KƆLĨITIƐ 11 - DEƲE NIINƐI

Pɔɔ ƃɔga zɛɛ ʋaa ɣeelaitiɛ Kolai ʋaa ma

¹ Ɔ̀ ɣɛ ga nɛ̀ɛ‐bɛ ʋaa ga wo laa zei dàa ƃɔɛ wu titi faa wolo zu. A laa zei bu zèea!

² Gà wo maa lolo wulozu Gala zii‐mai mavele ma. Toku ge zei ga gè Kolai na wɛ̃ɛ ʋaa woga wo ma, kɛɛ ʋaa ma gè wo leve pɔ́ è ɣɛ tabolo wɛ̃ɛ nii maa wuai zunu wo gɛ lɛ ba, nu ɣa teve pɔɔ nui tɔ ɣilekpu pɔ.

³ Kɛ̀ gà luozu ga è ɣɛ velei nɔ kaalii Iivi ɣaa wɔlɔni la ga ná gbana luoi, vele nɔ na wa ɣi‐gaa‐ziɛi ɣa ziɣi la gaama velei va ta wo wũ‐kpado fai Kolai maʋaa va ga gaama.

⁴ Ƃɔvɛlaale ani nu ta ɣa vaa na é Gala goi ta ƃɔnɔ bo wiɛ é vile Ziizɛ va é wulo nii wulu gé boga wiɛ é vile ba wo yee zei bu, ɔɔ ani ki‐gaa‐ziɛ ta ƃɔnɔ ka vili na wo ma é wulo nii wulu Gala baa ŋinɛgi kɛɛni é vili wo ɣigi zu, ɔɔ a ni wa yee zei na woo niinɛ vagɔ ta wu maa ʋeligɛi nii va wo yee zeini bu, a kɛ tii wa laa zei faa wu ga faa ʋii ƃɛɛ.

⁵ Kìgi zu gɛ̀ lɛ looni Ziizɛ na keelai niitiɛ wu é te ɣigi zu ga te lo‐su ƃakpavɛ é leve te vaa pɛ ba.

⁶ Gè ɣɛɛvɛ ƃalaa ga nui nii ɛ́ lɛ laalini faa‐zu‐wulo faa zu, gɛ̀ lɛ ɣɛɛ ŋɛ na kele‐ɣelegi zu. Gé nii ɣaa wodoa ga wiɛ pelei ɣaazɔ zu gé kɛ wɔnɔ fai ɣaazɔ zu.

⁷ ?Faa yowũ ɣa gè kɛɛni kpɔ̀ɔ loo vele ma bu bɛ̀ kɛɛ ʋaa ma gè wo ƃakpa, toku ge zei Gala na goo niinɛ vagɔi va gè boni wiɛ fɔɔnɛ‐ʋee ʋaa lɛ ŋɛni ba?

⁸ Gè wũmɔ woni Gala pɛlɛi zɔitiɛ ma ga velei gè yee zeini la faa‐nɛitiɛ wu te ɣɛni te ɣɛɛzu ga kpɔ‐ba, kɛɛ ʋaa ma gè tii ɣɛ wo vɛ.

⁹ Tɔwɔ tei gè ɣɛni wo wɔ vɛ kpàlai gɛ̀ lɛ ɣɛɛni ga nu ta nɛpɛ wũmɔ ɣasɔ. Toku ge zei ga bàitiɛ te wuloni Masadoonia ta ɣa te kpàla‐ma ʋaitiɛ laa zoni bɛ̀. Na ma gè ƃe teveni bá. Nà wɔ gà wɔnɔ ƃe tevezu bá. Na ɣa ga kɛ̀ɛ ʋai ga wo wũmɔ ɣasɔ pele mazii ta nɛpɛ su.

¹⁰ È ɣɛ velei Kolai na gaamai la zìi zu, nà yoka‐teve woi nii ɣaa lɛ yiiya Akeea ligi zu.

¹¹ Aƃɛ mu be? ?Wõi ɣa gɛ̀ lɛ boni ga wiɛ ʋaa ve? Gala ge kwɛ̃ni ga ẁõivɛ ga wiɛ!

¹² Nii wɔgi gè kɛɛzu gà ɣata kɛɛ va, kɛɛ ʋaa ma numai niitiɛ te wõini te bo ga tii nii te kɛɛzu ta yoka‐teve yekegi zu tɔ ga gá dɛi ɣavele gè zeɣe leve te woi wu.

¹³ Ƃɔvɛlaale nà ɣavele veaitiɛ ta ga zɛɛ ʋaa zeele woo‐ʋee vea Kolai ʋaa ma. Ta ga gaa‐wɔlɔ tii‐ɣɛɛ veai niitiɛ te ƃɔɔ ɣaazu wulozu ga Kolai na keelaa.

¹⁴ Nii lɛ ga fai yá wulo ga nu, ƃɔvɛlaale Seeta ɣagi ƃalaa ɣa ƃɔɔ ɣaazu wulozu ga ŋada wodoai maɣeelaitiɛ te Gala ta te ta.

¹⁵ Na ma ɛ́ lɛ ga faa niinɛ ga ani ná tii‐ɣɛɛ veaitiɛ ta ɣɛ na ƃɔɔ ɣaazu wulozu ga tele‐bo tuoi zu lii‐ɣɛɛ vea. Ta ŋeteai ɣaa‐ƃela‐suvɛ maʋai ɣa zolowo nɔ te ɣɛɛ‐zɔgitiɛ ma.

Daa‐nɔwɔ‐wogitiɛ Pɔɔ boni Kolai na keela woo‐wo fai zu

¹⁶ Gà wɔnɔ bosu. Maa lɛ nɛɛni ɔ́ ɣɛ nu ta nɛpɛ kigi zu ga tìtigɛ. Kɛ̀ ani ƃalaa yá ɣɛ na wo ɣigi zu ŋɛ na, a sìɣi ga titi nu kɛɛ ʋaa ma nà ƃalaa gè yoka kolo leve.

¹⁷ Yá lii na ga yoka‐teve ʋai wɔ vele, fai nii gè bosu de maliɣii lei ɔ́ dèʋe la ga gè bo. Kɛ̀ gà bosu nɔ è ɣɛ titi nu.

¹⁸ Tei tɔwɔ nu lamaa te ŋeteai nii zu ʋaitiɛ te mayoka tevezu, nà ƃalaa gà yoka teve.

¹⁹ Ƃɔvɛlaale wa laa zei titi bea laa ƃɔɛ wu ga kuu zu nɛɛ, wa wɔ wo ɣɛ wo ɣele‐ɣelegɛ!

²⁰ Ani nu ɣa wo ziɣi na ga ná dua ɔɔ é wo ɣɛ ga weli gaa‐ziɛzu, wa laa zei bu. Ani wɔnɔ gáazu ɣa leve na wo ma ɔɔ é ƃɔɔ ziɣi ga nu ɣaa wua wo ɣaazu ɔɔ é wo woolɛ, wa laa zei bu.

²¹ Kɛni gà bo wiɛ. Tɔ ga nà wũfe faa. Gá ziɛ‐bu ʋaa lɛ ŋɛni ga gé fai nii ɣɛ ga wiɛ! Gà ƃɔɛzu è ɣɛ titi nu. Nii nɛpɛ é ga nu ta na mɛni‐masa‐kɛ̃ɛ ʋaa ga é mayoka teve, nà ƃalaa tɔ ga nà mɛni‐masa‐kɛ̃ɛ ʋaa ga gè mayoka teve.

²² Ani numai niitiɛ ta ga Hiiƃulu vea, vele nɔ na gè la. Ani ta ga Yezɔi vea, vele nɔ na gè la. Ani ta ga Eeƃɔlɔhɛ̃ɛ nu zuwua, vele nɔ na gè la.

²³ Ani ta ga Kolai na tii‐ɣɛɛ vea, nà dɔ laa levegɛ. Gà ƃɔɛzu è ɣɛ nu wũ su lɛ ɣɛ la. Gà ga nui é tii lamaa ɣɛɛ, kpidi vɛlɛ lamaa maa zɔlɔ wogɛi bɛ́, kpooʋe wogɛi la nu lɛ tii kwɛ̃ni, siɛ tamaa zu na wolo ɣa yɛ te ga é za.

²⁴ Ná zei‐zu ɣɛɛ loolu gìɛ dowa maa zɔlɔ wo Dusiitiɛ ya tiɛ kpatolo da sù ná ɣa yɛ nɔ ɣile ga é ɣɛ ga da‐su zee naagɔ.

²⁵ Te dòwala ɣɛɛ sava ga kɔlɔ ƃaɣa te sɔ̀ɔ‐zu ɣɛ ɣile ga kwɔti. Ziɛ‐ɣaa ŋee gwala wuula ɣɛɛ gàazu sava. Gè ŋiiya yuwu ɣa gè luo gá yíɛ yii gàazu.

²⁶ Kɛ̀ɛvɛ liizu siɛ ma ti‐ti. Siɛi niitiɛ ma ziɛ ƃaazagitiɛ ɣɛɛvɛ tùo ga faa ƃoei, gè faa ƃoei zu wũmɔ vea ya. Kɛ̀ɛvɛ faa ƃoei zu kpɔ̀ɔ numaitiɛ ya ta zii ƃalaagitiɛ, gè su taa zu é vɛɛ kpooʋei zu va. Kɛ̀ɛvɛ kɔnɔ faa ƃoei zu yuwu ɣa gè su niitiɛ ya tɔ ƃɔɔ wulo ga de ta, tɔwɔ tɛ lɛ ŋɛni ga de ta ga ƃɔɔƃɔɔ su.

²⁷ Kɛ̀ɛvɛ tii ƃaana kɛɛzu faa ƃaa giɛ la mà, kpidi lamaa zu ŋii ʋaa lɛ ŋɛni ɣɛɛ bà. Pulu ɣɛɛvɛ sòsu ta kpoale‐wõi. Siɛ tamaa zu daa‐mii ŋɛni ʋaa lɛ ŋɛni ɣɛɛ bà. Gà ɣɛ ŋetea kɔɔlɛi yíɛ va mà.

²⁸ Na ɣa ɣɛɛ na é wulo fai zɔitiɛ wulu gɛ̀ dɛ te laa woni, fai é na yíɛ vii mà ga gela‐bo pele ɣile‐gile tɔ ga zii‐zɛlɛgi é mà Gala pɛlɛitiɛ ɣaazɔ ʋaa ma.

²⁹ Ƃɛ ɣa zobo ge valasu bɛ́ ná maa‐wõi ƃe sòsu? Ƃɛ ɣa faa ta ɣɛɛzu la é kɛ é ziɣi pele va é ƃe wãlasu mà?

³⁰ Ani pagɛ gè yoka teve, fai niitiɛ ta dɛ ga zobo gɛ lɛ bɛ̀ ta ɣa gà te mayoka teve.

³¹ Galagi nii é ga de maliɣii Ziizɛ keea é ga ná Galagi, nii ná daa‐zeigi maa lɛi wɔlɔ‐wɔlɔ ta wɔlɔ‐wɔlɔ, é kwɛ̃ni ga gɛ̀ lɛ zɛɛ ʋaa wosu.

³² Tei gè ɣɛni Dimasikɔ lai zu, gɔmɛti nui é ɣɛni masa gwalai Aloita wu é gba daani Dimasikɔ lai ma kɛɛ ʋaa ma te sò.

³³ Kɛ̀ te sèini kpɔlɔ su te dɔ̀ taa ziɣigi mawũdai la te pìle ga siɣi puluvɛ vele, gè wulo sa zée wu sɔlɔlɔ.