हिब्रु 8 - Dhimal NT

येसु नावा कारारको केलाइको प्रधान पुजारि

¹ एला केलाइ दोअ्लि खाङका काथा चाहि इदोइ दोङ हि: केलाइको बुङ इसिका प्राधान पुजारि हि, जाइ स्वर्गता माहान परमेस्वरको सिङहासनको दाम्पाहा भारि झाउका साम्मानको थामेता बिराजमान हि।

² केलाइको प्रधान पुजारि स्वर्गता हिका माहा पबित्तरो थामेता सेवा पाखे, इङको सत्ये खोपारा द्‍याङगेलाइको माको, भरु परमेस्वर दोङ बानाइका हि।

³ गोताङ प्राधान पुजारि पाप स्यामाको भाअ्सिङ भेति कालाउ भोग पिलि नियुक्ति जेङका हिखे, ओदोङ भाअ्सिङ केलाइको प्राधान पुजारि येसु बुङ परमेस्वरहेङ हाइ दोङ पिलि आवस्यक हि।

⁴ जेसापा वा दोङ इदोइ सुमिङताङ हिका नुते वा पुजारि दोङ माजेङधाङ, हाइपालिपानु मोसाको व्यवस्था बमोजिम भेति चढाइका पुजारिगेलाइते हिदोङ हि।

⁵ इदोइ पुजारिगेलाइ पाका काम स्वर्गिता हिका काथाको नक्कल कालाउ स्याइरि खिनिङ हि, कालाउ स्वर्गता हिका भाइका माको, हाइपालिपानु मोसा पबित्तरो खोपारा बानाइलि खाङलाउ परमेस्वर मोसाहेङ या खबरदारि पाका हिघाहि, “रा नासेहेङ तिङपाका नामुना बमोजिम नाअ् गोताङ आनेमाने बानाइ।”

⁶ कालाउ येसु केलाइको प्राधान पुजारिहेङ पिका पुजारिको काम, इङको आरु प्राधान पुजारिको काम खान्तेङ आझाइ हेन्जा बारका हि, हाइपालिपानु वा जेदोङ कारारको मध्यस्ता पाका हि, इङको पुर्ना कारार खान्तेङ आसल हि कालाउ आसल काथागेलाइको प्रतिग्याता आधारित हि।

⁷ हाइपालिपानु लाम्फाको कारार दाग माकोसिङ हिका हिनुते न्हेतेङ कारारको खाचो माजेङधावा।

⁸ कालाउ परमेस्वर द्‍याङगेलाइको दुसिका तिङतेङ वा दोअ्खे, परमप्रभु दोअ्खे, इङको दिना ल्वाङ जेलाउ इस्राएल जातिको द्‍याङगेलाइ दोफा कालाउ यहुदा जातिको द्‍याङगेलाइ दोफा, का एनोङ नावा कारार धेवाङका।

⁹ इदोइ कारार चाहि नेलाइको पुर्खागेलाइ दोफा काङको धेउका भाइका माजेनाङ, इङको बेला तेका खुर चाअ्तेङ नेलाइहेङ मिस्रो सारभिसो ओल्लेपाका हिघाखा। परमप्रभु दोअ्खे, का नेलाइ दोफा धेउका कारार इम्बालाइ माकेम्हि। ओदोङ भाअ्सिङ का इम्बालाइको वास्ता मापाघा।

¹⁰ परमप्रभु दोअ्खे, इसिका सोमोइ ल्वाङ, का इस्राएलको द्‍याङगेलाइ दोफा इदोइ कारार जिनाङका, का इम्बालाइहेङ काङको व्यवस्थाको बारेता सोचिका बानाइ याङका, कालाउ इम्बालाइ इङकोहेङ ताइको ह्रदयता ताअ्तावा, कालाउ का इम्बालाइको आराधाना पाका परमेस्वर जेनाङका, कालाउ इम्बालाइ काङको द्‍याङगेलाइ जेनावा।

¹¹ “परमप्रभुहेङ नाल्सु, दोअ्तेङ एला उसो हिदोइ बुङ द्‍याङ ताइको यहुदि ओनेहेङ, माकुनु ताइकोगेलाइहेङ माधिर्पाङ, हाइपालिपानु म्हुइकासो कालाउ बा-बार्का थेकापा झाराङ, का इम्बालाइको परमेस्वर दोङ हिघा दोअ्तेङ नालावा।

¹² का इम्बालाइको पाप स्यामा पाप्याङका, कालाउ इम्बालाइको पाप आरोङ हेलाउ बुङ फोम मापाङका।”

¹³ एसापा परमेस्वर इदोइहेङ नावा कारार दोअ्का हि, ओदोङ भाअ्सिङ वा लाङ कारारहेङ पुर्ना कारार बानाइहि। कालाउ जेदोङ चाहि पुर्ना थोअ्तेरे जेङतेङ हानिखे कालाउ इङको धेमाङ नासातेङ हानावा।