JOHN 12 - DARA GADAIN N.T. with PSA and PRO (BSI)

Jisu khe Bethani ha thao hu ba

¹ Baiglai ni Busu jamani nokha sain doh sagang ha Jisu Bethani ha sophai ba, braha Lazaras dong ba, sere khe Jisu githi ni phrang baijaphin ri ba.

² Oraha, bonsi Jisu ni khlai hi jima-lingma ni salai ri ba, Martha sowar-mowar ja ba, bonsi ni bising ha Lazaras dongpha ba, bonsi jang jilai mani khlai hi khampha ba.

³ Odehe, Mari duyaba thao midim herjer si lahi Jisu ni yapha basao ha lukhru ba. Ode jarni khnai jang boni igah khe rusa ri ba. Ode noh khonglang bahai midimyaba gablai thar ba.

⁴ Boni rikphayarao ni bising ha saosi Juda Iskariot, Jisu khe rem riginyaba jajaoya jahi thi ba,

⁵ Sumjabani ebo midimyaba khe phain hi, bo rang khe dukhisarao ne riyaba? Ebo de maithai si ni yaowai ni rang jama se.

⁶ Dukhi sarao khe waimu nang hi bo ebo grao khe thiba niya, bede thikhala, bo de makhao se, boni ha ning rang rih julibo dongba se, ode snadi khe seng re, bo deng khao re.

⁷ Jisu thiphin ba, Bo khe sao jang haiger khlah. Ang khe phip bani basain ni khlai hi bo ebo thao midim khe dengthao la thing.

⁸ Nisi ni bising ha nalaibo dukhisarao dongma se, thikhabo ang khe nisi nalai de mai nang niya.

Lazaras khe sthai mane bao ba

⁹ Jisu oraha dong thihi tharmai bani gabang Judarao ode Jisu ni khlai hi se ning niya thikhabo sere khe bo githi ni phrang baijaphin riba, Lazaras khe bo nai mane phai ba.

¹⁰ Odese Jonthaimarao Lazaras khe bo sthai mane baolei ba.

¹¹ Bede thikhala, boni khlai hi gabang Judarao thang thar la ba, ode bonsi Jisu khe lon ba.

Jerusalem ha hapsing phai ba

¹² Gibin basain ha mel ha gabang subung githimyarao Jisu Jerusalem ha phai du thihi ebo graojma khe khna ba.

¹³ Bonsi saman bedep khe lahi bokhe goron mane thang ba, ode Hosanna! Gabra ni bumu jang Israel ni Raja phaiyaba de bakhan ja thing! thihi bonsi jirik khao ba.

¹⁴ Jisu mihleng ni basa masi mai ba, ode boni basao ha ga ba, ode reb langyaba dongba lai jasosi,

¹⁵ Zion ni bisik, da khin! Nai lah, nini Raja khe Mihleng basa ni basaoha gahi bo phai du.

¹⁶ Sagang ha boni rikphayarao ebo grao khe bujiya. Thikhabo, Jisu ni muima baigo phaihi se bonsi wainso phin ba, ebo grao boni balam ha se reb langyaba dong ba, odebani se subung buthu boni ha, elei dang ba.

¹⁷ Subung buthu githimyarao bo bubli ha bo jang dongpha ba, jekhali bo Lazaras khe phipyaba hakhor ni phrang longhun hi mathang phinyaba grao khe thiphlung songhi ning dong ba.

¹⁸ Bede thikhala bo gmang thaosisiyaba sin khe dang phnu ba thihi bonsi khna ba, odebani subung buthu bo jang goron lai mane thang ba.

¹⁹ Pharisairao jar jang jar thilai ba, Gibi khe bao lah, nisi jang musibo jadaoya kha. Nai lah! habsao bokhe rikpha kha.

Greek sarao bokhe smai ba

²⁰ Mel ha phaiyarao ni bising ha gijisa Greek saraobo dong ba.

²¹ Bonsi Galili ni Bethsaida ha dongyaba Philip niha bonsi phai ba, Gedema, jing Jisu khe naima nangjao du, thihi khainsu phai ba.

²² Philip Andri niha sainthi mane thang ba. Andri ode Philip thanghi Jisu niha sainthi ba.

²³ Marsi ni Basa muima mai mani bubli sophai kha, thihi Jisu bonsi khe thiphin ba.

²⁴ Gibi gibi jang ang nisi khe thi du, maigrong hah ha galai hi thihyasi de bo grong si de sao jang thaoma se. Thikhabo thih kha se bo gabang thaiphai ma.

²⁵ Sere jarni hang khe khasao la re, bo de gama jao re, ebo habsao ha sere jarni hang khe naisle re, bo thaoglao ni khlai hi raokhi jao ma se.

²⁶ Sere ang khe naiso-nuso khlai re thikhade ani yaohon rikpha la thing, ode ang braha dong ma, ani naiso-nuso jayababo oraha dongma se, ani Abai bokhe khasao ma se.

Jisu jarni thih mani grao khe thi ba

²⁷ Duha ani khah ha baophrang phuya japhai du, odebani ang snadi khe thi rima kho? Ang thima na somo? Ebo bubli ni phrang Abai angkhe sogo? Niya, ebo ni khlai hi se ebo bubli aniha phai ba.

²⁸ Abai jarni bumu khe muima ja ri lah. Boha ning nokhasao ni phrang khurang si biring ba phai ba, Ang bokhe muima ja rila kha, ode bokhe ang muima jari phinma.

²⁹ Oraha subung githim hi ning dongyarao bokhe khna hi thilai ba, Ebo de nokhasao girimba se, Gibin subung buthu thibu kha, Saosi degla bo jang sainlaiba se.

³⁰ Ebo khurang ani khlai hi niya, nisi ni khlai hi se, thihi Jisu thi ri ba.

³¹ Ebo habsao ni basao ha bisar khlai mani bubli ja kha, ebo habsao ni raja duha rikhon jao ma.

³² Odehe phirthi ni phrang guju ha ang khe khasi kha, thikha se khrip subung khe ang jarni ha sikpha ma.

³³ (Ebo grao khe thiba ha bede jahi bo thihma, bo khe se bo thihi mithi ri ba.)

³⁴ Githim laiyarao subung buthu thi ba, Krista de thaoglao ha se dong ma thihi jing Dara ni phrang khna ba, thikhala ning bedehe thiphu re, Marsi ni Basa khe guju ha se khasi ma thi hi? Ebo Marsi ni Basa la sere kho?

³⁵ Yaohon ha Jisu bonsi niha thi ba, Jdanma nisi ni bising ha khaisa se ning dong si ma, jdanma nisi jang dongpha du si nisi daobai bai lah, andar jang nisi khlip phung jaogothai de da ja thing. Sere andar ha daobai re, jar bo jang gede thangba bo tharmai laya.

³⁶ Nisi jang jdanma dongpha du si, jdanma khe lon lah, odese nisi jdanma ni basathu ja ma. Elei thiblai hi Jisu thangba, ode bonsi ni phrang bo jar khe thimkhao ba.

Judarao bo khe lonya

³⁷ Bonsi ni sagang ha bo buthu khrip gmangthao sisiyaba sin khe Jisu dang phnu ba, thikhabo bokhe bonsi lonya.

³⁸ Odese, gorasali Isaiah thilangyaba grao ja thar mane; Gabra, jini hamba graojma khe sere lon ma? Gabra ni yao ni bol khe sere niha mithi ri ma?

³⁹ Ebo ni khlai hi se bonsi lonyaba. Odebani Isaiah thiphin ba;

⁴⁰ Madai ning bonsi ni muthai khe gma khlai la kha, ode bonsi ni khah khe gibir khlai kha. Ode niyakhade bonsi muthai jang nuhi, khah ha buji hi, ode khah phin ma mu, ode ang bonsi khe ham ri ma.

⁴¹ Isaiah ede thiba, bede thikhala, bo Jisu ni muima khe nu kha, odebani se boni balam ha sainthi ri ba.

⁴² Bo bubli ha gejesi hojarao Jisu khe long ba. Bede thikhala Pharisai sarao ni khlai hi boni lonma khe mithijao ri ba. Ode niyakha de bonsi khe sunnagog ni phrang rikhon khlama se.

⁴³ Bede thikhala, Madai khe judao riba thane bonsi subung khe judao riba khe se gabang hamjaodao ba.

Jisu ni grao lahi bisar

⁴⁴ Odehe, Jisu jirik khaohi thi ba, “Sere ang khe lon re, bo ang khe lonba niya. Ang khe haihayaba khe se bo lon ba.

⁴⁵ Sere ang khe nu kha, ang khe haihayaba khe se bo nu ba.

⁴⁶ Masi jdanma lai jasosi ang habsao ha phai ba, odebani ang khe lonyarao saosi bo andar ha thao nang niya.

⁴⁷ Sere ani grao khe khna hi maniya la kha bo, ang bokhe gajai ha galai riya. Bede thikhala habsao khe gajai ha galai rimani khlai hi ang phaiya, habsao khe sogo mani khlai hi se ang phai ba.

⁴⁸ Sere saosi ani graojma khe nangjaoya ode ang khebo maniya jare, bokhe bisar khlai ginyaba saosi dong. Ang thiyaba graojma de nangyaba se, thikhabo yaohonthao ni basain ha bokhe siji ma.

⁴⁹ Bede thikhala, ang jarni baoma ha ang grao khe joya, thikhabo sere ang khe haiha ba snadi khe thima ode bokhe bedehe thi ma,

⁵⁰ Bo grao riyaba de thaoglao ni hayu se thi hi ang mithi du, odebani ang grao thiyaba buthu de Abai ani thi ri ba lai ning ang thi ba se,” bo ode thi ba.