1KƆLĨITIƐ 5 - DEƲE NIINƐI

Ƃaa‐wulo‐ma ŋaza nu yekegi maʋaa‐wo gaa‐leve ʋai

¹ Bogɛ ga ƃɔɔƃɔɔ su ga ŋaza nu yeke ta ɣa ɣɛɛzu wo zaama é ga ŋaza nu yekegi nii nu lɛ wɛlɛɛ mazii ta va ƃalaa Gala tuo‐wo tala veaitiɛ zaama. Ƃɔvɛlaale wo ta ɣa na kéea ŋazai zéea.

² Tɔwɔ wo ʋaa wɔɔlɔi dɛ nɔ ƃɔɔ ɣaazu! Kɛ̀bɛ maa nɛɛvɛ wa mu wo wɔlɔ. Nui é nii ɣɛɛ maa nɛɛvɛ é wulo wo zaama.

³ Velei ƃalaa nà kagi gɛ̀ lɛ la na, nà ki‐gaa‐ziɛi ɣa na. Tɔwɔ è ɣɛ velei nɔ gɔ̀ ɣɛ la na gè kɛ, bogɛ sa bɛ̀

⁴ ga faa yɛga nui ma é fai na mazii ɣɛɛ. Wa ɣaa lɛɛ na ba, nà ki‐gaa‐ziɛi é wo woba ta de maliɣii Ziizɛ na gaa‐ƃai,

⁵ wa sa wa zunui nii yee la Seeta ya de maliɣii Ziizɛ na daa‐zeigi zu ga nu ƃuse lɔtɔi nii é ma su ŋala‐ŋala, kɛɛ ʋaa ma zɛʋui yɛ zéea de maliɣii na kui ma.

⁶ Wa yoka‐teveai lɛ vani.? Wɛ lɛ kwɛ̃ni ga kpoolo‐ʋɔɔ ƃokolo ŋɛnii maƃuo wolo ɣa kɛ kpɔɔlɔ‐ʋɔɔ ƃumɛ walai ƃoda kɔlɔ‐kɔlɔ ma ɣaali?

⁷ È ɣɛ velei wo wuloai la ga kpoolo‐ʋɔɔ, a kpoolo‐ʋɔɔ ƃokolo ŋɛni wɔlɔ‐zaɣagi wulo zaama, kɛɛ ʋaa ma wo ɣɛ ga kpoolo‐ʋɔɔ niinɛ. Ƃɔɔƃɔɔ su wɛ lɛ ƃodani, ƃɔvɛlaale Kolai nii é ga da leve‐maazu wuu‐ɣaa vaala zuwui te kuloa sa ga zalaɣa te paa.

⁸ Na ma a de kui ɣa na. A de mɛ lɛ ka ga kpoolo‐ʋɔɔ ƃokolo ŋɛni wɔlɔ‐zaɣagi. Tɔ ga wãla‐lɔɔ ta tuo vele yowũ. Kɛ̀ a de kɛ ga kpoolo‐ʋɔi nii ŋɛni lɛ su ɔ́ kpokolo, nii é ga gaama, gaa‐wɔlɔ gɛ lɛ maʋai zu.

⁹ Gè boni wo ma kɔlɔi zu gè ponɛni wo wɔ ga wo mɛ lɛ ɣɛ siɛ‐pulu zu wa wɛ̃ɛ‐ziɛ‐bo bea.

¹⁰ Gɛ̀ lɛ ŋɛni bosu ga wa ʋaa mɛ lɛ ɣɛ ŋeteai nii zu wɛ̃ɛ‐ziɛ‐bo bea ta ʋaa zu. Gɛ̀ lɛ ŋɛni bosu ga wa ʋaa mɛ lɛ ɣɛ maŋɛni‐wõi bea ta ʋaa zu ta mawũmɔ‐wo bea ɔ́ nɔ ɣɛ ga mamaa‐niini gala‐feli vea, toku ge zei ga wɔ ɣɛ na wo na ɣɛ kɛni nɔ wɔ wulo ŋeteai nii zu.

¹¹ Kɛ̀ to mu gè kɔlɔi wonɛni wo wɔ ga numai niitiɛ daa‐zeigi te va ga ta ga de ta, ani te ta nɛpɛ kɛɛ‐zɔ ka ɣɛ na ga fai niitiɛ te ta, a mɛ lɛ vile wulu wa tiɛni. Natiɛ ta ga wɛ̃ɛ‐ziɛ‐boga, ŋɛni‐wõi faa, maa‐niini gala felia, nu laa‐woo‐zu‐loa ga yowũa, dɔɔ‐ƃoalea nu vɛ ga é so, ta wũmɔ‐woga. A mɛ lɛ ʋɔlɔ ƃalaa laa mi ŋada ɣila wa na ɣavele veaitiɛ.

¹² Zɛƃɛ ɣa é dà ga gè bo numai niitiɛ ʋaa zu tɛ lɛ ga Gala pɛlɛ wu vea? Kɛ̀bɛ numai niitiɛ te Gala pɛlɛi wu ta ɣa pagɛi wo ta ʋaa‐wo bo, kɛlɛɛ?

¹³ Niitiɛ tɛ lɛ Gala pɛlɛi wu, Gala ka yá wɛlɛ natiɛ ta ʋaa‐wo su va. A tuo‐vele‐yowũ nui nii ƃɛ é wulo wo zaama.