2 PITE 3 - DEƲE NIINƐI

De maliɣii ʋaa ʋai maɣi‐togi

¹ Nii ɣa sa é ga kɔlɔi fele kelei gè ponɛɛ wo wɔ, wai wo ga ẁõila veaitiɛ. Gè wa ɣaama ɣi‐gaa‐ziɛi wũ bu ziɣini kɔlɔi zei‐zu felegɔ pɛ su ga wo ɣi‐too vele faa zu.

² Gà nii ɣɛɛzu ga wo ɣi ge yɛ faitiɛ zu Gala tɔ ƃɔɔ laa woo‐wo beaitiɛ te ná yɛni ná luo te bo ta tɔgi de maliɣii daani de ya, nii é ga de valo nui. É nii ɣɛɛni ná keelaitiɛ zaala zu niitiɛ te ga wa dɔa.

³ Mamaa wũgi pa kɛni wa nii ɣaa ɣa. Na ɣa ga gaa‐ƃela‐suvɛ ŋɛɛ‐wulo‐su veaitiɛ ta va ga ta ŋɛɛ‐wulo‐sui te vilegɛi ta ŋɛni‐wõi‐leve‐ma luoi wulu.

⁴ Ta ɣɛɛzu tea,“?Ná paa ʋai nii maɣi‐togi wogɛi é ɣɛɛ mu sa ɣɛ le la? Ƃɔvɛlaale kamiti wɔlɔ de mama gwɔlɔni te laa yee ma fai ɣaazɔ ɣa nɔ ga ɣevele, è ɣɛ velei te ɣɛni la é ziɣi ƃɔɔ ŋetea lɔɔ‐zei ʋolo ma.”

⁵ Ta gaa ɣili te laa wulo faa ɣai nii zu. Na ɣa ga Gala daa woi nɔ ɣa wɔlɔ gee wɔlɔgi wuloni ŋetea sáala zu, zui wulo wɔnɔ ziɛ wu é ƃɛtɛ dáa woi nɔ zaala zu. É ƃɛtɛni ga ziɛ.

⁶ Tɔwɔ ziɛi nii nɔ é kɛɛni zui nii é ɣɛni ŋetea ziɛ‐ʋe gwala ziɛ maazu su ŋala‐ŋala.

⁷ Woi nii nɔ zaala zu zui nii zai ŋɛ ni é ŋetea ta gee wɔlɔgi ta na ŋabu laa ma. Te laa‐zu ɣɛɛvɛ ga te yɛ na é yɛsu faa‐wo gaa‐leve ʋoloi ziiti nii é ga Gala tuo‐wo tala veaitiɛ zu‐ŋala‐ŋala foloi.

⁸ Wõìla veaitiɛ, a mɛ lɛ faa ɣilagi nii zo ga soloya. Na ɣa ga folo ɣila maʋaa wulovɛ de maliɣii ya ga kwena wulu gila, kwena wulu gila pɔ maʋaa wuloai zéea ga folo ɣilekpu.

⁹ De maliɣii lɛ nɛkɛni ná ki‐togi zu ʋaa‐ɣɛɛ ʋaa zu, è ɣɛ velei é la nui taniga wuu zu. Kɛ̀ tɔ yii lɔɔzu wo ɣɛɛ‐zɔgi ɣa. Ɛ́ lɛ wõini nu nɛpɛ su ɔ́ ŋala‐ŋala, kɛ̀ to mu tɔ wõizu ga nu pɛ ge zoo é wulu ɣaa ʋe faa yowũ va.

¹⁰ Tɔwɔ de maliɣii na kui ɣa vaazu ziitizu è ɣɛ velei wũmɔ nu ɣa vaa la. Nà maʋoloi gee wɔlɔgi ɣa leve wuu, maʋaa ƃea gá. Niitiɛ nɛpɛgi ŋetea zu ŋɛnii ƃɛtɛi la ŋabu ɣa te ɣala kpai zui vɛɛ su ŋɛniitiɛ ɣaazɔ va te maʋaa ƃea gá.

¹¹ Tei niitiɛ ɣaazɔ te vaazu ƃeazu gá ŋɛ na, nu zɛƃɛ mazii ɣa sa maa nɛɛ wo ɣɛ la? Kɛni wa ɣɛ tuo maa wua wosu wiɛ Gala tuo wo.

¹² Wa ɣɛ náa maa kpowũsu wiɛ tuoi nii wo yá kɛ Gala na kui ziiti ɣaʋu. Foloi nii ɣa ŋabu vaazu zosu la gee wɔlɔgi va é gala kpai. Nii ŋeteai zu ŋɛnii ɣaazɔ ƃɛtɛi la ŋabu ɣa seka.

¹³ Kɛ̀ è ɣɛ velei Gala na ki‐togi la, a da gee wɔlɔ niinɛ maa kpowũsu ta zuu niinɛ. Minɛtiɛ ɣa tele‐bo tuo ɣa ɣɛ na.

¹⁴ Na ma ẁõila veaitiɛ, tei tɔwɔ wo fai niitiɛ maa kpowũsu, a ɣaa ƃaa ga Gala ka vaa na é wo vɛtɛ ga nui nii faa nɛpɛ gɛ lɛ ɣɛɛ ba ɔɔ niitiɛ maa‐wulo‐zu lɛ te va te ga nui niitiɛ ta ɣɛ ga zii‐laa luo‐wo bea.

¹⁵ Na ɣa ɣɛɛ na a de maliɣii na zii‐lɔɔ‐wuloai ziɣi ga balola. De wõila wɔi nii é ga Pɔɔ, vele nɔ na é ponɛni la ga velei nɔ maɣele‐ɣelegi ʋeeni la zéea.

¹⁶ Ɔ́ ɣɛ na ƃɔɛzu é vile fai nii va, vele nɔ na ɔ́ kɛɛ la ná kɔlɔi ɣaazɔ zu. Faa taniga ta te zu te ɣaa ɣaazu ƃai. Fai niitiɛ ɣa taitiɛ te ga ki tala veaitiɛ tɛ lɛ loni kpãa te te maa vẽe‐pẽesu, è ɣɛ velei nɔ ta kɛɛ la ga Gala kɔlɔi zu woi zɔitiɛ tiɛ kɛ ta ƃɔɔ zu‐ŋala‐ŋala faa ma.

¹⁷ Na ma, ẁõila veaitiɛ, tei tɔwɔ wo fai nii yɛga ná luo wo kwɛ̃ɛ, a kɛsɛ tɔ‐maazu‐vɛtɛ tala veaitiɛ ta ʋaa‐ŋala‐ŋala‐kɛi mɛ lɛ va wo ziɣizu pele va, to‐kpãagi nii bogɛi wiɛ ɔ́ wulo wo ya.

¹⁸ Kɛ̀ a wiɛ wɔɔlɔ maa‐wõi‐ɣaa ƃɔ‐bai zu ta de maliɣii nii é ga de valo nui Ziizɛ Kolai maʋai ɣaa‐ɣaa ʋai. Towa saala ɣa la ma zai ŋɛ ni é yɛsu é lii la wɔlɔ‐wɔlɔ ta wɔlɔ‐wɔlɔ. Towaa ɣɛ ŋɛ na.