1JƆ̃ 5 - DEƲE NIINƐI

Zee‐la‐ma ɣa ga nu yee levega ŋeteai va

¹ Nui nɛpɛ yá siɣi ga gaama ga Ziizɛ ɣa é ga nui Gala zee ƃadogɛi bá, manui ɣa ga Gala duu. Tɔwɔ nui nɛpɛ yá wõi ga duu‐ɣaa nui towaa wõi ga malui.

² Nii ɣa da kwɛ̃ɛ da ga de wõivɛ ga Gala deaitiɛ. Na ɣa ga da wõi na ga Gala de goo‐mɛni kulo niitiɛ zu é deʋea é da de ya.

³ Nii ɣa é ga nu wõiyai ga Gala. Na ɣa ga a da ɣɛ na ziɛzu ga faitiɛ é deʋea é da de ya. Tɔwɔ niitiɛ é deʋea é da de ya tɛ lɛ ga fai niitiɛ dɛ lɛ zia te wu.

⁴ Zee‐leve‐bai nii zée zoogɛi ŋeteai la tɔ ga da yee‐la‐mai. Nui nɛpɛ é ga Gala duu ná gaa‐ƃaa yee ɣa leve ŋeteai nii va.

⁵ Ƃɛ ƃɔnɔ ka zée ɣa leve ŋeteai nii va é wulo nui nii wulu yá siɣi ga gaama ga Ziizɛ ɣa é ga Gala dui?

Seele woi pilegɛi Gala dui va

⁶ Nui nii ɣa é vaani ziɛi zu ta ŋamai, na ɣa ga Ziizɛ Kolai. Ɛ́ lɛ nɔ vaani ziɛi zu tɔ ɣilekpu, kɛ̀ é vaani ziɛi zu ta ŋamai.

⁷ Gala baa ŋinɛgi wɔ ka é ga mazeele, ƃɔvɛlaale Gala baa ŋinɛgi ɣa é ga gaamai.

⁸ Seeleitiɛ ta sava. Ta ga Gala baa ŋinɛgi, ziɛi é vɛɛ ŋamai va. Seele saagɔi niitiɛ te woi lia ga pele ɣila.

⁹ A da yee zei nu ƃuse na seele woo wu, tɔwɔ Gala na seele woi mu maʋaa wɔɔlɔvɛ é leve nu ƃuse na dɛi va. Gala na seele woi ɣa ga nii. É dúi mazeele woo ʋeea.

¹⁰ Nui yá Gala dui maʋaa ziɣi ga gaama, seele woi ɣa ɣɛ manui ɣagi yii zu. Nui ɛ́ lɛ laani ga Gala, manui Gala kɛɛ ga zɛɛ ʋaa nu, ƃɔvɛlaale ɛ́ lɛ laani ga seele woi Gala ge feea dúi ʋaa ma.

¹¹ Tɔwɔ nii ɣa é ga seele woi. Na ɣa ga zɛʋui kwɛ̃ɛ gɛ lɛ ba Gala ge feea de ya. Dúi wɔ ka zɛʋui nii ɣa zɔlɔ wo sáala zu.

¹² Nui Gala dui maʋaa zíi zu, zɛʋui ɣa manui ya. Nui Gala dui maʋaa lɛ zíi zu, zɛʋui lɛ manui ya.

Zɛʋui kwɛ̃ɛ gɛ lɛ ba maʋaa ɣaa‐ɣai

¹³ Gà nii wonɛzu wo wɔ, wai wo Gala dui maʋaa ziɣia ga gaama, kɛɛ ʋaa ma wo kwɛ̃ɛ ga zɛʋui nii kwɛ̃ɛ gɛ lɛ ba tɔ wo ya.

¹⁴ Vele wɔ ka na de lai la la. Na ɣa ga ani da ŋɛni ta nɛpɛ feli na ma zii‐mai mavele ma, towaa de woi mɛni.

¹⁵ Ani tɔwɔ de kwɛ̃ni ga da feli na faa ta nɛpɛ ma towaa de woo mɛni, a kɛ tii de kwɛ̃ni ga fai niitiɛ de gaa zaɣa kɛɛ ma de te maa zɔlɔ woga.

¹⁶ Ani nu ta nɛpɛ ka wɛlɛ na bɔɔ nu va yíɛ faa yowũi nii ɣɛ ɛ́ lɛ ga fai yá saa laa ziiti má, towaa Gala feli manui ʋaa ma. Gala pɔ ka zɛʋu ʋe zéea numai niitiɛ ʋaa ma ta faa yowũ ɣɛ ɛ́ lɛ ga faa yowũi nii yá saa laa ziiti te ma. Faa yowũi ta ɣa na yá saa laa ziiti nu ma. Gɛ̀ lɛ bosu ga nu Gala feli nà ʋaa yowũi ʋaa ma.

¹⁷ Faitiɛ ɣaazɔ nu ɣa kɛ lɛ pele ma ta ga faa yowũ‐ɣɛɛ. Kɛ̀ faa yowũi ta wɔ ka na ɛ́ lɛ saa laa ziitia nu ma.

¹⁸ De kwɛ̃ni ga nui nɛpɛgi é ga Gala duu ɛ́ lɛ ɣataga faa yowũ‐ɣɛɛ va. Kɛ̀ to mu nui nii Gala ge kaani tɔ ƃaazu manui maazu. Na ɣa ɣɛɛ na tuƃo‐vele‐yowũ‐wulo nui lɛ ʋowũga bá.

¹⁹ De kwɛ̃ni ga da ga Gala na dɔa. Tɔwɔ ŋeteai nii maʋaa ɣaazɔ ɣa tuƃo‐vele‐yowũ nui na gaa‐ƃai yee wu.

²⁰ Da wɔ de kwɛ̃ni ga Gala dui vaa. Na ɣa ɣɛɛ na é de ɣi daa levea ga de nui nii wɛ̃ɛ é ga gaamai. Nui nii wɔgi é ga gaamai da tiɛni da su ɣilekpu, na ɣa ga dui Ziizɛ Kolai. Nii ɣa é ga gaama Ɣalagi é ga zɛʋui nii kwɛ̃ɛ gɛ lɛ ba.

²¹ Dèa woloitiɛ, a ƃɔɔ ƃe teve maa‐niini gala‐zeke‐kɛɛ va.