NÁN ƐFƐ́ƐZ VɄ 2 - Dii New Testament

Tayɨɨ pú̵ ba ví vágád Krístu woolı̵́

¹ Ví á̧ḿ, ká ví mbaa kɔ́ ı̵́ nɔm vu̵ wɔgɔ, moo kíí duun dooká Tayɨɨ woo vu̵ né, kíí kɔ́ hȩn vu̵ sɔd má nɔ.

² Ká ví baa kɔ́ hȩn tóó vu̵ kɔ́ ı̵́ nán hágá yɛ ku̵u̵ dɨ kɔ́lı̵́ yɛ wɔgɔ. Ví duu Seeɗán, wu̵ gbanaa yigid ɓı̵́d ku̵u̵ dɨ be"ı̵́ máa voo. Wu̵ yigid ı̵́ ka kɔ́ ba'ad nán tɔ́g ŋgó̧ó̧lȩ́ voolı̵́ zó̧ó̧lȩ́ máa voo á̧ḿ.

³ Ká ba sú̵g kɔ́ ví hȩn yȩ vu̵ á̧ḿ, ba ví 'waapád, ba kɔ́ ví hȩn hí̧í̧lí̧ fó̧ó̧ baa ví voo, ba duu ví hȩn hí̧í̧lí̧ fó̧ó̧ baa ví voo kan zó̧ó̧ baa ví voo vu̵ á̧ḿ. Vu̵ ha̧a̧ ba ví nán ɓı̵́d vu̵ kɔ́ ı̵́ nán tóó vu̵ wɔgɔ á̧ḿ; maa Tayɨɨ a si̧'i̧d ba ví ú.

⁴ A̧máa Tayɨɨ dɨ woo kan zó̧ó̧ nán gbo̧o̧, kan hí̧í̧lí̧ gbo̧o̧ ka hí̧i̧n ba ví wu̵lı̵́ yȩ nɔ,

⁵ ma sey ká kaa mbaa ví nɔmná, moo kaa sɔd ví dooká Tayɨɨ woo vu̵ yȩ, Tayɨɨ duu su̵g vágád pú̵ ba ví kan Krístu á̧ḿ yɔ. Ví sə́d sı̵́ yúú zó̧ó̧ nán woolı̵́ ú̵!

⁶ Tayɨɨ su̵g nim ba ví nɔmmé kan Yesu Krístu á̧ḿ, duu su̵g 'yɛ́ ba ví be"ı̵́ á̧ḿ,

⁷ moo bi tú' zó̧ó̧ nán gbo̧o̧ woo ka kɔ́d ba ví yúú Yesu Krístu woolı̵́ sey hág a dɨ yaalı̵́ káákáá yȩlȩ́.

⁸ Yúú zó̧ó̧ 'yɛ́lı̵́ víílí máa, ví sə́d sı̵́ kan zó̧ó̧ nán Tayɨɨ woo ú̵. A̧máa ví nugun sə́nné yȩ kan ba'ad víí nu né á̧ḿ, Tayɨɨ wu̵ pú̵ ví leená.

⁹ Ví nugun moo ba'ad víí vu̵ yu̵ né, moo nán tóó a na' yúú woo wu̵lı̵́ sá.

¹⁰ Tayɨɨ wu̵ mbɔ́g ba ví, yɨb ba ví yúú Yesu Krístu woolı̵́, moo aa kɔ́ ví ba'ad du̵u̵ vu̵ yu̵. Tayɨɨ dəŋ mbɔ́g hȩn du̵u̵ yȩ vu̵ moo aa kɔ́ vu̵ ví ú.

Nán vu̵ sú̵gú̵n dágá Krístu woolı̵́

¹¹ Ɨ́ víí, kíí zig Yúúda pɛ́lı̵́ yȩ, i duu taa mbaalı̵́ víí ká tíŋ́ má nɔ. Nán Yúúda vu̵ o̧ ba bin “nán do̧ŋ dɔ́lı̵́ vu̵ yu̵,” ma vu̵ bee ví víí “zaga vu̵ yu̵.” Do̧ŋ dɔ́lı̵́ ı̵́ yȩ vu̵ kɔ́ kan nag voo nɔ.

¹² Ká sey woolı̵́ máa, ká ví kan Krístu pɛ́lı̵́. Ká ví waa Izraɛ́l vu̵ yu̵ pɛ́lı̵́, ví waa ya̧g talı̵́ Tayɨɨ woo vu̵ yu̵ pɛ́lı̵́ á̧ḿ. Ví kan moo tóó vín 'yɛ́ zó̧ó̧ Tayɨɨ woolı̵́ wu̵lı̵́ pɛ́lı̵́, ví kan Tayɨɨ hágá yɛlı̵́ pɛ́lı̵́ á̧ḿ.

¹³ A̧máa 'ya̧'a̧ yɛ ví sı̵́ nán Krístu woo vu̵ yu̵. Ɨ́ víí ká kíí mbaa ɗiilí na'a kan Tayɨɨ yȩ, ví séé ya sı̵́ woolı̵́ bə́' yúú nɔm Krístu woolı̵́ ú̵.

¹⁴ Krístu wu̵ mbɔ́g to̧nné baa ví kan Tayɨɨ. Wu̵ su̵gu̵n zig Yúúda vu̵, kan zig tóó vu̵, moo u̵u̵ tii zig dágá. Tum gbuŋgbuŋ ka big vu̵, ku̵u̵ to̧n né pee kan fó̧ó̧ woo sú̵'ú̵.

¹⁵ Krístu na'ad dooká nán Yúúda voo vu̵ 'waa la, kan moo palı̵́ voo vu̵ á̧ḿ, moo bi su̵g nán Yúúda vu̵ kan zig tóó vu̵, u̵u̵ tii zig dágá, u̵u̵ mbaa nán 'maŋ vu̵ yu̵. Mbɔ́g moo to̧o̧g woo ı̵́ yo̧go̧.

¹⁶ Krístu su̵gu̵n zig vu̵, vu̵ tii fó̧ó̧ dágá, kɔ́ vu̵ to̧n kan Tayɨɨ yúú nɔm Krístu woo la' vbagadı̵́ yȩlȩ́. Tud hȩn maag voo vu̵ gbɔ yúú nɔm woolı̵́.

¹⁷ Dɨ ı̵́ yo̧go̧, Krístu ya pa moo to̧o̧g yȩ, pad nán Yúúda ku̵u̵ mbaa bə́' kan Tayɨɨ, kan zig tóó ku̵u̵ mbaa ɗii kannɔ máa vu̵ yu̵ á̧ḿ.

¹⁸ Moo woo nɔ, nán Yúúda vu̵ kan nán ku̵u̵ Yúúda pɛ́lı̵́ máa vu̵ á̧ḿ, ba sú̵g nuŋ ví néélȩ́ yúú Krístu woolı̵́ ma, ba séé ví la tíŋ́ Ba'á Tayɨɨ woolı̵́ kan yigid woo dágá yȩ nɔ.

¹⁹ Moo woo nɔ ma, ví sı̵́ gááɨ pɛ́lı̵́. Ví duu mbaan sı̵́ waa hág tóó woo vu̵ yu̵ né. A̧máa ví dɔ́ sı̵́ zig nán Tayɨɨ woo voolı̵́, ví sı̵́ waa lig Tayɨɨ woo vu̵ yu̵!

²⁰ Ví mbaa kɔ́ ı̵́ lig ku̵u̵ yo̧o̧ máa wɔgɔ. Vu̵ ha' ví dɨ yúú lig do̧o̧ sú̵u̵lı̵́; lig do̧o̧ sú̵u̵ wu̵ waa ba'ad Yesu woo vu̵, kan anábi vu̵ yu̵. 'Yɛgɛ ndam woo wu̵ Yesu Krístu wu̵.

²¹ Hȩn yo̧o̧lȩ́ 'waapád vu̵ há'ay dɨ Krístu woolı̵́, ma vu̵ na', vu̵ tii lig ı̵́ 'yɛ́lı̵́ baa ví woo.

²² Ví á̧ḿ, ví sú̵gú̵n kan Krístu, ví tii ka' lig Tayɨɨ woo kan nán tóó vu̵ á̧ḿ. Tayɨɨ mbaa dɨ lig yȩlȩ́ kan yigid woo á̧ḿ.