kùlo Yɛloo ya. Na ɣa ɣɛɛ na é kùlo nii ɣaazɔ zu Dusi veaitiɛ ɣigi yɛga ba ga é ɣɛ gàazu.”

¹² Tei é looni ga nii ɣalama laa, é liini Jɔ̃ dee Meele na pɛlɛi la, Jɔ̃ nii ná daa‐zeigi zɔi ɣɛni ga Maki. Pɛlɛi nii wu ɣa nu lamaa ɣaa lɛi ɣɛ ba na ŋada ɣila tiɛ Gala feli.

¹³ Tei é siɣigi laavɛ ƃogi luƃoni, tii‐ɣɛɛ ŋaza nu ɣila daa ga Looda é vaani ga é wɛlɛ na va ga nui é le.

¹⁴ Tei é Pite woo wulo‐ba wɛ̃ɛni, ɛ́ lɛ siɣigi laa laoni kuu‐zu‐nɛɛ vɛ, kɛ̀ é ƃizeni é li pɛlɛi wu é bo ga Pite ɣa loni siɣi zeɣei la.

¹⁵ Te ɣɛ ma, “È ɣigi lɛ è woba.” Kɛ̀ é ɣatani boga va ga kavele ɣa na. Te ɣɛ tea, “ka dɔ kɛ mu mawɔʋɛi ɣa na.”

¹⁶ Kɛ̀ pite ɣilini kpogi luƃoa va. Tei te daa laoni, te wɛlɛni ba. Na ɣa ɣɛɛ na é wuloni ga tiɛ ga kpakpaa.

¹⁷ Kɛ̀ tei é yee ɣɛni te ma ƃɛ‐ƃɛ ga te na ɣɛ ƃu, velei de maliɣii kuloni la kpidi vɛlɛi wu é kavelei zu wuloni te ma. É ɣɛ tea, “A nii wo Jĩi ma é vɛɛ de vaitiɛ va.” É ziɣi sa na é li ŋada ƃɔnɔ.

¹⁸ Tei sa gela boni, zii‐zɛlɛgi é ɣɛ sɔdasiitiɛ ma é vile velei va Pite maʋai ɣɛɛni la ɛ́ lɛ ŋɛni vɛnɛni.

¹⁹ Tei Yɛloo gaa ziɛni, tɔwɔ lɛ ŋɛni pɛtɛsu, é kpidi vɛlɛ maa‐ƃɛɛ zɔdasiitiɛ ɣaa‐zaɣa kɛɛni ƃɔɔ sɛ‐sɛ. Na ɣa ɣɛɛ na é deʋe ga te te vaa. É wulo sa Yudiiya é li Sɛsɔluiya é yɛ na.

Yɛloo zaa ʋai

²⁰ Tɔwɔ Yɛloo yii ɣaa wãlai ɣɛ Taalɔ ƃɔga Saidɔ̃ lai zu veaitiɛ ya. Te vaani pɔ́ ga ƃulu. Tei sa te laa lɔɔni masagi na pɛlɛ lo‐tuoi Belasitɔ va, te maa‐nɛɛnɛ boni ga Yɛloo ga ta tiɛni te yɔɔzu ƃɛtɛ, ƃɔvɛlaale ta yui yee lai ɣɛ masagi na zui ma daa‐mii ŋɛni ʋaa ma.

²¹ Te kuu loni. Nà maʋoloi Yɛloo é ná masa seɣei looni wɔ ba é zei ná masa kpɔkpɔgi ɣa é ƃɔɛ sa te wɔ.

²² Numaitiɛ te lobani te ɣɛ tea, “Gala ta ɣa goo le, nu ƃuse woo laale!”

²³ Gala ta ɣeelai kuloai de maliɣii wɔ vɛ é dowani ga maa ʋilea, ƃɔvɛlaale ɛ́ lɛ ŋɛni ƃeni ba ƃai nii ɔ́ la Gala ma. Na ɣa ɣɛɛ na é yɛni ga ʋulu koiga te miini é za.

Banaba ƃɔga Sɔɔ

²⁴ Kɛ̀ Gala goi zu wɔɔlɔni ma, maa yìɛ wɔɔlɔ.

²⁵ Na ɣa ɣɛɛ na Banaba ƃɔga Sɔɔ te galeni ma te ziɣi Yɛlusulɛɛ, tei te nii ɣɛɛni te levegɛi ɣɛ ma. Te vaani ta Jɔ̃ni nii ná daa‐zeigi zɔi ga Maki.