1JƆ̃ 2 - DEƲE NIINƐI

De vaa ʋaa‐wo nui Kolai

¹ Dèa woloitiɛ, gà nii wonɛzu wo wɔ ga wo mɛ lɛ faa yowũ ɣɛ. Kɛ̀ ani nu ta nɛpɛ ka faa yowũ ɣɛɛ na, de vaa ʋaa‐wo nu ɣa na de ɣeea Gala ma. Na ɣa ga Ziizɛ Kolai nii é ga tele‐bo tuo‐wo nui.

² Tɔwɔ towa é ga da ʋaa yowũi maʋaa‐zu‐ƃɛtɛ ŋɛnii. Ɛ́ lɛ nɔ ga da dɛi, kɛ̀ towa é ga nu pɛ na faa yowũ zu‐ƃɛtɛ ŋɛnii.

³ Nii mavele wɔ ka da laa la ga kwɛ̃ɛgɛ de vɛ. Na ɣa ga ani da ziɛzu ga ná tɔgitiɛ.

⁴ Nui nii yá ɣɛ tea, “Gè kẃɛ̃ni,” tɔwɔ ɛ́ lɛ goo‐mɛni kulozu ná tɔgitiɛ zu, manui ɣa ɣɛ ga zɛɛ ʋaa nu, gaama lɛ ɣɛɛ kígi zu.

⁵ Kɛ̀ nui nɛpɛ yá ziɛ ga dáa woi, towa é ga nui é woloa wulu ma ga ƃɔɔƃɔɔ su wõilai ʋaa zu é zéea Gala faa ma. Vele ɣa da zoo de laa la ga da tiɛni da su ɣilekpu.

⁶ Na ɣa ga nui yá bo ga kátagɛ ta tɔ te ɣɛɛ va su ɣilekpu, kɛni manui ɣa ŋeteai ɣɛ ga velei é kɛɛni la.

Tɔ niinɛi

⁷ Wõìla veaitiɛ, gɛ̀ lɛ tɔ niinɛ wonɛzu wo wɔ. Kɛ̀ tɔ pɔlɔ‐zaɣagi é yɛga wo ya é ziɣi ƃɔɔ tɔɔ‐zei ʋolo ma tɔ ve. Tɔ pɔlɔ‐zaɣagi ɣa ga woi wo mɛniga wɔlɔ.

⁸ A li na kɔnɔ ga pelei zɔi zu vele, tɔ niinɛ ɣa gè ponɛzu wo wɔ, nii é ga gaama Kolai na ŋeteai zu é wɔnɔ ga gaama wa dɔ ŋeteai zu. Su‐wulo‐zu ɣa ga kpidii maʋaa ɣa sa ƃeazu gá, ŋada wodoa ƃɔɔƃɔɔgi yìɛ sa ʋɔlɔ ʋolo.

⁹ Nui nii yá bo ga tɔ ŋada wodoai zu, tɔwɔ siliai ga bɔ́ɔ nu, manui ɣa dɛ nɔ kpidii zu.

¹⁰ Nui é wõini ga bɔ́ɔ nu towa é ŋada‐wodoai‐zu ŋeteai ɣɛɛzu. Faa ta nɛpɛ gɛ lɛ na ɔ́ kɛ manui ɔ́ ɣali ŋeteai zu.

¹¹ Kɛ̀ nui nii yá zili ga bɔɔ nu manui ɣa ɣɛ kpidii zu yíɛ ná ŋeteai‐zu ziɛ wo kpidii zu. Ɛ́ lɛ kwɛ̃ni ga vɛ é liizu na, toku ge zei ga kpidii gáazu wua.

¹² Dèa woloitiɛ, gà kɔlɔ wonɛzu wo wɔ, ƃɔvɛlaale wa ʋaa yowũitiɛ zu ʋaa yɛga Ziizɛ Kolai zaƃu zu.

¹³ Gà kɔlɔ wonɛzu wo wɔ, kèeani, ƃɔvɛlaale wo nui nii wɛ̃ni é yɛga na é ziɣi ƃɔɔ tɔɔ‐zei ʋolo ma. Dakpa niinɛitiɛ, gà kɔlɔ wonɛzu wo wɔ, ƃɔvɛlaale wo yee levega tuƃo‐vele‐yowũ‐wulo nui va.

¹⁴ Dèaitiɛ, gè kɔlɔ wonɛɛ wo wɔ, ƃɔvɛlaale wo de ɣeea Gala kwɛ̃ni. Kèeani, gè kɔlɔ wonɛɛ wo wɔ, ƃɔvɛlaale wo nui nii wɛ̃ni é yɛga na é ziɣi ƃɔɔ tɔɔ‐zei ʋolo ma. Dakpa niinɛitiɛ, gè kɔlɔ wonɛɛ wo wɔ, ƃɔvɛlaale wo ɣaa ƃaavɛ. Na ɣa ɣɛɛ na Gala daa woi ɣa wo yii zu wɔ, wo yee wɔ ge levega tuƃo‐vele- yowũ‐wulo nui va.

¹⁵ A mɛ lɛ wõi ga ŋeteai nii ɔ́ nɔ ɣɛ ga wo wõi ga ŋeteai nii zu ŋɛniitiɛ. Ani nu nɛpɛ ka wõi na ga ŋeteai nii, wõila lɛ ɣɛɛ manui yii zu de ɣeea Gala faa ma.

¹⁶ Ƃɔvɛlaale nii pɛgi é ŋeteai nii zu ta nɔ ga nu ƃuse ŋeteai zu ʋaa, tɛ lɛ ga de ɣeea Gala zeea ʋaa. Fai natiɛ ta ga ŋɛni‐yii‐leve‐kuu‐zu ƃakpa, nu wɛlɛ ʋai ŋɛni va mayii leve kúu zu ga kpakpaa, é vɛɛ nu ƃɔɔ ʋaa wɔɔlɔ ʋai va ŋeteai‐ɣɛɛ ŋɛniitiɛ ʋaa ma.

¹⁷ Tɔwɔ ŋeteai nii maʋai ɣa vaazu ƃeazu gá é vɛɛ maŋɛni‐yii‐leve‐kuu‐zui va. Kɛ̀ nui yá Gala zii‐mai ɣɛ towaa yɛ na wɔlɔ‐wɔlɔ ta wɔlɔ‐wɔlɔ.

Kolai wɔɔ yɔ̃wɔi

¹⁸ Dèaitiɛ, siɛ gaa‐ƃelagi ɣa sa ga nii. Tɔwɔ è ɣɛ velei nɔ wo mɛniga la ga nui é ŋapi wɔɔzu ga Kolai tɔ vaazu, vele nɔ na Kolai wɔɔ yɔ̃wɔ lamaa vaa la. Na ma de kwɛ̃ni ga tɔ sa ga siɛ gaa‐ƃelagi.

¹⁹ Te wuloni de va te li tɛ lɛ ŋɛni ga de ta. Toku ge zei ga è ɣɛ te ɣɛni ga de ta tɔ yɛ de va wɔ. Kɛ̀ te liini, kɛɛ ʋaa ma gáa wodo ga te ta nɛpɛ gɛ lɛ ga de ta.

²⁰ Kɛ̀ wo Gala baa ŋinɛgi maa zɔlɔ woga tevegɛi Kolai vɛ. Na ma wo pɛ wo gaamai wɛ̃ni.

²¹ Gà kɔlɔ wonɛzu wo wɔ ɛ́ lɛ ga gaama‐wɛ̃ɛ ka wɛ lɛ boni. Kɛ̀ gà kɛɛzu ƃɔvɛlaale wo kẃɛ̃ni, kwɛ̃ɛgɛi wɔnɔ wo vɛ ga zɛɛ ʋaa ta nɛpɛ gɛ lɛ gaamai zu.

²² Ƃɛ ƃɔnɔ ka é ga zɛɛ ʋaa nui? Kɛ̀bɛ Ziizɛ ɣɛɛ ʋai ga nui kuloai Gala bɛ, nui é nà zakpesu tɔ nɔ ɣa é ga zɛɛ ʋaa nui, kɛlɛɛ? Nii ɣa é ga Kolai wɔɔ yɔ̃wɔi. Na ɣa ga nui yá de ɣeea Gala maʋaa zakpe ta dúi.

²³ Nu nɛpɛ gɛ lɛ Gala dui maʋaa zakpega de ɣeea Gala gɔ ɣɛ manui yii zu. Nui nɛpɛ yá laa wu ziɣi Gala dui maʋai ma é bo, de ɣeea Gala ka ɣɛ manui yii zu.

²⁴ Nii wo mɛnini ƃɔɔ tɔɔ‐zei‐zuvɛ, a ƃe ba é yɛ wo ɣigi zu. Nii wo mɛnini ga tɔɔ‐zei ʋolo, ani yá yɛ na wo ɣigi zu, wa ƃɔga Gala duini wa ɣɛ su ɣilekpu é vɛɛ de ɣeea Gala kagi va.

²⁵ Tɔwɔ nii ɣa é de ɣi toga la, na ɣa ga zɛʋui nii kwɛ̃ɛ gɛ lɛ ba.

²⁶ Gà nii wonɛzu wo wɔ é vile numai niitiɛ va te wõini te wo ɣaa wɔlɔ.

²⁷ Kɛ̀ kuloi nii é boga ga wiɛ ná ɣi ka wo ɣa. Na ɣa ɣɛɛ na wɛ lɛ ƃalaa kala‐bo faa ma nu ta nɛpɛ zeea. Toku ge zei ga wo wulo ʋai bɛ́, nà ɣa wo ɣala bosu fai pɛ su. Tɔwɔ tɔ ga gaama. Zɛɛ ʋaa nɛpɛ gɛ lɛ su. È ɣɛ velei nɔ é wo ɣala boga la, a ɣata ŋɛ ni wo ɣɛɛ ʋai va su ɣilekpu wa tiɛni.

Gala deaitiɛ

²⁸ Tɔwɔ, dèa woloitiɛ, a ɣata ɣɛɛ va su ɣilekpu wa tiɛni, kɛɛ ʋaa ma yá wulo na, a de ɣɛ ga duo lala vea. Yá vaa na, de mɛ lɛ wulo wulu dɔ ziɣi bá wũfe maazu.

²⁹ Ani wo kwɛ̃ni ga tɔ ga tele‐bo tuo‐wo nu, pagɛ wo laa la ga nui nɛpɛ é gaamai ɣɛɛzu tɔ ga dúu.