1 कोरिन्थि 2 - Dhimal NT

क्रुस्टता बलिदान जेङका ख्रिस्ट

¹ खान्धुराइ ओनेगेलाइ, जेलाउ का नेलाइकोता लोघा का नेलाइहेङ परमेस्वरको सन्‍देस दोअ्लाउ का बा-बार्का काथागेलाइ मापाघा कालाउ बुद्दिमानि जेङलि माभोघा।

² हाइपालिपानु का नेलाइ दोफा हिलाउ येसु ख्रिस्ट कालाउ वासेहेङ क्रुसता ताङगाइतेङ सिका काथा बाहेक आरु हाइ दोङ काथा मागिका का थानिका हिघाखा।

³ जेलाउ का नेलाइकोता लोघा, का मुइमुइतेङ कालाउ थितेङ फिरतेङ हिघाखा।

⁴ काङको सिक्स्या कालाउ उपदेस मानिमुइ बुद्दि भाइका मान्थुघाखे, कालाउ पबित्तरो आत्माको सरबुङसो नेलाइहेङ काङको दोअ्का सन्‍देस सत्ये तिङपा पिहि।

⁵ कालाउकि नेलाइको खाङधुरि द्‍याङको बुद्दिता माको, कालाउ परमेस्वरको सरबुङता आधारित ह्याको।

पबित्तरो आत्माको ग्यान

⁶ कालाउ बुङ परिपक्का खान्धुराइगेलाइको माझाता केलाइ बुद्दिको काथा पानाखे, कालाउ सुमिङको द्‍याङगेलाइको बुद्दि माको, ना ते इदोइ सुमिङको सासकगेलाइको बुद्दि भाइपा, जेदोङ नासातेङ हानावा।

⁷ कालाउ केलाइ परमेस्वरको म्होनाका ग्यान कालाउ बुद्दिको काथा पानाखे। जेदोङ आझाइ थेकापा हासुहेङ बुङ थाहा मान्थु, परमेस्वर केलाइको साम्मानको भाअ्सिङ सुमिङ सिरजाइन्हाका खान्तेङ लाम्फा थोहोराइका हिघाहि।

⁸ कालाउ इदोइ सुमिङको हिदोइ बुङ सासकगेलाइ इङको परमेस्वरको योजानाको काथा माबुझिहि। हाइपालिपानु जेसापा इम्बालाइ बुझिकानु महिमाको प्रभुहेङ क्रुस्टता तोइतेङ माअ्सेधावा।

⁹ जेसाङ धर्मसास्तरता लेखेका हि, “हिदोइ बुङ द्‍याङ हेलाउ बुङ मातिङका, कालाउ हासु बुङ माहिङका, हासु बुङ मासोचेका काथा दोङ परमेस्वर ताइमिहेङ प्रेम पाकालाइको भाअ्सिङ तियार पाका हि।”

¹⁰ हाइपालिपानु हिदोइ बुङ काथा पबित्तरो आत्मासो म्होन्हाका मान्थु, वा दोङ गोताङ काथा भोखे इता थेकापा परमेस्वरको उदेस्यगेलाइ जेदोङ द्‍याङगेलाइहेङ एला थेकापा बुङ थाहा मान्थु।

¹¹ हासुहेङ बुङ थाहा मान्थु कि, भेनेङ द्‍याङ हाइ बिचार पादोङखे, वा खिनिङ गिखे, कालाउ हासु बुङ परमेस्वरको बिचार बुझिलि मादोखे, परमेस्वरको आत्माहोइ खिनिङ इङको गिखे।

¹² केलाइ सुमिङको बो द्‍याङगेलाइ भाइपा माहाङन्हाखे कालाउ केलाइहेङ परमेस्वर दोङ पिका बरदानगेलाइ बुझिलि द्वाको दोअ्तेङ परमेस्वर केलाइहेङ पबित्तरो आत्मा पिका हि।

¹³ जेदोङ काथा केलाइ धुइनाखे, इङको काथागेलाइ द्‍याङको बुद्दिहोइ धिर्पाका काथा माको, कालाउ पबित्तरो आत्माहोइ धिर्पाका काथागेलाइ दोङ दोअ्नाखे कालाउ पबित्तरो आत्मासोङ इङको आत्मिक काथागेलाइको आर्था बुझाइ पानाखे।

¹⁴ जेदोङ द्‍याङता पबित्तरो आत्मा मान्थु, वा पबित्तरो आत्मासो लोका सिक्स्यागेलाइ सुइकार मापाखे। हाइपालिपानु इङको काथागेलाइ वाको भाअ्सिङ मुर्ख काथा हि। वा इङको काथागेलाइ बुझिलि मादोखे हाइपालिपानु इङको काथागेलाइ पबित्तरो आत्मा खिनिङ द्‍याङगेलाइहेङ बुझिपालि दोअ्खे।

¹⁵ पबित्तरो आत्मा हिका द्‍याङ इङको गोताङ काथागेलाइ बुझिलि दोअ्खे। कालाउ पबित्तरो आत्मा मान्थुका द्‍याङ, पबित्तरो आत्मा हिका द्‍याङको बिचार बुझिलि मादोखे।

¹⁶ इदोइ सत्ये हि, हाइपालिपानु धर्मसास्तरता लेखेका हि, “हासु बुङ प्रभुको मनता हाइ हि थाहा मानिङखे, कालाउ हासु बुङ वासेहेङ धिरपालि मादोअ्खे।” भरु केलाइ खान्धुराइगेलाइ येसु ख्रिस्टको मनता हाइ हि इङको बुझिलि द्वाङ।