ཡོ་ཧ་ནན་གཉིས་པ​། 1 - དོལ་པོ།

ལེའུ་དང་པོ། འཚམས་འདྲི།

^1-2 ཆོས་ཚོགས་​ཀྱི་​རྒན་མི་ངས་​ཡི་གེ་འདི་ནི་དཀོན་མཆོག་​གིས་​བདམས་པའི་​ཆོས་ཚོགས་ཀྱ་དིང་། ཡང་ཆོས་ཚོགས་ཀྱི་ནང་ལེ་འོད་ཡོད་མི་ཀྱ་ཀྱི་ཆེད་དུ་བྲིས་འོད། འུ་​ཀྱ་​ལེ་​རྒྱུན་ཆད་​མེད་​འོད་ཡོད་​བདེན་པ་​དེ་ནི་འུ་ཀྱ་ཀྱི་ནང་ལེ་བཞུགས་ཕེན། ང་​པ་རྐྱང་​མ་དིག་བདེན་པ་​ཧ་གོ་ཐུབ་མཁན་ཡེ་རེས་​ཟང་​ཁྱེད་​ཀྱ་​ལེ་​བརྩེ་བ་​བགྱིད་​འོད་དིག​

³ ཡབ་དཀོན་མཆོག་​དིང་། ཁོང་​གི་​སྲས་​སྐྱབས་མགོན་​ཡེ་ཤུའི་བརྒྱུད་ནས་ཐུགས་རྗེ་​གཟིགས་དིང་བཀའ་དྲིན། ཞི་བདེ་དིང་བདེན་པ། བྱམས་པ་དེ་འུ་ཀྱ་ལེ་གནས་པར་​ཤོག

བདེན་པ་དིང་བྱམས་པ།

⁴ ཡབ་​ཀྱིས་​འུ་ཀྱ་ལེ་བཀའ་​གནང་​འོད་དི་ཅོག་འདྲ། ཁྱེད་ཀྱ་ཀྱི་ནང་ནས་མི་ཁ་ཤས་​ཀྱིས་​བདེན་པའི་སྤྱོད་ལམ་བ​གྱིད་​འོད་དི་​ཧ་གོ་སྟེ་ང་​དགའ་རི་​འཇུ་གུ་​བྱུང་​།

⁵ ད་ཁྱེད་ཆོས་ཚོགས་ཀྱ། ངས་​ཁྱེད་ཀྱ་ལེ་ད་ལྟ་བཀའ་གསར་པ་ཞིག་མི་འབྲི་འོད། འུ་ཀྱ་ཀྱིས་གཅིག་གིས་གཅིག་ལེ་བྱམས་པ་བགྱིད་དགོས་འོད་དིག་ཟིན། ངས་ཁྱེད་ཀྱ་ལེ་ཞུ་བ་ཕུལ་གྱོ་འོད། བཀའ་དེ་ནི་སྔོན་མ་ནས་ཕེན་འུ་ཀྱ་ལེ་འོད་ཡོད་བཀའ་དེ་རང་ཡིན་དིག

⁶ ཡང་འུ་ཀྱ་ཀྱིས་དཀོན་མཆོག་གི་སྤྱོད་ལམ་ཅོག་འདྲ་བྱས་འོད་ནི། དེ་ནི་བྱམས་པ་ཡིན་དིག ཁྱེད་ཀྱ་ཀྱིས་སྔོན་མ་ནས་ཐོས་པི་དེ་རིང་ཅོག་འདྲ་སྤྱོད་ལམ་བགྱིད་དགོས་རྒྱུ་ནི་བཀའ་དེ་ཡིན་དིག

⁷ ཅི་ལེ་​ཟེར་​ནི། མགོ་སྐོར་​གཏོང་​མཁན་​མང་པོ་​ཞིག་​འཇིག་རྟེན་​ལེ་​སླེབས་​འོད་དིག མི་དེ་ཀྱ་​ཀྱིས་​སྐྱབས་མགོན་​ཡེ་ཤུ་​ནི་མིའི་​ལུས་​ནས་​ཕེབས་​གནང་པི་དེ་ལེ་​ཁས་ལེན་​མི་​བགྱིད་​འོད་དིག མི་དེ་ཀྱ་ནི་མགོ་སྐོར་​གཏོང་​མཁན་ཞིག་ཡིན་དི་མ་ཟད། སྐྱབས་མགོན་གྱི་བསྟན་དགྲ་ཞིག་ཡིན་དིག

⁸ ཉེད་ཀྱ་ཀྱིས་​འབད་བརྩོན་​ངང་ནས་ཅི་བསྒྲུབས་པི་དེ་ཀྱ་དོན་མེད་ལེ་མི་འགྲོ་བའི་ཆེད་དུ་​དོགས་ཟོན་​གྱིས་​ཞིག དེ་​ནི་​ཁྱེད་ཀྱ་ལེ་བྱ་དགའ་​ཆ་ཚང་​འཐོབ་རྒྱུ་ཆེད་​དུ་​ཡིན།

⁹ ཡང་མི་སུ་ཞིག་གིས་​སྐྱབས་མགོན་​ཡེ་ཤུ་བརྒྱུད་ནས་བསྟན་​གནང་བའི་​བསླབ་བྱ་དེ་མི་སྲུང་མཁན་​དེ་ལེ། དཀོན་མཆོག་​ཟང་འབྲེལ་བ་མེད་དིག ཁོང་གི་བསྟན་གནང་བའི་​བསླབ་བྱ་སྲུང་མཁན་གྱི་སྐྱེན་​ལེ་​ཡབ་​སྲས་​གཉིས་ཀ་​བཞུགས་​འོད་དིག

¹⁰ ཡང་གལ་སྲིད་​མི་​སུ་ཞིག་གིས་ཁྱེད་ཀྱ་ཀྱིས་བསྟན་པའི་​བསླབ་བྱ་​འདི་ལེ་​མ་སྟོན་ཏེ། ཁྱེད་ཀྱ་ཀྱི་རྩ་ལེ་འོང་འོད་ནི། ཁྱེད་​ཀྱ་​ཀྱིས་​མི་​དེ་​རང་གི་​ཁང་པ་ལེ་མ་བསུས་ཤིག ཡང་མི་དེ་ཀྱ་ཀྱི་སྐྱེན་ལེ་སྐད་ཆ་ཟང་​མ་​ཤོད་ཅིག

¹¹ ཅི་ལེ་​ཟེར་​ནི། མི་དེའི་རིགས་ལེ་བསུ་མཁན་དེ་ནི། ལས་ངན་གྱི་སྤྱོད་པ་དིང་འབྲེལ་བ་འོད་དིག

མཇུག་མཐའ་མའི་འཚམས་འདྲི།

¹² ང་ལེ་ད་རུང་ཁྱེད་ཀྱ་ཀྱི་ཆེད་དུ་འབྲི་དགོས་པའི་དོན་མང་པོ་འོད་ནའང་། ཤོག་ལེབ་དིང་སྣག་ཚའི་བརྒྱུད་ནས་པ་རྐྱང་འབྲི་འདོད་མེད། འུ་ཀྱ་ཀྱི་སེམས་ལེ་དགའ་སྤྲོས་ཁེངས་རྒྱུ་ཆེད་དུ། ཁྱེད་ཀྱ་ལེ་གདོང་ངོ་མངོན་སུམ་ཐུག་སྟེ་སྐད་ཆ་ཤོད་འདོད་འོད།

¹³ དཀོན་མཆོག་​གིས་​བདམས་གནང་བའི་ཁྱེད་ཀྱ་ཀྱི་ཆོས་ཚོགས་ཀྱ་ཀྱིས་ཟང་། ཁྱེད་ཀྱ་ལེ་འཚམས་འདྲི་​བཀྲ་ཤིས་བདེ་ལེགས་ཞུ་​འདུག ། ། །​