1KƆLĨITIƐ 3 - DEƲE NIINƐI

Tii‐ɣɛɛ veaitiɛ Gala faa ma

¹ Nà numaa, nà dɛi gɛ̀ lɛ ƃega zoo gɔ̀ wo ziɣi ga numai niitiɛ Gala baa ŋinɛgi te yii zu, kɛ̀ pagɛi ɣɛ gè wo ziɣi ga numai niitiɛ ɣavele te ŋeteai ɣɛɛzu nu ƃuse luoi zu te ga duuyɛ̃ kavele Kolai maa nu na ŋeteai zu.

² Gè wo ɣaa wɔni ga ŋini yiɛ, ɛ́ lɛ ŋɛni ga daa‐mii ŋɛni ƃaana, ƃɔvɛlaale wo ɣavele lɛ ŋɛni dɛ ƃɛtɛni na maʋaa ma. Wo ɣavele lɛ dɛ ƃɛtɛni nii zu ƃalaa.

³ Toku ge zei ga wa dɛ nɔ nu ƃuse ŋeteai maʋaa ma. Tei tɔwɔ kuu‐zu‐yowũ maʋaa ƃɔga kpɔɛ ʋaa te dɛ nɔ wo zaama, kɛ̀bɛ wa nu ƃuse ŋeteai ʋaa ma wiɛ luo è ɣɛ nu ƃuse mazii ta nɛpɛ, kɛlɛɛ?

⁴ ?Wɛ lɛ nɔ ga nu ƃusea wo ta ɣa vɛɛ yíɛ ɣɛ tea, “Gà ga Pɔɔ wulu nu,” zɔi yìɛ ɣɛ tea, “Gà ga Apɔɔla wulu nu”?

⁵ Ƃɛɛ mu ka sa ga Apɔɔla? Ƃɛɛ mu ka wɔnɔ ga Pɔɔ? Gá nɔ ga tii‐ɣɛɛ veai niitiɛ wo woo vagɔi maʋaa ziɣia ga gaama te zaala zu è ɣɛ velei nɔ de maliɣii malii ʋeea la gé ya ga gile‐gile.

⁶ Gè sii‐zii ŋɛnii zeini, Apɔɔla wɔ ge ziɛ wu má. Kɛ̀ Gala ka é ɣɛni ga zaƃu é ƃɛtɛ.

⁷ Na ma ɛ́ lɛ ga nui é sii‐zii ŋɛnii zeizu ƃaa nii é ziɛ wuuzu ma te ta ɣa é ga ŋɛni‐ɣɛɛ ŋɛni ta nɛpɛ fai nii zu. Kɛ̀ Gala be. Tɔ ɣa é kɛɛzu yíɛ ƃɛtɛ.

⁸ Nui é sii‐zii ŋɛnii zeizu ta nui é ziɛ wuuzu ma ta ga tii. Te nu felegɔ pɛ ta ʋɔɔnɛi zɔlɔ wo nɔ è ɣɛ velei ta lii la.

⁹ Ƃɔvɛlaale gé nu felegɔ pɛ gá nɔ ga tii‐ɣɛɛ vea Gala faa ma. Wa ɣa wo ga Gala na kpalagi nii tii ɣɛɛzu gá, wo ga ná pɛlɛi nii tii ɣɛɛzu má.

¹⁰ Tei tɔwɔ Gala ge tèvega tii ma, pɛlɛi vile‐suvɛ ƃɛtɛvɛ bɛ̀ è ɣɛ velei pɛlɛ‐lo kala pɔlɔ ɣa kɛɛ la. Nu ta ƃɔnɔ ka sa pɛlɛ losu vɛ ná ƃɛtɛi bɛ̀. Ƃe ba nu ɣile‐giledai kɛsɛ ga velei ta pɛlɛ lo da na.

¹¹ Ƃɔvɛlaale nu ta ƃɔnɔ nɛpɛ gɛ lɛ sa zooga ɔ́ pɛlɛ lo‐suvɛ ta ƃɛtɛ ɔ́ leve vɛ va ná ƃɛtɛi. Pɛlɛ lo‐suvɛ vɛ wɔ ka ga Ziizɛ Kolai.

¹² Tɔwɔ ani nu nɛpɛ ka pɛlɛ lo na pɛlɛ lo‐suvɛ vɛ ná ƃɛtɛi, manui toni ga zɛni, é to ga kani ɔɔ tɔnɔ‐ba wɔti, é to ga gulu ɔɔ kava ʋɔɔ ɔɔ mɔlɔ ƃaɣa

¹³ te ɣile‐giledai te yee‐wogi ɣa wulo podo ɣala‐kala ga. Folo ta ɣa vaazu maʋai ɣa wulo la kala‐kala ga. Ƃɔvɛlaale ŋabu ɣa é vaazu foloi nii maʋaa wulozu kɛnɛ ma. Na ɣa ɣɛɛ na tii nii mazii nu ɣile‐giledai kɛɛ, ŋabu ɣa a te wɔ̃ɔ.

¹⁴ Ani pɛlɛi nu ta nɛpɛ ka to pɛlɛ lo‐suvɛ vɛ ná ƃɛtɛi mavɛlɛi ɣa ɣɛ na loni, nui é toga towaa wulo ná zu nu ma.

¹⁵ Ani pɛlɛi nu ta nɛpɛ ka to mavɛlɛi ɣa ɣala na, a kɛ tii manui valaga ná tii zu, velei ƃalaa tɔ ɣagi ɣa valo la. Kɛ̀ na manui na baloi ɣa ɣɛ nɔ ga nu wuloa ŋabu zu.

¹⁶ ?Wɛ lɛ kwɛ̃ni ga wa ga Gala‐feli wɔta wala, Gala baa ŋinɛgi é wo yii zu?

¹⁷ Nui nɛpɛ yá Gala‐feli wɔta walai ŋala‐ŋala, Gala ka manui zu ŋala‐ŋala. Ƃɔvɛlaale Gala‐feli wɔta walai wulovɛ su leelaa máʋaa ma. Wa wɔ ka wo ga Gala‐feli wɔta walai na.

¹⁸ Nu ta nɛpɛ ge mɛ lɛ ƃɔɔ ɣaa wɔlɔ. Ani nu ta nɛpɛ ka wo zaama kigi su ga kele‐ɣelegɛ ŋeteai nii zu luoi zu, pagɛ manui ƃɔɔ ɣɛ ga titi nu, kɛɛ ʋaa ma é ɣele‐ɣelegi teɣa ga ƃɔɔƃɔɔ su.

¹⁹ Ƃɔvɛlaale ŋeteai nii zu ɣele‐ɣelegi ɣa Gala gaazu ga titi faa. Ponɛvɛ Gala kɔlɔi zu mawoi ga “Towaa kele‐ɣele beaitiɛ zo nɔ ta gbana luoi zu.”

²⁰ Ponɛvɛ wɔnɔ mawoi ga “De maliɣii kwɛ̃ni ga kele‐ɣele beaitiɛ ta ɣi‐gaa‐ziɛi ɣa nɔ ga faa yãka.”

²¹ Na ma nu ta nɛpɛ ge mɛ lɛ nu ƃuse mayoka teve. To mu fɔlɔ ŋɛnii ɣaazɔ ɣa ga wa dɔ.

²² É ɣɛni ga Pɔɔ ƃaa Apɔɔla ƃaa Siifɛ. É ɣɛni wɔnɔ ga zui ƃaa zɛʋu ɔɔ saa, é ɣɛ ga zai ŋɛ ni ɔɔ ná yee luo vele, te pɛ ta ga wa dɔ.

²³ Tɔwɔ wa ga Kolai na dɔ, Kolai wɔ ge ga Gala na dɔ.