Judas 1 - Diósïri Karakata P´urheepecha Jimbo

Uénakua

¹ Júdasï Jesukristueri jántspiri, Santiagueri erachi jémba, iámendu uandajpakatechani enga Diósï Táte xénhchaaka ka enga Jesukristu kuájchakuani jaka.

² Eskajtsï cha kánekua p'amojkunhaaka ka eskajtsï sési jakua intsïnhaaka ka kánekuajtsï xénhchanhani.

³ Jucheti xénhchakatecha: Kánekuaksïni karachenhchaxapka juchari p'ímutantskueri ambe, ka karaska jimbokaksïni uéksïrempka arhini, eskajtsï jángorheaka jakajkukuani kuájpeni, enga Diósï imeri ireta arhutakatani méntku íntskuka.

⁴ Nóchkaksï jarhaski máru andi engaksïni sïpatekuarhu inchaakucheka, imanisï karakata arhiani jápti eskaksï arhinharhikunhaaka. Nóksï jakajkusïndi, juchari Diósïri kóntperakuanksï ísku ambe niátatarasïndi ka nóksï jiókorhesïndi juchari Acha Jesukristuni engajtsïni juchantsïni míngorhetini jaka.

⁵ Uékasïngaksïni ma ambe míatani, eska Acha jiáni enga Israeli anapuechani Ejiptu petaatantaaka, k'amajkuaspti imani engaksï no jakajkupka.

⁶ Ka ístu ánjelichani engaksï no uékapka jima jarhani engaksï péranhapka, ka sánderuksï imecheri irekuarhu kéndikusti. Diósï jima jatsiasti enga méntkisï pájpakandeka, tiámu jimbo jójkuatini, erokorheni ima jurhiatekuani enga arhinharhikperanhaaka.

⁷ Ka májkuentu Sodoma ka Gomorra ka iretecha engaksï jimesï jaka, engaksï ima ísku jándi úkorhepka ka nósesi jásï ambejkuksï tsitinhchani. Ikimenhasptiksï chpíri jimbo enga nómeni pátakorhejka, eskaksïni imecheri ikimekua marhucheaka ka cha no ísï jámani.

⁸ Ka nauejki ísï, íchkaksï májkueni ísku jándisïndi, tsánharhiparinkï jámasïndi ka Diósïri juramukuanksï no jiókorhesïndi, ka auandarhu anapu ánjelichanksï nósesi arhiasïndi.

⁹ Migueli, ánjelicheri k'éri, engaksï nóambakitini jinguni jupiperatini jápka Moisesiri anhaanhatakuani euajperani, no tekaaspti útakuni ka sánderu jamberi jinijku uandaspti: “¡Eskakini Acha arhinharhikuaka!”

¹⁰ K'óruksï inde nósesi arhisïndi imani ambe engaksï no kurhangujka, ka sáni ambe engaksï kurhangujka, jandiojku jatinksï tsînchekorhetarasïndi ísï eskaksï manakorhericha engaksï no eratsejka.

¹¹ ¡Ákeruksï! Jimbokaksï Kaíniri xanhari jimbo niraska, ka tumina andakuekanksï támu ísï nirastia ísï eska Balaami. No kurhandirakua jimboksï Koreni uarhiati.

¹² Inde k'uratsekua ambesti engajtsï cha xénhchperani tángorhentani jarhajka ka indeksï t'iresïndi ka tsípekorhesïndiksï Diósïni nósani chénharhiparini. Jinguntku je indecha jinguni; janikuenksï járhasti enga tarhiata ísku pájka, anhatapu uauarhuntskuarhu anapuenksï járhasti engaksï no újka amanhejchakua jukani, tsimani xanhariksï uarhirixati, ísï jimboksïsï murutanhaati.

¹³ Japunderi k'érati jenguerakuenksï jáxesti, engaksï k'uratsekua ambe k'uruarhekorhejka; jóskuenksï járhasti engaksï jini ka jini jámka, ka méntkisï anapu pájpakandekuaksï patsamenhaxati.

¹⁴ Enoki, ima enga Adaniri iúmu tsimani sïrukueka jémbepka, indecheri ambe uandarixaptia: “Exe je, Acha uánekua ánjeli jémbecha jinguni janosti.

¹⁵ Ka mándani arhiati arhinharhikuani imani nósesi ambe jimbo enga únhaka ka engaksï Diósïni nósesi arhika.”

¹⁶ Indeksï méntku aiaimeni jarhasïndi, ka arhinhchpesïndiksï, ísïksï jámasïndi eskaksï na tsitinhchaaka jámani. K'éramakorhesïndiksï ka sésiksï jándirantasïndi k'arhajpeni.

Sési mintsikani

¹⁷ K'óru cha erachicha, míani ja je ambe engaksï Jesukristueri uandakua páricha, juchari Acha Jesukristueri ambe arhijpeka.

¹⁸ Imaksï uandasïrempti: “Jiájakani engaksï jurhiatekuechani k'amakurhiaka, jauatiksï máru engaksï Diósïni nósesi arhiaka ka nósesi ambeksï tsitiparini irekorheati.”

¹⁹ Indeksïsï arhukpejti, parhakpeni anapuestiksï ka Espiritunksï no kámasïndi.

²⁰ Ka cha erachicha, chári pímpinhasï jakajkukua jimbo uinhaperpentsï je, ka Espiritu Sántu jimbo uandamukukorhe je.

²¹ Diósïri xénhchperakuarhu ja je. Ka p'íjeteru juchari Acha Jesukristueri p'amojperakua engaksïni jamberi ima tsípekuarhu páaka enga méntkisïka.

²² Ka andajtsïtera je imechani engaksï tsimanitsimanerhani jaka.

²³ Ka máteruechani chpírirhu p'íjpaantsï je, ka máteruechani p'amojkua je. K'óru xéparini je. Ikimcha je xukuparhakua jamberi enga imecheri nósesi jángua jimbo ikichakueni jáxekia.

²⁴ Diósïksïni úsïndi exeni jarhani eskajtsï no terungutanhaaka ka úatiksïni ima jinguni k'érikuarhu incharani, nómbe ma arhikua jinguni ka tsípeparini.

²⁵ Diósïni ima enga májkueka, juchari p'ímutantspiri, k'éri ambe arhinhe ka k'éri ambesti, juramue ka uinhapekua jatsini, iásï ka méntkisï juchari Acha Jesukristuni jimbo. Ka ísïue.