KƆLĨITIƐ 6 - DEƲE NIINƐI

¹ È ɣɛ velei gé tii ɣɛɛzu la ŋada ɣila gá Galani, gá wo maa nɛɛnɛsu ga wo mɛ lɛ nɔ yee yãkai zei Gala na maa‐wõi‐ɣaa ƃɔ‐bai wu.

² Ƃɔvɛlaale ponɛvɛ Gala kɔlɔi zu Gala giɛ ɣɛ tea, “Gè wui toga è woo ma siɛgi ma solowogɛi gàazu, gè ƃɔ yìɛ ga balolai‐ʋee ʋoloi.” Wɛlɛ, siɛgi ɣaa solowogɛi. Wɛlɛ, balolai‐ʋee ʋoloi ziitia sa.

³ Gɛ́ lɛ ƃesasu nu ta nɛpɛ tuo, kɛɛ ʋaa ma gá lii maa‐wulo‐zu nɛpɛ ge mɛ lɛ ɣɛ ba.

⁴ Kɛ̀ tei tɔwɔ gé ga Gala na tii‐ɣɛɛ vea, gá ƃɔɔ lɛɛzu pelei ɣaazɔ zu ga nui ta kwɛ̃ɛ ga tii nii ɣavele‐ɣɛɛ vea gá yii‐lɔɔ ƃakpa‐wuloai zaala zu. Na ɣa ga zii‐lɔi gá kulo faa ƃoei zu ta faa ƃaali é vɛɛ faa ƃawu ba.

⁵ Gá kɛ dowa maazu ta kpidi vɛlɛ é vɛɛ zaa‐zaa faa va ta mɔɔlɛ‐woga. Gá kɛ ga ŋii ƃĩi siɣia ta pulu.

⁶ Gá kɛ wɔnɔ tuo‐maa‐wua‐woga zu ta kele‐ɣele, zii‐lɔɔ‐wuloa nu ɣɛɛ‐zɔ ga é vɛɛ tuola nɛɛ va. Gá kɛ Gala baa ŋinɛgi zaala zu ta gaama wõila.

⁷ Gá kɛ gaama‐woga zaala zu ta Gala na gaa‐ƃai. Gá kɛ ga kɔɔ‐wɔɔ wolu ŋɛnii nii é ga tuo‐zakpa‐woga nii yá ɣɛ gé yee‐za ga ta gé wɔwɔ yee.

⁸ Gá kɛ wũfe‐ma zu ta wũfe‐ma lala gíɛ kɛ wɔnɔ gé lɔwɔ yowũ zu ta gé lɔwɔ vagɔ. Ta luo ga gíɛ è ɣɛ nui é ga gaa‐wɔlɔ‐bo nu, tɔwɔ gé ga gaama‐ɣɛɛ vea.

⁹ Ta luo ga gíɛ è ɣɛ nui tɛ lɛ kwɛ̃ni, tɔwɔ gé wɛ̃ɛgɛi tiɛ kalãi. Ta luo kɔnɔ ga gíɛ è ɣɛ nui é zaazu, tɔwɔ gé yɛʋui gé ya. Te luo ga gíɛ è ɣɛ nui te tɔ kpɛɛzu ma, na ƃalaa ɣɛɛvɛ tɛ lɛ gé vaa.

¹⁰ Ta gé ɣaazu ga nui maa wõiyai, tɔwɔ gíɛ kuu‐zu‐nɛɛ wulo ga ɣee nɛpɛ. Ta kaazu ga gé mɔɔlɛvɛ, tɔwɔ gíɛ kɛ nu lamaa yíɛ ƃɛtɛ. Ta gé ɣaazu ga nui ŋɛni ta nɛpɛ gɛ lɛ zéea, tɔwɔ ŋɛnii ɣaazɔ ga gé wo.

¹¹ Kɔlĩ veaitiɛ, gé laa wu ziɣia fai pɛ ma gé bo wiɛ gé wuu zu laa zeivɛ wiɛ kpai.

¹² Gɛ́ lɛ wo wolo kpani. Wo ƃɔɔ wõi ʋaitiɛ ɣa te wo wolo kpaga.

¹³ Gà ƃɔɛzu wo wɔ è ɣɛ velei nu ɣa ƃɔɛ la dea wɔ. Nii wa fai ni zu loo la gé vɛ tɔ ga wa ƃalaa wo wuu zu laa zei gé ma kpai.

Wa ɣa wo ga ʋululai maƔalagi ʋeli wɔta walai

¹⁴ A mɛ lɛ ɣaka wɔ vɛɛ niitiɛ va tɛ lɛ Kolai ʋaa ziɣini ga gaama. Ƃɔ‐ma ʋaa zɛƃɛ ɣa é tele‐bo tuo‐wo bea ƃɔga tele‐bo tala luo‐wo bea te yɔɔzu? Ƃaa siɛ‐pulu zɛƃɛ ɣa é ŋada wodoai zu vea ƃɔga kpidi zu vea te yɔɔzu?

¹⁵ Goo‐la‐ma ʋaa zɛƃɛ ɣa é Kolai yɔɔzu ta Bɛɛlia? Ɔɔ nui nii Kolai ʋaa ziɣiai bɛ́ ga gaama zɛƃɛi é te yɔɔzu ta nui nii ɛ́ lɛ Kolai ʋaa ziɣini ga gaama?

¹⁶ Goo‐la‐ma ʋaa zɛƃɛ ɣa é Gala‐feli wɔta walai ƃɔga maa‐niini galaga te yɔɔzu? Toku ge zei ga da ɣa de ga ʋululai ma‐Ɣalagi ʋeli wɔta walai. È ɣɛ velei ponɛi la Gala kɔlɔi zu Gala giɛ ɣɛ tea “Gà ɣɛ te yii zu gìɛ leve‐teve te zaama. Na ɣa ɣɛɛ na gà ɣɛ ga ta Ɣalagi te ɣɛ ga nà numaa.”

¹⁷ Na ma de maliɣii ɣa bosu ga “A wulo te zaama wo ɣaa wɛɛ ma wa tiɛni, wo mɛ lɛ ʋowũ niitiɛ va te maa lɛ ziɣini. Na ɣa ɣɛɛ na gà sa gà yee zei wo wu.”

¹⁸ Gaa‐ƃaa pɛ maliɣii ɣa ɣɛɛzu tea, “Na ɣa ɣɛɛ na gà sa gà ɣɛ ga wo ɣeea, wa wɔ wo ɣɛ ga dèa zinaa ta dèa ŋazaa.”