MOO TO̧O̧ 'MAŊ Ɨ́ LÚG KA BÍŃDA MÁ NƆ 3 - Dii New Testament

Yoohá̧na ı̵́ mam Tayɨɨ wooné pa moo Tayɨɨ woo

¹ Káýzar Tibɛ́r ka waa gbanii ve' wa̧nɓó' zu̵u̵ nɔ́nɔ́ máa, Pó̧ŋ́tí Pilád mbaa woo guvɛrnə́ər dɨ hág Yúúdalı̵́, Heeród waa woo gbanaa hág Gáliléelı̵́, daa nii Filíb waa woo hág Ituríilí kan Taakoníi. Lizanía waa woo hág Abilɛ́nné.

² Ána vu̵ kan Káýfa, vu̵ mbaa voo ı̵́ nii hȩn ha"ı̵́. Sey woo Tayɨɨ o̧d Yoohá̧na Zakaríi waa moo hó̧g kȩŋŋı̵́,

³ ma baa 'yȩm kə̧́ə̧́ daa hág dáŋ́ ziŋ Yu̵ŕdɛnné 'waapád. Baa pa moo o̧: “I gbɔ mbaalı̵́ see víí vu̵, i woo mam Tayɨɨ tée, Tayɨɨ wú̵ń kéé hȩn ɓı̵́d kɔ́lı̵́ víí vu̵ gbɔ la.”

⁴ Kɔ́ kɔ́ ı̵́ ká vu̵ bíńda debtere anábi Esáya woolı̵́ máa wɔgɔ. Ká o̧: “Yɛ́g nánán tóó woo kiy hó̧g kȩŋŋı̵́, o̧: ‘I mbɔ́g hi̧naa ı̵́ 'yɛ́lı̵́ woo ú̵; i zȩȩ hi̧naa waa woo vu̵ u̵u̵ man kííd.

⁵ Ya mbu̵u̵g 'waapád vú̵ń mbíddú. Gu̵u̵ gbo̧o̧ vu̵ kan gu̵u̵ waa vu̵ 'waapád vú̵ń su'uy. Hi̧naa kə̧ə̧g 'waapád vú̵ń líí. Hi̧naa haag vú̵ń mbɔ́gɔy man kííd.

⁶ Tée nán 'waapád vú̵ń ho̧ ı̵́ nán sənné Tayɨɨ ka ba'ad ba ví ya máa.’ ”

⁷ Dúú vu̵ yaa Yoohá̧na woolı̵́, moo a woo bi mam Tayɨɨɨ. Ma o̧d vu̵: “Ɨ́ víí, ı̵́ kɛb, du̵kə́ŋ́ waa vu̵, nóo o̧d ví i kɛ ɗug sə́d hȩn si̧'i̧ní Tayɨɨ woo ka dɨ yaalı̵́ yȩlȩ́lá?

⁸ I gbɔ mbaalı̵́ see víí vu̵, tée i kɔ́ hȩn hí̧í̧lí̧ Tayɨɨ woo nɔ. I o̧ zó̧ó̧ víílí: ‘Aga vɔ́ vóó Ibrahí̧í̧ma aa yée vu̵ yu̵’ sá. Mí o̧d ví, Tayɨɨ a hí̧í̧ tée, wú̵ń tii 'yɛgɛ yɛ vu̵ waa Ibrahí̧í̧ma woo.

⁹ Bə́g mbaa dɨ bə́' moo la' du̵lı̵́ɨ. Moo kóó la' woo ȩná, a liin du̵u̵ na'a né tée, vú̵ń du̵ gbɔgɔ vɛlı̵́.”

¹⁰ Dúú vu̵ baa vígi: “Yee tée, vɔ́ń kɔ́ vóó nɛ́nná?”

¹¹ Hí̧i̧d vu̵: “Nán ka dɨ kan sa̧a̧m idú tée, a pú̵ nán ı̵́ ka 'yɛ́n né máa dágá. Nán ı̵́ ka dɨ kan hȩn lálı̵́ tée, a yȩ' ı̵́ yo̧go̧ á̧ḿ.”

¹² Nán lámba su̵ggı̵́ tóó vu̵ yaa woolı̵́ moo a woo bi mam Tayɨɨ á̧ḿ, vu̵ vigi: “Akaw, yee tée vɔ́ń kɔ́ vóó nɛ́nná?”

¹³ Hí̧i̧d vu̵: “I ɓɛ sɨɨde mba sɨɨde ı̵́ ku̵u̵ o̧d ví i ɓɛ máa sá.”

¹⁴ Só̧ó̧ze tóó vu̵ baa vígi: “Ɨ́ vóó máalá̧? Oo kɔ́ vóó nɛ́nná?” Duu o̧d vu̵: “I vbid nán tóó hȩn sá. I sóowu̵ yúú hȩn woolı̵́ sá. A̧máa zó̧ó̧ víí a ka̧' yúú hȩn ku̵u̵ sú̵ú̵ ví máalȩ́.”

¹⁵ Nán ku̵u̵ laa ı̵́ nán sənné Tayɨɨ woo máa, vu̵ víń zó̧ó̧, vu̵ taa tóó tée Yoohá̧na ba ı̵́ nán sənné pee nɔ.

¹⁶ A̧máa Yoohá̧na baa o̧d vu̵ ya voo 'waapád: “Ɨ́ míí, mí woo ví mam Tayɨɨ kan mamme. A̧máa nán tóó wú̵ń yaa dɨlı̵́. Wu̵ mban néélȩ́. Mí maan míí zaŋ tɛ́gɛ́ woo buuní ní á̧ḿ. Ɨ́ woo wú̵ń woo ví kan yigid Tayɨɨ woo kan veeɨ.

¹⁷ Dɨ kan ɗag yɛɛg nagá. Wú̵ń mbɔ́g kɔɔg woo, wú̵ń su̵g tú̵d woo aa a̧a̧lȩ́. A̧máa tú̵d gu̵u̵g máa, wú̵ń a̧nnɔ kan vee ı̵́ a ním ní má nɔ.”

¹⁸ Yoohá̧na baa zigid dúú vu̵ zó̧ó̧ yúú moo tóó vu̵lı̵́ ɓu̵u̵lı̵́ na'a á̧ḿ. Baa tú'ud vu̵ moo to̧o̧ 'maŋ ı̵́ yo̧go̧.

¹⁹ A̧máa gbanaa Heeród ká éé daa sá̧ŋ́ kȩ́ȩ́ Herodía, ka kɔ́ hȩn ɓı̵́d tóó vu̵ á̧ḿ máa, Yoohá̧na séewu̵.

²⁰ Ma Heeród duu kɔ́ hȩn ɓı̵́d gbo̧o̧ tóó. Ma' Yoohá̧na tú̵' lig púúsinalȩ́.

Yesu woo mam Tayɨɨ

²¹ Nán 'waapád vu̵ woo mam Tayɨɨ. Yesu woo á̧ḿ. Pig woolı̵́, sey Yesu ka dɨd Tayɨɨ moo o̧lȩ́ máa, be' tú̵'ú̵,

²² yigid Tayɨɨ woo sí zu̵u̵ yúú woolı̵́ kɔ́ ı̵́ gbɔkii wɔgɔ. Yɛ́g tóó kiy zu̵u̵ be"ı̵́ o̧: “Móo Waa hí̧í̧lí̧ míí, zó̧ó̧ míí dȩ' yúú móólȩ́.”

Yesu aa yée gbo̧o̧ vu̵u̵ yɛ nɔ

²³ Yesu ka dəŋ ba'ad máa, zaa kan ya̧ ve' vo' ta̧a̧nɔ́ sú̵'ú̵. Vu̵ taa ba waa Yu̵u̵séfu woo nɔ. Yu̵u̵séfu máa, waa Helíi woo nɔ.

²⁴ Helíi waa Mátad woo nɔ. Mátad waa Levíd woo nɔ. Levíd waa Malíki woo nɔ. Malíki waa Yaná woo nɔ. Yaná waa Yu̵u̵séfu woo nɔ.

²⁵ Yu̵u̵séfu waa Matatía woo nɔ. Matatía waa Amós woo nɔ. Amós waa Naahú̧m woo nɔ. Naahú̧m waa Esilíi woo nɔ. Esilíi waa Naagáy woo nɔ.

²⁶ Naagáy waa Máad woo nɔ. Máad waa Matatía woo nɔ. Matatía waa Semáy woo nɔ. Semáy waa Yu̵u̵sɛ́g woo nɔ. Yu̵u̵sɛ́g waa Yóóda woo nɔ.

²⁷ Yóóda waa Yu̵anán woo nɔ. Yu̵anán waa Rééza woo nɔ. Rééza waa Zorobábɛl woo nɔ. Zorobábɛl waa Salatiɛ́l woo nɔ. Salatiɛ́l waa Neríi woo nɔ.

²⁸ Neríi waa Malíki woo nɔ. Malíki waa Adíi woo nɔ. Adíi waa Kósam woo nɔ. Kósam waa Elmadám woo nɔ. Elmadám waa Ɛ́r woo nɔ.

²⁹ Ɛ́r waa Yesu woo nɔ. Yesu waa Elizɛ́r woo nɔ. Elizɛ́r waa Yorím woo nɔ. Yorím waa Mátad woo nɔ. Mátad waa Levíd woo nɔ.

³⁰ Levíd waa Simió̧ŋ woo nɔ. Simió̧ŋ waa Yúúda woo nɔ. Yúúda waa Yu̵u̵séfu woo nɔ. Yu̵u̵séfu waa Yu̵nám woo nɔ. Yu̵nám waa Eliakím woo nɔ.

³¹ Eliakím waa Mɛléa woo nɔ. Mɛléa waa Mɛ́na woo nɔ. Mɛ́na waa Matáta woo nɔ. Matáta waa Natán woo nɔ. Natán waa Daavíd woo nɔ.

³² Daavíd waa Izáy woo nɔ. Izáy waa Yu̵bɛ́d woo nɔ. Yu̵bɛ́d waa Bowáa woo nɔ. Bowáa waa Salmɔ́ŋ woo nɔ. Salmɔ́ŋ waa Naáso̧ŋ woo nɔ.

³³ Naáso̧ŋ waa Aminadáb woo nɔ. Aminadáb waa Admín woo nɔ. Admín waa Aaníi woo nɔ. Aaníi waa Ɛslóm woo nɔ. Ɛslóm waa Falée woo nɔ. Falée waa Yúúda woo nɔ.

³⁴ Yúúda waa Yaakúbu woo nɔ. Yaakúbu waa Iizág woo nɔ. Iizág waa Ibrahí̧í̧ma woo nɔ. Ibrahí̧í̧ma waa Teerág woo nɔ. Teerág waa Nakɔ́r woo nɔ.

³⁵ Nakɔ́r waa Serúg woo nɔ. Serúg waa Ragáw woo nɔ. Ragáw waa Falɛ́g woo nɔ. Falɛ́g waa Ɛbɛ́r woo nɔ. Ɛbɛ́r waa Salá woo nɔ.

³⁶ Salá waa Káýnam woo nɔ. Káýnam waa Alfasád woo nɔ. Alfasád waa Sɛ́m woo nɔ. Sɛ́m waa Núúhu̧ woo nɔ. Núúhu̧ waa Lamɛ́s woo nɔ.

³⁷ Lamɛ́s waa Matusála woo nɔ. Matusála waa Enóg woo nɔ. Enóg waa Yarɛ́d woo nɔ. Yarɛ́d waa Malelɛ́l woo nɔ. Malelɛ́l waa Káýnan woo nɔ.

³⁸ Káýnan waa Enós woo nɔ. Enós waa Sɛ́d woo nɔ. Sɛ́d waa Adamú woo nɔ. Adamú waa Tayɨɨ woo nɔ.