Márkus 14 - Dii New Testament

Nán gbo̧o̧ vu̵ yá̧ḿ Yesu bi ma"o̧ ó̧

¹ Mam vúnní páska kan mam vúnní 'yɛ́ wág sá, ká kéé dɨ bá' idú. Gbanaa hȩn ha"ı̵́ vu̵ kan nán moo Tayɨɨ tú"í vu̵ soo hi̧naa moo bi ma' Yesu kan hȩn yá̧mnée, bi nɔɔwo̧ ó̧.

² Ma vu̵ o̧: “A̧máa sú̵ggı̵́ ka 'wáa ná né yɛ, ba ma"o̧ ví sá, moo dúú ka vu̵n dɔ́b mooɨ.”

Wakȩ́ȩ́ tóó túud Yesu duusá̧n yúlí

³ Yesu ka dɨ lá kaa Bɛtaníilí̧ lig Simɔ́ŋ nán ho̧o̧ naa tóó woolı̵́, ku̵u̵ dɨ hȩn lálı̵́ wu̵lı̵́ máa, wakȩ́ȩ́ tóó dɔ́ ya. Pa̧ŋ tɔg kúḿ albatée, duusá̧n nárdə ku̵u̵ hɨ sɨɨde na'a máa hi̧' tɔg yȩ ság. Gə vəg tɔg kúḿ pee, túud Yesu duusá̧n yúlí.

⁴ A̧máa nán tóó vu̵ kɔ́ zó̧ó̧ yȩ́ȩ́, vu̵ ó̧ń ya voolı̵́: “Duusá̧n lı̵́nné ı̵́ yo̧go̧ máa, du̵u̵ dɨ tɛ́lá?

⁵ Ka ban gí ví duusá̧n yȩ mba booro tȩmɛre ta̧a̧nɔ́ á̧ḿ, pú̵ nán gíḿ vu̵ yu̵!” Vu̵ kɔ́d wakȩ́ȩ́ pee zó̧ó̧ yȩ́ȩ́.

⁶ Yesu ka ki máa, o̧d vu̵: “I gbɔgɔ ú̵; moo ȩn ví 'mááwo̧lá? Kɔ́ ba'ad du̵u̵ yúú míílí̧ sú̵'ú̵.

⁷ Ví dɨ víí kan nán gíḿ vu̵ sey 'waapád. Sey i hí̧í̧ ú̧ tée, víń kɔ́d vu̵ hȩn du̵u̵ ú̵. A̧máa ı̵́ míí máa, míń mbaan kan ví sey 'waapád né.

⁸ Wakȩ́ȩ́ yɛ kɔ́ hȩn ka maa kɔ́lı̵́ máa yúú míílí̧ sú̵'ú̵. Dəŋ túun kúḿ moo dɔnné míí bɛ́ɛ́gı̵́ sú̵'ú̵.

⁹ Mí o̧d ví moo yȩ́ńne, kóó ya woo tɛ́lá u̵u̵ dɨ moo to̧o̧ 'maŋ palı̵́ 'waapád, vú̵ń pa'a moo yúú hȩn wakȩ́ȩ́ yɛ ka kɔ́ yɛlı̵́ á̧ḿ, moo bi duu taawu̵ wu̵lı̵́.”

Yúúdas bi dɔd Yesu nag gbanaa hȩn ha"ı̵́ voolı̵́

¹⁰ Yúúdas Iskarió, nán tóó sa̧a̧m waa duulí ı̵́ wa̧nɓó' zu̵u̵ idú voolı̵́, la maa gbanaa hȩn ha"ı̵́ vu̵, moo bi dɔd Yesu voolı̵́ nagá.

¹¹ Vu̵ kiddu̵ moo woo kan zó̧ó̧ dȩ"ȩ́, vu̵ taddu̵ ya̧g bi pú̵gu̵ sɨɨdeɨ. Ma Yúúdas soo kɛb du̵u̵lı̵́ na'a, moo bi dɔddu̵ voolı̵́ nagá.

Yesu lá hȩn lálı̵́ páska kan waa duulí woo vu̵ yu̵

¹² Zá̧ga̧ mam vúnní 'yɛ́ wág sá ka dəŋ, ku̵u̵ dɨ mbee waa páska vu̵ sə̧'ə̧né wu̵lı̵́ máa, waa duulí Yesu woo vu̵ vigi: “Mɔ́ hí̧í̧ oo la mbɔ́gɔm hȩn lálı̵́ páska ya woo tɛ́lá?”

¹³ Ma Yesu ba' waa duulí woo vu̵ idú, o̧d vu̵: “I laa kaalı̵́, víń kan kan wayée tóó gaŋ gbág mam, tée ví dugu.

¹⁴ Kíi ka dɔ́ wu̵lı̵́ tée, ví o̧d ı̵́ kíi aga: ‘Akaw o̧ lig bii ba ii lá hȩn lálı̵́ páska kan waa duulí bii vu̵ wu̵lı̵́ máa, ba dɨ tɛ́lá?’

¹⁵ Tée wú̵ń tú'ud ví lig ı̵́ yúba gbo̧o̧ ba'a, kan hȩn vu̵ tíŋ́ woolı̵́ 'waapád. Tée víń mbɔ́g hȩn lálı̵́ páska baa ví wu̵lı̵́.”

¹⁶ Waa duulí woo pee ku̵u̵ la ya̧ kaalı̵́ máa, vu̵ nuŋ hȩn 'waapád kɔ́ ı̵́ Yesu ba o̧d vu̵ pee wɔgɔ. Ma vu̵ mbɔ́g hȩn lálı̵́ páska wu̵lı̵́.

¹⁷ Mɛn ka kɔ́ máa, Yesu yaa kan waa duulí woo ı̵́ wa̧nɓó' zu̵u̵ idú pee vu̵.

¹⁸ Sey ku̵u̵ mbaa dɨ hȩn lálı̵́ máa, Yesu o̧: “Mí o̧d ví moo yȩ́ńne, nán dágá víílí sa̧a̧mé, ka lá hȩn kan mí yɛ, wú̵ń dɔn nag kúḿ nánánné ó̧.”

¹⁹ Zó̧ó̧ waa duulí woo voo ví̧i̧ ya voo 'waapád, kóó nɔ́nná o̧: “Míi pɛ́lı̵́ náa!”, “Míi pɛ́lı̵́ náa!”

²⁰ Ma Yesu hí̧i̧d vu̵: “Nán dágá sa̧a̧m víí wa̧nɓó' zu̵u̵ idú yɛlı̵́, ı̵́ a dɔd nag kan mí ɗag dágá má nɔ.

²¹ Ɨ́ míí Tayɨɨ ka ba'an ya yɛ, míń dɨ nɔm kɔ́ ı̵́ ká vu̵ bíńda moo Tayɨɨlı̵́ yúú míílí̧ máa wɔgɔ. A̧máa zó̧ó̧ wú̵ń ví̧i̧ nánán ı̵́ a dɔn nag nánán voolı̵́ máa ó̧. Du̵u̵ ka vu̵n ha̧a̧wo̧ sá.”

Yesu lá hȩn lálı̵́ Tayɨɨ kan waa duulí woo vu̵

²² Sey ku̵u̵ dɨ hȩn lálı̵́ máa, Yesu ɓɛ beréd, dȩn Tayɨɨ nag, yɨɨ zu̵u̵, pú̵ waa duulí woo vu̵, o̧: “I fȩȩ lá ví la ú̵, hȩn yɛ fó̧ó̧ míí nu.”

²³ Duu ɓɛ ɗag waa hȩn zɔlı̵́, dȩn Tayɨɨ nag, pú̵ vu̵, vu̵ zɔ ya voo 'waapád.

²⁴ Ma o̧d vu̵: “Hȩn yɛ mɛm míí nu, mɛm ya̧g talı̵́ ka dɨ yɛ́nné moo nán voo ɓu̵u̵lı̵́ na'a má nɔ.

²⁵ Mí o̧d ví moo yȩ́ńne, míń duu zɔn sı̵́ doo yɛ né há̧á̧ wú̵ń ya̧ bá' a̧n zɔ hȩn zɔlı̵́ 'maŋ gbaŋ waalı̵́ Tayɨɨ woolı̵́ pȩ́ń.”

²⁶ Ku̵u̵ bee yéé na' Tayɨɨ máa, vu̵ daa laa gu̵u̵ la' kúḿmí.

Yesu o̧ Piɛ́r ban su̵u̵ bi ú

²⁷ Pig woolı̵́ máa, Yesu o̧d vu̵: “Víń kéé gbɔn 'waapád, moo ká vu̵ bíńda debterelı̵́ o̧: ‘Míń nɔɔ waa tu̵ mbee, tée mbee vú̵ń hɨ'ɨ 'waapád.’ ”

²⁸ Yesu duu o̧: “A̧máa pig nímní míí nɔmmé tée, míń ɓə́ə́ laa ví la hág Gáliléelı̵́.”

²⁹ A̧máa Piɛ́r o̧ddu̵: “Kóó nán 'waapád u̵u̵ kéé gbɔm tée, ı̵́ míí máa pɛ́lı̵́.”

³⁰ Ma Yesu hí̧i̧du̵: “Mí o̧m moo yȩ́ńne, vid ɓəə yɛ nɔ́g va̧a̧ wú̵ń hȩ́ȩ ná hȩ́ȩ́lȩ́ do' idú woo né, mɔ́ń su̵u̵n do' ta̧a̧nɔ́.”

³¹ A̧máa Piɛ́r duu sȩn fó̧ó̧, moo: “Kóó a̧n bi sú̵g nɔɔ kan mɔ́ á̧ḿ si̧', míń su̵u̵n mɔ́ né sá̧ḿ!” Waa duulí woo vu̵ 'waapád vu̵ moo ya̧g dágá yȩ nɔ.

Yesu ɓá' Tayɨɨ bab Gɛdsɛ́manɛ́ɛlȩ́

³² Pig woolı̵́ máa, Yesu vu̵ kan waa duulí woo vu̵ daa laa ya tóó ku̵u̵ bee Gɛdsɛ́manɛ́ɛ máalȩ́. Ma Yesu o̧d waa duulí woo vu̵: “I mbaa yɛlı̵́, mí la ɓá' Tayɨɨɨ.”

³³ Yesu ɓɛ Piɛ́r vu̵ kan Yaakúbu kan Yoohá̧na, u̵u̵ mbaa kan bi ú. Dú̵ú̵ dəŋŋɔ kɔ́lı̵́, fó̧ó̧ ka̧"o̧,

³⁴ o̧d vu̵: “Zó̧ó̧ ví̧i̧n há̧á̧ maa nɔmme. I mbaa yɛlı̵́, i mbaa nɔ́ɔ́ to̧o̧ȩ.”

³⁵ Pig woolı̵́ máa, séé la waaná', buu zu̵u̵ hágá, ɓá' Tayɨɨ o̧ tow kɛb tóó a dɨlı̵́ tée, hȩn yȩ a ya̧a̧ bi ú,

³⁶ o̧: “Ábba (moo yɛ tú' ‘Ba'á’), hȩn 'waapád təən mɔ́ né, hȩn ndɔ́gɔné nɔm yɛ a ya̧n sá. A̧máa a̧m duu hȩn hí̧í̧lí̧ míí sá, séý hí̧í̧lí̧ móó a wu̵ kɔ́y.”

³⁷ Duu vȩ́' yaa Piɛ́r voolı̵́, nuŋ vu̵, vu̵ dɨ nəmme. O̧d Piɛ́r: “Simɔ́ŋ, mɔ́ nə á̧a̧? Mɔ́ mbaan kan nɔ́ɔ́ to̧o̧ zamndi dágá aga né sá̧ḿma?

³⁸ I mbaa to̧o̧, i ɓá' Tayɨɨɨ, moo ka víń dɔ́ hȩn zo"ı̵́lı̵́. Zó̧ó̧ víí hí̧í̧ Tayɨɨ ɓá"ı̵́ ú̵, a̧máa fó̧ó̧ wu̵ ta̧a̧.”

³⁹ Yesu duu vȩ́' la ɓá' Tayɨɨ kan moo dágá pee.

⁴⁰ Pig woolı̵́ máa, duu vȩ́' ya nuŋ vu̵, vu̵ dɨ nəmme, moo nɔ́ɔ́ voo zi̧i̧ mbaa dər kan nəm. Vu̵ gaan moo u̵u̵ hí̧i̧nɔ né á̧ḿ.

⁴¹ Yesu ka duu vȩ́' ya do' ta̧a̧nɔ́ woo máa, o̧d vu̵: “Ví nəə, ví dɨ lá nəmmaá? Sey míí ya̧ sú̵'ú̵. Ɨ́ míí Tayɨɨ ka ba'an ya yɛ, vu̵ dɔn nag nánán hȩn ɓı̵́d kɔ́lı̵́ voolı̵́ sú̵'ú̵.

⁴² I lúú dɔg, ba lúú ví ú. I ho̧ sú̵m, nán a dɔn nag nánán voolı̵́ máa, dɨ bə́'.”

Vu̵ ma' Yesu

⁴³ Sey Yesu ka dɨ moo yȩ o̧lȩ́ máa, Yúúdas sa̧a̧m waa duulí ı̵́ wa̧nɓó' zu̵u̵ idú voolı̵́ pee, ya̧ ya kan dúú vu̵. Vu̵ pa̧ŋ pag naa vu̵ kan yé'en vu̵. Gbanaa hȩn ha"ı̵́ vu̵ kan nán moo Tayɨɨ tú"í vu̵, kan ı̵́ nii Yúúda, vu̵u̵ ba' vu̵ ya.

⁴⁴ Yúúdas ı̵́ ba dɨ Yesu dɔnné nag nánán voolı̵́ pee, ká tú'ud vu̵ hȩn a kɔ́ pȩ́ń u̵u̵ gaa Yesu wu̵lı̵́ máa sú̵'ú̵, o̧: “Nán a̧n vá"u̵ kan hȩn hu̧u̧lí̧ tée, wu̵ yu̵, i ma' pa̧ŋŋɔ, ví tu̵gu̵ du̵u̵ na'a.”

⁴⁵ Yúúdas séé la Yesu woolı̵́ vaŋná, vá"u̵: “Akaw,” hu̧u̧wo̧.

⁴⁶ Ma nán pee vu̵ yo̧o̧ nag ma' Yesu.

⁴⁷ Nán ku̵u̵ mbaa wu̵lı̵́ máa, dágá woo pag naa, du̵ nán ba'ad ı̵́ nii hȩn ha"ı̵́ woo pee tɔ́g sə̧'.

⁴⁸ Sey woo Yesu ka moo sɔd vu̵, o̧: “Ví yaa bi ma'an kan pag naa vu̵ kan yé'en vu̵ kɔ́ ı̵́ kíí laa dɨ kɛm tóó woolı̵́ wɔgɔ máalá̧!

⁴⁹ Ká mí baa tú' moo lig hȩn ha"ı̵́lı̵́ zá̧ga̧ 'waapád, ví ma'an mí ní. Ká vu̵ bíńda hȩn yɛ debterelı̵́, ma hȩn yɛ kɔ́y ı̵́ yo̧go̧.” Ma waa duulí woo vu̵

⁵⁰ 'waapád vu̵ lúú ɗug, vu̵ kéé gbɔgɔ.

⁵¹ Náásaa waa tóó ka duu Yesu máa, wáá sa̧a̧m wáálı̵́ɨ; vu̵ hí̧í̧ bi ma"o̧ ó̧,

⁵² a̧máa yu̵'u̵ sa̧a̧m gbɔ, kɛ ɗug lúú fó̧ó̧ leená.

Ɨ́ nii moo sə̧"ȩ́ vu̵ sə̧' moo yúú Yesu woolı̵́

⁵³ Vu̵ pa̧ŋ Yesu laan tíŋ́ ı̵́ nii hȩn ha"ı̵́ woolı̵́, ya gbanaa hȩn ha"ı̵́ ku̵u̵ sú̵g kan ı̵́ nii Yúúda vu̵ kan nán moo Tayɨɨ tú"í vu̵ wu̵lı̵́ máa 'waapád.

⁵⁴ Piɛ́r duu Yesu pigim ɗiilí na'a, la ya̧ ya̧g na'am ı̵́ nii hȩn ha"ı̵́ woolı̵́, daa o̧o̧ vee mbaa kan só̧ó̧ze ı̵́ lig hȩn ha"ı̵́ vu̵.

⁵⁵ Gbanaa hȩn ha"ı̵́ vu̵ kan ı̵́ nii moo sə̧"ȩ́ tóó vu̵ 'waapád, vu̵ soo moo yúú Yesu woolı̵́, moo bi nɔɔwo̧ ó̧. A̧máa vu̵ nugu né.

⁵⁶ Nán ɓu̵u̵lı̵́ na'a vu̵ moo moo vbád yúú woolı̵́, a̧máa nán yȩ vu̵ moon moo ya̧g dágá né.

⁵⁷ Nán tóó vu̵ lúú dɔg, vu̵ kɔ́ vbád, vu̵ o̧:

⁵⁸ “Vɔ́ ki ká o̧ ba bíń 'wɔ lig hȩn ha"ı̵́ ku̵u̵ yo̧o̧ kan nag yȩ, ba bíń duu yo̧o̧ tóó ı̵́ nag nánán ba ku̵u̵ yo̧o̧ né máa, bá' ta̧a̧nɔ́.”

⁵⁹ A̧máa kóó ı̵́ yo̧go̧ si̧', vu̵ moo ya̧g man né á̧ḿ.

⁶⁰ Ma ı̵́ nii hȩn ha"ı̵́ lúú dii yúba sa̧a̧m voolı̵́, vi Yesu: “Mɔ́ hí̧i̧n ya̧g né sá̧ḿmaa? Nán yȩ vu̵ moo moo ȩn yúú móólȩ́ yȩlá?”

⁶¹ Yesu mbaa simná, hí̧i̧n moo né ɓid. Ɨ́ nii hȩn ha"ı̵́ duu faa vigi: “Mɔ́ ı̵́ nán sənné, Waa Tayɨɨ ı̵́ ku̵u̵ dɨgɨ na"ȩ́ yɛ woo naa?”

⁶² Ma Yesu hí̧i̧du̵: “Mí wu̵ yu̵. Víń ho̧n, ı̵́ míí Tayɨɨ ka ba'an ya yɛ, míń mbaa nag nán Tayɨɨ ı̵́ néélȩ́ na'a zu woolı̵́, míń yaa kan mam hi̧i̧g be"ı̵́ á̧ḿ.”

⁶³ Ɨ́ nii hȩn ha"ı̵́ ka ki ná' máa, dee sa̧a̧m woo, tii píg, o̧: “Moo ȩn ba duu soo ví nán ya̧g du̵lı̵́ vu̵lá?

⁶⁴ Ví ki Tayɨɨ haalı̵́ woo sú̵'ú̵. Ví taa víí nɛ́nná?” Ya voo 'waapád vu̵ sə̧' moo yúú Yesu woolı̵́, vu̵ o̧: “Maa nɔmme.”

⁶⁵ Nán tóó vu̵ tú̵'u̵du̵ su̵d fó̧lȩ́, vu̵ go̧o̧wo̧ nɔ́ɔ́ kan sa̧a̧m, vu̵ zúŋ́ŋɔ, vu̵ vigi: “A̧m moo moo anábiɨ! A̧m o̧d vɔ́ ú̵, nóo ku̵u̵ dȩ́gȩmá?” Só̧ó̧ze ı̵́ lig hȩn ha"ı̵́ vu̵ fȩȩwo̧, vu̵ dȩ́ŋ́ŋɔ á̧ḿ.

Piɛ́r su̵u̵ Yesu

⁶⁶ Sey Piɛ́r ka dɨ mbaalı̵́ zɔ́gɔ́n na'amé máa, wakȩ́ȩ́ ba'ad ı̵́ nii hȩn ha"ı̵́ woo tóó yaa woolı̵́,

⁶⁷ ho̧go̧ o̧o̧ vee mbaa, tə́ggu̵ o̧: “Mɔ́ á̧ḿ, mɔ́ mbaa kan Yesu nán Naazaréd yȩ á̧ḿ.”

⁶⁸ A̧máa Piɛ́r su̵u̵ ya̧g o̧: “Mí gaan hȩn káḿ o̧n yȩ né; mí kinnɔ né á̧ḿ.” Piɛ́r daa lúú laa ke'emé, ma nɔ́g va̧a̧ hȩ́ȩ́.

⁶⁹ Wakȩ́ȩ́ ba'ad pee duu ho̧go̧, faa o̧d nán ku̵u̵ mbaa wu̵lı̵́ máa vu̵, o̧: “Nán yȩ dɨ sa̧a̧m nán Yesu woo voolı̵́ á̧ḿ.”

⁷⁰ Piɛ́r duu su̵u̵. Zaa máa, nán ku̵u̵ mbaa wu̵lı̵́ yȩ, vu̵ o̧d Piɛ́r: “Moo yȩ́ńne, mɔ́ dɨ sa̧a̧m nán yȩ voolı̵́, moo mɔ́ nán Gáliléeɨ.”

⁷¹ A̧máa Piɛ́r dəŋ hȩn sa̧a̧lȩ́, o̧: “Tayɨɨ a sə̧'ə̧nɔ́! Mí gaan nán kíí o̧n moo woo yȩ né sá̧ḿ.”

⁷² Ma nɔ́g va̧a̧ há̧á̧ hȩ́ȩ́ hȩ́ȩ́lȩ́ do' idú woo. Piɛ́r há̧á̧ dȩ́' moo Yesu ba o̧ddu̵: “Nɔ́g va̧a̧ wú̵ń hȩ́ȩ ná do' idú woo né, mɔ́ń su̵u̵n do' ta̧a̧nɔ́” pee, ma bé' ká̧né.